Naunau e Auauna iā Ieova i so o se Nofoaga

NA TUPU lenā mea i le 1949, ae e tele nisi mea na tutupu a o leʻi oo i lenā tausaga. O loʻu tamā o Hendrik, o se faiseevae ma sa teu fanua i Donderen, o se aai laʻitiiti i le itu mātū o Drenthe, i Holani. Na ou fanau i inā i le 1927, ma o aʻu e lona fā i le fanauga e toʻafitu. E tū lo matou fale i se auala pefu i se nuu maotua. O le toʻatele o o matou tuaoi e faifaatoʻaga, ma sa ou fiafia i lenā ituaiga o siʻomaga. I le 1947 ina ua 19 oʻu tausaga, sa ma talanoa ai ma Theunis Been o se tasi o oʻu tuaoi, e uiga i le upu moni. Ou te leʻi fiafia iā Theunis i le taimi muamua. Ae ina ua avea o ia ma Molimau a Ieova, na ou mātauina ai ona uiga faaleuō nai lo o le taimi muamua. Sa ou fia iloa pe aiseā na suia ai ona uiga, o lea, na ou faalogologo ai a o ia talanoa mai i folafolaga a le Atua i se lalolagi parataiso. Na vave ona ou taliaina le upu moni, ma faaauau pea le ma faauōga.a

Iā Me 1948, na amata ai ona ou talaʻi, ae sa ou papatiso iā Iuni 20 i se tauaofiaga i Utrecht. Na amata ona ou paeonia iā Ianuari 1, 1949, ma na tofia aʻu i se faapotopotoga laʻitiiti i Borculo, i le itu i sasaʻe o Holani. Sa ou malaga i inā i se uilavilivae i le mamao e tusa ma le 80 maila (130 km). Na ou manatu e na o le 6 itula ou te malaga ai, ae o le mamafa o timuga ma le malolosi o savili, sa ou malaga ai mo le 12 itula e ui sa faaauau laʻu malaga i se nofoaafi. Na faatoʻā ou taunuu i le afiafi i se aiga Molimau a Ieova sa ou faamautū ai, a o oʻu paeonia ai i lenā vaipanoa.

Ina ua mavae le Taua Lona Lua a le Lalolagi, sa tau leai ni meatotino a tagata. E pau lava mea na iā aʻu o se peleue ma se ofuvae. Sa lē ofi lelei na ofu iā te aʻu. E pei ona ou taʻua i le amataga, sa faigatā le uluaʻi masina i Borculo. Peitaʻi, na faamanuia aʻu e Ieova i le mauaina o suʻesuʻega faale-Tusi Paia. Na tofia aʻu i Amsterdam ina ua mavae le 9 masina.

AUAUNA I SE ISI NOFOAGA

Na ou siitia ese mai i se nuu maotua ma agaʻi atu i Amsterdam, o le aai e sili ona telē i Holani. Sa matuā fuatele mai laʻu faiva. I le masina muamua i Amsterdam, e tele atu lomiga na taliaina e tagata nai lo o le 9 masina ua mavae. E leʻi umi ae oʻu faia le silia ma le 8 suʻesuʻega faale-Tusi Paia. Ina ua mavae le tofiaina o aʻu o se auauna o le faapotopotoga (lea ua taʻua nei o le sooupu a le ʻautoeaina), ae ou maua se faaeaga e faia se lauga i le lautele mo le uluaʻi taimi. Sa ou lagona le popole, ae na ou fiafia ina ua ou siitia atu i se isi faapotopotoga, a o leʻi oo i le aso e fai ai le lauga. E aunoa ma soʻu iloa, o le a ou faia le silia ma le 5,000 lauga i loʻu olaga.

Iā Me 1950, na tofia ai aʻu i Haarlem, lea na ou maua ai se valaaulia i le galuega femalagaaʻi. Sa tau lē mafai ona ou moe mo aso e tolu. Na ou faailoa atu iā Robert Winkler, o se uso sa auauna i le lālā, sa ou lagona le lē agavaa. Ae na ia faapea mai: “Na o le faatumu lava o pepa. O le a e maua ni toleniga.” E leʻi umi, ae oʻu maua se toleniga mo le masina, ma amata ona ou auauna o se auauna o le matagaluega (ovasia o le matagaluega). A o oʻu asiasi atu i se tasi o faapotopotoga, na ou feiloaʻi ai iā Janny Taatgen, o se paeonia e mataʻataʻata, ma o sē e alofa tele iā Ieova ma iai le agaga faataulaga. A o leʻi faaauauina laʻu tala, o le a faamatala atu e Janny le amataga o lana paeonia, ma le taimi na ma masani ai.

AUAUNA O SE ULUGALII

Janny: I le 1945, na avea ai loʻu tinā ma Molimau a Ieova ina ua 11 oʻu tausaga. Sa ia iloa le tāua o le suʻesuʻeina o le Tusi Paia ma lana fanau e toʻatolu, ae sa teena e loʻu tamā le upu moni. Sa aʻoaʻoina e loʻu tinā i matou pe a leai loʻu tamā i le fale.

O le sauniga muamua na ou auai ai o se tauaofiaga sa faia i The Hague i le 1950. Ina ua mavae se vaiaso, ona ou auai lea i le sauniga i le Maota mo Sauniga i Assen (Drenthe). O le ita tele o loʻu tamā na ia tuliesea ai aʻu mai le aiga, ae na faapea mai loʻu tinā: “O lenā ua e iloa le mea e te alu i ai.” Na ou iloa sa faatatau lana tala i uso ma tuafāfine. Na ou nofo i se aiga Molimau a Ieova i lenā vaipanoa, ae sa faigatā pea loʻu tulaga ona o loʻu tamā. O lea, na ou siitia atu ai i le faapotopotoga i Deventer (Overijssel), lea e pe ā ma le 60 maila (95 km) le mamao. Ona o aʻu o se talavou, na afāina ai loʻu tamā i le malo ona o lona tuliesea o aʻu mai le aiga. Na toe talia aʻu e loʻu tamā. E ui na ia lē taliaina le upu moni, ae sa ia faatagaina loʻu auai i sauniga ma talaʻiga.

E leʻi umi ona ou toe foʻi i le aiga, ae maʻi tigāina loa loʻu tinā ma sa ou faia uma ai feʻau i le fale. E ui i lea, sa faaauau pea ona ou agaʻigaʻi i luma faaleagaga. Na ou papatiso i le 1951 ina ua 17 oʻu tausaga. Ina ua toe malosi loʻu tinā i le 1952, ona matou paeonia lagolago faatasi lea ma tuafāfine paeonia e toʻatolu mo le lua masina. Sa matou nonofo i luga o se vaa ma talaʻi i aai e lua i Drenthe. I le 1953, sa avea ai aʻu ma paeonia sauatoa. Ina ua mavae le tausaga, na asia la matou faapotopotoga e se ovasia matagaluega talavou e igoa iā Markus. Na ma faaipoipo iā Me 1955, auā na ma manatu e sili atu ona lelei pe a ma auauna iā Ieova o se ulugalii.​—Fai. 4:9-12.

Markus: Ina ua uma ona ma faaipoipo, sa tofia muamua maʻua o ni paeonia i Veendam (Groningen). Sa ma nonofo i se tamaʻi potu, pe tusa ma le fitu futu le lautele ae sefulu futu le umi (2 x 3 m). O pō uma lava e toso ese ai la ma laulauʻai ma nofoa e lua, ina ia mafai ona tatala i lalo le moega e faamoe i le puipui o le potu.

Ina ua māeʻa le ono masina, na valaaulia i maʻua i le galuega femalagaaʻi i Belgium. I le 1955, e pe ā ma le 4,000 tagata talaʻi i lenā atunuu. Ae ua silia ma le 24,000 le aofaʻi o tagata talaʻi i le taimi nei. I Flanders i le itu i mātū o Belgium, e tautatala tagata i le gagana o loo faaaogā foʻi i Holani. Peitaʻi, e ese le faaleoga o upu e tautala ai tagata Belgium. O lea, sa manaʻomia ai ona ma faamasani i ai.

Janny: O le galuega femalagaaʻi e manaʻomia ai le agaga faataulaga. Sa ma faaaogāina uilavilivae e asiasi ai i faapotopotoga ma nonofo i fale o uso ma tuafāfine. E leai so ma fale e faamautū ai a o asiasi atu i faapotopotoga. O lea, sa ma nonofo pea seʻia oo i le Aso Gafua, ona faatoʻā malaga lea i le isi faapotopotoga i le taeao o le Aso Lua. Sa ma manatu pea i le auaunaga o se faamanuiaga mai iā Ieova.

Markus: I le taimi muamua sa ma lē masani i uso ma tuafāfine i le faapotopotoga, ae sa latou faaalia le agalelei ma le agaga talimālō. (Epe. 13:2) A o faagasolo tausaga, e tele taimi sa ma asia ai faapotopotoga uma e tautatala i le gagana Holani i Belgium, ma maua ai le tele o faamanuiaga. O se faataʻitaʻiga, sa toetoe o uso ma tuafāfine uma i na faapotopotoga ua ma iloaina, ma e pele i latou iā i maʻua. Ua vaaia le faitau selau o talavou ua tuputupu aʻe ma agaʻigaʻi i luma faaleagaga, tuuina atu i latou iā Ieova ma faamuamua manaʻoga o le Malo i o latou olaga. O se fiafiaga le vaai atu i le toʻatele o i latou o loo auauna ma le faamaoni iā Ieova i le auaunaga faataimi atoa. (3 Ioa. 4) O le “fefaalaeiauaʻi” ua faigofie ai ona ma faaauau pea ma le lotoatoa i lo ma tofiga.​—Roma 1:12.

SE LUʻI MA SE FAAMANUIAGA

Markus: Ina ua uma ona ma faaipoipo, sa ma naunau lava e auai i le Aʻoga o Kiliata. Sa ma aʻoaʻoina le gagana faa-Peretania e lē itiiti mai i le itula i aso uma. Peitaʻi, sa lē faigofie ona aʻoaʻoina le faa-Peretania mai i tusi, o lea, na ma filifili ai e malaga atu i Egelani i taimi o faigāmālōlōga, ina ia aʻoaʻo le gagana a o talaʻi ai i inā. I le 1963, na ma maua ai ni tusi se lua mai i le ofisa ulu i Brooklyn, o le tasi mo aʻu ma le isi mo Janny. Sa valaaulia aʻu mo Kiliata mo le 10 masina. O le autū o le aʻoga o le toleniina o uso ma aʻoaʻoina i latou i le auala e faagaoioi ai le faalapotopotoga. E toʻa 100 na valaaulia i le vasega, ma o le 82 o i latou o uso.

Janny: I laʻu tusi, sa talosagaina ai aʻu ina ia iloilo ma le tatalo pe ou te lotomalie e nofo i Belgium, a o auai atu Markus i Kiliata. Ou te taʻutino atu, sa ou faanoanoa. E foliga mai ua lē faamanuia e Ieova aʻu taumafaiga. E ui i lea, na ou toe tomānatu i le fuafuaga o le Aʻoga o Kiliata, ina ia fesoasoani i ē e auai e faataunuu le galuega talaʻi i le lalolagi aoao. Na ou lotomalie loa ou te nofo, ma na tofia aʻu e paeonia faapito i le aai o Ghent i Belgium faatasi ma Anna ma Maria Colpaert, o ni paeonia faapito ua iai le poto masani.

Markus: Talu ai sa manaʻomia ona faaleleia laʻu faa-Peretania, sa valaaulia ai aʻu e malaga atu i Brooklyn mo le 5 masina a o leʻi amata le aʻoga. Sa ou galue i matagaluega o Auaunaga ma Felaʻuaʻiga. O le auauna i le ofisa ulu ma fesoasoani i le saunia o lomiga mo felaʻuaʻiga i Asia, Europa ma Amerika i Saute, na atili ai ona ou malamalama i le autasi o le ʻauuso i le lalolagi aoao. Ou te manatua pea le uso o A. H. Macmillan, o lē sa galue o se ovasia femalagaaʻi i taimi o le uso o Russell. E ui ua loa lona soifua ma logonoa, ae sa faamaoni pea o ia e auai i sauniga uma a le faapotopotoga. Sa matuā pāʻia ai loʻu loto ma aʻoaʻoina ai aʻu, e aua lava neʻi manatu māmā i aufaatasiga faa-Kerisiano.​—Epe. 10:24, 25.

Janny: E tele taimi o le vaiaso sa ma fetusiaʻi ai ma Markus. E ui ina misia e le tasi le isi, ae sa fiafia Markus i toleniga na ia maua mai i Kiliata, ma na ou fiafia foʻi i laʻu faiva. Ina ua toe foʻi mai Markus mai i le Iunaite Setete, sa ou faia ni suʻesuʻega faale-Tusi Paia e 17. E leʻi faigofie le valavala mo le 15 masina, ae ou te iloa na faamanuia e Ieova i maʻua i faataulaga na ma faia. I le aso na foʻi mai ai Markus, sa tuai ona taunuu mai le vaalele mo ni nai itula. O lea, ina ua ma feiloaʻi, na opo e le tasi le isi ma fetagisi. Talu mai lenā taimi, e ma te leʻi toe valavala.

TALISAPAIA FAAEAGA UMA I LE AUAUNAGA

Markus: Iā Tesema 1964 ina ua ou toe foʻi mai i Kiliata, na tofia ai i maʻua e auauna i le Peteli. E ma te leʻi iloaina i lenā taimi e lē tumau lo ma tofiga i inā. Ina ua mavae le 3 masina, na tofia i maʻua i le galuega itumalo i Flanders. Ina ua auina atu Aalzen ma Els Wiegersma o ni misionare i Belgium, na tofia loa i laʻua i le galuega itumalo ae ma toe foʻi i le Peteli ma ou galue ai i le Matagaluega o le Auaunaga. Mai le 1968 i le 1980, sa fesuisuiaʻi pea o ma tofiga mai i le auauna i le Peteli agaʻi i le galuega femalagaaʻi. Mulimuli ane, mai i le 1980 seʻia oo i le 2005, na ou galue ai foʻi o se ovasia itumalo.

E ui i le fesuisuiaʻi o a ma tofiga, ae e lē galo iā i maʻua lo ma tuuina atu e auauna iā Ieova ma le lotoatoa. E ma te fiafia i so o se faaeaga, ma e ma te manatu e fesoasoani so o se suiga i le ma auaunaga e faaauiluma ai manaʻoga o le Malo.

Janny: O le faaeaga manaia sa sili ona ou fiafia ai o le malaga atu lea ma Markus i Brooklyn i le 1977 ma Patterson i le 1997, mo aʻoga mo sui o le Komiti o le Lālā.

E SILAFIA E IEOVA O TATOU MANAʻOGA

Markus: I le 1982, na faia ai se taotoga o Janny ma toe malosi ai. Ina ua mavae le 3 tausaga, na ofoina mai ai ma le alofa e le faapotopotoga i Louvain se fale mo maʻua, i luga aʻe o le Maota mo Sauniga. O le taimi muamua lea mai le 30 tausaga, ua iai so maʻua lava fale. I Aso Lua uma, pe a ma sauni e asiasi atu i se faapotopotoga, sa manaʻomia ona ou savali i luga ma lalo i fasitepu e 54 mo le tele o taimi e laʻu i lalo a ma atopaʻu! Ae i le 2002, na ma lotofaafetai ina ua fai le fuafuaga e ma te siitia i le fogāfale pito i lalo. Ina ua 78 oʻu tausaga, na tofia ai maʻua o ni paeonia faapito i le aai o Lokeren. Ua ma fiafia ua mafai ona ma auauna iā Ieova i lenei vala, ma mafai pea ona ma talaʻi i aso uma.

Janny: E silia ma le 120 tausaga o ma auauna faatasi i le auaunaga faataimi atoa. Ua ma tofo totino i le moni o folafolaga a Ieova e na te lē “tuulafoaʻia lava” i tatou. Pe a tatou auauna ma le faamaoni iā te ia, o le a ʻleai se mea e tatou te matitiva ai.’​—Epe. 13:5; Teu. 2:7.

Markus: Na tuuina atu o ma ola iā Ieova a o ma talavou. E ma te leʻi saʻilia ni o maʻua lava lelei. Sa ma lotomalilie e talia so o se faaeaga na tuuina mai. Na ma talitonu e lē tāua po o ā o tatou tulaga, ae e sili atu ona tāua le auauna iā Ieova.