Ua Saunia e le Atua le Auala e Laveaʻi ai Tagata

Na folafola atu e le Atua i le tane faamaoni o Aperaamo, o le “fanau” lea na valoia e tupuga mai iā te ia, ma e ala mai i lenā fanau o le a maua ai e “nuu uma” faamanuiaga. (Kenese 22:18) I tausaga mulimuli ane, na ō atu ai Iakopo ma lona aiga i Aikupito ma na faatoʻateleina ma avea ai ma nuu o Isaraelu.

Na faapologaina e le tupu sauā o Farao tagata Isaraelu seʻia oo i le taimi na tulaʻi mai ai Mose, ma faasaʻolotoina le nuu mai Aikupito. Na latou uia le Sami Ulaula lea na faavavega ona vaeluaina. Ina ua māeʻa lenā, ona tuuina atu lea e Ieova i le nuu o Isaraelu o tulafono lea e aofia ai Tulafono e Sefulu, e taʻitaʻia ma puipuia ai i latou. Na patino na tulafono i taulaga e faia mo le faamagaloga o agasala. Na faagaeeina e le Atua Mose e faailoa atu i le nuu o Isaraelu, o le a Ia auina mai se isi perofeta, ma o ia lenā o le “fanau” na folafolaina mai.

I le silia ma le 400 tausaga mulimuli ane, na folafola atu ai e le Atua i le tupu o Tavita, o le “fanau” lea na valoia i le faatoʻaga i Etena, o le a avea ma tupu i se malo e tumau e faavavau. O lenā fanau o le Mesia, o lē na tofia e le Atua e laveaʻiina tagata ma toe faia le lalolagi o se Parataiso.

E ala mai iā Tavita ma isi perofeta, na faasolosolo ona faailoa mai e le Atua le tele o faamatalaga e faatatau i le Mesia. Na valoia mai o ia o sē e lotomaulalo ma agalelei. E lē toe iai se oge, faigātaua, ma ni faiga lē tonu i lana pulega. E lē gata i lea, o le a nonofo fifilemu tagata, ae o le va foʻi o tagata ma meaola. O le a lē toe iai se maʻi, mafatiaga ma le oti—o ni mea e leʻi aofia i le uluaʻi fuafuaga a le Atua—ma o le a toetutū mai ē ua maliliu.

E ala i le perofeta o Mika na valoia mai ai e le Atua, o le a fanau le Mesia i Peteleema, ae na valoia mai e le perofeta o Tanielu o le a fasiotia le Mesia. Peitaʻi, e toe faatūina mai e le Atua le Mesia ma tofia o ia ma Tupu i le lagi. Na valoia mai foʻi e Tanielu o le a aveesea e le Malo faa-Mesia isi faigāmalo uma o loo iai. Pe na taunuu moni lava le valoaga e faatatau i le Mesia?

​—Faavae mai i le Kenese mataupu e 22-50, Esoto, Teuteronome, 2 Samuelu, Salamo, Isaia, Tanielu, Mika, Sakaria 9:9.