Pe e Tatau i Kerisiano Ona Faamanatuina le Kerisimasi?

E talitonu le faitau miliona o tagata i le lalolagi o le tū masani o le Kerisimasi, o le faamanatuina lea o le aso na fanau ai Iesu Keriso. Peitaʻi, pe na e tomānatu pe faamata sa faamanatuina le Kerisimasi e i latou na vavalalata iā Iesu, e pei o ona aposetolo ma ona soo? Po o e iloa foʻi faamatalaga a le Tusi Paia e faatatau i aso fanau? O le iloaina o tali i na fesili, e mafai ona fesoasoani iā i tatou e iloa ai pe e tatau i Kerisiano ona faamanatuina le Kerisimasi.

Muamua, e lē o taʻua i le Tusi Paia ni aso fanau na faia mo Iesu po o se isi lava tagata tapuaʻi faamaoni o le Atua. E na o le toʻalua tagata o loo taʻua i le Tusi Paia na faamanatuina o la aso fanau. O i laʻua uma e lē o ni tagata tapuaʻi o Ieova, le Atua o le Tusi Paia, ma na iai ni mea leaga na tutupu ina ua faamanatuina o la aso fanau. (Kenese 40:20; Mareko 6:21) E tusa ai o le faamatalaga i le Encyclopædia Britannica, na teena e uluaʻi Kerisiano le “tū faapaupau o le faamanatuina o aso fanau.”

E lē o taʻua i le Tusi Paia le aso tonu na fanau ai Iesu. Ua faapea mai le McClintock and Strong’s Cyclopedia, “E lē mafai ona iloa le aso na fanau ai le Keriso mai i le F[eagaiga] F[ou] po o, se isi lava faamatalaga.” O le mea moni, pe ana faapea e finagalo Iesu e faamanatu e ona soo lona aso fanau, semanū e na te faailoa mai le aso tonu lava na fanau ai.

Lua, e lē o faamauina i le Tusi Paia na faamanatu e Iesu po o se tasi o ona soo le Kerisimasi. E tusa ai ma le New Catholic Encyclopedia, na muamua taʻua le faamanatuina o le Kerisimasi “i le Chronograph a Philocalus, o se kalena Roma na tusia i le tausaga 336 [T.A.].” E manino mai o le taimi lenā ua leva ona māeʻa le tusiaina o le Tusi Paia, ma ua mavae le tele o senituri talu ona soifua Iesu i le lalolagi. O lea, ua faapea mai ai le McClintock and Strong “o le faamanatuina o le Kerisimasi e lē mai i le Atua, pe faavae mai foʻi i le F[eagaiga] F[ou].”a

I le avea ai o Iesu ma Faiaʻoga Sili, na ia aumaia ai ni faatonuga manino i mea e manaʻomia ona faia e ona soo, ma o loo faamauina nei faatonuga i le Tusi Paia. Peitaʻi e lē o aofia ai le faamanatuina o le Kerisimasi. E pei lava ona lē manaʻo se faiaʻoga e faia e tamaiti o lana vasega mea e leʻi faatonuina i latou e fai, e faapena foʻi ona lē manaʻo Iesu e “faia [e ona soo] mea e sili atu nai lo o mea ua tusia” i Tusitusiga Paia.​—1 Korinito 4:6.

Ae i le isi itu, e tasi le aso tāua na masani ona faamanatuina e uluaʻi Kerisiano, o le faamanatuga lea o le maliu o Iesu. O Iesu lava ia na fetalai i ona soo i le vaitaimi e faamanatuina ai lenā aso, ma faaali iā i latou le auala e fai ai. O loo faamauina i le Tusi Paia na faatonuga patino, faapea le aso tonu lava na maliu ai Iesu.​—Luka 22:7, 19; 1 Korinito 11:25.

Ua tatou iloa mai i lenei mataupu o le Kerisimasi o le faamanatuina lea o le aso na fanau ai se tasi, ma e leʻi mulimuli uluaʻi Kerisiano i lenā tū faapaupau. E lē o taʻua foʻi i le Tusi Paia na faamanatuina e Iesu po o se isi lava le Kerisimasi. O le iloaina o nei faamatalaga moni, ua faamaonia ai e le faitau miliona o Kerisiano i le lalolagi e lē tatau ona latou faamanatuina le Kerisimasi.