“Ia Alolofa i le ʻAuuso Atoa”

Ua sili atu ona manaʻomia ona tatou faatatauina i aso nei upu faagaeeina o loo i le ulutala, lea na tusia i le toetoe lua afe tausaga ua mavae. (1 Pete. 2:17) E faapefea ona tatou alolofa i se ʻauuso i le lalolagi aoao? E faapefea ona faamautinoa e lē mou atu lo tatou alofa, a o iai i lenei lalolagi ua aunoa ma se alofa? (Mata. 24:12) A o e matamata i le vitiō Our Whole Association of Brothers, vaai pe mafai ona e taliina fesili o loo mulimuli mai.

(1) O anafea na avea aloaʻia ai i tatou ma vaega o lo tatou ʻauuso faa-Kerisiano? (2) O ā gaoioiga e tolu o loo tofu sao uma i ai lo tatou ʻauuso i le lalolagi aoao? (3) Ua faaalia faapefea e o tatou uso le maumauaʻi e talaʻi (a) i laufanua tetele i Alaska, (e) i uafu tetele i Europa, ma (i) i le vaomāoa o Peru? (4) Aiseā e lē tatau ai ona manatu o le talaʻiga o se galuega e lē tāua? (5) Aumai ni faaaʻoaʻoga i le auala ua faamāfanafana ma felagolagomaʻi ai Molimau a Ieova i taimi o (a) mafuiʻe, (e) afā, ma (i) taua i le va o tagata o atunuu lava ia. (6) O ā auala e mafai ona tatou faatinoina ai le faailoga ua iloga ai lo tatou ʻauuso Kerisiano? (Ioa. 13:35) (7) O ā aogā o le galulue faatasi e fausia a tatou Maota mo Sauniga? (8) Na faapefea ona tumau faaleagaga o tatou uso i Europa i Sasaʻe ma Rusia, i le taimi a o faasāina le galuega? (9) O ā ni taumafaiga ua faia e le toʻatele o Molimau i aso nei ina ia auai ai i tauaofiaga, ma aiseā? (10) Ua faapefea ona faamalosia e lenei vitiō lou maumauaʻi e (a) tapuaʻi iā Ieova i le autasi ma ou uso i sauniga faa-Kerisiano, (e) fesoasoani i isi i taimi e manaʻomia ai se fesoasoani, ma (i) faamaoni e talaʻi i so o se taimi e tusa lava po o ā tulaga? (11) E faapefea ma o ā taimi e tatou te faaaogā ai lenei vitiō i le talaʻiga?

O le māfuaaga autū ua avea ai i tatou ma vaega o lo tatou ʻauuso Kerisiano, ona o le alolofa iā Ieova. O lea e tatou te naunau ai e aʻoaʻoina e faatatau iā te ia, aʻoaʻo isi e uiga iā te ia, ma alolofa i ē e alofa i ai Ieova. Pe a tatou fesoasoani atu iā i latou, ia faafetai atu iā Ieova auā o lo tatou ʻauuso Kerisiano, o se meaalofa mai iā te ia. Tau ina ia faaauau ona tatou alolofa mo le ʻauuso atoa, a o lata mai le iʻuga o lenei lalolagi lē alofa!