Taimiga Saʻo, Vaevae Tonu

E UI ina e tatau ona avatu le faamamafaga muamua i le lelei o lau aʻoaʻo atu, ae e alagatatau foʻi ona uaʻi atu i le taimiga o au lauga. Ua faatulaga a tatou sauniga ina ia amata ma faaiʻu i taimi patino ua fuafuaina. Ina ia ausia lenei tulaga e manaʻomia le felagolagomaʻi o tagata taʻitoʻatasi o ē e iai se vaega i le polokalame.

I ona pō o le Tusi Paia, sa ese le vaaiga a tagata i le olaga mai le mea ua iai i le tele o atunuu i aso nei. E leʻi faitauina le taimi i ni tulaga maʻoti ae sa taʻua o le “itu aso . . . e tolu” po o le “itu aso . . . e sefulu.” (Mata. 20:3-6; Ioa. 1:39) Sa seāseā iai se māfuaaga e popole ai i le taimiga saʻo o galuegafai i aso taʻitasi. I nisi vaega o le lalolagi i aso nei, ua faapena foʻi ona manatu i ai i le taimi.

Peitaʻi, e ui ina atonu o tū masani po o le manaʻo totino o le tagata lava ia e māfua ai i tagata ona manatu māmā i le taimi, ae e mafai ona aogā iā i tatou le faamasani ina ia uaʻi talafeagai i ai. Pe a toʻatele e tofia i ai vaega o se polokalame, e manaʻomia la ona manatunatu i le taimi ua faatagaina mo vaega taʻitasi. O le mataupu silisili “ia faia mea uma lava ma le matagofie ma le sauni lelei” e mafai ona faatatau i le taimiga o o tatou tofiga i le sauniga.—1 Kori. 14:40.

Ausiaina o se Taimiga Lelei. O le ki o sauniuniga. E masani ā, o failauga o ē e iai faafitauli i le taimiga, sa lē lava ona sauniuni. Atonu ua latou soona mautinoa naʻuā. Pe atonu foʻi e latou te faatalitali seʻia sauniuni i le taimi mulimuli. O se taimiga lelei e amata lea i le manatu mamafa i lou tofiga ma ia lotomalie e sauniuni lelei.

Po o lou tofiga ea o se faitau tusi? Muamua, ia autalu Suʻesuʻega 4 e oo i le 7, o loo aofia ai le sologa lelei, mānavaga, faamamafa le uiga, ma le faamamafaina o manatu autū. Ona faatatau lea o na fautuaga a o e faitauina leotele le mataupu sa tofia atu iā te oe. Taimi lau faitau. Pe manaʻomia ona e faitau saosaoa ina ia uma ai i le taimi faatagaina? Ia faavavevave lau faitau i vaega e faalētāua, ae faaaogā pea mānavaga ma ia faagesegese ina ia faamamafa ai manatu tāua. Ia faataʻitaʻi ma toe faataʻitaʻi. A o faaleleia le sologa lelei o lau faitau, o le a faigofie foʻi ona fetuunaʻi lau taimiga.

Po o le ā e tautala atu e faaaogāina ai faamaumauga? E lē manaʻomia ona fai ni au faamaumauga se tele—e pei o se manusikulipi—ina ia faamautinoa ai se taimiga talafeagai. Ina ua e galue i le Suʻesuʻega 25, sa e aʻoaʻo ai se auala e sili atu ona lelei. Ia manatua manatu nei e lima: (1) Sauniuni se mataupu lelei, ae aua le tele naʻuā. (2) Ia manino i le mafaufau manatu autū, ae aua le taulotoina fuaiupu atoatoa. (3) Faailoga i lau auivi le aofaʻi o le taimi ua e fuafua e faaaogā mo vaega taʻitasi o lau lauga po o le aofaʻi foʻi o le taimi e ao ona faaalu faatoʻā e oo i isi manatu. (4) Pe a sauniuni, ia iloilo po o ā faamatalaga e ono tuuese pe afai e ova lou taimi. (5) Faataʻitaʻi lau taulimaga.

E tāua le faataʻitaʻi. A o fai au faataʻitaʻiga, vaai le taimiga o vaega taʻitasi o lau lauga. Ia faataʻitaʻi ma toe faataʻitaʻi lau lauga seʻia oo ina māeʻa lau lauga atoa i totonu o le taimi faatagaina. Aua le taumafai e faaofi i ai ni manatu se tele. Ia faaleoleo sou taimi, auā o le taulimaina o lau lauga i luma o se aofia, e ono umi atu na i lo o au faataʻitaʻiga na o oe.

Vaevaeina o Vaega. O se taimiga lelei, e fesootaʻi vavalalata i le vaevaeina tonu o vaega o se lauga. E ao ona faaalu le tele o le taimi i le taulimaina o le tino o le lauga. O inā o loo iai manatu autū o aʻoaʻoga. E ao ona fetaui le umi o le faatomuaga ina ia ausia ai sini e tolu sa talanoaina i le Suʻesuʻega 38. E lē tatau foʻi ona umi naʻuā le tino ae lē lava ai le taimi mo se faaiʻuga uigā, e tusa ma le Suʻesuʻega 39.

O au taumafaiga ina ia ausia se taimiga lelei o le a iʻu lea i se lauga e sili ona lelei ma o le a faaalia ai lou faaaloalo mo isi o ē e iai vaega i le polokalame, e faapena foʻi ma le faapotopotoga atoa.