UA FESILI MAI TALAVOU
Aiseā e Tatau ai Ona Ou Tatalo?
E tusa ai o se suʻesuʻega, o le 80 pasene o talavou i Amerika e tatalo, ae o le afa o i latou na e tatalo i aso uma. O le māfuaaga lena ua taumānatu ai nisi o i latou: Po o le tatalo ua na o se auala e faaleleia ai oʻu faalogona, pe iai se isi ona aogā e sili atu?
O le ā le tatalo?
O le tatalo o se fesootaʻiga tuusaʻo ma Lē na foafoaina mea uma. Seʻi mafaufau i le uiga o lenā mea! E silisili Ieova i tagata uma lava, “ae peitaʻi e lē o mamao o ia mai iā i tatou taʻitoʻatasi.” (Galuega 17:27) O le mea moni, o loo iai i le Tusi Paia se valaaulia mataʻina: “Ia outou mafuta vavalalata atu i le Atua, ona mafuta vavalalata mai lea o ia iā te outou.”—Iakopo 4:8.
E faapefea ona e mafuta vavalalata atu i le Atua?
O se tasi o auala, o le tatalo. O le auala lena e te talanoa ai i le Atua.
O se isi auala o le suʻesuʻe o le Tusi Paia. O le auala lena e “talanoa” mai ai le Atua iā te oe.
O lena ituaiga fesootaʻiga, o le tatalo ma le suʻesuʻe o le Tusi Paia, o le a fesoasoani iā te oe e atiaʻe ai se faauōga malosi ma le Atua.
“O le talanoa atu iā Ieova, po o le fesootaʻi atu i Lē Silisili Ese, o se tasi o faaeaga sili ua maua e tagata.”—Jeremy.
“O le faailoa atu o oʻu faalogona loloto iā Ieova e ala i le tatalo, ua ou lagona ai le vavalalata atu iā te ia.”—Miranda.
Po o faafofoga mai le Atua?
E tusa pe e te talitonu i le Atua, pe e te tatalo atu foʻi iā te ia, e ono faigatā lava ona talia le manatu, o loo ia faafofoga mai. Peitaʻi, o loo taʻua i le Tusi Paia Ieova o le “Faafofoga tatalo.” (Salamo 65:2) O loo ia valaaulia oe e “taʻu atu [ou] popolega uma iā te ia.” Aiseā? “Auā o loo manatu mamafa mai o ia iā te [oe].”—1 Peteru 5:7.
Ia mafaufau i ai: Po o e faaalu e lē aunoa le taimi e talanoa ai i sau uō vavalalata? E mafai foʻi ona e talanoa faapena i le Atua. Ia talanoa atu e lē aunoa iā te ia e ala i le tatalo, ma faaaogā lona suafa, o Ieova. (Salamo 86:5-7; 88:9) O le mea moni o loo valaaulia oe e le Tusi Paia ina “ia tatalo e lē aunoa.”—1 Tesalonia 5:17.
“O le tatalo o le auala lea ou te talanoa atu ai i loʻu Tamā i le lagi, ma sasaa atu loʻu loto atoa iā te ia.”—Moises.
“Ou te faamatala auʻiliʻili atu mea uma iā Ieova, e pei lava o loo oʻu talanoa atu i loʻu tinā po o saʻu uō vavalalata.”—Karen.
O ā mea e mafai ona ou tatalo atu ai?
Ua faapea mai le Tusi Paia: “Ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai.”—Filipi 4:6.
Po o le uiga o lena manatu, e mafai ona e tatalo e faatatau i ou faafitauli? Ioe! O le mea moni ua faapea mai le Tusi Paia: “Ia tuuina atu iā Ieova ou popolega uma, o ia lava e na te tausia oe.”—Salamo 55:22.
Pe a e tatalo atu i le Atua, e tatau ona e talanoa atu i le tele o mea, ae lē na o ou faafitauli. Na taʻua e se teine talavou e igoa ia Chantelle: “E lē maua se faauōga lelei pe afai na o loʻu talosaga atu lava iā Ieova mo se fesoasoani. Pe a ou tatalo, e tatau ona ou faafetai muamua atu lava iā Ieova, ma e tele mea ou te faafetai atu ai.”
Ia mafaufau i ai: O ā ni vala o lou olaga e te lotofaafetai ai? Pe mafai ona e mafaufau i ni mea se tolu e te faafetai atu ai iā Ieova mo lenei aso?
“E oo lava i mea lāiti e pei o le vaai i se fugālaau matagofie, e uunaʻia ai lava i tatou e tatalo faafetai atu iā Ieova.”—Anita.
“Mafaufau loloto i se mea o le foafoaga e te maofa ai, po o se mau o le Tusi Paia e pāʻia ai lou loto, ona e faafetai lea iā Ieova mo lenā mea.”—Brian.