TALIINA FESILI FAALE-TUSI PAIA

Pe e na o le pau ea lenei o le olaga?

Pe na e taumānatu pe e iai se isi olaga e sili atu nai lo o le tau ina taaalo, faigaluega, faaipoipo, tausia se aiga, ma ola matutua? (Iopu 14:1, 2) Ua faailoa mai i le Tusi Paia, e oo lava i tagata e sili ona atamamai ua taumānatu foʻi i lenei tulaga.​—Faitau le Failauga 2:11.

Pe e iai se fuafuaga o lenei olaga? Muamua, ia fesili ifo: Na faapefea ona iai le ola? O le maofa o nisi i le ofoofogia o le auala na faia ai o tatou faiʻai ma le tino atoa, ua latou faapea mai ai e iai Sē e atamai na foafoaina mea uma. (Faitau le Salamo 139:14.) Pe afai o le tulaga lenā, e tatau la ona iai se māfuaaga na ia foafoaina ai i tatou. O le iloaina o lenā māfuaaga o le a atili ai ona iai se fuafuaga o o tatou olaga.

Aiseā na foafoaina ai tagata?

Na faamanuia e le Atua le uluaʻi ulugalii ma tuu i ai se tofiga matagofie. Sa finagalo le Atua ia la faatumu le lalolagi, ia fai le lalolagi ma parataiso, ma ia la ola e faavavau.​—Faitau le Kenese 1:28, 31.

Na tuai ona faataunuu le finagalo o le Atua ina ua fouvale le tagata i lana pule. Ae e leʻi suia ai le finagalo o le Atua pe e na te faagaloina ai i tatou. Ua faamautinoa mai i le Tusi Paia o loo galue pea le Atua ina ia faasaoina tagata faamaoni, ma faataunuu lona finagalo mo le lalolagi. O lea, e finagalo le Atua ia e tofo i le olaga moni lea sa tatau ona iai. (Faitau le Salamo 37:29.) Ia iloilo le Tusi Paia, ma aʻoaʻoina mai ai pe faapefea ona e maua aogā mai i le finagalo o le Atua.