Faamanuiaga mo i Latou e Usiusitaʻi i le Atua

Na taʻua e le perofeta o Mose, o le usiusitaʻi i poloaʻiga a le Atua o le a tatou maua ai ana faamanuiaga. (Teuteronome 10:13; 11:27) O le fefefe neʻi faasala i tatou e le Atua, e lē o le māfuaaga lea e tatou te usiusitaʻi ai iā te ia. O uiga matagofie o le Atua e uunaʻia ai i tatou e usiusitaʻi iā te ia, ona e tatou te alolofa ma mananaʻo e ʻalofia le faia o se mea e ono faanoanoa ai o ia. “O le alofa lenei i le Atua, ia tatou tausi i ana poloaʻiga.”​—1 Ioane 5:3.

Ae e faapefea i le usiusitaʻi i le Atua ona tatou maua ai ana faamanuiaga? Ia mātau auala nei e lua.

1. O LE USIUSITAʻI I LE ATUA E TATOU TE MAUA AI LE ATAMAI

“O aʻu o Ieova, lou Atua, o Lē o loo aʻoaʻo oe i mea e aogā iā te oe, . . . e taʻitaʻiina oe i le ala e ao ona e ui ai.”​—ISAIA 48:17.

E silafia ma saunia e Ieova le Atua o Lē na foafoaina i tatou, le taʻitaʻiga e tatou te manaʻomia. Pe a tatou mananaʻo e fesoasoani ana aʻoaʻoga ia tatou faia ai ni filifiliga atamai, e tatau ona aʻoaʻoina mai i le Afioga a le Atua po o le ā e finagalo o ia e tatou te faia, ma faatatauina i o tatou olaga.

2. O LE USIUSITAʻI E TATOU TE MAUA AI LE FIAFIA

“Amuia i latou e faalogo i le afioga a le Atua ma tausi i ai!”​—LUKA 11:28.

I aso nei, e faitau miliona i latou ua maua le fiafia moni ona o le usiusitaʻi i le Afioga a le Atua. Mo se faataʻitaʻiga, seʻi mātau se tamāloa i Sepania e maitaitagofie ma e feutagaʻi ma isi i se auala sauā, e aofia ai ma lana avā. I se tasi aso, na ia faitau ai i tusitusiga a le perofeta o Mose e faatatau i le atalii o Iakopo o Iosefa, o sē e agamalu. Na faatau atu Iosefa o se pologa ma faafalepuipui e aunoa ma se sala, peitaʻi, na tumau pea ona agamalu o ia, toʻafilemu ma faamagalo atu. (Kenese, mataupu 37-45) Na taʻutino mai lenei tamāloa: “O le mafaufau i le faaaʻoaʻoga a Iosefa na uunaʻia ai aʻu e atiaʻe le agamalu, agalelei ma le amio pulea. O le iʻuga, ua ou maua ai le olioli i se olaga fiafia.”

Ua saunia mai i le Afioga a le Atua le tele o isi taʻiala i le auala e feutagaʻi ai ma isi. O le a faamatala auʻiliʻili i le mataupu o loo sosoo mai nei taʻiala.