DJAMBA DJƐ WEKELO 22
Alako wa balo watokotshɛ́ djɛ ndɔndjɛ lowiko lɔso
‘Yehova nyɔmɛlɛ ndeke lɔpɛyanaka balo.’—WOO. 2:6.
YEEMBO 89 Tekameyɛ, tɔlɛmɛyɛ, ko tɔngɔtshɔkwama (lá Otetela)
LÁ YOPASƐa
1. Lamo isankfumɔ oyɛso la djonyi djɛ balo djɛ me Ndjambe? (Woongo 4:7)
NTSHA ombotanemaká lá ntondo kɛ nkano mɔtshi djɛ djonyi djɛ ndɔsa, mbɔ ape l’ehamo ɔlɔmbaka djɛ mba balo, edjinge oyalaka la ndonga djɛ wɔlɔ djɛ nangha nkambo djɛsɔ. (Dja. 1:5) Nkfumi Salɔmɔ afunaka ante: ‘Balo alekɔ ekete keleka djonyi.’ (Wala Woongo 4:7.) Lá nsɔsɔlɔ, nkfumi Salɔmɔ atatepelaki lá kɛnɛ kelendana la balo ngo balo. Ndatepelaka nde balo djeyɛ mé Yehova Ndjambe. (Woo. 2:6) Nsɔsɔlɔ balo djɛ Ndjambe nkoka ntokotshɛ́ djɛ ndongela wepo w’ekakasano w’opomanaso la wɛkɔ lɔɔko kɛnɛ? Ee, djekoka ntokotshɛ́, etengo sɔngɛna lá djamba djɛnɛ.
2. Yopo imɔtshi yɛkɔnge y’okokaso ndjala la balo djɛ nsɔsɔlɔ?
2 Yopo imɔtshi y’okokaso ndjala la balo djɛ nsɔsɔlɔ nde, má ndjekaka la nkambaka l’elakanyelo wɛ ampame ipe w’iyalɛmɛyɛka efula má balo djɛwɔ. Ntondontondo, tongotepela nkambo djɛ Salɔmɔ. Bible ntepelaka ante: ‘Ndjambe apɛyɛka Salɔmɔ balo la yimba lá lɛdji l’efula.’ (1 Nk. 4:29) Onto w’ape, wɔ songotepela nde Yeso, onto woleka anto ankfumɔ balo. (Mat. 12:42) Bible ewoyɛka lá nkambo djɛ Yeso ante: ‘Nyuma kɛ Yehova kengintasɛ le nde, nyuma kɛ balo la kɛ yimba.’—Iza. 11:2.
3. Kɛkɔnge k’ɔkɔpaso nshishima lá djamba djɛnɛ?
3 Má nkamba la balo djɛ Ndjambe ndaapɛyɛ, Salɔmɔ nya Yeso wapɛyɛka alako wa wɔlɔ l’akambo wa djonyi walendana laso isankfumɔ. Lá djamba djɛnɛ, tongoshishima akambo asato l’anteyi k’akambo wakɔ: Djonyi djɛ ndjala l’ikanyi yɛdje lá nkambo djɛ mfalanga, dj’olemo welá demba, la djɛso isɔmɛlɛ.
TOYALE L’IKANYI YƐDJE LÁ NKAMBO DJƐ MFALANGA
4. Wopo wɔkɔnge lowiko lɔ Salɔmɔ yatshikitana la lɔ Yeso lá kɛnɛ kelendana la nkete djelá demba?
4 Salɔmɔ ayalaki l’okfudji efula edjinge l’amvulu yɛ wɔlɔ efula. (1 Nk. 10:7, 14, 15) Koko l’onkoko wɔnde, Yeso ayalaki ngo la ndambo kɛ nkete daambi la atayalaki la mvulu kɛnde nyɔmɛlɛ. (Mat. 8:20) Kaanga oyɛwɔ ngɔsɔ, ampame yɛkɔ ipe yɛsɔ wayalaki l’ikanyi yɛdje lá nkambo djɛ nkete djelá demba ladjikɛnde balo djɛwɔ yaye ngo m’Ikɔkɔ imɔ ntepela ente, mé Yehova Ndjambe.
5. Kɛkɔnge k’ɛnyɛ ente Salɔmɔ ayalaki l’ikanyi yɛdje lá nkambo djɛ mfalanga?
5 Salɔmɔ ewaki ante mfalanga ‘mbombaka.’ (Los. 7:12) Ntsha tolekɔ la mfalanga, iso nkoka mba nkete dj’oyɛso la djonyi lá lowiko la nkete mɔtshi dj’ɔkɔpaso. Koko, kaanga ndayalaka kanga okfudji efula, Salɔmɔ asipisoyɛka ante nkete mɔtshi djeleka mfalanga djonyi dekɔ. Ndjɔmbɔmba, nde afunaka ante: ‘Djiina djɛ wɔlɔ [kana, ‘lokumu lɔ wɔlɔ,’ lá nkilika nɔtɛ] ndeke lokoka nsɔnama l’edjena kɛ okfudji w’efula.’ (Woo. 22:1) Salɔmɔ asipisoyɛka lonkina ante anto walekɔ́ la ngandji kɛ mfalanga wapalekaka nsasanga la kɛnɛ k’okotshɛwɔ. (Los. 5:10, 12) Edjinge nde atewolaka dj’ipa ndawɛkɛ tshɛ tá mfalanga, ladjikɛnde kaanga efula kɛ mfalanga y’okotshɛso, yekoka mfumbɔ la mayimo djɛ ntsho.—Woo. 23:4, 5.
Wopo w’ɔsakaso nkete djelá demba angotoshimbake djɛ mpetshɛ Onkfumi l’edjena kɛ ntondo lá lowiko lɔso? (Lenda itenyi 6-7)d
6. Ikanyi yɛdje yɛkɔnge yeyalaki la Yeso lá kɛnɛ kelendana la nkete djelá demba? (Mateo 6:31-33)
6 Yeso ayalaki l’ikanyi yɛdje lá kɛnɛ kelendana la nkete djelá demba. Nde asasangaki nkete djɛ ndɛ la waná. (Luka 19:2, 6, 7) Lá mbamba kɛmɔtshi, nde akadjimolaka washi waná wa wɔlɔ efula, edjinge ɔsɔ ayalaka nsese djɛnde djɛ ntondo. (Dj. 2:10, 11) Kaanga lofu lɔ ndavu, nde alɔtaka esendja k’oshinga efula. (Dj. 19:23, 24) Koko Yeso atawola djɛ nkete djelá demba ndjala ekete keleka djonyi lá lowiko lɔnde. Nde ashimelaka ambeki wande ante: ‘Lako onto wokoka nkambela ewandji epe olemo . . . Nyopakoke nkambela Ndjambe la mfalanga olemo etengo amfumbe.’ (Mat. 6:24) Yeso atolakanyɛka ante ntsha iso mpona ntondo Onkfumi, Yehova angotakfeyɛ nkete nkina dj’oyɛso la djonyi.—Wala Mateo 6:31-33.
7. Wopo wɔkɔnge wɔnanyɔ ɔmɔtshi ndawa wapɔ má ndjala l’ikanyi yɛdje lá nkambo djɛ mfalanga?
7 Wananyɔ l’ankaana efula wambowaka wapɔ má nkamba la balo dj’ime Ndjambe lá nkambo djɛ mfalanga. Tɔkɔsa ndjɔmbɔmba kɛ wɔnanyɔ ɔmɔtshi w’epolo w’etawɔ Daniel. Nde atepelaka ante: “Winá wɔ mayalaka olangala ndɔsaka nkano ente langhonangha djɛ akambo welá nyuma ndjala akambo waleka djonyi lá lowiko lɔmi.” Ladjikɛnde nde atshikaka lowiko lɔnde onghanghunya, Daniel ayalaka l’akoka wa nkamba la winá edjinge l’akoka wande l’elemo efula wɛ teokrasi. Nde nkotshɛka ante: “La nkɔmano nkfumɔ, mpakiyana kaanga ndambo daambi má nkano dj’imɔshi. Lá nsɔsɔlɔ, otananghami djɛ mfalanga ndjala ekete keleka djonyi lá lowiko lɔmi, ntakoka ndjala la yɛkɔ efula. Koko ntasamba ndjala la tolongo tɔ wɔlɔ tokotshɛmi winá wɔsɔ. Mfalanga yɛsɔ yetakoka mpɛna osasa wɔ momowa má wopo wɔ mahetshɛ Onkfumi l’edjena kɛ ntondo? Lako lofulo lɔ mfalanga lotakoka ndjɛlama la ɛtshɔkɔ wɛ Yehova ndɔmbɔmpɛyɛ.” Ndjokamaka papoo ente, iso mbaka wapɔ, ntsha iso ndapɛyɛ efula ape ngo lá mfalanga, koko lá nkete djelá nyuma.
TOYALE L’IKANYI YƐDJE LÁ NKAMBO DJƐ OLEMO WELÁ DEMBA
8. Wopo wɔkɔnge w’ewaso ente Salɔmɔ ayalaki l’ikanyi yɛdje lá nkambo dj’olemo? (Losanghanyɛ 5:18, 19)
8 Salɔmɔ etaka osasa w’okokaso mba m’olemo wɔso wɔ wolo ante ‘opapɛyɛ wɔ Ndjambe.’ (Wala Losanghanyɛ 5:18, 19.) Nde afunaka ante: ‘Olemo onkfumɔ wɔ wolo wolekɔ la wapɔ.’ (Woo. 14:23) Salɔmɔ asipisoyɛki kɛnɛ kɛ ndatepela. Nde ayalaki nkambi kɛ wolo efula! Nde apikaka amvulu, akambaka awedji wa tovinyo, edjinge ananghaka tojardɛ la edjiya. Nde apikaka lonkina angando. (1 Nk. 9:19; Los. 2:4-6) Ɔsɔ ayalaka olemo wɔ wolo efula, koko ape l’ehamo kɛsɔ k’ɔpɛyɛka osasa. Koko Salɔmɔ ewaki ante djɛ ndjala l’osasa wɔ nsɔsɔlɔ nde apakoke ndapɛyɛ ngo l’elemo wɛsɔ toko. Nde ayapɛyɛka lonkina l’akambo welá nyuma. Ndjɔmbɔmba, nde alɔndjɛka opikelo wɔ tɛmpɛlɔ kɛ wɔlɔ efula lá nkambo djɛ ɔtɛmwɛlɔ wɔ Yehova, olemo w’opikelo wɔsɔ w’ɔsaka ɛnɔnyi esambele! (1 Nk. 6:38; 9:1) M’ɔkɔngɔ wɔnde ndapɛyɛ lá wepo enkfumɔ w’elemo, welá demba la welá nyuma, Salɔmɔ asipisoyɛka ante elemo welá nyuma ndeka elemo welá demba djonyi otalee. Nde afunaka ante: ‘Akambo ankfumɔ wambokama, ekomo kɛ nkambo kekinɛ: Oka Ndjambe kɛ nsɔsɔlɔ wɔma la lɛmɛyɛka ɛlɛmbɛ wɛnde.’—Los. 12:13.
9. Wopo wɔkɔnge Yeso ndɛnyɛ ante olemo wɔnde wɔ lá demba w’otayala djonyi amboleka lende?
9 Yeso ayalaki nkambi kɛ wolo efula. L’ɛnɔnyi wɛnde wɛ bango wɛ laanɛ lá looko, nde akambaka etengo otshudji w’awaya. (Mar. 6:3) Ape l’ehamo ambotshi wande wasasangaki okotshɔ w’indapɛyɛka winá wɔ yananghaka la wolo djɛ nkotshɛ ehomba wɛ nkfumbo kɛwɔ k’ekekete. Etengo otshudji w’awaya wɔ djɔ, Yeso ananghaki olemo wɔ djɔ, edjinge mbala imɔtshi anto efula wakɔpaki nkete djɛ ndananghaka! Yeso akɔpaki olemo wɔnde efula. Koko, kaanga winá wɔ ndakambaka olemo wɔnde welá demba, Yeso ayawombelaki winá wɔ nangha akambo welá nyuma. (Dj. 7:15) L’ɔkɔngɔ, winá wɔ ndookoma nsakodji kɛ winá enkfumɔ, nde alakaka anto wowekameyɛki ante: ‘Nyotakambake olemo lá nkambo djɛ nkete djɛ ndɛ djengotshitana, koko nyokambe lá nkambo djɛ nkete djɛ ndɛ djetshikala ilá djɛpɛyɛ lowiko l’etshinda.’ (Dj. 6:27) Edjinge lá Djamba djɛnde djel’Onkókó, Yeso atepelaka ante: ‘Nyoyawombele nkete djɛ ntshina l’olongo.’—Mat. 6:20.
Wopo wɔkɔnge w’okokaso ndjala l’ikanyi yɛdje lá nkambo dj’elemo welá demba la welá nyuma? (Lenda itenyi 10-11)e
10. Okakasano wɔkɔnge w’okoka mpomana l’anto amɔtshi l’olemo welá demba?
10 Balo djɛ me Ndjambe ntokotshɛka djɛ ndjala l’ikanyi yɛdje lá nkambo dj’olemo wɔso welá demba. Etengo oyɛso Akristo, iso ndjekaka djɛ ‘nkamba olemo wɔ wolo la wɔ wɔlɔ.’ (Ɛfɛ. 4:28) Mbala efula ewandji wɛso w’elemo nyɛnaka nkɔmano l’entete kɛso l’olemo, ko mbala imɔtshi iwɔ nkoka ntoshimela dj’iwɔ nkɔpaka yopo yɛso y’okambaso olemo. Ntsha topawadjisa, nkambo djɛsɔ nkoka ndotokomɛ djɛ nkamba winá efula djɛ owandji wɔso w’olemo ndjala l’ikanyi yɛ wɔlɔ lá nkambo dj’Ewakɛ wɛ Yehova. Koko, ntsha iso nangha nghɔsɔ, tokoka ndɛna djɛ tombowanga nyimɛ yimba l’edjito wɛso welá nkfumbo la wɛ teokrasi. Iso ladjɛ nangha etshikitano ntepela ente ndjala l’ikanyi yɛdje.
11. Olakanyelo wɔkɔnge wɔnanyɔ ɔmɔtshi ndawa lá kɛnɛ kelendana la ndjala l’ikanyi yɛdje lá nkambo dj’olemo?
11 Wɔnanyɔ ɔmɔtshi w’olangala w’etawɔ William ɛnaka ngo má bango djonyi djɛ ndjala l’ikanyi yɛdje lá nkambo dj’olemo welá demba. William atepelaka lá nkambo djɛ ikokolo yɛ ndakambaka lande ntondo ante: “[Wɔnanyɔ] wɔsɔ alekɔ ndjɔmbɔmba k’onto w’olekɔ́ l’ikanyi yɛdje lá nkambo dj’olemo. Nde nkambaka efula edjinge alekɔ la djokanelo djɛ wɔlɔ nya wa kiliya yɛnde, ladjikɛnde nde nanghaka olemo wɔ wɔlɔ. Koko l’ekomo kɛ lofu, winá woshiyɛnde olemo, nde nyimaka la winá edjinge ndapɛyɛka te nkfumbo kɛnde la lá wayi welá nyuma. Nyewa eposelo welekɔ la djoyi djɛsɔ? Nde alekɔ l’anteyi k’anto wewami waleka ndjala l’osasa!”b
TOYALE L’IKANYI YƐDJE LÁ NKAMBO DJƐSO IISƆMƐLƐ
12. Wopo wɔkɔnge Salɔmɔ ndɛnyɛ ante nde ayalaka l’ikanyi yɛdje lá nkambo djɛnde nyɔmɛlɛ, ko wopo wɔkɔnge ndootshutshɛka ikanyi yɛsɔ?
12 Winá wɔ ndayalaka ntɛmɔdji kɛ nkɔmano kɛ Yehova, Salɔmɔ ayalaki l’ikanyi yɛdje lá nkambo djɛnde nyɔmɛlɛ. Winá wɔ ndayalaka olangala, nde ewaki elelo wɛnde edjinge alɔmbaka Yehova djɛ nde ndɔlɔndjɛ. (1 Nk. 3:7-9) Má bango dj’ɛlɔndjɛlɔ kɛnde, Salɔmɔ ewaki lonkina mbalaka keyɛ má ndjala l’otako. Nde afunaka ante: ‘Otako ndeke lohetaka lá ntondo k’etshitanelo, la yimba yɛ lotamanyɛ lá ntondo kɛ ɔkfɛlɔ.’ (Woo. 16:18) Yɛnyi nde, m’ɔkɔngɔ Salɔmɔ atayɛ ndokamba la dako djɛnde nyɔmɛlɛ. Lá mbamba kɛmɔtshi l’eleko k’ɛlɔndjɛlɔ kɛnde, nde ayalaka l’otako edjinge atateyɛka nyɔnyɔla ɛlɛmbɛ wɛ Ndjambe. Ndjɔmbɔmba, ɔlɛmbɛ ɔmɔtshi watepelaki djɛ owandji w’ose Hebero apakoke ‘ntshuka wadji efula, dj’ipa oloko wɔnde ndovunga mboka.’ (Mvu. 17:17) Salɔmɔ ɔnyɔlaka ɔlɛmbɛ wɔsɔ ko atshukaka wadji 700 la ayalaka l’ashile 300, edjinge efula kɛwɔ iyayalaka nde ampanghano! (1 Nk. 11:1-3) Mbala imɔtshi Salɔmɔ akanelaki ante ‘nkambo djɛsɔ mpangoyala okakasano le nde.’ Ayale kɛkɔnge kɛ ndakanelaka, Salɔmɔ ayɛka ndɛna ndjolo l’eposelo wɛ nyɛtshi weyɛ má nsamba nɛmɛyɛ Yehova.—1 Nk. 11:9-13.
13. Olakanyelo wɔkɔnge w’okokaso mba má ntɔnɔla l’eyalelo k’okitshakitshɛ kɛ Yeso?
13 Yeso ayalaki l’okitshakitshɛ edjinge l’ikanyi yɛdje lá nkambo djɛnde nyɔmɛlɛ. Lá ntondo kɛ nde ndjɛ lá looko, Yeso ananghaka akambo wa nkamɔ efula l’olemo wɔ Yehova. Má lotshimbo lɔ Yeso, ndeke ‘nkete nkina nkfumɔ djel’olongo la djelá looko yatongama.’ (Kɔl. 1:16) Lá winá wɔ batisimo djɛnde, nyɛnamaka ente Yeso avungɔka nkete nkfumɔ djɛ ndananghaka winá wɔ ndayalaka nya Papa kɛnde. (Mat. 3:16; Dj. 17:5) Koko balo djɛsɔ djetatshinda Yeso djɛ ndjala l’otako. L’onkoko onkina, nde atɛnyɛ kaanga lofu ante nde ndeka anto ankina. Nde ashimelaka ambeki wande ante ndaye lá looko nde, ‘ape dj’anto ndokambela olemo, koko djɛ nde ndokambela anto ankina olemo la mpɛyɛ anima wande etengo oshinga wɔ mbendo lá nkambo dj’anto efula.’ (Mat. 20:28) Nde atepelaka lonkina ante, apananghaka nkaanga nkambo mɔ m’ɛkɔpa kɛnde nyɔmɛlɛ. (Dj. 5:19) Ɔsɔngo okitshakitshɛ wɔ Yeso ndɛnyɛ! Yeso atotshikelaka ndjɔmbɔmba kɛ wɔlɔ efula kɛ nkilika.
14. Olakanyelo wɔkɔnge w’owaso me Yeso lá kɛnɛ kelendana la ndjala l’ikanyi yɛ wɔlɔ lá nkambo djɛso isɔmɛlɛ?
14 Yeso alakanyɛka ambeki wande djɛ ndjala l’ikanyi yɛ wɔlɔ lá nkambo djɛwɔ iyɔmɛlɛ. Lá mbamba kɛmɔtshi, Yeso áshikikɛka ante: ‘Kaanga nkfo nkfumɔ djelekɔ l’ɛtɛ wɛnyo mbalemaka.’ (Mat. 10:30) Etepela wɛsɔ ntokembɛka efula, pekapeka ntsha tongoyalake l’ekfumbo kɛ ndjala l’ikanyi yɛ nyɛtshi lá nkambo djɛso iisɔmɛlɛ. Etepela wɛsɔ nsakisolaka ambɔ, Papa kɛso kel’olongo ndakiyanyɛka efula lá nkambo djɛso edjinge tolekɔ la ntshina efula lá wiso wande. Topakoke kaanga ndambo daambi ndjila ehamo lá wopo wɔ Yehova ɔtɔsande má ntepela ente tɔpɛdje djɛ ndjala enkambi wɛnde la djɛ mba lowiko l’etshinda l’andja wa bango.
Mbamba la ɛtshɔkɔ wɛkɔnge w’okokaso nsamba ntsha topalekɔ l’ikanyi yɛdje lá nkambo djɛso isɔmɛlɛ? (Lenda itenyi 15)f
15. a) Ikanyi yɛdje yɛkɔnge Etange k’Olami otoshimelande dj’iso ndjala la yɛkɔ? b) Etengo ɛnyɛwɔ lá asango welá nkishi 24, ntsha toyakiyanyɛ ngo lá nkambo djɛso, ɛtshɔkɔ wɛkɔnge w’okokaso nsamba?
15 Amboheta etengo ɛnɔnyi 15, Etange k’Olami ketoshimelaka ante iso ladjɛ ndjala l’ikanyi yɛ wɔlɔ lá nkambo djɛso má ntepela ante: “Lá nsɔsɔlɔ, topakoke ndawɔsa la ntshina efula tii lá lɛdji lɔ ndoyala l’otako edjinge topakoke lonkina ndawɔsa etengo topalekɔ kaanga la ndambo kɛ ntshina. Koko, iso ladjɛ ndjala l’ikanyi yɛdje lá nkambo djɛso isɔmɛlɛ, ntepela ente ndjewa ente tolekɔ l’akoka edjinge la wɛdju. Okristo ɔmɔtshi w’omoto atepelaka nkambo djɛsɔ lá lɛdji lɔnɛ ante: ‘Mpalekɔ onto womboleka nyɛtshi tshɛ, koko lonkina mpaleke anto ankina. Ndekɔ la nanghedji djɛ wɔlɔ la djɛ nyɛtshi, edjinge nghɔsɔ ndeke anto ankfumɔ oyɛwɔ.’”c Ɔmbɛna wapɔ w’okokaso mba má ndjala l’ikanyi yɛdje lá nkambo djɛso isɔmɛlɛ?
16. Lamo Yehova ɔtɔpɛyɛnde ɛlɔndjɛlɔ kɛ balo?
16 Yehova ntɔpɛyɛka ɛlɔndjɛlɔ kɛ balo, má lotshimbo l’Otepela wɔnde. Nde ntɔkɔpaka, la nkombolaka dj’iso ndjala l’osasa. (Iza. 48:17, 18) Nkambo djɛ balo la djekoka ntɔpɛyɛ osasa wɔ nsɔsɔlɔ la w’efula w’okokaso nangha nde, mpetshɛ wapɔ wɛ Yehova l’edjena kɛ ntondo kelá lowiko lɔso. Ntsha iso nangha nghɔsɔ, tongolota efula k’ekakasano kepomaná la wanɛ w’ilá yimba yɛwɔ inkfumɔ ngo lá mfalanga, l’elemo welá demba, kana lá nkambo djɛwɔ iyɔmɛlɛ. Djɛkondeke, nyontshɔ isankfumɔ tɔshi nkano djɛ ndjala la balo la djɛ nsasangɛka oloko wɔ Yehova!—Woo. 23:15.
YEEMBO 94 Djedjɛ lá nkambo dj’Otepela wɔ Ndjambe (lá Otetela)
a Salɔmɔ nya Yeso wayalaki la balo dj’efula. Ikɔkɔ yɛ balo djɛsɔ nde Yehova Ndjambe. Lá djamba djɛnɛ, tɔngɛna elakanyelo w’okokaso ndjeka má alako wa Salɔmɔ nya Yeso wafunamisá má nyuma k’ekina lá kɛnɛ kelendana la ndjala l’ikanyi yɛdje lá nkambo djɛ mfalanga, dj’olemo welá demba, la djɛso isɔmɛlɛ. Tɔngɛna lonkina wopo wɔ winaso Akristo yawa wapɔ má nkamba la balo nkfumɔ l’alako w’otanaso lá Bible walendana l’akambo wasɔ.
b Lenda djamba djelekɔ́ l’ɔtɛ wɔ djoyi ante: “Wopo wɔ nsasanga l’olemo wɔ wolo,” lá Etange k’Olami Ngɔndɔ k’ape 1, 2015. (Lá Otetela)
c Lenda djamba djelekɔ́ l’ɔtɛ wɔ djoyi ante: “Bible nkoka nkokotshɛ́ djɛ wɛ ndjala l’osasa” lá Etange k’Olami Ngɔndɔ k’enanɛyi 1, 2005. (Lá Otetela)
d NSAKISO Y’ASANGO: John nya Tom walekɔ wananyɔ w’elangala walekɔ́ l’otshumano ɔmɔ. John mpetshɛka winá efula lá nkambo dj’otuka wɔnde. Tom nkambaka l’otuka wɔnde djɛ nkotshɛ́ anto ankina má ndawɛmba t’olemo w’ipoposanyɛ la tá nsanghanyɛ y’otshumano.
e NSAKISO Y’ASANGO: John nkambaka olemo tii lá winá w’akɔlɔ. Nde apakɔpɛ nkiyanyɛ owandji wɔnde w’olemo. Djɛkondeke winá w’owandji wɔnde w’olemo ɔlɔmbande djɛ nkamba kaanga la nkɔlɔ, John ndjawolaka. La nkɔlɔ djɛkɔ mɔ, Tom kanga lolekɔ́ onkambi w’okotshɛ́, atatshindjeyɛ ikokolo imɔtshi djɛ ntowembola ɛnkɔkɔ. Ngo má bango, Tom asipisoyɛka owandji wɔnde w’olemo ante nde angokamba la winá efula w’akɔlɔ l’akambo walendana la ɔtɛmwɛlɔ wɔ Yehova.
f NSAKISO Y’ASANGO: John ayakiyanyɛ ngo lá nkambo djɛnde. Tom, kanga lohetshɛ wapɔ wɛ nyuma lá ntondo kɛ wɛnde, ambowa tolongo tonkina efula tɔ bango winá w’okotshɛnde l’ɔwɔngɛlɔ wɔ Mvulu kɛ nsanghanyɛ yɛ nkekete.