Tagata Matitiva

Pe e alofa mai le Atua i tagata matitiva?

“Ia aunoa o outou olaga ma le manaʻo tele i tupe . . . Auā na fetalai [le Atua]: ʻOu te lē tuua lava oe, ma ou te lē tuulafoaʻia lava oe.’”​—Eperu 13:5.

E ALOFA MAI LE ATUA.

E tele auala e faaalia mai ai e Ieova le Atua lona alofa i ana auauna pe a feagai ma ni faigatā. O se tasi o auala o le lagolagosua a uso Kerisiano.a Ua faapea mai le Iakopo 1:27: “O le tapuaʻiga lenei e mamā ma lē taʻuleagaina i le silafaga a le Atua lo tatou Tamā: ia tausi i tamaiti ua mātua oti ma fafine ua oti a latou tane i taimi o o latou puapuaga.”

O se faataʻitaʻiga, ina ua valoia le iai o se oge tele i Iutaia i le uluaʻi senituri, sa gaoioi loa Kerisiano i Anetioka i Suria ina ia “aauina atu se fesoasoani i uso o loo nonofo i Iutaia.” (Galuega 11:28-30) O le iʻuga, e lē gata sa maua e na uso mea na latou manaʻomia, ae ua faaalia ai foʻi i na foaʻi le alofa faa-Kerisiano.​—1 Ioane 3:18.

O le ā e mafai ona faia e le tagata mativa ina ia faaleleia ai lona tulaga?

“O aʻu o Ieova, lou Atua, o Lē o loo aʻoaʻo oe i mea e aogā iā te oe.”​—Isaia 48:17, 18.

FESOASOANI MAI LE ATUA.

Ua iloa e le faitau miliona o tagata le aogā o le atamai mai i le Tusi Paia i le taʻitaʻia o o latou olaga. Ua faapea mai le Faataoto 2:6, 7: “O Ieova e na te foaʻi mai le atamai; e mai i lona fofoga foʻi le poto ma le faautaga loloto. E na te teua le atamai aogā mo ē e amio saʻo.” O le saʻilia ma le faatatauina o lenā atamai ua latou maua ai aogā.

O se faaaʻoaʻoga, ua latou ʻalofia masaniga leaga, e pei o le faaaogā sesē o fualaau faasāina ma le ʻava malosi. (2 Korinito 7:1) Ua avea ai i latou o ni tagata faigaluega faamaoni, faatuatuaina, ma aogā. Ua faapea mai le Efeso 4:28: “O lē e gaoi, aua neʻi toe gaoi, a ia galue mamafa o ia, . . . ina ia mafai ai ona ia avatu ni mea i se tagata mativa.”

Pe e iai ni faamaoniga e aogā le atamai o le Tusi Paia?

“E taʻuamiotonuina le atamai o le Atua i iʻuga lelei.”​—Mataio 11:19, The New English Bible.

FAAMAONIGA MA IʻUGA LELEI.

O Uilisone o se tagata o loo nofo i Ghana. I lona aso mulimuli i lana galuega lē tumau, sa ia fufuluina ai le taavale a lona pule ma ia maua ai se tupe. Na faapea atu le isi tagata e maualuga i le galuega iā Uilisone e ave ma ia le tupe, ae sa musu ona o ia o se Molimau a Ieova. O lea sa ia faafoʻi atu ai le tupe, ma na mulimuli ane faigaluega tumau ai i inā, ma na siitia foʻi lona tulaga.

I Falani, sa tuli ai Géraldine mai i lana galuega ona e lē fiafia lona pule i Molimau a Ieova. Peitaʻi, sa fai atu le tinā o le pule i lana tama ua matuā sesē lana mea ua fai, ma faapea atu: “E na o Molimau a Ieova e te maua ai tagata faigaluega e maufaatuatuaina ma galue mamafa.” O lea na faia ai ni suʻesuʻega a le pule e uiga i Molimau a Ieova, ma sa toe maua ai e Géraldine lana galuega.

O Sara o se tinā nofo toʻatasi i Aferika i Saute. A o feagai o ia ma faigatā, sa ia vaaia ai le auala e uunaʻia ai e le atamai o le Tusi Paia tagata ina ia faaalia le alofa. Sa ia mātauina le fesoasoani atu o lana faapotopotoga i lona aiga pe a manaʻomia ni meaʻai, pe e momoli foʻi i latou i se mea. Na faapea mai lana fanau: “Sa matuā toʻatele o matou mātua i totonu o le faapotopotoga.”

E tele foʻi isi tala faapena. Maʻeu la le moni o upu o loo i le Faataoto 1:33: “A o lē e faalogo mai iā te aʻu [Ieova], o le a saogalemu.”