Pe e Tou te Saunia Fesoasoani Laveaʻi i Taimi o Mala Faalenatura?

Ioe, e masani ona ofo atu e Molimau a Ieova le fesoasoani pe a oo i taimi o mala. E matou te saunia fesoasoani aogā mo tagata Molimau a Ieova faapea i latou e lē o ni Molimau, e tusa ai ma le faatonuga o loo i le Kalatia 6:10: “Seʻi o tatou faia mea lelei i tagata uma manū o talafeagai le taimi e fai ai, aemaise i ē tatou te aiga i le faatuatua.” E matou te taumafai foʻi e avatu le fesoasoani faaleagaga ma i le itu tau faalogona i ē o loo matuā manaʻomia i lenā taimi.—2 Korinito 1:3, 4.

Faalapotopotoga

Pe a māeʻa se mala, e taumafai toeaina i faapotopotoga o loo i le vaipanoa na aafia, e faafesootaʻi tagata uma o loo auai i faapotopotoga i inā, ina ia iloa po o saogalemu ma po o manaʻomia se fesoasoani. E faailoa atu e toeaina iʻuga o a latou saʻiliʻiliga i le ofisa o le lālā o Molimau a Ieova o loo i lea vaipanoa, ma lipoti atu foʻi ni fesoasoani laveaʻi ua mafai ona latou saunia atu.

Pe afai e lē gafatia e faapotopotoga i le vaipanoa ona saunia ni fesoasoani, ona faia lea e le Vaega Pule a Molimau a Ieova ni fuafuaga ina ia saunia mea o loo manaʻomia. E taitutusa lea faiga ma le auala na tausia ai e uluaʻi Kerisiano le tasi i le isi a o feagai ai ma se oge. (1 Korinito 16:1-4) E tofia e le ofisa o le lālā o lea vaipanoa se Komiti mo Fesoasoani Laveaʻi e faamaopoopo ma faatonutonuina galuega e fai. E ofo mai foʻi e Molimau a Ieova i isi atunuu o latou taimi ma meafaitino e fesoasoani mai ai.—Faataoto 17:17.

Tupe

O se tasi o auala e faaaogā ai tupe o loo lafo atu i ofisa o lālā o Molimau a Ieova, o le fesoasoani lea i ē e aafia i mala faalenatura. (Galuega 11:27-30; 2 Korinito 8:13-15) Talu ai e faatino galuega fesoasoani e i latou e tauofo e lē totogiina, o tupe uma la e foaʻiina atu, e saunia ai fesoasoani laveaʻi ae e lē ina ia totogi ai i latou o loo galulue. E matou te matuā faaeteete i le auala e faaaogā ai foaʻi tauofo.—2 Korinito 8:20.