Fesili Mai le ʻAufaitau

Aiseā e faaata mai ai i lomiga a Molimau a Ieova le aposetolo o Paulo, o se tane e tula le ulu pe e tau leai ni lauulu?

O le mea moni, e lē mafai ona mautinoa se tasi i aso nei pe na faapeʻī foliga o Paulo. O ata o Paulo i a tatou lomiga, o ata na tusia e le ʻautusiata ae e lē o ni ata na faavae i ni faamaoniga mai i suʻesuʻega o toegamea i le eleele.

Peitaʻi, e iai ni nai faamaoniga e iloa ai foliga vaaia o Paulo. O se faataʻitaʻiga, na taʻua e le Zion’s Watch Tower o Mati 1, 1902, se tasi o na faamaoniga: “E tusa ai ma foliga vaaia o Paulo: . . . O le tala lenei a le tusi ʻActs of Paul and Thecla,’ . . . lea na tusia pe tusa o le 150 T.A., o loo faamatalaina ai Paulo ma atonu o le faamatalaga sili lea ona manino ma saʻo. O loo taʻua ai foliga o Paulo e faapea, ʻe puupuu, tula le ulu, e lē sasaʻo lelei ona vae, tino lelei, māfiafia ona fulufulu mata, ma e umī lona isu.’”

Ua faapea mai le lomifefiloi o le Oxford Dictionary of the Christian Church (lomiga 1997) e faatatau i na tusitusiga anamua: “E mafai ona faapea atu atonu e moni nisi o na faamatalaga o le talafaasolopito.” Na faatāua e tagata i uluaʻi senituri le ʻActs of Paul and Thecla.’ E faamaonia lea i le iai i aso nei o manusikulipi e 80 o lenā tusi i le gagana Eleni, faapea foʻi ma isi gagana. O lea la, o a tatou ata o foliga vaaia o le aposetolo o Paulo, e ōgatusa ma nisi o faamaoniga mai i aso anamua.

E ui i lea, ia manatua e iai mea e sili atu ona tāua nai lo o foliga vaaia o Paulo. E oo lava foʻi i le taimi na faatino ai lana faiva, na faapea mai nisi tagata tetee e faatatau iā Paulo: “A faatasi mai o ia e vaivai, o ana upu foʻi e faatauvaa ia.” (2 Kori. 10:10) Aua neʻi galo iā i tatou, na avea Paulo ma Kerisiano ona na faaali faavavega atu Iesu iā te ia. Ia tatou mafaufau foʻi i mea na faataunuu e Paulo, “o le ipu ia ua filifilia” mo Keriso, ʻe talaʻi atu le igoa o Iesu i nuu ese.’ (Galu. 9:3-5, 15; 22:6-8) Ia mafaufau foʻi i le tele o aogā ua tatou aʻoaʻoina mai i tusi o le Tusi Paia na tusia e Paulo, e ala i le taʻitaʻiga a le agaga o Ieova.

E leʻi faamaualuga Paulo i mea na ia ausia a o leʻi avea o ia o se Kerisiano, ma e na te leʻi faamatalaina foʻi ona foliga vaaia. (Galu. 26:4, 5; Fili. 3:4-6) Na ia taʻutino mai: “O aʻu o lē e aupito faatauvaa o le ʻauaposetolo, ma e lē tatau ona taʻua aʻu o se aposetolo.” (1 Kori. 15:9) Na tusi foʻi o ia mulimuli ane: “Ua tuuina mai iā te aʻu, o lē e itiiti ifo i le tagata aupito i faatauvaa o le ʻaupaia, lenei agalelei faifua ina ia ou folafola atu le tala lelei i nuu ese, e faatatau i oloa e lē masuʻesuʻeina a Keriso.” (Efe. 3:8) Ioe, e sili atu ona tāua lenā feʻau nai lo o le popole pe na faapeʻī foliga vaaia o Paulo.