E leai ni a matou faifeʻau totogi i la matou faalapotopotoga. Nai lo lea, e pei ona sa faia ina ua faatoʻā amata le faapotopotoga Kerisiano, na tofia ovasia agavaa “ina ia leoleo le faapotopotoga a le Atua.” (Galuega 20:28) O nei toeaina o ni tane ua taʻumatuaina faaleagaga o loo taʻimua ma leoleoina le faapotopotoga, e lē “manatu i ai o se avega mamafa, ae ia faia ma le lotomalie; aua le faia ona o le fia maua o se mea i se auala faapiʻopiʻo, ae ia faia ma le lotonaunau.” (1 Peteru 5:1-3) O ā galuega o loo latou faia mo i matou?

E latou te tausia ma puipuia i matou. E taʻitaʻia ma fesoasoani toeaina ina ia puipuia le faapotopotoga i le itu faaleagaga. I le iloaina ua faatuatuaina i latou e le Atua mo lenei tofiga tāua, e lē fia pulepuletutū ai toeaina i ona tagata, ae nai lo o lea, e latou te saosaolaumea mo lo matou lelei ma le olioli. (2 Korinito 1:24) E pei lava ona tinoū se leoleo mamoe e tausia ana mamoe taʻitoʻatasi, e faapena foʻi ona taumafai toeaina e iloa sui taʻitoʻatasi uma o le faapotopotoga.​—Faataoto 27:23.

E latou te aʻoaʻoina i matou i le auala e faia ai le finagalo o le Atua. I vaiaso taʻitasi, e taʻimua toeaina i sauniga a le faapotopotoga, ina ia mafai ona faamalosia ai lo matou faatuatua. (Galuega 15:32) O nei tane tuutoina atu e latou te taʻimua foʻi i le galuega talaʻi, galulue faatasi ma toleniina i matou i vala uma o le faiva.

E latou te aumaia faalaeiauga mo i matou taʻitoʻatasi. Ina ia tausia manaʻoga faaleagaga o i matou taʻitoʻatasi, e ono asiasi mai toeaina i o matou fale po o le Maota mo Sauniga, ina ia fesoasoani mai ma aumaia faamāfanafanaga mai i le Tusi Paia.​—Iakopo 5:14, 15.

E lē gata i a latou galuega i le faapotopotoga, ae o le toʻatele o toeaina e galulue foʻi i galuega faaletino ma tiute tauave faaleaiga lea e manaʻomia ai lo latou taimi ma le malosi. E talafeagai ai la ona matou faaaloalo atu i nei uso e galulue mamafa.​—1 Tesalonia 5:12, 13.

• O ā matafaioi a toeaina o le faapotopotoga?

• O ā auala e faaalia ai e toeaina le naunau totino iā i matou?

Ua faamatalaina i le Tusi Paia vaega e lua o tane Kerisiano o ē o loo feagai ma tiute tauave i le faapotopotoga—o “ovasia ma auauna o le faiva.” (Filipi 1:1) O le tulaga masani e iai ni toeaina ma auauna o le faiva o loo auauna i faapotopotoga taʻitasi. O ā galuega e faia e auauna o le faiva e aogā mo i matou?

E latou te fesoasoani i le ʻautoeaina. O auauna o le faiva o ni tane e matutua faaleagaga, maufaatuatuaina ma magafagafa, o nisi e talavou a o isi ua matutua. E latou te gafa ma galuega tāua ma galuega masani ia e fesootaʻi atu i le faapotopotoga ma le Maota mo Sauniga, e ese mai i le aʻoaʻo atu ma le leoleoina o le lafu. O lenei tulaga e mafai ai ona uaʻi atu toeaina i tiute tauave tau aʻoaʻo atu ma le leoleoina o le lafu.

E latou te faia auaunaga tāua. O nisi auauna o le faiva ua tofia e avea ma tautua ina ia faafeiloaʻi tagata uma e taunuu mai i sauniga. O isi atonu e taulimaina mea faaleoteleleo, le faasoaina o lomiga, vaaia o tupe a le faapotopotoga, ma le tofiaina o oganuu e talaʻi ai sui o le faapotopotoga. E latou te fesoasoani foʻi i le tausia ma le faaleleia o le Maota mo Sauniga. E ono talosaga atu toeaina iā i latou e fesoasoani i ē ua afu lo latou soifua. Po o ā lava tiute tauave e tuuina atu i auauna o le faiva, ae e latou te lotomalilie e faia nei tiute, ma e faaaloalo le faapotopotoga iā i latou ona o a latou galuega mamafa ma le lotomalilie.​—1 Timoteo 3:13.

E latou te faataatia se faaaʻoaʻoga lelei o ni tane Kerisiano. E filifilia auauna o le faiva ona o o latou uiga lelei faaleagaga. Pe a latou taulimaina vaega i sauniga, e latou te faamalosia lo matou faatuatua. E ala i le taʻimua i le galuega talaʻi, e latou te fesoasoani mai ai ia atili ona matou maelega. Ona o lo latou galulue felagolagomaʻi ma le ʻautoeaina, e latou te faatupuina ai le olioli ma le autasi. (Efeso 4:16) Mulimuli ane, e latou te ono agavaa foʻi e auauna o ni toeaina.

• O ā ituaiga tane e iai auauna o le faiva?

• E faapefea ona fesoasoani auauna i le faapotopotoga ina ia sologa lelei?

E masani ona taʻua i Tusitusiga Kerisiano Eleni ia Panapa ma le aposetolo o Paulo. O nei tane sa auauna o ni ovasia femalagaaʻi, na asiasi atu i uluaʻi faapotopotoga. Aiseā? Ona sa la manatu mamafa moni mo le lelei o o la uso faaleagaga. Na faapea mai Paulo sa manaʻo “e toe foʻi e asiasi i uso” po o ā mai i latou. Na lotomalie o ia e malaga mo le faitau selau o maila [km] ina ia alu atu ma faamalosiau i latou. (Galuega 15:36) O le faanaunauga foʻi lenā o loo iai i a matou ovasia femalagaaʻi i aso nei.

E latou te asiasi mai e faalaeiau i matou. O ovasia matagaluega e faalua i le tausaga ona asiasi atu pe ā ma le 20 faapotopotoga, ma faaalu le vaiaso faatasi ma faapotopotoga taʻitasi. E matou te mauaina le tele o aogā mai i tala o mea na tutupu i nei uso, ma afai ua faaipoipo e maua foʻi aogā mai i a latou avā. E latou te taumafai e faamasani i ē matutua atoa ma ē iti, ma e naunau e galulue faatasi ma i matou i le galuega talaʻi faapea a matou suʻesuʻega faale-Tusi Paia. O nei ovasia e faia asiasiga faaleoleo mamoe faatasi ma toeaina, ma faia lauga faalaeiau i sauniga ma fonotaga ina ia faamalosia ai i matou.​—Galuega 15:35.

E latou te faaalia le naunau i tagata uma. E naunau moni ovasia matagaluega i le itu faaleagaga o faapotopotoga. E latou te feiloaʻi ma toeaina ma auauna o le faiva ina ia toe tilofaʻia le agaʻigaʻi i luma o le faapotopotoga, ma avatu fautuaga aogā i le auala e taulima ai o latou tiute tauave. E latou te fesoasoani i paeonia ina ia taulau manuia i la latou faiva, ma e fiafia e feiloaʻi atu i ē fou ma faalogo atu i lo latou agaʻigaʻi i luma faaleagaga. E ofo mai e nei uso taʻitoʻatasi i latou lava e matou te “galulue faatasi mo lo [matou] lelei.” (2 Korinito 8:23) E tatau ona matou faataʻitaʻi i lo latou faatuatua ma le tuutoina i le Atua.​—Eperu 13:7.

• O le ā le fuafuaga e asiasi ai ovasia matagaluega i faapotopotoga?

• E faapefea ona e maua aogā mai i a latou asiasiga?

Pe a tupu se mala, e vave ona faamaopoopo e Molimau a Ieova fesoasoani laveaʻi e avatu i o latou uso o loo aafia. O nei gaoioiga e faaalia ai le moni o lo matou alofa o le tasi i le isi. (Ioane 13:34, 35; 1 Ioane 3:17, 18) O ā auala e matou te fesoasoani atu ai?

E matou te foaʻi atu tupe. Ina ua tupu se oge tele i Iutaia, sa auina atu e uluaʻi Kerisiano i Anetioka le fesoasoani tautupe i o latou uso Kerisiano. (Galuega 11:27-30) I se tulaga tutusa, pe a matou iloa o loo feagai o matou uso i nisi vaega o le lalolagi ma tulaga faigatā, e matou te auina atu foaʻi tautupe e ala i a matou faapotopotoga, ina ia avatu fesoasoani faaletino i ē o loo matuā manaʻomia.​—2 Korinito 8:13-15.

E matou te avatu fesoasoani talafeagai. O toeaina e nonofo i le vaipanoa o loo tupu ai se mala, e latou te faafesootaʻia sui taʻitasi o le faapotopotoga ina ia faamautinoa o loo saogalemu tagata uma. E ono taʻimua se komiti o fesoasoani laveaʻi i le faasoasoaina o fesoasoani tau meaʻai, lavalava, fale ma togafitiga faafomaʻi. E toʻatele Molimau o loo iai le tomai e manaʻomia, e tauofo e faatupe e i latou lava a latou tupe faaalu ina ia ō atu ma auai i galuega fesoasoani, pe toe faaleleia fale o aiga ma Maota mo Sauniga ua faaleagaina. O le autasi o loo matou olioli ai o se faalapotopotoga ma mea e tutupu i lo matou galulue faatasi, ua mafai ai ona vave a matou galuega i le taimi e manaʻomia. E ui e faalautele atu lo matou alofa i “ē [matou] te aiga i le faatuatua,” ae e matou te fesoasoani atu foʻi i isi pe a mafai, e tusa lava po o le ā la latou tapuaʻiga.​—Kalatia 6:10.

E matou te ofo atu le fesoasoani i le itu faaleagaga ma le itu tau faalogona. E sili ona manaʻomia e i latou e aafia i se mala ni faamāfanafanaga. O taimi na e matou te maua ai le malosi mai iā Ieova, “le Atua o faamāfanafanaga uma.” (2 Korinito 1:3, 4) E matou te fiafia e faasoa atu i ē o loo mafatia folafolaga a le Tusi Paia, ma avatu le faamautinoaga ua lē o toe umi ona aumaia lea e le Malo o le Atua, le iʻuga i mea leaga uma e māfua ai tigā ma puapuaga.​—Faaaliga 21:4.

• Aiseā e mafai ai ona vave tali atu Molimau a Ieova i taimi o mala?

• O ā faamāfanafanaga faaleagaga e mafai ona matou faasoa atu i ē e faasaoina?

A o lata i lona maliu, sa faia ai e Iesu se talanoaga e na o i latou ma ona soo e toʻafā—o Peteru, Iakopo, Ioane ma Aneterea. A o valoia e Iesu le faailoga o lona faatasi mai i aso e gata ai, na ia lāgā se fesili tāua: “O ai la le pologa faamaoni ma le faautauta, o lē ua tofia e lona matai e vaavaaia lana ʻaufaigaluega, e avatu a latou meaʻai i le taimi tatau?” (Mataio 24:3, 45; Mareko 13:3, 4) Na faamautinoa atu e Iesu i ona soo e faapea, ona o ia o lo latou “matai,” o le a ia tofia ē e saunia le tele o taumafa faaleagaga mo ona soo i le taimi o le iʻuga. O ai e faia aʻe ai lenei pologa?

Se vaega toʻaitiiti o soo faauuina o Iesu. O le “pologa” e faasino atu i le Vaega Pule a Molimau a Ieova. O loo latou tufatufaina mai meaʻai faaleagaga i le taimi tatau mo tagata tapuaʻi o Ieova. E matou te faalagolago i lenei pologa faamaoni e aumaia pea mo i matou “meaʻai e talafeagai i le taimi tatau.”​—Luka 12:42.

E latou te tausia le aiga o le Atua. (1 Timoteo 3:15) Na tuu atu e Iesu i le pologa le tiute tauave tāua o le puleaina o le galuega a le vaega i le lalolagi o le faalapotopotoga a Ieova—e vaavaaia ana meatotino, faatonutonuina le galuega talaʻi, ma aʻoaʻoina i matou e ala mai i a matou faapotopotoga. O lea, ina ia saunia mai mea e matou te manaʻomia, o loo tufatufa mai e “le pologa faamaoni ma le faautauta” meaʻai faaleagaga, e ala mai i lomiga o loo matou faaaogā i la matou talaʻiga, faapea polokalame o loo faia i a matou sauniga ma fonotaga.

O loo faamaoni le pologa i upu moni o le Tusi Paia ma lo latou tofiga ia talaʻi atu le tala lelei, ma e faautauta i le vaavaaia o mea a Keriso i le lalolagi. (Galuega 10:42) O loo faamanuia e Ieova le galuega a le pologa i le faateleina ma le anoanoaʻi o sauniuniga faaleagaga.​—Isaia 60:22; 65:13.

• O ai na tofia e Iesu e fafagaina faaleagaga ona soo?

• I ā auala ua faamaoni ai ma faautauta le pologa?

I le uluaʻi senituri, o se vaega toʻaitiiti o “le ʻauaposetolo ma toeaina i Ierusalema,” sa auauna o se vaega pule i le faia o faaiʻuga tāua mo le faapotopotoga Kerisiano faauuina atoa. (Galuega 15:2) Afai e latou autasi i se faaiʻuga, o le iʻuga lenā o le talanoaina o manatu o le Tusi Paia, ma le usiusitaʻi i le taʻitaʻiga a le agaga o le Atua. (Galuega 15:25) O le auala lava foʻi lenā o loo mulimuli ai i aso nei.

O loo faaaogā e le Atua e faia lona finagalo. O uso faauuina o loo auauna i le Vaega Pule, e latou te matuā naunau i le Afioga a le Atua, ma e telē lo latou malamalama i le auala e taulima ai mataupu aogā ma faaleagaga. E latou te feiloaʻi i vaiaso taʻitasi ina ia iloilo manaʻoga o le ʻauuso i le lalolagi atoa. E pei lava o le uluaʻi senituri, e latou te aumaia faatonuga e faavae mai i le Tusi Paia, e ala mai i ni tusi po o ovasia femalagaaʻi ma isi. O lenei faiga e autasi ai tagata o le Atua i manatu ma gaoioiga. (Galuega 16:4, 5) E vaavaaia e le Vaega Pule le sauniunia o taumafa faaleagaga, faalaeiau tagata ia faamuamua le galuega talaʻi, ma vaavaaia le tofiaina o uso i tulaga mo tiute tauave.

E latou te tali vave atu i le taʻitaʻiga a le agaga o le Atua. E taulaʻi atu le Vaega Pule i Lē e Pule Silisili Ese, o Ieova, ma le Ulu o le faapotopotoga, o Iesu, mo le taʻitaʻiga. (1 Korinito 11:3; Efeso 5:23) E lē vāai sui taʻitasi o le Vaega Pule iā i latou lava o ni taʻitaʻi i tagata o le Atua. O i latou faatasi ma Kerisiano faauuina, e “mulimuli atu i le Tamaʻi Mamoe [o Iesu] i mea uma e alu i ai o ia.” (Faaaliga 14:4) E matuā talisapaia e le Vaega Pule a matou tatalo mo i latou ma la latou galuega.

• O ai sa iai i le vaega pule i le uluaʻi senituri?

• E faapefea ona saʻilia e le Vaega Pule i aso nei le taʻitaʻiga a le Atua?

O le Peteli, o se igoa faa-Eperu, o lona uiga o le “Fale o le Atua.” (Kenese 28:17, 19 fpl.) O se taʻu ua talafeagai mo nofoaga ua faatūina e Molimau a Ieova i so o se vaega o le lalolagi, ia e faatonutonu ma lagolagoina ai le galuega talaʻi. O loo auauna le Vaega Pule i le ofisa ulu i le Setete o Niu Ioka i Amerika, ma e vaavaaia mai i inā galuega a ofisa o lālā i le tele o atunuu. I le avea ai ma vaega, e iloa ē o loo auauna i nei fale o le aiga Peteli. I le pei o se aiga, e latou te nonofo ma galulue faatasi, olioli faatasi i taimi o taumafataga, ma suʻesuʻe faatasi ma le autasi le Tusi Paia.​—Salamo 133:1.

O se nofoaga faapitoa o loo galulue faataulagaina ai sui o le aiga. I fale o Peteli uma, o loo iai tane ma fafine Kerisiano ua tuutoina atu e fai le finagalo o le Atua, ma auauna faataimi atoa i manaʻoga o le Malo. (Mataio 6:33) E lē mauaina e se tasi o i latou se totogi, ae ua saunia potu ma meaʻai mo i latou uma, ma se alauni ina ia fesoasoani i mea e manaʻomia e le tagata lava ia. E tofu tagata uma i Peteli ma se galuega, a lē i le ofisa, umukuka po o le potu ʻai. O isi e galulue i se fale lomitusi po o le tuufaatasia o tusi, po le teuina o potu, fale tamea, faaleleia o fale po o isi mea.

O se nofoaga pisi e lagolagoina ai le talaʻiga o le Malo. O le sini autū o Peteli uma ia maua e le toʻatele o tagata le upu moni o le Tusi Paia i le tele e mafai ai. O se faataʻitaʻiga o lenā tulaga o lenei polosiua. Sa tusia i lalo o le vaavaaiga a le Vaega Pule, lafo atu i le faitau selau o vaega faaliliu i le lalolagi aoao e ala atu i komepiuta, lomia i masini lomitusi televavave i fale lomitusi i nisi o Peteli, ma auina atu i le silia i le 110,000 faapotopotoga. A o faagasolo vaega uma o lenei galuega, e matuā lagolagosua aiga Peteli i le galuega e sili ona faanatinati i galuega uma​—o le talaʻiina atu o le tala lelei.​—Mareko 13:10.

• O ai e galulue i Peteli, ma o ā sauniuniga ua faia mo i latou?

• O le ā le galuega faanatinati ua lagolagoina i galuega o loo faia i Peteli taʻitasi?

O sui o le aiga Peteli e galulue i matagaluega eseese, ma vaavaaia le faagaoioiga o le galuega talaʻi i se atunuu e tasi pe sili atu foʻi. Atonu e latou te galulue i le ʻaufaaliliu, lolomiina o mekasini, tuufaatasia o tusi, fale tetele e teu ai tusi, saunia o polokalame i TV ma vitiō, pe vaaia isi mataupu mo lea itulagi.

E vaavaaia e le Komiti o le Lālā le galuega. E tuuina atu e le Vaega Pule le faagaoioiga o ofisa o lālā taʻitasi i Komiti o Lālā, lea e faia aʻe i toeaina agavaa e toʻatolu pe sili atu foʻi. E faailoa atu pea e le komiti i le Vaega Pule le faagasologa agaʻigaʻi i luma o galuega i atunuu taʻitasi o loo i lalo o la latou vaavaaiga, faapea so o se faafitauli e tulaʻi mai. O nei lipoti e fesoasoani i le Vaega Pule e filifili ai po o ā ni mataupu e tatau ona talanoaina i lomiga, sauniga ma fonotaga i le lumanaʻi. O ē e fai ma sui o le Vaega Pule, e auina atu e lē aunoa e asiasi i lālā ma avatu taʻiala mo Komiti o Lālā i le taulimaina o o latou tofiga eseese. (Faataoto 11:14) E fuafuaina se polokalame faapitoa e aofia ai se lauga a le sui o le ofisa ulu, e faalaeiau ai i latou o loo nonofo i oganuu o le lālā.

E tuuina atu le lagolagosua i faapotopotoga taʻitasi. E faamaonia e uso taʻumatuaina i ofisa o lālā le faatutūina o faapotopotoga fou. E faatonutonuina foʻi e uso galuega a paeonia, misionare, ma ovasia matagaluega o loo auauna i oganuu o le lālā. E latou te faamaopoopo fonotaga ma tauaofiaga, ma faatulaga le fausiaina o Maota fou mo Sauniga, ma faamautinoa ua auina atu lomiga ma tusi i faapotopotoga e tusa ma o latou manaʻoga. O mea uma e faia i le lālā e saosaolaumea i le faamaopoopoina lelei o le galuega talaʻi.​—1 Korinito 14:33, 40.

• E faapefea ona fesoasoani Komiti o Lālā i le Vaega Pule?

• O ā tiute tauave e gafa ma se ofisa o le lālā?

Ina ia matou faia le mea silisili e faalauiloa atu ai le “tala lelei” i “nuu uma, ma ituaiga uma, ma gagana uma, ma tagata uma,” e matou te saunia lomiga i le silia i le 750 gagana. (Faaaliga 14:6) E faapefea ona matou faataunuuina lenei galuega tele? E matou te faia e ala i le fesoasoani a le vaega o tusitusiga faavaomalo faapea se ʻaufaaliliu e galulue mamafa—o i latou uma o Molimau a Ieova.

E faia le uluaʻi tusitusiga o mataupu i le faa-Peretania. E vaavaaia e le Vaega Pule galuega a le Matagaluega o Tusitusiga i la matou ofisa ulu i le lalolagi. O lenei matagaluega e faasoasoaina atu tofiga i ē e tusia nei mataupu, ia o loo auauna i ofisa ulu ma nisi o ofisa o lālā. Ona o le toʻatele o le ʻaufaigaluega e tusia mataupu e mai i atunuu eseese, ua mafai ai ona matou tusia mataupu e aogā i tagata mai i aganuu eseese, ma ua fiafia ai tagata o atunuu eseese i a matou lomiga.

Ona auina atu lea o mataupu i le ʻaufaaliliu. A māeʻa ona faatonutonu ma faamaonia mataupu na tusia, ona lafo atu lea i komepiuta i ʻaufaaliliu i le lalolagi atoa, ia e faaliliuina, siaki, ma faitau po ua saʻo ma sologa lelei le mataupu. E latou te taumafai e filifili “upu moni” lea e maua ai le uiga moni o le faa-Peretania i la latou gagana.—Failauga 12:10.

E faavavevave e komepiuta galuega. E lē mafai e se komepiuta ona suitulaga i tagata tusitusi ma faaliliu. Peitaʻi, e mafai ona faavavevave a latou galuega e ala i le faaaogāina o lomifefiloi ma polokalame ua i totonu o komepiuta, faapea ma isi meafaigaluega mo saʻiliʻiliga. Ua saunia e Molimau a Ieova se polokalame e taʻua o le MEPS, lea e mafai ona tuuina ai le mataupu i le faitau selau o gagana, tuufaatasia ai ma le tele o ata, ma saunia ai mo le lolomiina.

Aiseā ua faia ai lenei taumafaiga tele, e oo lava i gagana e lē toʻatele nisi e tautatala ai? Talu ai o le finagalo o le Atua “ia faaolaina ituaiga uma o tagata ma ia maua le poto saʻo i le upu moni.”​—1 Timoteo 2:3, 4.

• O ā galuega e aofia ai i le saunia o a matou lomiga?

• Aiseā e lomia ai a matou lomiga i le tele o gagana?

Ua lomia ma tufatufaina atu e la matou faalapotopotoga le faitau selau miliona o Tusi Paia, ma isi lomiga i tausaga uma lava e aunoa ma se totogi. E matou te fausia ma faaleleia Maota mo Sauniga ma ofisa o lālā. E matou te tausia foʻi le faitau afe o tagata Peteli ma misionare, ma saunia fesoasoani i taimi o mala. Atonu la e te taumānatu, ʻE faapefea ona faatupe nei mea uma?’

E lē faia ni a matou sefuluaʻi, totogi se tupe pe aoina se peleti. E ui ina maualuga le aofaʻi o tupe e lagolagoina ai la matou galuega faaevagelia, ae e lē faia ni a matou suʻega tupe. E silia ma le senituri ua mavae, na taʻua ai i le lomiga lona lua o le mekasini o le Watchtower e faapea, e matou te talitonu o loo lagolagoina e Ieova i matou, ma o le pogai lenā e “lē taitai ai ona matou ʻaisi pe talosagaina se fesoasoani a isi”—ma e matou te lē o faia lava!​—Mataio 10:8.

O loo lagolagoina a matou galuega i foaʻi tauofo. E toʻatele tagata e latou te talisapaia la matou galuega tauaʻoaʻoga faale-Tusi Paia, ma foaʻi mai fesoasoani tau tupe. E foaʻi atu ma le lotomalilie e Molimau a Ieova o latou taimi, malosi, tupe, ma isi alagāʻoa ina ia faia ai le finagalo o le Atua i le lalolagi atoa. (1 Nofoaiga a Tupu 29:9) O loo iai i Maota mo Sauniga ma Maota mo Fonotaga ma Tauaofiaga, pusa mo meaalofa e foaʻi ai tupe a i latou e mananaʻo e faia faapea. E mafai foʻi ona faia foaʻi tauofo e ala i la matou Upega tafaʻilagi o le jw.org. E masani lava, o i latou e faia foaʻi e lē o ni tagata mauoloa, ae e pei o le fafine mativa lea sa taʻuleleia e Iesu na lafoina ni tupe iti se lua, i le pusa tupe o le malumalu. (Luka 21:1-4) O lea, e mafai e so o se tasi ona “tuu ese se mea,” ma e faia “e tusa ma le mea ua filifili i lona loto.”​—1 Korinito 16:2; 2 Korinito 9:7.

E matou te talitonu o le a faaauau pea ona uunaʻia e Ieova loto o i latou e mananaʻo e ʻāva iā te Ia i a latou ʻoa,’ ina ia lagolagoina ai le galuega o le Malo ona faataunuuina ai lea o lona finagalo.​—Faataoto 3:9.

• O le ā le mea e ese mai ai la matou faalapotopotoga mai i isi lotu?

• E faapefea ona faaaogā foaʻi tautupe?

O le Maota mo Sauniga, o le nofoaga autū lea o loo talanoaina ai aʻoaʻoga faale-Tusi Paia e faatatau i le Malo o le Atua—le autū o le faiva a Iesu.​—Luka 8:1.

O nofoaga autū na o le tapuaʻiga moni i o matou vaipanoa. O Maota mo Sauniga e faapotopoto ai Molimau a Ieova mo le galuega o le talaʻia o le tala lelei o le Malo. (Mataio 24:14) E eseese le tetelē ma le fausaga o Maota mo Sauniga, ae e fausia uma i fausaga faaonapōnei ma e silia i le tasi faapotopotoga e faaaogāina nisi o na Maota. I nai tausaga talu ai nei, na matou fausiaina ai le faitau sefulu afe o Maota fou mo Sauniga (i se fua faatatau e lima maota i le aso), ina ia talafeagai ma le faatupulaʻia o a matou faapotopotoga. E mafai faapefea ona faataunuu lenei mea?​—Mataio 19:26.

E fausia i meaalofa foaʻi ua faia faapitoa mo lea fuafuaga. O nei meaalofa e auina atu i le ofisa o le lālā, ina ia mafai ona maua e faapotopotoga se tino i tupe e fausia pe toe faaleleia ai se Maota mo Sauniga.

E fausia e tagata tauofo e lē totogiina mai i atunuu ma tulaga eseese. I le tele o atunuu, ua faamaopoopoina ai Vaega Faufale mo Maota mo Sauniga. E ō atu vaega o auauna ma tagata faufale tauofo mai lea faapotopotoga i lea faapotopotoga i totonu o se atunuu, e oo lava foʻi i vaipanoa maotua, ina ia fesoasoani i faapotopotoga i le fausiaina o a latou Maota mo Sauniga. I isi atunuu, ua tofia ni Molimau agavaa e vaavaaia le fausiaina ma le toe faafouina o Maota mo Sauniga i se vaipanoa ua tofia. E ui e toʻatele uso faufale tomai mai i isi vaipanoa e tauofo e fesoasoani i le fausiaina o Maota, ae i nofoaga uma e faia ai faugāfale, o le toʻatele o tagata e galulue tauofo e faia aʻe i sui o le faapotopotoga. E mafaia nei mea uma ona o le agaga o Ieova ma taumafaiga mai le loto a ona tagata.​—Salamo 127:1; Kolose 3:23.

• Aiseā ua taʻua ai nofoaga mo la matou tapuaʻiga o Maota mo Sauniga?

• Ua mafai faapefea ona fausiaina Maota mo Sauniga i le lalolagi aoao?

O Maota mo Sauniga uma a Molimau a Ieova o loo tauaveina ai le suafa paia o le Atua. O lea la, e matou te manatu o le aufaatasi i le tausia pea o le mamā o le maota, faamatagofie ma toe faafou i sona tulaga lelei, o se faaeaga ma o se vaega tāua o la matou tapuaʻiga paia. E mafai ona fai se sao o tagata uma.

Tauofo e fai nisi o galuega faamamā pe a uma le sauniga. Pe a māeʻa sauniga taʻitasi, e faia ma le fiafia e uso ma tuafāfine sina galuega faamamā i le Maota mo Sauniga. E faatasi i le vaiaso ona fai se galuega e faamamā atoa ai mea uma. O se toeaina po o se auauna o le faiva e vaaia le galuega, e masani lava ona mulimuli i se lisi o mea e tatau ona fai. E fuafua i le manaʻoga, e tauofo nisi e salu, solo le fola, tafi le pefu, faatulaga lelei nofoa, faamamā ma faamanogi falelētaʻua, solo faamalama ma fāʻata, tiaʻi lapisi, pe faamamā ma tausia lelei le fanua ma fafo o le maota. E faatasi i le tausaga ona fai se galuega tele tuufaatasi mo le faamamāina o totonu ma fafo. E ala i le faaaofia ai o a matou fanau mo nisi o tiute, ua matou aʻoaʻoina ai i latou ia faaaloalo i lo matou nofoaga mo le tapuaʻiga.​—Failauga 5:1.

Fesoasoani i le faaleleia o so o se mea o loo manaʻomia. I tausaga taʻitasi, e faia ai se iloiloga māeʻaeʻa o le Maota mo Sauniga, i totonu ma fafo. E tusa ai ma lenei iloiloga, e faia ai e lē aunoa se galuega o le tausia lelei ma siaki pea o le Maota ina ia tumau pea ona lelei, e fesoasoani e ʻalofia ai tupe faaalu e lē manaʻomia. (2 Nofoaiga a Tupu 24:13; 34:10) O se Maota mo Sauniga e mamā ma tausia lelei, o se nofoaga tāua lea e tapuaʻi atu ai i lo matou Atua. E ala i le faia o se sao i lenei galuega, e faaalia ai o loo matou faalatalata atu iā Ieova ma e tāua i o matou loto le nofoaga mo le tapuaʻiga. (Salamo 122:1) O lenei vala o se taaʻiga lelei i tagata o le vaipanoa.​—2 Korinito 6:3.

• Aiseā e lē tatau ai ona matou faatamala i le nofoaga mo la matou tapuaʻiga?

• O ā faatulagaga ua faia ina ia tausisia ai pea le mamā o le Maota mo Sauniga?

Pe e te fiafia e fai ni au saʻiliʻiliga ina ia faalolotoina ai lou malamalama i le Tusi Paia? Pe e te fia iloa e faatatau i se mau patino po o se tagata, nofoaga, po o mea o loo taʻua i le Tusi Paia? Pe na e tau tomānatu pe e mafai e le Afioga a le Atua ona fesoasoani iā te oe i se popolega autū o loo e fesagaʻia?

E maua ai tusi ma lomiga e aogā mo saʻiliʻiliga. Atonu e lē o lomiga uma faale-Tusi Paia a Molimau a Ieova i lau gagana o loo iai iā te oe. Ae peitaʻi o loo iai i le potu tusi i le Maota mo Sauniga mekasini ma tusi faatoʻā māeʻa ona lolomiina. Atonu foʻi o loo iai ma ni lomiga eseese o le Tusi Paia, se lomifefiloi lelei, atoa ma isi fesoasoani aogā. E mafai ona e saʻoloto e faaaogā le potu tusi a o leʻi amata po o le māeʻa foʻi o sauniga. Afai ua iai se komepiuta, atonu ua uma ona tuu i ai se Watchtower Library. O le polokalame o le komepiuta lea o loo iai le tele o lomiga ma auala faigofie e mafai ona e suʻe ai se mataupu, se upu, po o se mau.

E aogā mo le ʻauaʻoʻoga i le Sauniga o le Faiva ma le Olaga Faa-Kerisiano. Atonu e mafai ona e faaaogā tatau le potu tusi i le Maota mo Sauniga pe a sauni sau vaega. O le ovasia o le Sauniga o le Faiva ma le Olaga Faa-Kerisiano e gafa ma le vaaia o le potu tusi. O ia e iai le matafaioi ina ia mautinoa ua iai lomiga fou ma ua faatulaga lelei. E mafai e ia po o lau faiaʻoga o le Tusi Paia ona faasino atu le auala e saʻilia ai faamatalaga o loo e manaʻomia. Peitaʻi e lē tatau ona toesea mai ni tusi mai le Maota mo Sauniga. Ma e matou te mananaʻo e taulimaina ma le faaeteete tusi ina ia aua neʻi palapalā.

Ua taʻua i le Tusi Paia e faapea ina ia maua le “poto i le Atua,” e tatau ona tatou lotomalilie e saʻili e pei “o le oloa lilo.” (Faataoto 2:1-5) E mafai ona aogā iā te oe le potu tusi i le Maota mo Sauniga e faia ai au saʻiliʻiliga.

• O ā meafaigaluega mo saʻiliʻiliga e mafai ona maua i le potu tusi i le Maota mo Sauniga?

• O ai e mafai ona fesoasoani iā te oe ina ia faaaogā lelei le potu tusi?

Na fetalai atu Iesu i ona soo: “Ia susulu atu lo outou malamalama i luma o tagata, ina ia latou iloa a outou galuega lelei ma vivii atu ai i lo outou Tamā o i le lagi.” (Mataio 5:16) O le mea lea ua matou faaaogā tatau ai tekinolosi faaonapōnei, e aofia ai le Initaneti. O la matou Upega tafaʻilagi o le jw.org, o le puna aloaʻia o faamatalaga i luga o le Initaneti, e faatatau i talitonuga ma galuega a Molimau a Ieova. O ā mea o loo faaalia mai ai?

O tali mai le Tusi Paia i fesili e masani ona lāgā. E mafai ona e maua tali i nisi o fesili e sili ona tāua lea e masani ona tuufesili ai tagata. O se faataʻitaʻiga, o loo maua i le Initaneti sāvali o le Po o le a Faaiʻuina ea Mafatiaga? ma le Pe e Mafai Ona Toe Feola Mai Ē ua Maliliu? i gagana e silia i le 600. E mafai foʻi ona e maua le Faaliliuga a le Lalolagi Fou i le silia ma le 130 gagana ma le anoanoaʻi o fesoasoani i le faia o suʻesuʻega faale-Tusi Paia, e aofia ai le tusi O ā Aʻoaʻoga Moni a le Tusi Paia?, ma lomiga pito i lata mai o le Watchtower ma le Awake! O le tele o nei lomiga e mafai ona faitau pe faalogo i ai i luga o le Initaneti, pe e mafai foʻi ona kopiina (download) o se MP3, PDF, po o se EPUB. E mafai foʻi ona e lolomiina ni itulau ma tufa atu i se tagata fiafia i lana lava gagana! E maua foʻi vitiō i le tele o gagana a tagata logonoa. E mafai foʻi ona e puʻeina le faitauga o le Tusi Paia, Tala faale-Tusi Paia ma pese mālie ua saunia e te maua ai le fiafia.

Faamatalaga saʻo e uiga i Molimau a Ieova. O loo iai foʻi tala fou ma ata vitiō e faatatau i la matou galuega i le lalolagi aoao, o mea na tutupu e aafia ai Molimau a Ieova, ma la matou galuega fesoasoani i ē mafatia. E mafai ona e maua ai faasilasilaga o tauaofiaga o loma nei ma faamatalaga o fesootaʻiga mo a matou ofisa o lālā.

E ala i nei mea, ua matou faasusulu atu ai le malamalama o le upu moni i vaega pito i mamao o le lalolagi. Ua maua le tele o aogā e tagata uma mai so o se atunuu e aofia ai le Antarctica. E matou te tatalo “ina ia vave ona agaʻi i luma le afioga a Ieova” i le lalolagi atoa, mo le viiga o le Atua.​—2 Tesalonia 3:1.

• E faapefea i le jw.org ona fesoasoani i le tele o tagata ina ia aʻoaʻoina le upu moni o le Tusi Paia?

• O le ā e te manaʻo e maua mai i la matou Upega tafaʻilagi?