Faaopoopoga

O se Feʻau mo Mātua Kerisiano:

I le avea ai o oe o se matua, e te naunau e fesoasoani i lau fanau peleina ina ia tuputupu aʻe lo latou alofa mo Ieova, ma tuuina atu i latou lava iā te ia. E faapefea ona e fesoasoani iā i latou ina ia sauniuni ai mo le papatisoga? O le ā tonu le taimi e latou te agavaa ai mo lenei laasaga tāua?

Na faatonuina e Iesu ona soo: “Ia outou ō atu e fai tagata o nuu uma lava ma soo, ma papatiso atu iā i latou.” (Mata. 28:19) E tusa ai ma lea manatu, o le laasaga muamua lava ina ia agavaa ai mo le papatisoga, o le avea lea ma soo. O se tasi e lē gata e malamalama ma talitonu i aʻoaʻoga a Keriso, ae tatau foʻi ona ola e ōgatusa ma na aʻoaʻoga. E oo lava i fanau lāiti, e mafai ona latou faia lenei mea.

Ia faataatia se faaaʻoaʻoga lelei mo lau fanau, ma ia matuā aʻoaʻo soo i latou i aʻoaʻoga a Ieova. (Teu. 6:6-9) E aofia ai i nei aʻoaʻoga faamatalaga o loo i le tusi Se Olaga Fiafia e Faavavau! O lenei tusi e aʻoaʻoina ai i latou i aʻoaʻoga faavae o le Tusi Paia, ma fesoasoani iā i latou ina ia mafaufau lelei, ma ola e tusa ai ma mataupu silisili o le Tusi Paia. Ia fesoasoani i lau fanau ina ia mafai ona latou faamatalaina o latou talitonuga, i a latou lava upu. (1 Pete. 3:15) O le poto ma faalaeiauga e latou te maua mai iā te oe ma a latou lava suʻesuʻega, tapuaʻiga a le aiga, sauniga a faapotopotoga, ma le iai o ni aumea lelei, o le a fesoasoani iā i latou e agaʻi atu ai i le papatisoga, faapea foʻi pe a māeʻa lo latou papatisoga. Ia tamau pea i o latou mafaufau ni sini faaleagaga.

Ua faapea mai le Faataoto 20:11: “E mafai ona iloa le tama i lana amio pe e lelei ma tonu ana mea e fai.” O ā nisi o amioga e mafai ai ona iloa ua avea se tamaitiiti po o se teineitiiti o se soo o Iesu Keriso, ma ua agavaa e papatiso?

E tatau i se tamaitiiti o loo agaʻi atu i le papatisoga, ona usiusitaʻi i ona mātua (lona matua). (Galu. 5:29; Kolo. 3:20) Ina ua 12 tausaga o Iesu, ua faapea mai le Tusi Paia: “Ua gauaʻi pea o ia [i ona mātua].” (Luka 2:51) O le mea moni, e te lē faatalitalia o le a lelei atoatoa lou alo. Peitaʻi o se tasi e naunau e papatiso, o le a taumafai malosi e mulimuli i le faaaʻoaʻoga a Iesu, ma ia iloa atu o ia o se tasi e gauaʻi i ona mātua.

E na te faaalia foʻi le naunau e aʻoaʻoina upu moni o le Tusi Paia. (Luka 2:46) Pe e manaʻo lou alo e auai i sauniga ma faia ai sona sao? (Sala. 122:1) Pe e naunau o ia e faitau e lē aunoa le Tusi Paia, ma faia ana lava suʻesuʻega?​—Mata. 4:4.

O le tamaitiiti e agaʻigaʻi i luma mo le papatisoga, e taumafai malosi foʻi e faamuamua manaʻoga o le Malo. (Mata. 6:33) E na te iloa lona tiute tauave, o le talanoa atu lea i isi e faatatau i ona talitonuga. E auai i vala eseese o le auaunaga, ma e lē mā e faailoa atu o ia o se Molimau a Ieova i faiaʻoga ma tamaiti o le aʻoga. E na te faatāua ana vaega i le Sauniga o le Faiva ma le Olaga Faa-Kerisiano.

E taumafai malosi foʻi o ia e faatumauina pea lona tulaga mamā tauamio, e ala i le ʻalofia o aumea leaga. (Faata. 13:20; 1 Kori. 15:33) E atagia mai lona taumafai malosi e faatumauina lona tulaga mamā tauamio i mea e fiafia i ai, e pei o musika, ata tifaga, polokalame i le televise, taaloga vitiō ma le faaaogāina o le Initaneti.

E toʻatele fanau ua tali mai i taumafaiga filigā a o latou mātua, faia a latou lava filifiliga e ola e ōgatusa ma le upu moni, ma agavaa mo le papatisoga a o talavou lava. Tau ina ia faamanuia Ieova iā te oe, a o e fesoasoani i lau fanau e ausia lenei laasaga e sili ona tāua i la latou faiā ma Ieova.

Se Feʻau mo le Tagata Talaʻi e Leʻi Papatisoina:

O se faaeaga le auauna faatasi ma le faapotopotoga i le avea ai o se tagata talaʻi e leʻi papatisoina. E faamālō atu i lou agaʻigaʻi i luma faaleagaga. Ua oo ina e iloa le Atua e ala i le suʻesuʻeina o lana Afioga, ma faaalia le faatuatua i ana folafolaga.—Ioa. 17:3; Epe. 11:6.

A o leʻi amata ona e suʻesuʻe ma Molimau a Ieova, atonu sa e auai i se isi lotu, pe atonu foʻi e te leʻi auai lava i se lotu. Atonu sa e faia se gaoioiga e lē ōgatusa ma mataupu silisili o le Tusi Paia. Peitaʻi, ua e faaalia nei lou faatuatua e ala i le salamō, o lona uiga o le matuā faanoanoa lea i mea sesē sa faia i le taimi ua teʻa. Ae e faaalia foʻi lou faatuatua e ala i lou liliu ese, o lona uiga o lou matuā teena lea o se ala sesē, ma maumauaʻi e faia le mea e tonu i le silafaga a le Atua.​—Galu. 3:19.

I le isi itu, atonu ua e iloa tusitusiga paia “talu ona e laʻitiiti.” Ua puipuia ai oe mai i le aafia i amioga e lē faaKerisiano ma agasala matuiā. (2 Timo. 3:15) Ua e aʻoaʻoina le auala e tetee atu ai i omiga mai i aumea, ma isi faaosoosoga ina ia faia mea e leaga i le silafaga a Ieova. Ua e faaalia le faatuatua e ala i le lagolagoina o le tapuaʻiga moni, ma faailoa atu i isi ou talitonuga. Ua toleniina foʻi oe i le faiva faaKerisiano. O lea la ua fai lau lava faaiʻuga, ina ia auauna iā Ieova o se tagata talaʻi e leʻi papatisoina.

O lea, e tusa pe na e iloa Ieova ina ua e matua pe mai lava i lou laʻitiiti, ae atonu o lea ua e manatunatu nei i isi laasaga e lua i lou agaʻigaʻi i luma faaleagaga, o le tuuina atu ma le papatisoga. E te tuuina atu oe lava iā Ieova e ala i le tatalo atu iā te ia, ma faailoa atu i ai lau filifiliga e tuuina atu atoatoa lou ola e auauna ai iā te ia. (Mata. 16:24) Ina ia faailogaina lou tuuina atu, e tatau ona papatisoina oe i le vai. (Mata. 28:19, 20) E ala i le tuuina atu ma le papatisoga, o le a avea ai oe ma faifeʻau tofia a Ieova le Atua. Maʻeu se faaeaga matagofie!

Peitaʻi, e pei ona e iloa mai i lau suʻesuʻega Faale-Tusi Paia, e te ono fesagaʻia le tele o luʻi. Manatua foʻi, e leʻi leva lava ona māeʻa le papatisoga o Iesu, ae ʻave o ia e le agaga i le toafa, ma ua faaosoosoina ai e le Tiapolo.’ (Mata. 4:1) Pe a māeʻa lou papatisoga o se soo o Keriso, e te faatalitalia isi tofotofoga. (Ioa. 15:20) E eseese auala e ala mai ai nei tofotofoga. E te ono fesagaʻia tofotofoga mai i aiga. (Mata. 10:36) Atonu e ulagia oe e tamaiti i le aʻoga, tagata e tou te faigaluega faatasi, ma au uō na iai muamua. Peitaʻi, ia manatua pea le fetalaiga a Iesu o loo i le Mareko 10:29, 30: “E moni ou te fai atu iā te outou, O so o se tasi na te tuua le fale, po o uso, o tuafāfine, o le tinā, o le tamā, o le fanau, po o fanua, ona o aʻu ma le tala lelei, e maua e ia e taʻiselau i le taimi nei, o fale, o uso, o tuafāfine, o tinā, o fanau, ma fanua, faatasi ai ma sauāga, ma le ola e faavavau i le lumanaʻi.” O lea, ia faaauau pea ona faia taumafaiga uma e mafuta vavalalata atu ai iā Ieova, ma ola e ōgatusa ma ana tapulaa amiotonu.

Pe afai ua e fia papatiso, ia faailoa atu i le sooupu o le ʻautoeaina. O fesili o loo mulimuli mai, o le a fai ma faavae o a outou talanoaga ma toeaina e iloa ai po ua e agavaa mo le papatisoga. E mafai ona e autaluina e oe lava fesili nei i au suʻesuʻega masani o le Tusi Paia.

A o e sauniuni mo nei talanoaga, ia faaalu se taimi e te faitau māeʻaeʻa ai ma manatunatu loloto i mau faale-Tusi Paia o loo sii mai. E te ono manaʻo e fai ni au lava faamaumauga i totonu o lenei tusi po o se isi api. E mafai ona e faaaogā na faamaumauga ma vaai i lenei tusi a o faia la outou talanoaga ma toeaina. Afai e faigatā ona e malamalama i se fesili, ia talosaga atu mo se fesoasoani mai i lē o loo faia lau suʻesuʻega Faale-Tusi Paia po o se tasi o toeaina.

Pe a fai a outou talanoaga ma toeaina, aua e te manatu e manaʻomia ona faauumi pe faafaigatā au tali i fesili. O tali faigofie ma tuusaʻo e fai i au lava upu, e sili atu ona lelei. O le tele o fesili, e lelei foʻi pe a e taʻua se mau se tasi pe lua, e faailoa ai faavae Faale-Tusi Paia o au tali.

Afai e leʻi lava lou iloa o aʻoaʻoga faavae o le Tusi Paia, o le a faatulaga e toeaina se auala e fesoasoani ai iā te oe, ina ia mafai ona e faamatalaina i au lava upu le malamalamaga saʻo o le Tusi Paia, ma agavaa ai mo le papatisoga i se taimi mulimuli ane.

[Faaaliga i toeaina: O faatonuga mo le tauaaoina o talanoaga mo tagata o le a papatiso o loo i le itulau e 208-212.]