Ia Mafuta Atu i le Atua
“E Lē Galo Oe iā te Aʻu”
PE E manatu moni mai Ieova i ona tagata? Pe afai o lea, o le ā le tele e manatu mamafa mai ai i a i latou? E na o le tasi lava le auala e tatou te iloa ai tali i na fesili—e na o le faaaliga mai i le Atua. Ua faaalia manino mai e Ieova ona lagona i le Tusi Paia. Seʻi mātau upu o loo i le Isaia 49:15.
Ina ia faataʻitaʻi mai le tele o lona alofa mo ona tagata, sa faailoa mai e Ieova e ala iā Isaia se tasi o faaaʻoaʻoga e sili ona pāʻia ai loto. Na amata i lona faia o se fesili faatupu manatu: “Pe e mafai ona galo i se tinā lana tama o loo susu, ma lē alofa i le tama tama a lona manava?” E foliga mai e faigofie le tali. E faapefea i se failele ona galo lana tama o loo susu? E faalagolago atoatoa atu lana tama iā te ia i le ao ma le pō, ma e na te manaʻomia lona tinā! Ae e iai se isi uiga o le fesili a Ieova.
Aiseā e tatau ai ona tausia e se tinā lana tama, ma mea uma e na te manaʻomia? Pe e na ona faanā ai le pepe o loo tagi? E leai. O le natura lava o le tinā, e alofa i le “tama a lona manava.” O le veape Eperu ua faaliliuina i le “alofa,” e uiga atu foʻi i le ʻfaaalia o le alofa mutimutivale.’ (Esoto 33:19; Isaia 54:10) O lenei upu Eperu e uiga foʻi i le alofa mutimutivale mo i latou e lē o maua se fesoasoani, pe e vaivai. O le alofa mutimutivale o se tinā i lana tama o loo susu, o se tasi lea o faalogona e sili ona malosi.
E faanoanoa lava, ona e lē o tinā uma e iai le alofa mutimutivale mo a latou pepe o loo naunau atu i o latou suāsusu. Ua faapea mai Ieova: “E galo foʻi i nei tinā.” Ua tatou ola i se lalolagi e toʻatele tamāloloa ma fafine ua ʻlē faamaoni ma lē lotoaiga.’ (2 Timoteo 3:1-5) E iai taimi e tatou te faalogo ai i tinā ua tuulafoaʻi, tiaʻi, ma faileagaina a latou pepe e faatoʻā fananau mai. Ua faapea mai se lomifefiloi faale-Tusi Paia e uiga i le Isaia 49:15: “E agasala tinā, ma i nisi taimi e lē atoatoa ai lo latou alofa ona o lagona lē mafesoasoania o le tino agasala. E oo lava i le alofa e aupito i silisili o le tagata, e mafai ona lē taulau.”
Ae ua faamautinoa mai e Ieova iā i tatou: “E lē galo oe iā te aʻu.” O lea la ua tatou iloa nei le uiga o le fesili na lāgā e Ieova, e pei ona taʻua i le Isaia 49:15. Ua ia faailoa mai i inei le eseesega. I le lē pei o tinā e lē lelei atoatoa, o ē atonu e lē taulau ona faaalia lo latou alofa mutimutivale mo a latou pepe, e lē taitai ona galo iā Ieova ona faaali mai le alofa i ona tagata tapuaʻi, pe a iai se mea e latou te manaʻomia. Ua fetaui lelei ai le faamatalaga a le lomifefiloi lea na taʻua i luga e faatatau i le Isaia 49:15: “O se tasi lenei o faailoaga silisili o le alofa o le Atua, o loo taʻua i le Feagaiga Tuai.”
Pe e lē o se faamāfanafanaga la le iloa e faatatau i le “alofa faapelepele o lo tatou Atua”? (Luka 1:78) Aiseā e te lē aʻoaʻoina ai le auala e faalatalata atu ai iā Ieova? Ua faamautinoa mai e lenei Atua alofa i ona tagata tapuaʻi e faapea: “Ou te lē tuua lava oe, ma ou te lē tuulafoaʻia lava oe.”—Eperu 13:5.
Faitauga Tusi Paia mo Fepuari: