Pe e Finagalo le Atua e Taʻutino Atu Agasala?

Ua faaauau pea ona avea le taʻutino o agasala a se tasi (po o le kofesio) i se patele po o se faifeʻau, ma vaega o le tapuaʻiga a le tele o lotu. Peitaʻi i lenei lalolagi e lē ano i mea sesē, pe e tatau ma talafeagai ona taʻutino atu agasala?

E TAOFI eseese tagata i lenei mataupu. Na lipotia mai e le nusipepa a Kanata o le National Post se tasi na faapea mai, e ui lava e faigatā ona taʻu atu i se isi le mea sesē ua e faia, ae “e iai le aogā o le taʻutino atu i se tagata o lenā mea, ma tatalo faatasi ma oe, ma faailoa mai le mea e tatau ona e faia.” Ae e ese mai i lenā manatu, ua taʻua i le tusi Bless Me, Father, for I Have Sinned le faamatalaga a se tagata: “O le kofesio o se tasi lenā o tū masani e sili ona faigatā a le Lotu. E matuā faapopoleina ai lava le ʻaulotu.” O ā fa a le Tusi Paia i lenei mataupu?

Le Aʻoaʻoga a le Tusi Paia

O loo iai i le Tulafono na tuu atu e le Atua i le nuu o Isaraelu, ni faatonuga maʻoti i le mea e tatau ona fai pe a agasala se tagata. O se faaaʻoaʻoga, pe a agasala se tasi i lona uso a tagata pe solia se tulafono a le Atua, sa tatau ona ia taʻutino atu i se ositaulaga tofia o le ituaiga o sa Levī, lea e na te faia se togisala mo ia e ala i le ofo atu o se taulaga i le Atua e faamagalo ai le agasala.—Levitiko 5:1-6.

O le ā le tali a le tupu o Tavita i senituri mulimuli ane, ina ua aʻoaʻia o ia e le perofeta o Natano i ana agasala? Na vave ona ia taʻutino atu: “Ua ou agasala iā Ieova.” (2 Samuelu 12:13) Na tatalo foʻi o ia i le Atua ma faatoga atu ina ia alofa mai iā te ia. O le ā na iʻu i ai? Na tusi mulimuli ane Tavita: “Ona ou taʻutino atu lea iā te oe o laʻu agasala, ou te leʻi ufitia foʻi loʻu sesē. Na ou faapea ifo: ‘⁠Ou te taʻutino atu aʻu solitulafono iā Ieova.’ Ma ua e faamagaloina le leaga o aʻu agasala.”—Salamo 32:5; 51:1-4.

Sa finagalo pea le Atua i le faapotopotoga Kerisiano i le uluaʻi senituri T.A., e taʻutino atu a latou agasala. Na uunaʻia e Iakopo, o le ʻafa uso o Iesu ma o se tasi na taʻimua i le faapotopotoga i Ierusalema, ia uso Kerisiano e faapea: “Ia faailoa atu a outou agasala ma tatalo le tasi mo le isi, ina ia faamālōlōina ai outou.” (Iakopo 5:16) O ā la mea e tatau ona taʻutino atu e Kerisiano, ma iā te ai?

O ā Mea e Taʻutino Atu?

O lo tatou tino agasala e tele ai ina tatou faia i aso taʻitasi ni gaoioiga e aunoa ma le mafaufau lelei i ai, pe faaaogā sesē o tatou laulaufaiva ma agasala ai le tasi i le isi. (Roma 3:23) Po o lona uiga e tatau ona taʻutino atu mea sesē uma e tatou te faia i se tagata ua iai le pule?

E ui o agasala uma e inosia e le Atua, ae e silasila ma le alofa mutimutivale o ia i o tatou vaivaiga ona o lo tatou tulaga agasala na fananau mai ma i tatou. O lea, na taʻua ai e le faisalamo: “Ioa e, ana faapea e te mātaulia mea sesē, Ieova e, o ai sē e mafai ona tū atu i ou luma? Auā o oe lava e te faamagaloina agasala, ina ia matataʻu ai iā te oe.” (Salamo 130:3, 4) O le ā la e tatau ona tatou faia pe a tatou sesē ma agasala i isi, ae atonu na faia ma le lē iloa? Ia manatua, o loo aofia ai i le tatalo na aʻoaʻo e Iesu i ona soo, le talosaga lenei: “Ia faamagalo a matou agasala, e pei foʻi ona matou faamagalo atu i ē o agasala mai iā i matou.” (Luka 11:4) Ioe, o le a faamagalo e le Atua i tatou pe afai e tatou te ōle atu iā te ia e ala i le suafa o Iesu.—Ioane 14:13, 14.

Ia mātau mai, na fetalai Iesu e faamagaloina i tatou pe a tatou faamagalo “i ē o agasala mai iā i [tatou].” Na faamanatu atu e le aposetolo o Paulo i ona uso talitonu: “Ia agalelei le tasi i le isi, ia māfana lo outou alofa, ma ia fefaamagaloaʻi ma le lotoatoa, e pei ona finagalo malie le Atua e faamagaloina outou e ala iā Keriso.” (Efeso 4:32) Pe a tatou faamagaloina mea sesē a isi, e tatou te iloa o le a faamagalo e le Atua a tatou mea sesē.

Ae faapefea agasala matuiā e pei o le gaoi, pepelo ma le loto i ai, feusuaʻiga lē mamā, onā ma isi mea? O so o se tasi e faia na agasala, ua ia solia tulafono a le Atua ma ua agasala i le Atua. O le ā la e tatau ona fai?

O Ai e Taʻutino i ai Agasala?

E leʻi tuuina mai e le Atua le pule i tagata e faamagalo ai agasala e faia faasaga iā te Ia; e na o le Atua e faia faapea. O loo taʻua i le Tusi Paia: “Afai e faailoa atu a tatou agasala, e faamaoni ma amiotonu o ia e na te faamagaloina a tatou agasala, ma faamamāina ai i tatou mai i amiolētonu uma lava.” (1 Ioane 1:9) Ae o ai e tatau ona faailoa atu i ai na agasala?

Talu ai e na o le Atua e maua ai le faamagaloga, e tatau la ona taʻutino atu agasala iā te ia. O le mea lenā na faia e Tavita e pei ona taʻua muamua. E faapefea la ona maua le faamagaloga? Ua faapea mai le Tusi Paia: “O le mea lea, inā salamō ia ma liliu, ina ia soloiesea a outou agasala, ma ia oo mai ai le taimi e toe faafouina ai mai iā Ieova lava ia.” (Galuega 3:19) Ioe, e maua le faamagaloga pe afai e lē gata e ioe se tasi i lona sesē ma taʻutino le agasala, ae e filifili foʻi e liliuese mai i le ala sesē. E masani lava e faigatā ona fai lenei laasaga. Ae e mafai ona maua le fesoasoani.

Ia manatua upu a le soo o Iakopo na taʻua muamua: “Ia faailoa atu a outou agasala ma tatalo le tasi mo le isi, ina ia faamālōlōina ai outou.” Na toe faapea mai Iakopo: “E malosi tele le tatalo faatauanau a le tagata amiotonu.” (Iakopo 5:16) E mafai ona avea “le tagata amiotonu” o se “toeaina o le faapotopotoga,” lea na taʻua e Iakopo i le fuaiupu e 14. Ua iai “toeaina” faaleagaga i faapotopotoga Kerisiano, ua tofia e fesoasoani i ē e fia maua le faamagaloga a le Atua. E lē mafai e nei “toeaina” ona faamamā se tasi mai i ana agasala, auā e leʻi tuuina mai i le tagata le pule e faamagalo ai lona uso a tagata, i se agasala ua faia i le Atua.a Ae peitaʻi, ua agavaa faaleagaga i latou e aʻoaʻi ma faasaʻo se tagata ua faia se agasala matuiā, e fesoasoani iā te ia e iloa le mataʻutia o lana agasala, ma ia salamō.—Kalatia 6:1.

Aiseā e Taʻutino ai Agasala?

E tusa po o se agasala matuiā pe e leai, ae ua faaleagaina e lē na faia le agasala lo la va ma lona uso a tagata faapea ma le Atua. O lea, atonu o loo popole o ia. O lenei lagona e māfua ona o o tatou lotofuatiaifo na tuuina mai e le Atua. (Roma 2:14, 15) O le ā e mafai ona fai?

O upu faalaeiau nei o loo taʻua i le tusi o Iakopo: “Pe e iai ea se tasi o outou ua maʻi [faaleagaga]? Inā aami atu ia o toeaina o le faapotopotoga ina ia latou tatalo mo ia, ma uu iā te ia i le suāuu i le suafa o Ieova. O le tatalo e faia i le faatuatua e malosi ai le tagata maʻi, ma o le a faatūina o ia e Ieova. E faamagaloina foʻi o ia pe afai ua agasala.”—Iakopo 5:14, 15.

Ua taʻua foʻi i lenei mau e tatau i toeaina ona tausia manaʻoga o le lafu. E faapefea? E lē na o le faalogologo atu a o taʻutino mai agasala. Ae ona o loo maʻi faaleagaga le tagata, e iai la se mea e manaʻomia ona fai ina ia toe “malosi ai le tagata maʻi.” E lua mea na taʻua e Iakopo e mafai ona fai.

Muamua, e tatau ona “uu iā te ia i le suāuu.” E faasino atu lenei mea i le malosi o le Tusi Paia e faamālōlō ai. Na faapea mai le aposetolo o Paulo “o loo ola le afioga a le Atua ma e matuā malosi . . . e mafai foʻi ona faamasino i manatu ma faanaunauga o le loto,” ma pāʻia ai le loto ma le mafaufau o se tasi. (Eperu 4:12) E mafai e toeaina ona fesoasoani i se tagata ua maʻi faaleagaga e ala i le faaaogā ma le tomai o le Tusi Paia, ina ia iloa ai e le tagata le pogai o le faafitauli, ma gaoioi e toe faalelei lo laʻua va ma le Atua.

Lona lua, o le “tatalo e faia i le faatuatua.” E ui lava o le a lē suia ai e tatalo a toeaina le faatinoina o le faamasinotonu o le Atua, ae o nei tatalo e tāua i le Atua, o lē e finagalo e faamagalo agasala e faavae i le taulaga togiola a Keriso. (1 Ioane 2:2) E nofosauni le Atua e fesoasoani mai i so o se tagata agasala e salamō moni, ma faia “galuega ua tatau mo le salamō.”—Galuega 26:20.

O le māfuaaga autū e taʻutino atu ai se agasala na faia faasaga i se uso a tagata po o le Atua, ina ia maua ai le finagalo malie o le Atua. Na faaalia e Iesu Keriso e tatau ona tatou taumafai muamua e foʻia se faafitauli ma o tatou uso a tagata ma faalelei ma i latou, ona mafai lea ona tatou tapuaʻi atu i le Atua ma se lotofuatiaifo lelei. (Mataio 5:23, 24) Ua faapea mai le Faataoto 28:13: “O lē ua ufiufi i ana solitulafono e lē taulau manuia o ia, a o lē e taʻutino atu ma lafoaʻi ia mea, o le a faaalia i ai le alofa mutimutivale.” Pe a tatou faamaulalo i luma o Ieova le Atua ma talosaga atu mo le faamagaloga, o le a tatou maua lona finagalo malie ma faaeaina i tatou i le taimi tatau.—1 Peteru 5:6.

[Faaopoopoga i lalo]

[Faamatalaga faaopoopo i le itulau 23]

O le a faagalo ma faamagalo e le Atua a tatou mea sesē, pe a tatou ōle atu iā te ia i le suafa o Iesu

[Ata i le itulau 24]

O le māfuaaga autū e taʻutino atu ai se agasala, ina ia maua le finagalo malie o le Atua