UA FESILI MAI TALAVOU
E Faapefea Ona Ou Filifilia se Faaaʻoaʻoga Lelei e Mulimuli i Ai?
“Pe a ou fesagaʻia faafitauli i le aʻoga, na fesoasoani loʻu mafaufau i se tagata ou te fiafia i ai na aafia foʻi i na faafitauli, ma ou taumafai e mulimuli i lana faaaʻoaʻoga. O le iai o se tasi e avea ma faaaʻoaʻoga lelei mo aʻu, na faigofie ai ona ou taulimaina tulaga faigatā.”—Haley.
O le iai o se tasi e avea ma faaaʻoaʻoga mo oe, e fesoasoani ina ia ʻalofia ai faafitauli ma ausia ai ou sini. E tatau la ona filifili se faaaʻoaʻoga lelei.
Aiseā e tāua ai le filifili lelei?
O le tagata e te filifili e faaaʻoaʻo i ai, o le a taaʻina ai au gaoioiga.
Ua faalaeiau e le Tusi Paia Kerisiano ina ia mātau i latou o loo avea ma faaaʻoaʻoga lelei e ala i le faapea mai: “Ia outou mātauina iʻuga o a latou amio, ina ia faaaʻoaʻo i lo latou faatuatua.”—Eperu 13:7.
Fesoasoani: E mafai ona taaʻina i tatou e i latou e tatou te filifili e faaaʻoaʻo i ai i se auala lelei po o le leaga. E tatau la ona filifili i latou e iai uiga lelei, ae lē na o ē e taʻutaʻua po o i latou foʻi e tou te tupulaga faatasi.
“E tele ni lesona na ou aʻoaʻoina mai uiga ma amioga a se Kerisiano e igoa iā Adam. O loo ou manatua pea faamatalaga faalaeiau ma mea lelei na ia faia. E lē iloa e Adam le telē o le aafiaga lelei o lana faaaʻoaʻoga iā te aʻu.”—Colin.
O le tagata e te filifili e faaaʻoaʻo i ai, e aafia ai ou mafaufauga ma faalogona.
O loo taʻua i le Tusi Paia: “Aua neʻi faasesēina outou. O aumea leaga e faaleagaina ai masaniga lelei.”—1 Korinito 15:33.
Fesoasoani: Ia filifili se tasi e iai uiga lelei, ae lē na o le aulelei i foliga vaaia, ina ia ʻalofia ai iʻuga lē lelei.
“O loʻu faatusatusaina pea o aʻu i tagata aulelei, ou te lagona ai le faatauvaa ma manatu ou te auleaga. Ou te soona uaʻi atu ai i oʻu foliga vaaia.”—Tamara.
Ia fesili ifo: O ā aafiaga lē lelei o le avea o tagata taʻutaʻua o ni ē e faaaʻoaʻo i ai?
O le tagata e te filifili e faaaʻoaʻo i ai, e faalagolago i ai le taulau po o le lē taulau o ou sini.
O loo taʻua i le Tusi Paia: “O lē e savali ma tagata atamamai, e atamai ai o ia.”—Faataoto 13:20.
Fesoasoani: Ia faaaʻoaʻo iā i latou o loo faaalia uiga lelei e te fiafia i ai. A o e mātauina i latou, e te ono aʻoaʻoina ai auala patino e te faia ina ia ausia ai lou sini.
“Nai lo le faapea atu, ʻOu te manaʻo e avea aʻu o se tagata maufaatuatuaina,’ ae ia faapea atu, ʻOu te manaʻo e avea aʻu o se tagata maufaatuatuaina e pei o Jane. O se tagata e tausi taimi ma manatu mamafa i ona tiute tauave.”—Miriam.
Le manatu autū: O lou filifilia o se tagata e avea ma faaaʻoaʻoga lelei e te mulimuli i ai, o le a mafai ai ona e pulea oe lava ina ia avea oe o se tagata lelei.
O le mulimuli i se faaaʻoaʻoga lelei, o le a faigofie ai ona ausia ou sini!
Auala e filifili ai
E mafai ona e filifilia se tagata e te faaaʻoaʻo i ai i auala nei.
Filifili se uiga e te manaʻo e galue i ai, ona filifili lea o se tasi e te fiafia i ai o loo ia faaalia lenā uiga.
Filifili se tasi e te fiafia i ai ona filifili lea o se uiga lelei o loo ia faaalia e te manaʻo e atiaʻe.
O le fesoasoani faaopoopo (worksheet) o loo i lenei mataupu o le a fesoasoani iā te oe e faia faapea.
I latou e mafai ona e faaaʻoaʻo i ai:
Isi talavou. “Ou te fia pei o laʻu uō lelei. O ia o se tagata e naunau ma manatu mamafa i isi. Ou te matua ai ae ou te mātauina ona uiga lelei lea e lē o iā te aʻu, ma e uunaʻia ai aʻu e faaaʻoaʻo iā te ia.”—Miriam.
Tagata matutua. E aofia ai ou mātua ma tagata o lau tapuaʻiga. “E mautinoa o oʻu mātua o ni faaaʻoaʻoga lelei mo aʻu. E iai o la uiga lelei, ae e iai foʻi o la vaivaiga. Ae e ui i lea, o i laʻua o ni tagata faamaoni. Ou te manaʻo e iai foʻi soʻu talaaga lelei e pei o i laʻua pe a ou matua.”—Annette.
Faaaʻoaʻoga faale-Tusi Paia. “Ua ou filifilia nisi o faaaʻoaʻoga eseese mai i le Tusi Paia ou te mulimuli i ai, e pei o Timoteo, Ruta, Iopu, Peteru, ma le teineitiiti Isaraelu. O le tele ou te aʻoaʻo ai e faatatau i tagata o le Tusi Paia, o le moni foʻi lenā o i latou iā te aʻu. E ese loʻu fiafia e suʻesuʻeina tala o loo i le tusi Faaaʻoaʻo i lo Latou Faatuatua, ma le vaega ʻRole Model Index’ o loo i le tusi 1 ma le 2 o le Questions Young People Ask—Answers That Work.”—Melinda.
Fesoasoani: Aua le tausisi i se faaaʻoaʻoga se tasi. Na faapea atu le aposetolo o Paulo i ona uso Kerisiano: “Ia outou vaavaai iā i latou o savavali e ōgatusa ma le faaaʻoaʻoga na matou faia mo outou.”—Filipi 3:17.
E te silafia? E mafai ona avea oe ma faaaʻoaʻoga lelei i se tasi! Ua faapea mai le Tusi Paia: “Ia fai oe ma faaaʻoaʻo i ē e faamaoni i le tautala, ma le amio, ma le alofa, ma le faatuatua, ma le amio mamā.”—1 Timoteo 4:12.
“E mafai lava ona e galue e faaleleia ou uiga, ae i le taimi e tasi, o loo e fesoasoani foʻi i isi ina ia avea o ni faaaʻoaʻoga lelei. E te lē iloa o loo mātauina mai oe e isi, ma e ono iai ni aafiaga lelei i isi o au faamatalaga ma le auala e te tautala ai.”—Kiana.