MATAUPU AUTŪ

Faaiʻuina Sauāga i Aiga

Vaaiga 1: O loo asiasi mai mātua o Isapela.a O loo latou talanoa fiafia i le afiafi faatasi ma le la tama teine ma lona toʻalua. E alofa tele le toʻalua o le teine iā te ia. O ai se matua o le a lē fiafia i lenei tamāloa ua faaipoipo i ai le la tama?

Vaaiga 2: Ua matuā ita lava Falani. O le auala masani lava e faateʻa ai lona ita, o le tatuʻi o foliga o lana avā, kiki, futi le ulu pe faafetoʻai ma le puipui o le fale.

ATONU e faateʻia oe i le iloaina, e tasi lava le ulugalii o loo tutupu ai nei vaaiga e lua.

O tagata e sauāina o latou aiga, e masani lava ona ola i se olaga faafoliga

I le pei o le toʻatele o tagata e masani ona sauāina o latou aiga, e poto tele Falani e faafoliga atu o ia o se “tagata lelei,” pe a iai faatasi ma nisi po o mātua o lana avā. Ae o le matuaʻi sauā lava pe a na o i laʻua ma lana avā.

O le toʻatele o tamāloloa e pei o Falani na ola aʻe i aiga e sauā, ma ua matutua ane ma manatu e lē leaga le sauā, ae o se uiga masani. Peitaʻi, e lē o se mea masani le iai o sauāga i aiga. O le pogai lenā e faateʻia ai le toʻatele pe a fasi e se tamāloa lona toʻalua.

E ui i lea, ua avea sauāga i aiga o se faiga masani. O se faaaʻoaʻoga, na iloa mai i se suʻesuʻega i le Iunaite Setete, i se fua faatatau i le aso e tasi, e silia i le 16 telefoni i le minute e vili atu i laina eseese i le atunuu, ua faapitoa mo ē e aafia i sauāga i aiga. O lenei faafitauli ua pei o se faamaʻi pipisi, e tusa lava po o le ā le ituaiga, aganuu, ma le tulaga tau tamaoaiga. Talu ai e tele isi sauāga i aiga e lē o lipotia, e mautinoa la e sili atu ona tugā le tulaga o lenei faafitauli, nai lo o faamatalaga o loo faamauina.b

O nei lipoti ua lāgā ai fesili nei: E faapefea i se tamāloa ona sauā i se tasi, aemaise lava i lana avā? Pe e iai se fesoasoani mo tamāloloa o loo sauā i a latou avā?

E talitonu Molimau a Ieova e mafai ona fesoasoani taʻiala a le Tusi Paia i tane ma avā sauā ina ia suia o latou uiga. Pe e faigofie ona suia uiga o se tagata? Leai. Ae pe e mafai ona suia? Ioe! Ua fesoasoani aʻoaʻoga a le Tusi Paia i le toʻatele e suia uiga sauā i uiga agalelei ma faaaloalo. (Kolose 3:8-10) Seʻi iloilo le mea na tupu iā Troy ma Valerie.

Sa faapeʻī le lua mafutaga i le amataga?

Valerie: I le pō o le ma faamau, na po ai aʻu e Troy ma na atoa le vaiaso o totoulia oʻu foliga. Sa matuā faatoese mai ma tautō e na te lē toe faia lava. Ae ua tele tausaga talu ona ma faaipoipo, ma o lana tala a lea e fai mai i taimi uma e fasi ai aʻu.

Troy: O so o se mea lava ou te ita ai, e oo lava i le tuai ona vela o le meaʻai. E iai se taimi na ou sasaina ai Valerie i le fana, ma i se tasi aso, na ou matuā fasia o ia ma ou manatu ai ua oti. Ona ou taumafai lea e faafefe o ia e ala i le tuu o le naifi i le ua o la ma tama tama, ma fai i ai o le a ou fasiotia le ma tama.

Valerie: Sa ou matuā fefe, ma o nisi taimi ou te sola ese ai mai le fale seʻi toe toʻafilemu Troy. Peitaʻi, sa sili atu ona faigatā ona onosaia le tigā o ana upu, nai lo o le tele o taimi e matuā fasi ai aʻu.

Troy, pe na e masani i le sauā?

Troy: Ioe, mai lava i loʻu laʻitiiti. Sa ou ola aʻe i se aiga e sauā. Sa masani ona fasi e loʻu tamā loʻu tinā i luma o matou ma nai oʻu tei. Ina ua ia tuua i matou, sa toe fai le isi toʻalua o loʻu tinā, ma sa fasi foʻi e lenā tamāloa. Sa faamalosi e lenā tamāloa i maʻua ma loʻu tuafafine, ma na falepuipui ai. Peitaʻi, e lē avea na mea ma faamolemolega i aʻu amio.

Valerie, ae aiseā na e tumau ai pea i le lua faaipoipoga?

Valerie: Sa ou fefe ma mafaufau, ʻAe faapefea pe a ia suʻeina aʻu po o oʻu mātua ma fasiotia? Ae faapefea pe a ou lipotia o ia ma atili ai ona telē le faafitauli?’

O anafea na amata ai ona iai suiga?

Troy: Ina ua suʻesuʻe loʻu toʻalua ma Molimau a Ieova. Muamua, sa ou fuā i ana uō fou ma manatu e tatau ona ou taofia o ia e aua neʻi alu i lenā “lotu māvae.” O lea, na atili ai ona ou sauā iā Valerie faapea foʻi ma Molimau a Ieova. Ae i se tasi aso, na oso ai le maʻi o la ma tama e fā tausaga, o Daniel, ma taofia ai i le falemaʻi mo le toetoe tolu vaiaso. E tele mea lelei na faia e Molimau i lenā taimi, e pei o le tausia o la ma tama teine e ono tausaga o Desiree. Ina ua uma ona faigaluega se tasi uso Molimau i le pō atoa, sa sau vaai Daniel ae alu Valerie e fai sina ana mālōlōga. Sa matuā pāʻia loʻu loto i le agalelei o na tagata, ia sa ou soona sauā i ai. Sa ou iloa ai o i latou o Kerisiano moni. O lea na ou talosaga ai loa i Molimau e fai saʻu suʻesuʻega. Ina ua ou suʻesuʻeina le Tusi Paia, sa ou iloa ai le auala e tatau pe e lē tatau ai foʻi i se tamāloa ona feutagaʻi ai ma lana avā. Sa ou matuā lafoaʻia oʻu uiga sauā, ma na mulimuli ane avea aʻu ma Molimau a Ieova.

O ā taʻiala o le Tusi Paia na fesoasoani iā te oe?

Troy: Sa fesoasoani iā te aʻu le 1 Peteru 3:7, e faapea e tatau ona ou “āva” i laʻu avā. Ua fautua mai le Kalatia 5:23 ia “agamalu” ma “amio pulea.” O loo taʻusalaina i le Efeso 4:31 “upu masoā.” Ua taʻua foʻi i le Eperu 4:13 “ua matuā faaalia mea uma i luma” o le Atua. O lona uiga, e tusa pe e lē iloa mai e oʻu tuaoi aʻu gaoioiga, ae e silafia uma e le Atua. Sa ou iloa foʻi e tatau ona sui aʻu aumea, auā “o aumea leaga e faaleagaina ai mea lelei ua masani ai tagata.” (1 Korinito 15:33) E leʻi afāina i aʻu aumea muamua aʻu faiga sauā. Na latou manatu e tatau ona fasi se fafine, “ina ia ona iloa ai lona tulaga e tatau ona iai.”

O ā ni lua faalogona e uiga i le lua faaipoipoga i le taimi nei?

Valerie: Ua 25 tausaga talu ona avea Troy ma Molimau a Ieova. Talu mai lenā taimi, ua agalelei, magafagafa ma alofa iā te aʻu.

Troy: E lē mafai ona ou suia mea leaga na ou faia i loʻu aiga, ma sa lē tatau lava ona ou faia faapea si aʻu avā. Ae ou te tulimataʻia le faataunuuina o le Isaia 65:17, i le taimi o le a lē toe manatua ai nei mea leaga uma.

O ā ni a oulua fautuaga mo aiga o loo iai sauāga?

Troy: Pe afai o loo e sauāina lou aiga i upu ma gaoioiga, ia talia le mea moni o loo e manaʻomia se fesoasoani, ma e mautinoa e tele fesoasoani e mafai ona e mauaina. Sa fesoasoani iā te aʻu le suʻesuʻeina o le Tusi Paia ma Molimau a Ieova ma auaufaatasi ma i latou, e lafoaʻia ai uiga ma faanaunauga sauā sa mauaa iā te aʻu.

Valerie: Aua e te faatusatusaina lou tulaga i isi, pe talia fautuaga a ē e manatu e latou te iloa le mea e sili ona lelei mo oe. E ui e lē tutusa iʻuga e maua e tagata uma, ae ua ou fiafia ona ou te leʻi tuua laʻu tane, auā o lea ua ma olioli i se mafutaga māfana ma lelei i le taimi nei.

FAAIʻUINA SAUĀGA I AIGA

Ua fesoasoani le suʻesuʻeina o le Tusi Paia i le toʻatele o tamāloloa e faia ai ni suiga

Ua faapea mai le 2 Timoteo 3:16: “O Tusitusiga Paia uma e mai i le agaga o le Atua, ma e aogā e aʻoaʻo ai, e aʻoaʻi ai, e faasaʻo ai mea.” I le pei o Troy lea na taʻua i luga, e toʻatele tane ma avā sa sauā, ua faatatauina fautuaga a le Tusi Paia ma suia ai o latou mafaufauga ma uiga.

Pe e te fia iloa atili le auala e fesoasoani ai le Tusi Paia i la oulua faaipoipoga? Faafesootaʻi Molimau a Ieova i lou vaipanoa, pe tagaʻi i le www.pr2711.com

a Ua suia nisi igoa i lenei mataupu.

b O le mea moni, e toʻatele foʻi tamāloloa e fasi e fafine. Peitaʻi, o le tele o sauāga i aiga ua lipotia, na faia e tamāloloa.

MĀFUAAGA E LĒ TUUA AI A LATOU PAAGA SAUĀ

Aiseā e filifili ai nisi avā e nonofo pea ma a latou paaga sauā? O le māfuaaga masani lava ona e fefefe ina neʻi atili faateteleina ai le faafitauli. O nisi avā ua faafefe e a latou tane o le a fasi pe fasioti foʻi pe a sosola ese, ma e toʻatele avā ua fasiotia moni lava e a latou tane.

Ae e mumusu isi ina neʻi lē fiafia aiga ma uō iā i latou, ma lē talitonu o loo iai ni sauāga i le aiga. O se faataʻitaʻiga, o Isapela lea na taʻua i le amataga o le mataupu. Sa ia tuua lona toʻalua ma faapea mai: “Na matuā ita loʻu uso iā te aʻu ma fai mai ou te toe foʻi i loʻu toʻalua. Na manatu o ia o loʻu toʻalua o se tamāloa ʻlelei’ ma e lē sauā. Na ʻalofia aʻu e oʻu tuaoi, ma na iʻu ai ina matou siitia ese ma laʻu fanau.”

Ae o isi māfuaaga nei:

E mananaʻo e ola aʻe fanau o loo iai uma mātua e toʻalua.
E popole i le tausiga o i latou ma a latou fanau i le itu tautupe.
E sesē o latou manatu e faapea e tuuaʻia i latou.
E māsiasi e taʻu atu o loo sauāina i latou.
E latou te faamoemoe o le a toe faaleleia le tulaga o mea.

E faatāua e Molimau a Ieova le taʻiala a le Tusi Paia e faapea, e faatoʻā tatala le faaipoipoga pe afai ua mulilua se tasi o le paaga. (Mataio 5:32) Peitaʻi, e iai tulaga e ono māfua ai ona nonofo eseese nisi ma a latou paaga, e pei o le matuā sauā o le paaga.