Alami we ndjingandjinga otokotshɛkawɔ wopo ɔkɔ nke?

Afundelo we Greke w’akristo wadjumolake Barnabase la ɔpɔstɔlɔ Paulo mbala efula. Mpame ikɔ yoyalaká nde alami wanetetaka, gkambo wawembolaki etshumano w’akristo we ntondo. Yonanghaka nghɔsɔ la nke? Gkambo wakanelaki efula dje wɔlɔ we akristo ankina. Paulo atepelaka ante akopa “nkalɔ towembola boto” dje nyɛna wopo ɔkɔ nke oyalawɔ. Atatonaká ntshɔ nkɛndɔ y’akilomɛtrɛ nkama la nkama dje ntshɔ tokembiɛ winande akristo. (Elemo 15:36) L’etsho we lɔko, alami wanetetaka ɔkɔpakawɔ nangha koko ngo nghɔsɔ.

Wayɛke yotokembiɛ. Olami we ndjingandjinga alendake etshumano kondo 20; etshɛke lobengo ɔmɔ l’otshumano ɔmɔmɔ mbala ipe lá mvula. Iwɔ la wadji w’iwɔko (nde walekɔ la wadji) wakoka ntokotshɛ efula, gkambo wewa akambo efula. Wananghake la wolo dje ndjewa onto onkfumɔ, eyale dɛngɛ kondo ankɔlɔma, la wakopake ntotshindeyɛ l’olemo we nsakola losango le wɔlɔ la ndjekiɛ anto Bible. Alami akɔ watshɔke esanga l’ankɔlɔma towembola akristo ankina, kankina ko wananghake wadiskuru dje ntokembiɛ etema lá nsanghanyɛ y’otshumano la lá nsanghanyɛ ye gkekete.​—Elemo 15:35.

Wilake onto l’onto yimba. Alami we ndjingandjinga wakanelake efula dje otshumano ɔmɔmɔ ndjalá la djokanelo dje wɔlɔ la Ndjambe. Wananghake losanghanyɛ la ankɔlɔma esanga l’ankambi wanakotshɛ l’olemo dje ndjewa wopo ɔkɔ nke otshumano yombofula, la ndjaapɛyɛ alako dje iwɔ ndjewa nangha elemo w’iwɔko. Wakotshɛke akristo wanakamba olemo we lowanga dje iwɔ ndjewa nkamba olemo w’iwɔko; wakopake ko ndjewa anto we bango la ndjoka lɛdji le yoyafule l’edjimo. Yankfumɔ wayapɛyɛke onto l’onto dje ndjalá “mbayi ke l’olemo dje wɔlɔ w’isoko.” (2 Kɔrɛntɔ 8:23) Elekɔ wɔlɔ dje iso ndjokola djawɔ dj’iwɔko la ngandji k’iwoko ke Ndjambe.​—Hebero 13:7.

• Alami we ndjingandjinga owembolakawɔ etshumano la nke?

• Mbembo y’iwɔkɔ ikokawɔ nkokotshɛ wopo ɔkɔ nke?