E Mafai Faapefea Ona Faaitiitia le Lamatiaga?

O LE faamaʻi o ālatoto po o le coronary artery disease (CAD) e fesootai atu i ni vala e pei o le tupuaga, le siosiomaga, ma le ituaiga o olaga o ola ai. O le punitia o ālatoto ma le pē faafuasei o le fatu e mafai ona māfua mai le tele o ni tausaga o iai pea ia lamatiaga e fesootai ma se tasi o nei vala po o nei foi vala uma.

Le Matua, le Ituaiga, ma le Gafa e Tupuga Mai Ai

O le faasolo ina matua i tausaga o le faateleina foi lea o le lamatiaga i le pē faafuasei o le fatu. E tusa ma le 55 pasene o le pē faafuasei o le fatu ua aafia ai tagata e silia i le 65 tausaga le matutua. Pe tusa o le 80 pasene o i latou ua maliliu i le pē faafuasei o le fatu o i latou ia ua taʻi 65 tausaga pe sili atu lo latou matutua.

O tamaloloa i lalo ifo o le 50 tausaga le matutua e sili atu ona iai i se tulaga lamatia nai lo fafine o loo iai i tausaga na. Pe a oo ina muta le tulaga faafanautama o se fafine, e faateleina ona lamatiaga ona ua tele se faaitiitia o le puipuiga mai le homone estrogen. E tusa ai o nisi faatusatusaga, o le togafitiga e toe tuu lea homone i le tino atonu e feoloolo mai ai le lamatia i le faamaʻi fatu o fafine i se faatatauga e 40 pasene pe sili atu, e ui atonu e faateleina ai le lamatiaga i le kanesa.

E mafai foi ona iai se vaega tele e māfua i le gafa e tupuga mai ai. O i latou sa oo i o latou mātua le pē faafuasei o le fatu a o lei oo ina taʻi 50 tausaga e iai se lamatiaga tele o le oo i lena mea. E tusa lava pe na faatoʻā aafia mātua i le pē faafuasei o le fatu ina ua mavae le 50 tausaga, ae iai lava se lamatiaga tele. Pe afai e iai se talaaga o le aiga i le maʻi fatu, e ono mafai la ona aafia foi le fanau i nei lava faafitauli.

Le Vaega e Faia e le Cholesterol

O le cholesterol, o se ituaiga o mea faasuavaia (lipid), e manaomia tele mo le ola. E faatupuina e le ate, ona feaveai atu lea e le toto i sela, i vaega ninii e taʻua o lipoproteins. E lua ituaiga o lipoproteins, o lipoproteins e itiiti le malosi (low-density) (LDL cholesterol) ma lipoproteins e sili atu le malosi (high-density) (HDL cholesterol). E avea le cholesterol o se lamatiaga mo le faamaʻi o ālatoto (CAD) pe a tele le LDL cholesterol e toʻa i le toto.

Ua talitonuina le faia e le HDL cholesterol o se vaega tau puipuiga e ala i le aveesea o cholesterol mai tisu ma toe faafoi atu i le ate, o iina e toe suia ma aveesea ai mai le tino. Afai e faia suesuega ma iloa ai ua maualuga le LDL cholesterol ae maulalo le HDL cholesterol, lona uiga ua telē se lamatiaga o le maʻi fatu. O le faaitiitia o le tele o le LDL cholesterol e mafai ona matuā faaitiitia ai se tulaga lamatia. O fua tatau o meaʻai o se vala autū lea i togafitiga, ma e aogā foi le faia o faamalositino. E mafai e ni fualaau ona maua ai ni iuga lelei, ae o nisi fualaau e iai ni aafiaga lē lelei i se taimi mulimuli ane.a

E fautuaina se fua paleni o meataumafa e itiiti le cholesterol ma mea lololo o iai. O le aumai o meaʻai e itiiti le lololo, e pei o le canola oil po o le olive oil, e suia ai meaʻai e tele le lololo e pei o le pata, e mafai ai ona faaitiitia le LDL cholesterol ae faasaoina ai pea le HDL cholesterol. I le isi itu, ua taʻu mai e le American Journal of Public Health e faapea, o hydrogenated vegetable oil, po o partially hydrogenated vegetable oils o loo maua i le tele o margarine ma mea o loo iai gaʻo e faafefete ai meaʻai, e mafai ona tupu tele ai le LDL cholesterol ae faaitiitia ai le HDL cholesterol. E fautuaina foi le faaitiitia o le taumafaina o aano o manufasi o loo tele ai mealololo ae taumafa ni fasi moa po o fasi pīpī e itiiti mealololo e maua ai.

Ua faaalia i suesuega e faapea o le vaitamini E, beta-carotene, ma le vaitamini C, e mafai ona faaitiitia ai le vaega gaʻoa o loo i ālatoto o manu. Na faapea mai le suesuega, e mafai foi e nei mea ona faaitiitia ai le oo ina pē faafuasei fatu o tagata. O le taumafaina i aso taitasi o fualaau faasua ma fualaau taumafamata o loo tele ai le beta-carotene ma isi carotenoid ma le vaitamini C, e pei o tamato, o fualaau faasua e lanu meamata o latou lau, pepa faasua, karoti, umala, ma meleni, e mafai ona maua ai se isi puipuiga mai le CAD.

Ua taʻua foi le aogā o le vaitamini B₆ ma le magnesium (e maua mai faʻi pula, susu, sisi, pata). O saito lelei (whole grains) e pei o karite (barley) ma oats faapea ma fatupī, lentils, ma nisi ituaiga o fatulaau e ʻaina (seeds ma nuts) e mafai foi ona aogā. E lē gata i lea, ua ioeina e faapea o le taumafaina pe faalua i le vaiaso o iʻa e pei o samani, atule, po o tuna, e mafai ona faaitiitia ai le lamatiaga o le ono maua i le CAD, auā o iʻa nei o loo tele ai le acid e taʻua o le omega-3 polyunsaturated fatty acids.

Se Olaga e Seāseā Gaoioi

O tagata e seāseā gaoioi e telē se lamatiaga o le ono pē faafuasei o le fatu. O le tele o taimi o le aso e lē tāitai ona faagaoioia o latou tino ma e seāseā faia ni faamalositino. O le pē faafuasei o le fatu e masani ona tupu i nei tagata pe a faatoʻā uma ona latou faia ni gaoioiga ua matuā alu ai le malosi, e pei o le galue mamafa i le faia o se togalaau, tamoemoe solo, siiina o ni mea mamafa, po o le suaina o se palapala. Ae e faaitiitia le lamatiaga ia i latou e faifai pea a latou faamalositino.

O le savali tiotio mo le 20 i le 30 minute pe faatolu pe faafa i le vaiaso e mafai ona faaitiitia ai le lamatiaga o le pē faafuasei o le fatu. O faamalositino e faia e lē aunoa e faaleleia atili ai le mafai e le fatu ona pamuina le toto, e aogā e faaitiitia ai le lapoa o le tino, ma faaitiitia ai le tele o le cholesterol ma maulalo ai le toto.

Maualuga le Toto, Mamafa le Tino, ma Maʻi Suka

O le maualuga o le toto (hypertension) e ono faaleagaina ai ālatoto ma mafai ai e le LDL cholesterol ona ulu atu i ālatoto ma atili ai ona tuputupu aʻe le plaque. A o faateleina le toʻa o le plaque, o le a atili ai ona punitia le fetafeai o le toto ma maualuga ai le oso aʻe o le toto.

E tatau ona siaki e lē aunoa le fua o le toto, auā atonu e lē mafai ona iloa atu i fafo ni faailoilo o se faafitauli. Mo faaitiitiga taitasi uma (one-point reduction) i le malosi o loo mālōlō ai le tātā o le fatu (le numera pito i lalo), o le faaitiitia foi lea i le 2 i le 3 pasene o le lamatiaga i se pē faafuasei o le fatu. E mafai ona aogā ni fualaau e faaitiitia ai le toto maualuga. O le paleni o le fuaina o meaʻai, ma le faaeteete o le ʻai masima, faatasi ai ma le faifai pea o faamalositino e faalusi ai le tino, e mafai ona aogā e pulea lelei ai le oso maualuga o le toto.

O le tele o le mamafa o le tino e faateleina ai le toto maualuga ma āuga e lē masani ai i le lipid. O le alofia po o le togafitia o le tele o le gaʻo i totonu o le tino o se laasaga muamua lea i le puipuia o le maua i le maʻi suka. E faateleina e le maʻi suka le CAD ma atili lamatia ai i le pē faafuasei o le fatu.

Le Ulaula

O le ulaula tapaa o se vala malosi lea i le faatupuina aʻe o le CAD. I le Iunaite Setete, ua avea ai o se aafiaga tuusaʻo mo le tusa ma le 20 pasene o oti uma e māfua mai le maʻi fatu, ma le toetoe 50 pasene o le pē faafuasei o le fatu i fafine i lalo ifo i le 55 tausaga le matutua. O le ulaula tapaa e faateleina ai le toto maualuga ma avatu ai vailaau oona, e pei o le nicotine ma le carbon monoxide, i totonu o ālatoto. O le iuga, o vailaau nei e faaleagaina ai ālatoto.

Ua faaaafia foi e tagata ulaula isi o loo mānavaina asu o tapaa i se tulaga lamatia. Ua faaalia mai i suesuega e faapea o tagata e lē ulaula ae o loo nonofo faatasi ma ē ulaula ua telē so latou lamatiaga i le pē faafuasei o le fatu. O lea, e mafai e le tagata ona faaitiitia lona lava lamatiaga e ala i le taofi o lana ulaula, ma mafai ai ona faasaoina ola o ē pele ia te ia e lē o ulaula.

Mafatiaga

Pe a fetaiai ma ni mafatiaga matuitui o faalogona ootia po o le mafaufau, e sili atu ona telē se lamatiaga o le pē faafuasei o le fatu ma oti ai e fesagai ma i latou o loo aafia i le CAD, nai lo o tagata o loo maloloina o latou ālatoto. E tusa ai ma se tasi suesuega, o mafatiaga e mafai ona vāiti pe pipii faatasi ai ni ālatoto o loo tele ai plaque, ma o lenei mea e faaitiitia ai le fegasoloai o le toto i se itiiti e tusa ma le 27 pasene. Ua vaaia ni aafiaga tetele faapena e oo lava i ālatoto e lē o matuā aafia tele. O se isi suesuega na taʻua mai ai faapea o mafatiaga tetele e mafai ona faatupu aʻe ai se vaega e māfua ai ona motusi le plaque i totonu o ālatoto, ma faapogaia ai le pē faafuasei o le fatu.

Ua faapea mai le Consumer Reports on Health: “O nisi tagata e foliga mai e ese le lē lelei o o latou uiga faaalia i o latou olaga. E ia i latou uiga faitio, e feita, ma maʻaleʻalegofie. A o taumafai le toatele o tagata e faagalo ni mea e lē matuia tele, ae o tagata lotoa e vave lava ona oso aʻe o latou lagona ita.” O le ita faifai pea ma lagona lotoa e maualuga ai le toto, e faatatope ai le tātā o le fatu, ma māfua ai ona uunai atu e le ate le cholesterol i totonu o ālatoto. O lenei mea e faaleagaina ai coronary arteries ma māfua ai le CAD. Ua ioeina faapea o le ita e faaluaina ai le lamatiaga i le pē faafuasei o le fatu, ma e tumau pea lenei lamatiaga a itiiti mai e lua itula. O le ā se fesoasoani e mafai i ai?

I le New York Times, na faapea mai ai Dr. Murray Mittleman, o tagata o ē taumafai e toafilemu pea a o fesagai ma ni mafatiaga i faalogona atonu e mafai ona faaitiitia lo latou lamatiaga i le pē faafuasei o le fatu. Ua toetoe lava tutusa lenei manatu ma upu o loo faamauina i le Tusi Paia i le tele o senituri ua mavae: “O le loto lelei, o le ola lea o le tino.”—Faataoto 14:30.

Sa iloa e le aposetolo o Paulo pe faapeī le iai i mafatiaga. Sa ia tautala e faatatau i popolega sa omia ai o ia i aso taitasi. (2 Korinito 11:24-28) Peitai na tofo o ia i le fesoasoani mai le Atua ma tusi mai ai: “Aua neʻi popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.”—Filipi 4:6, 7.

E ui e iai isi vala e fesootai atu i faafitauli o le fatu, ae o vala ua talanoaina iinei e mafai ona fesoasoani e iloa ai le lamatiaga, ina ia mafai e se tagata ona faia ni gaoioiga talafeagai. Peitai, o nisi ua tau mānatu pe faapeī tulaga o mea mo i latou o ē atonu e toe laveaiina mai ma ni āuga o se pē faafuasei o le fatu. O le ā le tele o se toe malosi e ono mafai?

[Faaopoopoga i lalo]

[Ata i le itulau 17]

O le ulaula, le itaita gofie, le ʻai mealololo, ma le ola i se olaga e seāseā gaoioi, e faateleina ai le lamatiaga mo le pē faafuasei o le fatu