Pe e Mafai Ona Galulue Faatasi Atunuu e Taofia Suiga Ogaoga o le Tau?—O le ā se Manatu o le Tusi Paia?

I le Aso Sa, Novema 20, 2022, na faaiʻuina ai le Fonotaga a Malo Aufaatasi mo Suiga o le Tau lona 27 (COP27). E ui na faavae ai i lenā fonotaga se maliega ina ia faatulaga se fesoasoani tautupe mo atunuu e aafiagofie i suiga o le tau, ae e toʻatele ua iloa, e lē mafai ona foʻia ai le pogai autū o suiga o le tau.

Iā Novema 19, 2022, na faapea mai ai António Guterres, o le failautusi o Malo Aufaatasi: “Ou te lagolagoina le faaiʻuga ua faia ina ia faamatuu atu se vaega tupe e fesoasoani ai i tagata ua aafia i suiga o le tau.” Ae na ia taʻua atili: “Ua tatou iloa e lē lava lenā . . . Ua iai nei lo tatou paneta i se tulaga lamatia.”
“Atonu e lē o toe umi ona feagai lea o le lalolagi ma se suiga ogaoga o le tau, lea o le a aafia ai tagata uma.”—Mary Robinson, o lē sa avea ma peresitene o Aialani, ma sa avea foʻi ma Komesina Sili o Malo Aufaatasi mo Aiā Tatau a Tagata, Novema 20, 2022.

Ua popole tagata aemaise lava i talavou, e faatatau i le mea o le a tupu i le lalolagi paneta. Peitaʻi, pe e mafai e atunuu ona galulue faatasi, ma faataunuu la latou folafolaga e foʻia suiga o le tau? O le ā se manatu o le Tusi Paia?

Po o le a galulue faatasi ma taulau taumafaiga a atunuu?

Ua faailoa mai i le Tusi Paia, e ui i galuega mamafa ma taumafaiga lelei a atunuu ina ia foʻia suiga o le tau, ae e lē o mafai lava ona foʻia atoatoa ai lea faafitauli. Mātau māfuaaga nei e lua:

“O le mea ua faapiʻoina e lē mafai ona faasaʻoina.”—Failauga 1:15.

Lona uiga: E faatapulaa mea e mafai ona faia e malo faaletagata, ona e leʻi foafoaina le tagata ma le tomai e na te pulea ai o ia lava. (Ieremia 10:23) E tusa lava foʻi pe galulue faatasi atunuu, e lē mafai ona latou foʻia faafitauli o le lalolagi, e ui i le tele o a latou taumafaiga.
“Auā e avea tagata ma ē e alolofa iā i latou lava, o ē e mananaʻo tele i tupe, . . . o ē e mumusu i maliega.”—2 Timoteo 3:2, 3.

Lona uiga: Na valoia mai ma le saʻo e le Tusi Paia, o le toʻatele o tagata i aso nei e manatu faapito ma e lē lotomalilie e galulue faatasi mo le lelei o isi.

Se faamoemoe

Peitaʻi, o le lumanaʻi o le lalolagi paneta e lē faalagolago i folafolaga a malo faaletagata. Ua tofia e le Atua Iesu Keriso o se Pule e talafeagai lelei mo le lalolagi. Ua faapea mai le Tusi Paia e faatatau iā Iesu:

“O le a i luga o lona tauʻau le malo. O le a faaigoa o ia o le Faufautua Sili, o le Atua Malosi, o le Tamā o le Faavavau, ma le Perenise o le Filemu.”—Isaia 9:6, faamatalaga pito i lalo.

O Iesu o le Tupu o le Malo o le Atua, o se pulega i le lagi. (Mataio 6:10) E iā te ia le malosi, le atamai ma le faanaunauga e tausia ai lo tatou lalolagi paneta ma ona tagatānuu. (Salamo 72:12, 16) E ala i lana taʻitaʻiga, o le a taofia e le malo i le lagi i latou o loo “faatamaʻia le laueleele,” ma toe faaleleia le lalolagi paneta.—Faaaliga 11:18, faamatalaga pito i lalo; Isaia 35:1, 7.

Ina ia aʻoaʻo atili e faatatau i le vaifofō tumau mo suiga ogaoga o le tau, faitau i le mataupu “Le Manatu o le Tusi Paia e Faatatau i le Suiga o le Tau ma lo Tatou Lumanaʻi.”