Le Manatu o le Tusi Paia e Faatatau i le Suiga o le Tau ma lo Tatou Lumanaʻi

“Ua avea le suiga o le tau o se mala. Ua faasolosolo ona avea le lalolagi paneta ma nofoaga e lē mafai ona ola ai se mea.”—The Guardian.

O loo fesagaʻia e tagata se faafitauli tele na māfua mai iā i latou lava. Ua ioe le toʻatele o saienitisi, o mea e faia e tagata ua māfua ai ona faateteleina le vevela o le lalolagi paneta. O le faateteleina o le vevela, ua suia ai le tau ma iʻu ai i ni āuga mataʻutia. E aofia ai mea nei:

• Le faateteleina o mala faalenatura e pei o lāmala ma afā, ia ua māfua ai lologa ma mū.

• Liusuāvai o poloka aisa i le Atika.

• Siisii aʻe o le suāsami.

O nei suiga o le tau, ua aafia ai vaega uma o le lalolagi. Ina ua uma ona faamatalaina e le New York Times tulaga o atunuu e 193, na taʻua e se tasi o latou lipoti e faapea: “O loo talosaga mai le lalolagi paneta mo se fesoasoani.” Talu ai o le suiga o le tau ua māfua ai le oti ma mafatiaga, ua taʻua ai e le Faalapotopotoga o le Soifua Mālōlōina i le lalolagi, o le suiga o le tau “o le mea pito sili ona lamatia ai le soifua mālōlōina o tagata.”

E ui i lea, e iai māfuaaga e tatou te tulimataʻia ai pea le lumanaʻi. Na valoia i le Tusi Paia mea ua tatou vaaia i aso nei, o māfuaaga o le a gaoioi ai le Atua ma mea o le a ia faia ina ia puipuia ai lo tatou lumanaʻi.

Pe na valoia e le Tusi Paia le suiga o le tau?

Ioe. O suiga o le tau ua māfua ona o le faateteleina o le vevela i le paneta, lea e ōgatusa ma mea na valoia e le Tusi Paia o le a tutupu i o tatou taimi.

Valoaga: “O aso e gata ai e oo mai ai aso e sili ona faigatā. Auā e avea tagata ma ē e alolofa iā i latou lava, o ē e mananaʻo tele i tupe, . .  o ē e lē faamaoni, . . . o ē e mumusu i maliega, . . . o ē e faalata, o ē e faaulumalō.”—2 Timoteo 3:1-4.

Na valoia e le Tusi Paia uiga ma amioga a tagata ua māfua ai suiga o le tau. Ua sili atu ona popole faigāmalo ma pisinisi i tupe, nai lo o le olaga o le a ola ai tagata i le lumanaʻi. E tusa lava pe e latou te galulue faatasi, ae e lē mafai ona latou autasi i mea e manaʻomia ona fai e taofia ai le faateteleina o le vevela o le lalolagi paneta.

O lenā valoaga ua faailoa mai ai, e lē tatau ona tatou faatalitalia o le a suia gaoioiga a tagata ma puipuia le lalolagi. Nai lo o lea, ua taʻua e le Tusi Paia o tagata e faaalia uiga manatu faapito o le a “faateteleina pea lo latou leaga.”—2 Timoteo 3:13.

Aiseā e tatou te mautinoa ai o le a gaoioi le Atua?

Ua taʻua i le Tusi Paia e manatu mamafa mai Ieovaa le Atua, o Lē na foafoaina mea uma, i le lalolagi paneta ma i latou o loo nonofo ai. Ia mātau ni mau faale-Tusi Paia se tolu e faailoa mai ai o le a gaoioi le Atua.

1. 1. “Na ia [le Atua] lē foafoaina fua [le lalolagi] ae na ia faia ina ia ʻainā.”—Isaia 45:18.

   O le a faataunuuina e le Atua lona finagalo mo le lalolagi. (Isaia 55:11) E na te lē faatagaina e faaleagaina i se tulaga e lē mafai ona ola ai se mea.

2. 2. “O ē e agamalu, e fai mo i latou le lalolagi, e matuā faafiafiaina foʻi i latou ona o le tele o le filemu. E fai lava le lalolagi mo ē e amiotonu, e nonofo ai pea i latou e oo i le faavavau.”—Salamo 37:11, 29.

   Ua folafola mai e le Atua o le a ola e faavavau tagata i luga o le lalolagi i se tulaga filemu.

3. 3. “Ae e faaumatia o ē e amioleaga mai i le lalolagi.”—Faataoto 2:22.

   Ua folafola mai e le Atua o le a ia faaumatia i latou e faia pea le amioleaga, e aofia ai ma i latou o loo faaleagaina le lalolagi paneta.

O le ā o le a faia e le Atua mo lo tatou lumanaʻi?

O le a faapefea ona faataunuu e le Atua ana folafolaga mo le lalolagi? O le a ia faaaogāina se faigāmalo ua taʻua o le Malo o le Atua. (Mataio 6:10) O le a pule mai lenā Malo i le lagi. E lē faia e lenā Malo ni maliega ma malo faaletagata i mataupu e aofia ai le lalolagi ma le siʻosiʻomaga. Nai lo o lenā, o le a suitulaga le Malo o le Atua i malo faaletagata uma.—Tanielu 2:44.

O le a faaleleia e le Malo o le Atua mea uma mo tagata ma le siʻosiʻomaga. (Salamo 96:10-13) Ia mātau mea o le a faia e Ieova le Atua e ala i lona Malo.

• Faaleleia le siʻosiʻomaga

  Le manatu o le Tusi Paia: “O le a olioli le toafa ma le laueleele ua leai se vai, o le a fiafia foʻi le fanua laugatasi o le toafa ma e fua mai e pei o le lili.”—Isaia 35:1.

  Le mea o le a tupu i le lumanaʻi: O le a toe faaleleia e Ieova le paneta, e oo lava i nofoaga ua matuā faaleagaina e tagata.

• Pulea le tau

  Le manatu o le Tusi Paia: “Ua ia [Ieova] faatoʻafilemu le afā, ona malū ai lea o galu o le sami.”—Salamo 107:29.

  Le mea o le a tupu i le lumanaʻi: E iā Ieova le mana e pulea ai malosiaga faalenatura. O le a lē toe mafatia tagata ona o tulaga leaga o le tau.

• Aʻoaʻoina tagata ia tausia le lalolagi

  Le manatu o le Tusi Paia: “Ou te foaʻi atu iā te oe le tofā mamao, ma faatonu oe i le ala e ao ona e savali ai.”—Salamo 32:8.

  Le mea o le a tupu i le lumanaʻi: Na tuu mai e Ieova i tagata le tiute tauave o le tausia o le lalolagi. (Kenese 1:28; 2:15) O le a ia aʻoaʻoina i tatou i le auala sili e faia ai faapea ma ola i se auala e lē faaleagaina ai le siʻosiʻomaga.