Pe na Faaipoipo Iesu? Pe na Iai ni Uso ma ni Tuafāfine o Iesu?

Tali a le Tusi Paia

Ua faaalia manino mai i le Tusi Paia e leʻi faaipoipo Iesu, ae e lē o iai se mau maʻoti e taʻua ai na iai sana avā.a O nisi nei o faamaoniga.

1. E masani ona taʻua i le Tusi Paia le aiga o Iesu, faapea fafine na fesoasoani iā te ia i lana faiva. O loo faamatala ai foʻi ni fafine na iai i le taimi na fasiotia ai o ia. Peitaʻi, e lē o taʻua ai na iai se avā a Iesu. (Mataio 12:46, 47; Mareko 3:​31, 32; 15:40; Luka 8:​2, 3, 19, 20; Ioane 19:25) E leai se faamatalaga a le Tusi Paia e faatatau i se avā a Iesu, ona e leʻi faaipoipo o ia.

2. Na iai nisi e leʻi faaipoipo ona na mananaʻo e faatele lo latou taimi e auauna ai i le Atua. O lea, na fetalai Iesu i ona soo e faatatau iā i latou na: “O lē ua lotomalie e lē faaipoipo, ia nofofua pea o ia.” (Mataio 19:10-​12) Na faataatia e Iesu le faaaʻoaʻoga mo i latou e filifili e lē faaipoipo, ina ia faatele ai lo latou taimi e auauna i le Atua.​—Ioane 13:15; 1 Korinito 7:​32-​38.

3. A o lata ina maliu Iesu, na ia talosaga atu i se tasi ina ia tausia lona tinā. (Ioane 19:25-​27) Pe ana faapea na faaipoipo Iesu pe fai sana fanau, semanū e na te faamautinoa foʻi e iai sē e tausia i latou.

4. E leai se faamatalaga a le Tusi Paia e faatatau i ni feutagaʻiga a Iesu ma sana avā. Peitaʻi, o loo taʻua i le Tusi Paia le faaaʻoaʻoga a Iesu e avea ma faataʻitaʻiga lelei mo tane. O se faaaʻoaʻoga, ua faapea mai le Efeso 5:​25: “O outou tane, ia faaauau ona alolofa atu i a outou avā, e pei foʻi ona alofa le Keriso i le faapotopotoga, ma foaʻi mai lona ola mo le faapotopotoga.” Pe ana faapea na faaipoipo Iesu, semanū e taʻua i lenei mau lana faaaʻoaʻoga lelei atoatoa o se tane faaipoipo.

Pe na iai ni uso po o ni tuafāfine o Iesu?

Ioe, e pe tusa ma le toʻaono uso ma tuafāfine o Iesu, pe toʻatele atu foʻi. O nisi o ona uso o Iakopo, Iosefa, Simona, ma Iuta, ma e pe ā ma le toʻalua ona tuafāfine. (Mataio 13:54-​56; Mareko 6:3) O i latou na o le fanau moni a Maria le tinā o Iesu, ma lana tane o Iosefa. (Mataio 1:​25) O loo taʻua i le Luka 2:7 o Iesu “o le ulumatua” a Maria, e faaalia ai na iai isi fanau a Maria.

O nisi o manatu sesē e faatatau i uso o Iesu

E manatu le toʻatele o tagata na tumau ona avea Maria ma taupou i lona olaga atoa. Ona o lenā talitonuga, ua latou faapea mai ai e iai se isi uiga o le upu “uso.” O se faaaʻoaʻoga, ua manatu nisi o uso o Iesu o atalii matutua o Iosefa i se isi ana avā na fai muamua. Peitaʻi, ua faaalia e le Tusi Paia na maua e Iesu le aiā tatau faaletulafono i le nofoālii o le tupu o Tavita, e ala iā Iosefa. (2 Samuelu 7:​12, 13; Luka 1:​32) Pe ana faapea na iai se isi atalii o Iosefa e matua atu iā Iesu, semanū o ia lenā e iai le aiā tatau faaletulafono e avea ma suli o Iosefa.

Pe e mafai ona faatatau atu le upu “uso” i soo o Iesu po o ona uso faaleagaga? E leai, auā e feteenaʻi lenā ma le manatu o loo taʻua i le Ioane 7:5: “O le mea moni, e leʻi faatuatua ona uso iā te ia.” E manino mai i le Tusi Paia, e ese uso o Iesu mai i ona soo.​—Ioane 2:​12.

E manatu isi o uso o Iesu o ona tausoga. Peitaʻi, e maʻoti upu o loo faaaogā i Tusitusiga Paia Eleni mo le “uso,” “aiga,” ma le “tausoga.” (Luka 21:16; Kolose 4:​10) Ua faapea mai le toʻatele o faitofā o le Tusi Paia o uso ma tuafāfine o Iesu, o ona tei foʻi na. Ua taʻua i se lomifefiloi: “O le auala faigofie e tatou te malamalama ai i le upu ʻuso,’ e faasino atu i le fanau tama a Maria ma Iosefa, o lona uiga o uso o Iesu o ē e latou te tinā faatasi.”—The Expositor’s Bible Commentary.b