Le Suafa o Ieova—Aiseā e Tāua ai iā Iesu?

1-2. (a) O le ā na faia e Iesu i le pō a o leʻi fasiotia o ia? (e) O ā fesili o le a talanoaina i lenei mataupu?

UA OO i le afiafi o le Aso Tofi o Nisani 14, 33 T.A., o le taimi lea ua lata ina faalataina, faamasinoina, taʻusala, faapuapuagatia ma fasiotia Iesu. Ua faatoʻā uma ona faia sa latou talisuaga faapitoa i se potu pito i luga ma ona aposetolo faamaoni, ona ia fai atu lea o ni ana toe upu faalaeiau iā i latou. A o latou leʻi tuua le potu pito i luga, na faia ai e Iesu se tatalo tāua. Na faamauina e le aposetolo o Ioane lenā tatalo i le Ioane mataupu 17.

² O le ā ua faailoa mai i le tatalo a Iesu, e faatatau i le mea na ia manatu mamafa ai i lenā taimi? Ua faapefea i lenā tatalo ona tatou iloa ai le mea na sili ona tāua iā te ia, a o faia lana faiva i le lalolagi? Seʻi o tatou talanoa i tali o na fesili.

“UA OU FAAILOA ATU LOU SUAFA IĀ I LATOU”

3. O le ā na taʻua e Iesu e faatatau i le suafa o Ieova, ma o le ā na ia uiga i ai? (Ioane 17:​6, 26)

³ Na faapea mai Iesu i lana tatalo: “Ua ou faailoa atu lou suafa iā i latou.” E faalua ona taʻua e Iesu ua ia faailoa atu le suafa o Ieova i ona soo. (Faitau le Ioane 17:​6, 26.) O le ā na ia uiga i ai? Pe na ia faailoa atu iā i latou se suafa e latou te leʻi iloa muamua? Talu ai o soo o Iesu o ni tagata Iutaia, na latou iloa lelei la o le suafa o le Atua, o Ieova. E faitau afe taimi o loo taʻua ai lenā suafa i Tusitusiga Eperu. O lea, e leʻi uiga atu Iesu i le suafa patino o le Atua, ae na ia aʻoaʻoina i latou i le ituaiga o Atua e iai Lē e ou le suafa o Ieova. E leai se isi na sili ona faaatagia mai le finagalo o Ieova, o ana gaoioiga ma galuega, faapea ona uiga, nai lo o Iesu.

4-5. (a) Ia faataʻitaʻi mai le uiga o lo tatou iloa lelei o se tasi pe a taʻua lona igoa. (e) Na faapefea ona iloa lelei e soo o Iesu, Lē e ou le suafa o Ieova?

⁴ Ina ia faataʻitaʻi, seʻi faapea e iai se toeaina o lau faapotopotoga e igoa iā Tavita, ma o lana galuega o se fomaʻi tipitipi. Atonu ua tele tausaga o e iloa le uso. Ae i se tasi aso, na faafuaseʻi ai ona ave oe i le falemaʻi, ma ua ia faia sou taotoga ma faasaoina ai lou ola. I le taimi lenei, pe e lē moni ua sili atu mea e te talisapaia ma iloa lelei, pe a taʻua le igoa o lenā uso? E lē gata e te vaai iā Tavita o se toeaina o le faapotopotoga ua leva ona e iloa, ae o se fomaʻi foʻi na faasaoina lou ola.

⁵ I se tulaga talitutusa, ua leva ona iloa e soo o Iesu le suafa o Ieova. Ae ua sili atu mea ua latou iloa ma talisapaia pe a taʻua lenā suafa, ona o le faiva a Iesu. E faapefea? Talu ai na faaatagia atu e Iesu uiga o lona Tamā i mea uma na ia faia, ma ana fetalaiga. O lea, na “iloa” lelei e ona aposetolo Ieova, e ala i le faalogologo i le auala na aʻoaʻo ai Iesu ma mātauina le auala na ia feutagaʻi ai ma isi.—Ioa. 14:9; 17:3.

“O LOU SUAFA LEA, NA E TUUINA MAI IĀ TE AʻU”

6. O le ā na uiga i ai Iesu ina ua ia taʻua, ua tuuina atu iā te ia le suafa o le Atua? (Ioane 17:​11, 12)

⁶ Na taʻua e Iesu i lana tatalo ona soo ma faapea mai: “Ia e leoleo iā i latou ona o lou suafa lea na e tuuina mai iā te aʻu.” (Faitau le Ioane 17:​11, 12.) Po o le uiga o lenā manatu ua faaigoaina Iesu iā Ieova? E leai. Ina ua taʻua e Iesu i lana tatalo le suafa o Ieova, na ia faapea mai “o lou suafa.” O lea, e leʻi avea le suafa o Ieova ma suafa patino o Iesu. O le ā la na uiga i ai Iesu ina ua ia taʻua, ua tuuina atu iā te ia le suafa o le Atua? Muamua, na avea Iesu ma sui o Ieova ma o lana Fofoga Fetalai. Na ia afio mai i le suafa o lona Tamā, ma faia galuega mamana i lenā suafa. (Ioa. 5:43; 10:25) Lua, o le uiga o le suafa o Iesu, “O Ieova o le Faaolataga.” O lea, e iai se fesootaʻiga o le suafa o Ieova ma le suafa o Iesu.

7. Aiseā e faapea atu ai o fetalaiga a Iesu e mai iā Ieova? Ia faataʻitaʻi.

⁷ O se faataʻitaʻiga, pe a auina atu se tasi i le suafa o le tupu e faaoo atu se feʻau i isi, e vaai i faamatalaga a lenā tagata o ni faamatalaga mai i le tupu. I se tulaga talitutusa, na fai Iesu ma sui o Ieova ma e vaai i ana fetalaiga e mai iā Ieova, ona na auina mai o ia i le suafa o Ieova.—Mata. 21:9; Luka 13:35.

8. O le ā le uiga o le iai iā Iesu o le suafa o Ieova a o leʻi afio mai i le lalolagi? (Esoto 23:​20, 21)

⁸ I le matafaioi a Iesu o le Upu, o loo avea ai o ia o se Fofoga Fetalai a Ieova, e faaooina atu faamatalaga ma faatonuga i isi atalii agaga o Ieova faapea ma tagata. (Ioa. 1:​1-3) E foliga mai o Iesu le agelu lea na auina atu e Ieova e tausia tagata Isaraelu, a o latou iai i le toafa. Ina ua fetalai atu Ieova i tagata Isaraelu ina ia usiusitaʻi i lenā agelu, na ia faapea atu: “Ona o loo iā te ia loʻu igoa.”a (Faitau le Esoto 23:​20, 21.) O le iai iā Iesu o le suafa o Ieova, e uiga atu i le fai o ia ma sui o Ieova, ma o ia le tagata autū e faapaia ma faasilisilia le suafa o lona Tamā.

“TAMĀ E, IA FAAMAMALUINA LOU SUAFA”

9. E faapefea ona iloa na matuā tāua iā Iesu le suafa o Ieova? Ia faamatala.

⁹ E pei ona tatou talanoaina, e oo lava i le taimi a o leʻi afio mai Iesu i le lalolagi, na matuā tāua iā te ia le suafa o Ieova. E lētioa faatāua e Iesu le suafa o Ieova i mea uma na ia faia a o iai i le lalolagi! A o lata ina faaiʻuina lana faiva, na ia faapea atu: “Tamā e, ia faamamaluina lou suafa.” I le taimi lava lenā, na tali mai ai lona Tamā ma le leotele mai i le lagi: “Ua ou faamamaluina loʻu igoa, ma o le a ou toe faamamaluina.”—Ioa. 12:28.

10-11. (a) Na faapefea ona faamamaluina e Iesu le suafa o Ieova? (Tagaʻi foʻi i le ata.) (e) Aiseā e manaʻomia ai ona faasilisilia ma faapaiaina le suafa o Ieova?

¹⁰ Na faamamaluina foʻi e Iesu le suafa o lona Tamā. E faapefea? O se tasi o auala, o lona faaalia atu lea o uiga ma gaoioiga matagofie a lona Tamā i ana feutagaʻiga ma isi. Peitaʻi, e tele isi mea e aofia ai i le faamamaluina o lenā suafa. Na manaʻomia e Iesu ona faapaia ma faasilisiliab le suafa o Ieova. Na faaalia e Iesu le tāua o lenei mea ina ua ia aʻoaʻo ona soo i le tatalo faaaʻoaʻo: “Lo matou Tamā e o i le lagi, ia faapaiaina lou suafa.”—Mata. 6:9.

¹¹ Aiseā e manaʻomia ai ona faasilisilia ma faapaiaina le suafa o Ieova? Talu ai i le faatoʻaga i Etena, na faia ai e Satani le Tiapolo ni pepelo e taʻuleagaina ai le suafa o Ieova le Atua. Na faapea mai Satani, o Ieova o Sē e pepelo ma o loo ia taofia se mea lelei mai iā Atamu ma Eva. (Kene. 3:​1-5) O le faia faapea, ua peiseaʻī ai ua faapea mai Satani e lē saʻo le auala o loo faia ai e Ieova mea. O tuuaʻiga pepelo a Satani ua taʻuleagaina ai le suafa o Ieova po o lona talaaga. Mulimuli ane, i aso o Iopu, na taʻua ai e Satani e pau le māfuaaga e auauna ai tagata iā Ieova, ona o mea e latou te maua mai iā te Ia. O lenā tuuaʻiga ua atagia mai ai, e pei e leai se tagata e mafai ona alofa faamaoni iā Ieova ma auauna pea iā te ia, pe a tulaʻi mai faigatā. (Iopu 1:​9-11; 2:4) Na manaʻomia se taimi ina ia faamaonia ai po o ai e pepelo, po o Ieova po o Satani.

“OU TE FOAʻIINA ATU LOʻU OLA”

12. O le ā na lotomalie Iesu e fai ona o lona alofa iā Ieova ma lona suafa?

¹² O le alofa tele o Iesu iā Ieova, na naunau ai e faia mea uma e na te mafaia ina ia faapaia ma faasilisilia ai le suafa o Ieova. Na fetalai o ia: “Ou te foaʻiina atu loʻu ola.” (Ioa. 10:​17, 18) Ioe, na oo lava ina lotomalie o ia e maliu mo le suafa o Ieova.c Na fulitua uluaʻi tagata lelei atoatoa o Atamu ma Eva iā Ieova, ma aufaatasi atu iā Satani. I se faaeseesega, na lotomalie Iesu e afio mai i le lalolagi ma faamaonia atu lona alofa iā Ieova, e ala i le tumau faamaoni i lona olaga atoa. (Epe. 4:15; 5:​7-10) Na tumau faamaoni Iesu i lona olaga atoa, seʻia oo lava ina fasiotia i le laau e faapuapuagatia ai. (Epe. 12:2) O lona faia faapea, na faamaonia ai lona alofa iā Ieova, ma e pele iā te ia le suafa o lona Tamā.

13. Aiseā e faapea atu ai o Iesu le tagata e sili ona fetaui e na te faamaoniaina e pepelo Satani? (Tagaʻi foʻi i le ata.)

¹³ Na faamaonia mai e Iesu i lona olaga atoa le matuā pepelo o Satani. (Ioa. 8:44) Na silafia lelei e Iesu lona Tamā nai lo o se isi lava. Pe ana iai lava ni faamaoniga o tuuaʻiga a Satani, semanū la e silafia lelei e Iesu. Peitaʻi, na maumauaʻi Iesu e puipuia le talaaga lelei po o le suafa o Ieova, ona na ia iloa e pepelo na tuuaʻiga. E oo lava i le taimi na foliga mai ai e pei ua tuulafoaʻia o ia e Ieova, na lotomalie Iesu e maliu nai lo o le fulitua i lona Tamā alofa.—Mata. 27:46.d

“UA OU . . . FAAMĀEʻAINA LE GALUEGA NA E TUUINA MAI IĀ TE AʻU E FAI”

14. Na faapefea ona tauia e Ieova le faamaoni o Iesu?

¹⁴ I le tatalo a Iesu i le pō a o leʻi maliu, na talafeagai lelei lona faapea mai: “Ua ou . . . faamāeʻaina le galuega na e tuuina mai iā te aʻu e fai.” Na ia maufaatuatuaina Ieova e tauia lona faamaoni. (Ioa. 17:​4, 5) E leʻi iʻuvale le maufaatuatuaina e Iesu o lona Tamā, auā na toe faatūina o ia e Ieova e ala i le faasaʻoloto mai i le oti. (Galu. 2:​23, 24) Na foaʻi atu foʻi e Ieova iā te ia se tulaga e sili ona maualuga i le lagi. (Fili. 2:​8, 9) Mulimuli ane, na avea Iesu ma Tupu o le Malo o le Atua. O le ā o le a faataunuuina e lenā Malo? Ua faapea mai le vaega lona lua o le tatalo faaaʻoaʻo: “Ia oo mai lou Malo. Ia faia lou [Ieova] finagalo i le lalolagi, e pei ona faia i le lagi.”—Mata. 6:10.

15. O ā isi mea o le a faataunuuina e Iesu?

¹⁵ E lē o toe umi ona tauina lea e Iesu o se taua faasaga i fili o le Atua, ma faaumatia tagata amioleaga iā Amaketo. (Faaa. 16:​14, 16; 19:​11-16) Pe a uma, ona ia lafo lea o Satani “i le tō,” lea o le a saisaitia ai o ia ma e lē mafai ona ia toe faia se gaoioiga. (Faaa. 20:​1-3) O le a toe faafoʻisia e Iesu le filemu ma le tulaga lelei atoatoa o tagata, a o faagasolo lana Pulega i le Afe Tausaga. O le a ia toe faatutū mai ē ua maliliu, ma faafoʻisia le lalolagi o se parataiso. O le a faataunuuina le finagalo o Ieova.—Faaa. 21:​1-4.

16. O le ā o le a faataunuuina i le faaiʻuga o le Pulega o le Afe Tausaga?

¹⁶ O le ā e tatou te faatalitalia o le a tupu i le faaiʻuga o le Pulega o le Afe Tausaga? O le a lelei atoatoa tagata uma, ma o le a lē toe iai se agasala. E lē toe manaʻomia e tagata ona talosaga mo le faamagaloina o a latou agasala e faavae i le togiola a Iesu. E lē toe manaʻomia foʻi ona avea Iesu o se Puluvaga, po o le 144, 000 o ni ositaulaga, ina ia maua ai e tagata se faiā lelei ma Ieova. O le a “faaumatia . . . le fili mulimuli, o le oti lea” na tuufaasolo mai iā Atamu. O le a lē toe iai ni tuugamau, auā o le a toe faatutūina uma mai ē ua maliliu. O le a avea tagata uma o ni ē e lelei atoatoa.—1 Kori. 15:​25, 26.

17-18. (a) O le ā o le a tupu i le faaiʻuga o le Pulega o le Afe Tausaga? (e) O le ā o le a faia e Iesu pe a oo i le faaiʻuga o lana pulega? (1 Korinito 15:​24, 28) (Tagaʻi foʻi i le ata.)

¹⁷ O le ā le isi mea o le a tupu i le faaiʻuga o le Pulega o le Afe Tausaga? E iai se mea faapitoa o le a tupu i lenā taimi. O le a faamutaina le finauga lea o loo aafia ai le faapaiaina o le suafa o Ieova. E faapefea? I le faatoʻaga o Etena, na tuuaʻia ai e Satani e faapea o Ieova o sē e pepelo, ma e lē alofa le auala o loo ia pulea ai tagata. Talu mai lenā taimi, na faaauau pea ona faapaiaina le suafa o Ieova e i latou na faamamaluina ma faaaloalogia o ia. O lea, i le faaiʻuga o le Pulega o le Afe Tausaga, o le a faasilisilia atoatoa ai lona talaaga po o lona suafa. O le a ia faamaonia manino mai ai, o ia o lo tatou Tamā alofa i le lagi.

¹⁸ I le faaiʻuga o le Pulega o le Afe Tausaga, o le a iloa ai e tagata uma le pepelo o tuuaʻiga a Satani. O le ā o le a faia e Iesu pe a oo i le faaiʻuga o lana pulega? Po o le a ia mulimuli i le faaaʻoaʻoga a Satani, ma fouvale iā Ieova? E leai. (Faitau le 1 Korinito 15:​24, 28.) O le a tuuina atu e Iesu le Malo i lona Tamā, ma gauaʻi atu i Lana pule. Ioe, o le a lē pei Iesu o Satani, auā e lotomalie Iesu e tuuina atu le pule uma iā Ieova ona o lona alofa iā te Ia.

19. O ā faalogona o Iesu i le suafa o Ieova?

¹⁹ E lētioa finagalo malie Ieova e tuuina atu Lona suafa iā Iesu. Na faamaonia mai e Iesu i se auala lelei atoatoa le talafeagai ona avea o ia ma sui o lona Tamā. O lea, o ā faalogona o Iesu i le suafa o Ieova? E sili atu ona tāua iā te ia nai lo o se isi lava mea. Na lotomalie o ia e maliu mo lenā suafa, ma o le a lotomalie foʻi e toe faafoʻi atu le pule uma iā Ieova, i le faaiʻuga o lana Pulega o le Afe Tausaga. E faapefea ona tatou faaaʻoaʻo iā Iesu? O le a talanoaina lenā fesili i le mataupu o le a sosoo mai.