Todjimɛke ‘lombe lɔ Yah’

1. Wopo wɔkɔnge Bible opakisolande ngandji kɛ nsɔsɔlɔ?

‘LOMBE lɔ ngandji oyɛwɔnde lombe l’iyɛ, lombe lɔ Yah. Washi wakfukɔkfukɔ wapakoke ndjimɛ ngandji, edjinge ɛkɛdji wepakoke ndɔkɛlɛmɔyɛ.’b (Yes. 8:6, 7) Ɔsɔngo wopo wɔ wɔlɔ wɔ yombosakisola ngandji kɛ nsɔsɔlɔ! Etepela wɛsɔ wɛpɛyɛ eshikikelo kɛ nsɔsɔlɔ kɛnɛ te antshukami: Nyo nkoka ndjokana ngandji kɛ wolo efula l’anteyi kɛnyo.

2. Kɛkɔnge kɛ antshukami oyɛwɔ ladjɛ nangha dj’ipa ngandji kɛwɔ mpɔla?

² Antshukami ladjɛ ndjila welo dj’iwɔ ndjala la ngandji k’ipa l’ekomo lá lowiko lɔwɔ l’otondo. Ndjɔmbɔmba, dj’ipa iyɛ ndjima ngo ntshumanyɛka nkonyi winá enkfumɔ. Koko ntsha wambotshika ntshumanyɛ, ekomo ekomo iyɛ yengodjima. Wopo wɔk’ɔmɔ ndeke, ngandji kɛ wadji nya wome nkoka ntshikala lotshinda lotshinda, ngo ntsha wakembɛ djokanelo djɛwɔ. Lá winá ɛmɔtshi, antshukami nkoka ndjoka ambɔ ngandji kɛwɔ ketahɔlɛ, pekapeka winá woyalawɔ l’ekakasano welendana la mfalanga, elando kana owongwelo wɔ wana. Djɛkondeke ntsha olekɔ ntshukami, okokɛ nangha nge djɛ nkindjɛ mpɛtshɛ ‘lombe lɔ Yah’ lá bala djɛko? Lá djamba djɛnɛ, tongotepela topo tosato tɔ nkindjɛ nkembɛ djokanelo djɛnyo edjinge ndjala la bala dj’osasa.c

NYOKINDJƐ NKEMBƐ DJOKANELO DJƐNYO NYA YEHOVA

3. Wopo wɔkɔnge ndjala la ndjokanelo djɛ wolo la Yehova okotshɛ́wɔ antshukami djɛ nkembɛ ngandji kɛwɔ? (Losanghanyɛ 4:12) (Lenda edjinge ntshango.)

³ Djɛ nkindjɛ mpɛtshɛ ‘lombe lɔ Yah,’ wadji la wome ladjɛ nangha la wolo djɛ ndjala la djokanelo djɛ wɔlɔ la Yehova. Wopo wɔkɔnge djokanelo djɛsɔ okokawɔ nkembɛ bala djɛwɔ? Winá wɔ antshukami ɔsawɔ djokanelo djɛwɔ la Papa kɛwɔ kel’olongo la ntshina, iwɔ wangokamba mbala kɛkɔ kɛmɔ l’alako wande, wakoká ndaakotshɛ́ djɛ ndjewɔ la ndongela ekakasano wekoka nkitshakitshɛ ngandji k’okanawɔ. (Wala Losanghanyɛ 4:12.) Anto walekɔ la lonyuma lɔ wɔlɔ nanghaka lonkina la wolo djɛ ndjokola Yehova edjinge nyɛnyɛ wekeka wande, ndjɔmbɔmba oloko wɔlɔ, balentshitshi la enanghedji kɛ nyimeyɛ. (Ɛfɛ. 4:32–5:1) Winá wɔ antshukami oyalawɔ la wekeka w’etengo wasɔ, angoyala nkambo djɛ wɔdju djɛ ngandji kɛwɔ mfula. Nkaana kɛmɔtshi k’etawɔ Lena, kembotshukamá l’ilá k’ɛnɔnyi ndekana 25, atepelaka ante: “Alekɔ nkambo djɛ wɔdju nkɔpa la nɛmɛyɛ onto wolekɔ la lonyuma lɔ wɔlɔ.”

4. Lamo Yehova ndasɔnɛ Yosɛfu nya Mariya djɛ ndjala ambotshi wa Mesiya k’elakemisá?

⁴ Tokolenda ndjɔmbɔmba kɛmɔtshi kemá Bible. Winá wɔ Yehova ndakɔpɛ nsɔna antshukami amɔtshi dj’iwɔ ndjala ambotshi wa Mesiya kembolakemá, Nde asɔnaka Yosɛfu nya Mariya l’anteyi k’efula kɛ ntonkanola tɔ Davidɛ. Lamo? Ladjikɛnde iyape kɛkɔ wayalaki la djokanelo djɛ ma ma la Yehova, edjinge Yehova ewaki ante iwɔ wangopika bala djɛwɔ má ngandji kɛwɔ tende. Antshukami, olakanyelo wɔkɔnge w’okokanyo mba má ndjɔmbɔmba kɛ Yosɛfu nya Mariya?

5. Olakanyelo wɔkɔnge wame okokawɔ mba me Yosɛfu?

⁵ Yosefu akambaka mbala kɛkɔ kɛmɔ l’ɛlɔndjɛlɔ kɛ Yehova, ko kɛsɔ k’okotshɛka djɛnde ndjala wome wɔ wɔlɔ. Mbala isato y’etendo, nde awaka alako walendana la nkfumbo kɛnde me Ndjambe. Winá enkfumɔ, nde alɛmɛyɛki mbala kɛkɔ kɛmɔ, kaanga winá wɔ nkambo djɛsɔ yalɔmbaka nangha etshikitano wɛ nkekete. (Mat. 1:20, 24; 2:13-15, 19-21) Ma ndɔnda ɛlɔndjɛlɔ kɛ Ndjambe, Yosefu alamaka Mariya, okotshɛ́ka, edjinge oseyɛka ehomba wɛnde. Kokanela wopo wɔ nanghedji djɛ Yosɛfu djɛsɔ iyafudjɛ ngandji la dilɛmɛlɔ djɛ Mariya tende! Wame, nyo nkoka ndjokola Yosɛfu má mponaka alako wemá Bible djɛ nkotshɛka ehomba w’ankfumbo yɛnyo.d Winá w’okambanyo la dako djɛsɔ, kaanga ntsha kɛsɔ kɛlɔmba nangha etshikitano, wɛ nyɛnyɛka ente wɛ nkɔpaka wadjɛko edjinge kɛsɔ kengokembɛ bala djɛnyo. Nkaana kɛmɔtshi kelekɔ lá Vanuatu, kembotshukama l’ila k’ɛnɔnyi ndekana 20, atepela ante: “Winá wɔ womɛmi ohonakande la okambakande l’ɛlɔndjɛlɔ kɛ Yehova, langolekake ndɔlɛmɛyɛ. Langoyawokake ente ndekɔ l’elamelo, edjinge langawolake akano wande.”

6. Olakanyelo wɔkɔnge wadji okokawɔ mba me Mariya?

⁶ Mariya ayalaki la djokanelo djɛ wɔlɔ nya Yehova; djawo djɛnde talendanaki la kɛnɛ kɛ Yosɛfu ndananghaka. Nde ewaki Afunelo wɔlɔ. Nde ɔsaki lonkina winá wɔ ntɔnɔla lá kɛnɛ kɛ ndekaka. (Luka 2:19, 51) Ape l’ehamo, lonyuma lɔ Mariya lonanghaka djɛ nde ndjala wadji wɔ wɔlɔ efula. Lɔɔko kɛnɛ, amato efula wanangha la wolo djɛ ndjokola Mariya. Ndjɔmbɔmba, nkaana kɛmɔtshi k’etawɔ Emiko atepela ante: “Winá wɔ mayalaka epolo, layalaki l’ekfumbo kɛmi kɛ nanghaka akambo welá nyuma. Koko m’ɔkɔngɔ wɔ mpɛtshɛ bala, ndjɛka ndɛna ente ladjikɛnde womɛmi atɔlɔmbɛlaki edjinge alɔndjɛki ɔtɛmwɛlɔ wɔ nkfumbo, djawo djɛmi djetateyɛka ndendama ngo má kɛnɛ kɛ ndananghaka. Ndjɛka ndɛna ente ngo lemi mbɛmba odjito wɔmi lá kɛnɛ kelendana la djokanelo djɛmi isa Yehova. Djɛkondeke winá wɔsɔ langɔsake winá wɔ ntshikala mɔmɛlɛ isa Ndjambe kɛmi, djɛ ndɔlɔmbaka, mbalaka Afunelo, edjinge djɛ ntɔnɔlaka la tokanyi tɔnde.” (Nga. 6:5) Wadji, winá wokindjɛnyo nkembɛ djokanelo djɛnyo la Yehova, wame wanyo wangowa donga efula dj’iwɔ nyolumɛ edjinge nyɔkɔpa.—Woo. 31:30.

7. Olakanyelo wɔkɔnge antshukami okokawɔ mba má ndjɔmbɔmba kɛ Yosɛfu nya Mariya la kɛnɛ kelendana la ntɛmɔla esanga?

⁷ Yosɛfu nya Mariya wakambaki lonkina esanga dj’iwɔ nkindjɛ nkembɛ djokanelo djɛwɔ la Yehova. Iwɔ wasipisoyɛka ohomba wɔ ntɛmɔlaka Yehova esanga lá nkfumbo. (Luka 2:22-24, 41; 4:16) Ayalaka wolo nangha nkambo djɛsɔ, pekapeka winá wɔ nkfumbo kɛwɔ yotafulaka, koko walongaka. Ɔsɔngo ndjɔmbɔmba kɛ wɔlɔ le antshukami wa lɔɔko kɛnɛ! Ntsha olekɔ la wana, etengo Yosɛfu nya Mariya, nkoka ndjala ndambo k’okakasano ndjingela nsanghanyɛ kana nonghanyɛ winá wɔ nangha ɔtɛmwɛlɔ wɔ nkfumbo. Nkoka ndjala edjinge wolo djɛ ntana winá wɔ ndjeka kana ndɔmba esanga etengo antshukami. Koko, vungɔ ente winá wɔtɛmɔlanyo Yehova esanga, nyo ndasukanyɛka entshupa lande edjinge la onto l’onto wɔ l’anteyi kɛnyo. Djɛkondeke nyile ɔtɛmwɛlɔ wɔ Yehova l’edjena kɛ ntondo.

8. Kɛkɔnge kekoka nangha antshukami yepomana l’ekakasano dj’iwɔ ndeka mba wapɔ má ɔtɛmwɛlɔ wɔ nkfumbo?

⁸ Iya otepelaso mo ntsha bala djɛnyo dekɔ l’ekakasano? Ikanyi yɛ ntshumana esanga lá ɔtɛmwɛlɔ wɔ nkfumbo nkoka nyɛnama etengo ipalekɔ yɛ wɔlɔ. Ntsha oyɛwɔ nde nghɔsɔ, angoyala wɔlɔ nyo mbanga ndjeka wamba amɔtshi wa totenyi la wapɛyɛ osasa, wa nyɔngɔkɔpa nsawola nyape kɛkɔ. Nangha nghɔsɔ nkoka nkembɛ djokanelo djɛnyo edjinge mposɛ kɛnyo kɛ nangha akambo welá nyuma etengo antshukami.

NYOHETSHƐKE WINÁ ESANGA

9. Lamo wadji nya wome oyɛwɔ ladjɛ mpetshɛka winá esanga?

⁹ Antshukami, nyo nkoka nkembɛ ngandji kɛnyo lonkina má mpetshɛka winá esanga. Nangha nghɔsɔ, angonyokotshɛ́ djɛ ndjewa tokanyi tɔ winako la wopo w’oyawokande. (Ewa. 2:24) Tokolenda kɛnɛ kɛ Lilia nya Ruslan yisolá ndambo m’ɔkɔngɔ w’iwɔ ntshukana, amboheta winá wɔsɔ ɛnɔnyi 15. Lilia atepela ante: “Toyɛka ndɛna ente topawa winá efula wɔ ndjala esanga etengo sakanelaka. Winá wɛso wahetaki ngo l’elemo wɛ ndemba, l’elemo welá mvulu, la le wana waso. Tɛnaka ente ntsha topoyawombela winá wɔ nsawolaka esanga, ngandji kɛso kengokita.”

10. Wopo wɔkɔnge antshukami okokawɔ nkamba l’ikfɔ yelekɔ́ lá Ɛfɛsɛ 5:15, 16?

¹⁰ Kɛkɔnge kɛ antshukami okokawɔ nangha djɛ mpetshɛka winá esanga? Nyo nkoka nonghanyɛ kana nshikikɛ winá wɔ nyo sawolaka esanga. (Wala Ɛfɛsɛ 5:15, 16.) Wɔnanyɔ ɔmɔtshi welá Nigeria w’etawɔ Uzondu atepela ante: “Winá wolonghanyɛmi elemo wɛ mongonangha, mpavungɛka ndjila edjinge winá wɔ mongohetshɛ esanga isa wadjɛmi, edjinge longohetshɛke winá wɔkɔ l’edjena kɛ ntondo.” (Flp. 1:10) Kolenda wopo wɔ Anastasia, wadjɛ onami wedjingadjinga ɔmɔtshi welá Moldavie, okambakande la winá wɛnde lá lɛdji lɔ wɔlɔ. Nde atepela ante: “Langonanghake la wolo djɛ nshiyɛ elemo wɛmi winá wɔ womɛmi onanghande elemo wɛnde wel’otshumano. Má nangha nghɔsɔ, iso nkoka mba mbamba kɛ ndohetshɛ winá esanga.” Iya okokanyo nangha nge ntsha nonghanyi kɛnyo kepanyɔpɛyɛ winá wɔ ndjala esanga?

11. Elemo wɛkɔnge Akula nya Priskila yakambaka esanga?

¹¹ Antshukami nkoka mba olakanyelo má ndjɔmbɔmba kɛ Akula nya Priskila, antshukami wakɔpamaki me Akristo efula wal’ɛtɛndɔ kɛ ntondo. (Ɔrɔ. 16:3, 4) Kaanga Bible ndopatepela akambo efula walendana la bala djɛwɔ, djɛtɛnyɛ ante wakambaki, wapoposanyɛki edjinge wakotshɛ́ki anto ankina esanga. (Ele. 18:2, 3, 24-26) Lá nsɔsɔlɔ, mbala inkfumɔ yɛ Bible otepelande nkambo djɛ Akula la Priskila, álumolakande ngo iyape kɛkɔ esanga.

12. Wadji nya wome okokawɔ nangha nge djɛ mpetshɛka winá esanga?

¹² Wopo wɔkɔnge antshukami okokawɔ ndjokola Akula nya Priskila? Kokanela efula k’akambo kɛ wɛ kana womɛko oyɛnyo ladjɛ nangha. Nyopakoke nangha elemo ɛmɔtshi l’anteyi k’elemo wɛsɔ esanga etengo antshukami l’edjena kɛ nyo nangha onto l’onto lá wopo wɔnde? Ndjɔmbɔmba, Akula nya Priskila wapoposanyɛki esanga. Iya nyo, nyongolonghanyɛke mbala la mbala djɛ mpoposanyɛ esanga? Akula nya Priskila wakambaki lonkina esanga. Mbala imɔtshi wɛ nya ebula kɛko nyopakambe olemo ɔmɔ esanga, ko nyopakoke nangha elemo welá mvulu nyape esanga? (Los. 4:9) Winá w’okotshananyo djɛ nangha tolelemo tɔmɔtshi esanga, nyongoleka ndawoka ente nyolekɔ iwoke imɔ edjinge nyongowaka mbamba kɛ nsawolaka. Robert nya Linda wambotshukana l’ilá k’ɛnɔnyi ndekana 50. Robert atepela ante: “Lá nsɔsɔlɔ, totawaki winá efula wɔ mpetshɛ l’asɛkɛlɔ esanga. Koko winá wɔ masolaka alɔnga ko wadjɛmi adjola washi kana winá wɔ makambaka lá jardɛ djɛso ko wadjɛmi amboyɛ ndokamba esanga la lemi, l’okaki osasa efula. Nangha akambo esanga nghɔsɔ ntokotshɛka dj’iso ndjala iwoke imɔ. Ngandji kɛso ketakindjɛ ngo mfula.”

13. Djɛ ndjala nsɔsɔlɔ l’osanga, wadji nya wome oyɛwɔ ladjɛ nangha nge?

¹³ Koko, vungɔ ente, ndjala esanga toko apakoke nkotshɛ́ djɛ osanga ndjala. Omoto ɔmɔtshi welá Brésil atepelaka ante: “M’ɔtɛ wɔ efula k’akambo wɛkɔla yimba wel’etsho wɛso wɛnɛ, tokoka ndɔkfɔ l’ilongá yɛ mfɛnyɛ ente tohetshɛ winá esanga ngo ladjikɛnde towika lá mvulu kɛmɔ. Ndjɛka ndosipisoyɛ ente topakoke nkoma ngo lá ndjala esanga toko, koko lonkina, ngo ndjilanaka yimba.” Kolenda wopo wɔ Bruno nya wadjɛnde Tays, onanghawɔ djɛ ndjilanaka yimba l’anteyi kɛwɔ. Bruno atepela ante: “Lá winá wɔ salonghanyɛ djɛ ndjalaka esanga, tongotshikake atelefɔnɛ yɛso l’omamo dj’iso ndjewa nsawola wɔlɔ.”

14. Ntsha antshukami wapasasanga mpetshɛ winá esanga, kɛkɔnge k’okokawɔ nangha?

¹⁴ Iya kɛkɔnge k’okokanyo nangha ntsha nyape kɛkɔ nyopasasanga mpetshɛ winá esanga? Nkoka ndjala nyolekɔ la mposɛ yetshikitanyi, kana nyolekɔ la ntɔnkɛnkɛlɛ. Kɛkɔnge k’okokanyo nangha? Kokanela nkambo djɛ sotepelaki má djiko djelendana l’iyɛ. Iyɛ ipatateyɛka mpɛta la wolo má bango. Ingɔlɔmbake ndjila tokokonyi tɔ daambi ndambo ndambo tii ndokoma lá angale. Wopo wɔk’ɔmɔ ndeke, má bango nyokoka mpetshɛka ndambo kɛ winá daambi esanga lofu la lofu. Nyonanghe ikakambo imɔtshi yekoka nyosasangɛ nyape kɛkɔ, koko ape yengomadjɛ ɔmɔtshi l’anteyi kɛnyo. (Dja. 3:18) Má nangha nghɔsɔ, nyokoka ntateyɛ mpɛtshɛ ngandji kɛnyo.

NYONANGHELANAKE AKAMBO LA DILƐMƐLƆ

15. Ladjikɛnge dilɛmɛlɔ oyɛwɔ djonyi djɛ wadji nya wome nkindjɛ nkɔpana?

¹⁵ Dilɛmɛlɔ dekɔ la ntshina efula lá bala. Dekɔ etengo lohoyi lokotshɛ́ká dj’iyɛ mpɛta la wolo. Ntsha lako lohoyi, iyɛ ingodjima lankeke. Wopo wɔk’ɔmɔ ndeke, ntsha lako dilɛmɛlɔ, ngandji k’antshukami nkoka mpɔla lankeke. L’onkoko onkina, wadji la wome wonangha la wolo djɛ nɛmɛyana l’anteyi kɛwɔ, nkomɛka ngandji kɛwɔ wolo efula. Koko, vungɔka ente, ape nkanela ente wɛ nɛmɛyɛka wadjɛko kana womɛko ndeke djonyi, koko wadjɛko kana womɛko ndeke ladjɛ ndawoka ante ɔngɔɔlɛmɛyɛke. Penny nya Aret wambotshukana ɛnɔnyi ndekana 25. Aret atepela ante: “Ladjikɛnde tɔngɔlɛmɛyanake l’anteyi kɛso, mvulu kɛso ndola nkfu la ngandji. Topakaakandaka mpɛyana tokanyi ladjikɛnde tongewake ente onto l’onto wɔ l’anteyi kɛso angɔsake ikanyi yɛ winande la ntshina efula.” Ko, kɛkɔnge k’okokɛ nangha djɛ nkotshɛ́ wadjɛko kana womɛko djɛnde ndawoka ante ɔngɔlɛmɛyake nsɔsɔlɔ? Tokolenda ndjɔmbɔmba kɛ Abrahama nya Sara.

16. Olakanyelo wɔkɔnge wame okokawɔ mba má ndjɔmbɔmba kɛ Abrahama? (1 Pɛtɛlɔ 3:7) (Lenda edjinge ntshango.)

¹⁶ Abrahama ananghelaki Sara akambo la dilɛmɛlɔ. Nde ɔsaki tokanyi tɔ Sara la ntshina efula edjinge alɛmɛyɛki mposɛ yɛnde. Lofu lɔmɔtshi, Sara ayalaka la nkɛlɛ efula, nde ashimelaka Abrahama wopo wɔ ndoyawokaka edjiinge ɛkɛka Abrahama lowo lɔ nkambo djɛkɔ. Iya Abrahama owomadjɛka edjinge otshoolaka? Lako. Nde ewaki ante Sara alekɔ wadji wɔ ntshunamo edjinge wosukaki efula. Abrahama owekameyɛka edjinge ananghaka la wolo djɛ nkandola nkambo djɛkɔ. (Ewa. 16:5, 6) Olakanyelo wɔkɔnge w’isombowa? Wame, nyolekɔ la lowandji lɔ ndɔsa akano lá nkfumbo yɛnyo. (1 Kɔ. 11:3) Koko, nkambo djɛ ngandji djoyɛnyo ladjɛ nangha nde ndjila yimba lá tokanyi tɔ wadjɛnyo lá ntondo kɛ ndɔsa akano, pekapeka ntsha nkano djɛsɔ ngoyala l’eposelo ɛmɔtshi tende. (1 Kɔ. 13:4, 5) Lá winá ɛmɔtshi, wadjɛko nkoka nyomala edjinge nkoka ndjala la mposɛ kɛ nkoshimela wopo woyawokande. Ɔngɔlɛmɛyɛke mposɛ yɛnde má ndowekameyɛ la nkɔmɛ nkfumɔ? (Wala 1 Pɛtɛlɔ 3:7.) Angela nya Dmitry wambɔpɛtshɛ́ bala nsuke l’ɛnɔnyi 30. Nde apakisola wopo wɔ womɛnde onanghakande djɛ nde ndawoka ante alɛmɛyama: “Dmitry angoyalake winá enkfumɔ entshupa djɛ ndjekameyɛ lemi la nkɔmɛ ntsha lambomala kana nkɔpa ntepela. Nde angoyalake la balentshitshi le lemi kaanga ntsha lambomala efula.”

17. Olakanyelo wɔkɔnge wadji okokawɔ mba má ndjɔmbɔmba kɛ Sara? (1 Pɛtɛlɔ 3:5, 6)

¹⁷ Sara alɛmɛyɛki Abrahama má wopo wɔ ndasukaka akano wande. (Ewa. 12:5) Lá mbamba kɛmɔtshi, Abrahama ɔsaka nkano djɛ ndongola angangɛnda wakomelisá l’isasimoyɛ. Nde ashimelaka Sara djɛ ntshika kɛnɛ kɛ ndananghaka ko ndamba mampa y’efula. (Ewa. 18:6) Sara ananghaka lankeke ko asukaka nkano djɛ Abrahama. Wadji, nyo nkoka ndjokola Sara má nsukaka akano wa wame wanyo. Ntsha nyombonangha nghɔsɔ nyongokembɛ bala djɛnyo. (Wala 1 Pɛtɛlɔ 3:5, 6.) Dmitry, kaanga sotepelaki l’itenyi yemboheta apakisola wopo wɔ wadjɛnde ɔlɛmɛyɛkande. Nde atepela ante: “Langɔkɔpake welo wɛ Angela ilakande djɛ nsuka akano wami, kaanga ntsha tokanyi tɔso topasange. Ntsha eposelo wepayalisa wɛ wɔlɔ, nde apanyɔnyɔlaka.” Alekɔ nsɔsɔlɔ nkambo djɛ wɔdju nkɔpa onto wɔkɔlɛmɛyɛka!

18. Wapɔ wɛkɔnge antshukami okokawɔ mba má nkamba la wolo djɛ nkembɛ ngandji kɛwɔ?

¹⁸ Lɔɔko kɛnɛ, Satana nkɔpaka ndjimɛ ngandji kelekɔ l’awala w’Akristo. Nde ndjewaka ante ntsha antshukami wambotshika ndjokana ngandji, wakoka ntateyɛ ndawangoyɛ la Yehova. Koko, ngandji kɛ nsɔsɔlɔ kepakoke ndjima! Djɛkondeke nyonanghe djɛ ngandji kelá bala djɛnyo ndjala etengo kɛ kɔndɔlama lá Yeembo yɛ Salɔmɔna. Nyɔshi nkano djɛ ndjila Yehova l’edjena kɛ ntondo lá lowiko lɔnyo, nyɔsake winá wɔ nsawolaka esanga nyape, nyɔlɛmɛyɛke mposɛ l’ehomba w’onto l’onto. Má nangha nghɔsɔ, bala djɛnyo ngolumɛ Ikɔkɔ yɛ ngandji kɛ nsɔsɔlɔ, Yehova, edjinge etengo iyɛ yotshumanyɛwɔ wɔlɔ, ngandji kɛnyo kengokindjɛ pɛtapɛta lotshinda lotshinda.