AUALA E FEAGAI AI MA LE TAUGATĀ O LE SOIFUAGA

Faasoasoa Lelei Au Tupe

O se luʻi mo i tatou uma pe a siitia tau o oloa. Ae e lē o se mea e lotovaivai ai. E iai mea e mafai ona e faia e fesoasoani iā te oe.

LE MĀFUAAGA E TĀUA AI

O le a e fetaiaʻi ma faafitauli tautupe pe afai e te lē iloa faasoasoa lelei, ma e iʻu atu ai i le soona popole. E tusa pe e lē tele ni au tupe, ae e iai mea e mafai ona e faia ina ia faasoasoa lelei ai.

MEA E MAFAI ONA E FAIA

Ola e tusa ai ma tupe ua e maua. O lou faia faapea o le a mafai ai ona faaaogā tatau au tupe, ma e nofosauni ai e totogi ni mea e leʻi faatalitalia.

O le ā e fesoasoani iā te oe ina ia ola e tusa ai ma tupe ua e maua? Ia fai sau paketi, o lona uiga ia faamaumau tupe maua ma tupe faaalu. A o e iloilo lau paketi, ia mafaufau i mea o loo e manaʻomia moni. Ia taumafai malosi e pipii i le aofaʻi o tupe ua e filifili e faaalu, ma nofosauni e fetuunaʻi lenā aofaʻiga pe afai e sui lou totogi po o tau o oloa. Pe afai foʻi ua e faaipoipo, e tāua ona faaaofia lau paaga i so o se filifiliga e te faia.

Ia faataʻitaʻi: Ia taumafai e totogi i tupe lau faatau nai lo o le faaaogā o se credit card po o le faia o se aitalafu. O le faia faapea ua mafai ai e nisi ona faasoasoa lelei a latou tupe, ma leai ai ni aitalafu. Ia faaalu foʻi se taimi e tilofaʻia ai au bank statement. E faaitiitia lou popole pe a e iloa tonu le aofaʻi o au tupe o loo iai.

E mautinoa e lē faigofie le ola e tusa ai ma tupe ua e maua. Ae e telē le fesoasoani pe a iai se paketi e fuafua lelei. O le iʻuga, o le a e lē soona popole ai i tupe.

“Faitau tupe o le a faaalu.”—Luka 14:28.

Ia galue mamafa i lau galuega. O nisi nei o mea e mafai ona e faia ina ia tumau ai pea i lau galuega: Aua le tuai i le galuega, ia iai se vaaiga saʻo, ia lotofesoasoani, ia galue malosi, ia faaaloalo i isi, mulimuli i tulafono o le galuega, ma ia faaleleia ou tomai.

Aua le faamaʻimauina tupe. Ia fesili ifo: ʻPe e fai ma aʻu masani le faaalu o tupe i mea e lē tāua pe e lē aogā mo aʻu?’ O se faaaʻoaʻoga, o le toʻatele o tagata ua faamaʻimau a latou tupe i taaloga faitupe, o fualaau faasāina, o tapaa, po o le tele o le ʻava malosi. O nei masaniga e lē gata e aafia ai lo latou soifua mālōlōina, ae atonu o le a tutuli ai foʻi i latou mai i galuega.

ʻE fiafia le tagata ua maua le atamai. E sili atu i lo o le mauaina o siliva.’—Faataoto 3:13, 14.

Ia sefe ni tupe mo faalavelave faafuaseʻi. Pe a mafai, ia tuu ese sina tupe mo ni pili e leʻi faatalitalia po o faalavelave faafuaseʻi. E mafai ona fesoasoani lenā tupe iā te oe po o se isi o lou aiga, pe a faafuaseʻi ona maʻi se tasi, vāea mai i le galuega, po o se isi mea e leʻi faatalitalia.

“E tutupu faafuaseʻi mea iā i latou uma i le taimi e leʻi faatalitalia.”—Failauga 9:11.

Auala e Sefe ai Tupe

Ia kuka meaʻai i le fale.

E taugatā le fai ma masani le aai i faleʻaiga, po o le faatau foʻi o meaʻai ma vaiinu. E moni e tele le taimi ma le malosi e kuka ai meaʻai i le fale, ae e sefe ai le tele o tupe. O le kuka foʻi o meaʻai i le fale e lelei mo lou soifua mālōlōina.

Ia faautauta i le faia o faatau.

Ia faia se lisi o lau faatau ma pipii i ai. ʻAlofia le faatau o mea e te leʻi fuafua e faatau.
Ia taumafai e faatau oloa siiatoa pe a paʻū le tau ma lava lau tupe. Ia faamautinoa e teu lelei oloa po o meaʻai ina neʻi vave ona leaga.
Ia faatau oloa taugofie pe afai o loo lelei le tulaga o na oloa.
E tele aogā o le faia o faatau i le Initaneti, e lē gata e iloa ai oloa taugofie, ʻalofia ai le faatau o oloa e leʻi fuafua e faatau, ma iloa ai foʻi le tupe ua faaaogā. Pe afai e mafai ona faia faatau e faaaogā ai le Initaneti i le atunuu o loo e iai, pe e mafai ona e faataʻitaʻia lenā auala?
Ia mataalia i taimi e paʻū ai tau o oloa ma faaaogā kuponi pe a maua. Ia faatusatusa tau o oloa po o auaunaga, e aofia ai tau o le eletise ma le suāvai.

Aua le vavevave e faatau ni mea fou.

E faalauiloa e kamupani a latou oloa, e pei o telefoni ma isi masini fou ina ia faateleina ai a latou polofiti. Ia fesili ifo iā te oe: ʻPe e aogā iā te aʻu lenei masini po o se telefoni o loo aʻe mai? Pe e manaʻomia ona toe faafou i le taimi lenei? Pe afai e toe faafou, pe e manaʻomia moni ona sui i le ituaiga fou o loo aʻe mai?’

Lipea ma toe faaaogā mea o loo iai.

Ia tausi lelei masini e pei o pusa aisa ma ogaumu ma lipea pe afai e mafai, ina ia umi ai ona faaaogā. E mafai foʻi ona sefe au tupe pe a faatau mai masini na faaaogā muamua.

Ia totō ni au fualaau ʻaina ma fualaau taumafa mata.

Pe e mafai ona totō sau togālaau ʻaina? O le a sefe ai au tupe, ma maua ai ni mea e faatau atu, tufa atu i isi, pe e faafesuiaʻi ma oloa a isi.

“O fuafuaga a le tagata toʻaga e manuia ai lava o ia.”—Faataoto 21:5.

“E fai ma siaki tau o oloa e ma te manaʻomia i aso faisoo, ma e faaaogā ma le faautauta le ma credit card.”—Miles, mai i Egelani.

“A o leʻi faia le faatau a le matou aiga, e fai muamua se lisi o mea e matou te manaʻomia.”—Jeremy, mai i Amerika.

“E faamautinoa muamua e lava la matou tupe e faatau ai mea e manaʻomia, ma tuu ese se tupe mo pili faafuaseʻi.”—Yael, mai i Isaraelu.

“Na ma aʻoaʻoina le ma fanau e toe lipea mea e pei o taavale ma mea e faaaogā i lo matou fale, nai lo o le faatau o ni mea fou. E ma te lē faatauina foʻi ma laʻu avā ni oloa fou o loo aʻe mai.”—Jeffrey, mai i Amerika.

“E sefe aʻu tupe e ala i le totō o fualaau faisua ma faia se lafu moa. E tufa atu foʻi aʻu fualaau faisua i isi.”—Hono, mai i Myanmar.

O se tamāloa o loo ia tauina ni fualaau faisua mai i lana togālaau ʻaina.