Ua Fesili Mai le ʻAufaitau
Aiseā e Lē Fai ai se Vaega a Molimau a Ieova i Taua?
Po o fea lava e nonofo ai Molimau a Ieova, ua loa ona iai lo latou talaaga i le lē auai i fetauaʻiga i le va o atunuu po o le toe fetauaʻi o ʻautau a le atunuu lava ia. I le pe ā ma le 50 tausaga ua mavae, na faapea mai ai le Australian Encyclopædia, “E matuā maumauaʻi lava Molimau a Ieova e leai sa latou vaega e fai i taimi o taua.”
O se tasi o māfuaaga autū e lē faia ai se vaega a Molimau i taua, ona e faaleagaina ai o latou lotofuatiaifo o ni Kerisiano. Ua aʻoaʻoina o latou lotofuatiaifo i faatonuga ma faaaʻoaʻoga a le Alii o Iesu Keriso. Na ia faatonuina ona soo e alolofa i o latou tuaoi. Na faatonuina foʻi i latou: “Ia alolofa atu pea i o outou fili, ia faia mea lelei i ē ua ʻinoʻino mai iā te outou.” (Luka 6:27; Mataio 22:39) Ina ua taumafai se tasi o ona soo e puipuia Iesu i se pelu, na faatonu e Iesu o ia: “Ia toe sulu lau pelu i lona faamoega, auā o i latou uma e tago i le pelu, e faaumatia i le pelu.” (Mataio 26:52) O lea la, e ala i upu ma faaaʻoaʻoga, na ia faaalia manino ai i ona soo e lē tatau ona auai i taua.
O le isi māfuaaga e lē auai ai Molimau a Ieova i taua, ona o i latou o sui o se vaega faalelotu i le lalolagi aoao. O le a faatupu e taua le feitagaʻi i le va o uso, ma e tuufaafeagai lenā tulaga ma le faatonuga a Iesu ia latou “fealofani.”—Ioane 13:35.
O taʻiala o le alofa o loo taʻua i luga, e lē o ni talafatu i Molimau a Ieova ae o loo latou ola ai. O se faaaʻoaʻoga, seʻi tagaʻi i lo latou tulaga a o faagasolo le Taua Lona Lua a le Lalolagi, i le 1939-1945. I le Iunaite Setete o Amerika, e sili atu i le 4,300 Molimau a Ieova sa faafalepuipuiina e le malo, ona o le lē faia o sa latou vaega i vaegaʻau. I Peretania, e oo atu i le 1,500 e aofia ai ma fafine e sili atu i le 300, na faafalepuipuiina ona o le mumusu e auai i taua. I Nazi i Siamani, e oo atu i le 270 Molimau na fasiotia ona o le faatonuga a le malo, talu ai lo latou lē mananaʻo e auai i taua. I lalo o le pulega a Nazi, e sili atu i le 10,000 Molimau na faafalepuipuiina, a lē i falepuipui, po o le tuuina i nofoaga o faasalaga mamafa. Na matuā aafia foʻi Molimau i Iapani. O so o se tasi lava na oti sē e pele iā te ia i le Taua Lona Lua a le Lalolagi, po o se isi lava taua, e mafai ona latou mautinoa e leai ma se Molimau a Ieova e tuuaʻia i le oti o se tasi o na tagata.
O le vaaiga a Molimau a Ieova i taua e mafai ona taaofaʻi i upu faaiʻu a Wolfgang Kusserow. I le 1942 na vavaeese ai e ʻau a Nazi le ulu o se talavou Siamani e 20 tausaga le matua, ona sa ia teena le auai i taua. (Isaia 2:4) Na ia faapea atu i ē na faia le faamasinoga ao fitafita: “Sa ou ola aʻe o se tasi o Molimau a Ieova, e tusa ma afioga a le Atua o loo i le Tusi Paia. O le tulafono silisili ma e sili ona paia na ia tuuina mai i tagata: ‘Ia outou alolofa i le Atua ma o outou tuaoi e pei o oe lava iā te oe.’ O loo faapea mai isi faatonuga: “Aua e te fasioti tagata.” Pe na tusia e Lē na foafoaina nei mea uma mo ni laau?”—Mareko 12:29-31; Esoto 20:13.
Ua talitonu Molimau a Ieova ua na o Ieova, le Atua malosi, o le a aumaia le filemu tumau i le lalolagi. E latou te faatalitali iā te ia e faataunuu lana folafolaga, o le a ia ‘faaiʻua taua e oo lava i tuluʻiga o le lalolagi.’—Salamo 46:9.