Se Vitiō e Amata ai Suʻesuʻega Faale-Tusi Paia
Ua mafai nei e le toʻatele o tagata ona matamata i se vitiō puupuu ua faamatuaina Aiseā e Suʻesuʻe ai le Tusi Paia? i le jw.org. O lenei vitiō ua fuafuaina ina ia uunaʻia ai tagata fiafia e faia se suʻesuʻega faale-Tusi Paia e aunoa ma se totogi. E mafai ona e matamata i ai pe a e tagaʻi i le vaega “Talosaga mo se Suʻesuʻega Faale-Tusi Paia” i la tatou tuatusi i le initaneti, pe e faaaogā le QR (quick response) code, lea o loo lomia i le pito i tua o sāvali fou uma. O nisi nei o auala e mafai ona tatou faaaogāina ai lenei vitiō.
Pe a faia sau toe asiga, ia fai atu i lē e ana le fale: “E mafai ona ou faaali atu se vitiō puupuu o loo faamatala ai le auala e maua ai tali i au fesili faale-Tusi Paia?” Afai e fiafia i ai le tagata, ona faaali atu lea iā te ia le vitiō mai i lau telefoni, pe faaaogā ai foʻi lana komepiuta.
Pe afai e te ofoina se sāvali a o e talaʻi lē fuafuaina po o loo e talaʻi foʻi i nofoaga faitele, e mafai ona e faasino atu i le tagata le QR code ma fai i ai e faaaogā ai lana telefoni, pe afai o loo maua ai lea polokalame. Talu ai o le tele o gagana ua mafai ona faaaogāina ai lenei code ina ia e alu saʻo ai i le vitiō i la tatou tuatusi i le initaneti, e mafai la ona e faaali atu lenei vitiō i so o se taimi mai i lau telefoni feaveaʻi.
Ia faailoa atu le vitiō pe faaali atu foʻi i ē e tou te faigaluega ma aʻoʻoga faatasi, o tauaiga ma ē masani. Ia imeli atu iā i latou le auala vave (link) e mafai ai ona latou matamata i le vitiō i le initaneti.
O le faaaogā lelei o lenei vitiō, o le a mafai ai ona tatou amata ni suʻesuʻega faale-Tusi Paia, ma avatu ai le fesoasoani faaleagaga i “ē ua saunia o latou loto mo le ola e faavavau.”—Galu. 13:48.