Tala Lelei mo Tagata Uma

O le toetū o Iesu na matuā faamalosia ai le faatuatua o ona soo ma atili ai ona latou maelega. E pei o le aposetolo o Paulo, lea na femalagaaʻi solo i Asia Itiiti ma Metitirani, faamaopoopo faapotopotoga ma faamalosia Kerisiano ina ia tumau pea i le faamaoni e ui i tofotofoga ma teteega. E ui i nei luʻi, ae na faatuputeleina ma salalau atu le faa-Kerisiano.

Sa faafalepuipuiina foʻi Paulo. Peitaʻi, na faaauau pea ona ia tusi atu i faapotopotoga Kerisiano ina ia faalaeiau ma avatu fautuaga iā i latou. Na ia lapataʻi atu foʻi o le a iai ē e liliuese mai i le tapuaʻiga moni. O le taʻitaʻiga a le agaga paia o le Atua, na iloa ai e Paulo o le a ō mai “luko feʻai” o ē e “faauiga sesē mea” ma “fetoso ese ai soo e mulimuli atu iā i latou.”​—Galuega 20:29, 30.

Na amata ona tupu lenā tulaga ina ua oo ane i le faaiʻuga o le uluaʻi senituri. Atonu o le taimi foʻi lenā na faamatalaina ai e Iesu i le aposetolo o Ioane le Faaaliga, o se vaaiga o mea o le a tutupu i le lumanaʻi. E pei ona tusia e Ioane, e lē mafai e i latou e tetee po o ē taufaasesē, ona taofia le Atua mai le faataunuuina atoatoa o lana uluaʻi fuafuaga mo le lalolagi ma le fanau a tagata. O le a faalogo ʻnuu uma, ituaiga uma, gagana uma, ma tagata uma,’ i le tala lelei e faatatau i le Malo o le Atua. (Faaaliga 14:6) O le a toe avea le lalolagi ma Parataiso, ma o so o se tasi e manaʻo e faia le finagalo o le Atua, o le a ola ai i lenā Parataiso.

Pe e lē o se “tala lelei” ea lenā? Afai o le tulaga lenā, ia suʻesuʻe atili e faatatau i le feʻau a le Atua mo tagata o loo i le Tusi Paia, faapea le auala e mafai ona aogā ai mo oe i le taimi nei ma le lumanaʻi.

E mafai ona e faitau i le Tusi Paia i le initaneti i le www.jw.org. I lenā lava tuatusi, e mafai ona e faitau ai i polosiua e pei o le The Bible—What Is Its Message? ma le Tala Lelei Mai i le Atua! faapea foʻi le tusi O ā Aʻoaʻoga Moni a le Tusi Paia?, faatasi ai ma isi lomiga o loo talanoaina ai le māfuaaga e mafai ai ona tatou maufaatuatuaina le Tusi Paia, faapea le auala e faatatauina ai fautuaga aogā o loo iai i o tatou olaga. E mafai foʻi ona e fesili i Molimau a Ieova mo nisi faamatalaga.

​—Faavae mai i le Galuega, Efeso, Filipi, Kolose, Filemoni, 1 Ioane, Faaaliga.