“Faauta! Ou te Faia ia Fou Mea Uma Lava”

Pe e te moomoo ina ia e maua ma lou aiga se olaga umi ma soifua mālōlōina? Ae ā se lalolagi e aunoa ma ni tigā, mafatiaga, faapea ma le oti? O na moomooga e lē na o se miti, auā e le o toe umi ae faataunuuina lea o le lalolagi fou amiotonu, e pei ona fuafuaina e Ieova le Atua. Mātau le auala e faataunuu ai lana fuafuaga e pei ona faamatala mai i le Faaaliga 21:3-5.​—Faitau.

“E na te [Atua] soloiesea foʻi loimata uma i o latou mata.” (Faaaliga 21:4) O ā ituaiga o loimata o le a ia soloiesea? E lē o faasino atu i loimata ona o le fiafia, ae o loimata e māfua mai i mafatiaga ma faanoanoaga. E lē faapea e tau ina soloiesea e le Atua loimata, peitaʻi o le a ia aveesea atoatoa māfuaaga o loimata maligi e pei o mafatiaga ma faanoanoaga.

“E lē toe iai se oti.” (Faaaliga 21:4) Pe e iai se isi mea e sili atu nai lo le oti lea e māfua ai ona maligi loimata? O le a laveaʻia e Ieova tagata usiusitaʻi mai i āuga o le oti. E faapefea? E ala i le aveesea o le māfuaaga moni o le oti, o le agasala tuufaasolo mai iā Atamu. (Roma 5:12) O le a taʻitaʻia e Ieova tagata usiusitaʻi i le ola lelei atoatoa, e ala i le taulaga togiola a Iesu.a “Ona faaumatia lea o le fili mulimuli, o le oti lea.” (1 Korinito 15:26) O le a ola mālōlōina ma ola e faavavau tagata faamaoni e pei ona finagalo i ai le Atua.

“E lē toe iai foʻi se tigā.” (Faaaliga 21:4) O le ā le ituaiga o tigā o le a lē toe iai? O le a lē toe iai se tigā i le mafaufau, tino ma faalogona, lea e māfua mai i le agasala ma le tino lē lelei atoatoa, o loo mafatia ai le faitau miliona o tagata.

Ua toe o se aga ona tatou iai lea i se olaga e lē toe iai se oti, tigā, po o se loimata maligi. Atonu e te ono fesili: O fea o le a tupu ai lenā mea? Po o faasino atu lenā folafolaga i le ola ai i le lagi? E leai. Mātau māfuaaga e lua. Muamua, i le amataga o le folafolaga o loo iai upu nei, “ua iai i tagata le faleʻie o le Atua,” ma e na o le lalolagi o loo ola ai tagata. (Faaaliga 21:3) Lona lua, o loo faamatala mai ai se lalolagi “e lē toe iai se oti,” se lalolagi sa iai le oti ae o lea o le a lē toe iai. E leʻi iai se oti i le lagi, ae ua leva ona iai i le lalolagi. E manino mai la, o le folafolaga a le Atua e faatatau i se olaga fiafia, o le a faataunuuina i le lalolagi.

E finagalo Ieova ina ia tatou talitonu i lana folafolaga i le lalolagi fou amiotonu. Na ia faamautinoa atili lana folafolaga ina ua ia faapea mai: “Faauta! Ou te faia ia fou mea uma lava.” Ona ia toe fetalai atili mai lea: “O upu nei e faamaoni ma moni.” (Faaaliga 21:5) Aiseā e te lē aʻoaʻo atili ai e faatatau i le auala e avea ai oe ma ē pele iā te oe o ni tagata tapuaʻi fiafia, lea o le a molimauina le faataunuuga o folafolaga a le Atua?