Auala e Faasao ai le Malosi o le Wandering Albatross

O LE wandering albatross o se tasi lea o manulele e mafai ona tumau pea i luga o le ʻea, ma lele mo le faitau afe o maila e aunoa ma le apatā o ona apaʻau i le tele o taimi. O le auala autū e mafai ona faia ai faapea, ona o le auala na foafoaina ai ma le tomai e lele ai. O ona apaʻau e 11 futu (3.4 m) le uumi ma e toetoe 20 pauna (8.5 kilo) le mamafa o lenei manulele.

Ia mātau: E faaaogā le malosi e maua mai i uaua o sooga o apaʻau o lenei manulele, e lele ai. O le isi auala autū, o lona tomai e iloa ai le itu o loo agi mai ai le savili, lea e mafai ai ona lele mo le tele o itula.

E faasolosolo lava ona lele le albatross, seʻia oo ina maualuga le itulagi e lele ai. A o i luga o le sami, e lele i luga, liliu ma lele faatafa i le itu o loo agi mai ai le savili. O le faia faapea, e mafai ai e lenei manulele ona faatumauina lona malosi e lele ai. I suʻesuʻega talu ai nei a saienitisi, na latou malamalama ai i le auala e mafai ai ona faia faapea e nei manulele. Na faaaogā e nei saienitisi masini faaonapōnei, e iloa ai e maua e le albatross le malosi pe a faaauau ona lele seʻia oo i le itulagi e sili ona maualuga, ona liliu lea ma faaaogā le savili o loo agi mai i ona tua e lele ai. Na taʻua e nei saienitisi: ʻE faigofie le auala e maua ai e le albatross lona malosi ma o se tulaga e faifai pea.’ O le ā le iʻuga? E mafai e lenei manulele ona lele mo le tele o itula e aunoa ma le apatā o ona apaʻau.

O le iloaina o nei mea, e fesoasoani iā i latou e fausia masini e faaaogā i le ʻea lea e lē manaʻomia ai le tele o le penisini, po o masini e lē manaʻomia ai se malosiaga.

O le ā sou manatu? Pe e māfua mai i le faaevolusione le auala e faaaogā ai e le albatross lona malosi ma le auala na faia aʻe ai? Po o le mea na iai se tasi na foafoaina?