Kindjɛ ndjala entshupa lá nkambo djɛ lofu lɔ Yehova

1. Kɛkɔnge k’oyɛso ladjɛ nangha djɛ ndowika lá lofu lɔ Yehova?

WINÁ wɔ Bible otepelande nkambo djɛ ‘lofu lɔ Yehova,’ ɔkɔpande nde ntepela lofu lɔ Yehova ndongotshita antonyi wande la ndongowikɛ enkambi wɛnde. L’etsho wɛ ntondo, Yehova alomboyɛka anto amɔtshi. (Iza. 13:1, 6; Ezk. 13:5; Sef. 1:8) L’etsho wɛso wɛnɛ, ‘lofu lɔ Yehova’ longowanga winá wɔ ewandji wɛ pɔlitikɛ yongotshita Babilɔnɛ dj’Ekekete tii lá mbandji kɛ Armagɛdɔ. Dj’iso ndowika lá ‘lofu’ lɔsɔ, iso ladjɛ ndalɔngɔsɔla má winá wɔsɔ. Yeso alakanyɛka ante totakomake ngo lá ndalɔngɔsɔla lá nkambo djɛ ‘ndjolo k’ekekete’ toko, koko ‘tokindjɛ ndalɔngɔsɔla’ lá nkambo djɛkɔ.—Mat. 24:21; Luka 12:40.

2. Lamo okokaso mba wapɔ má nshishima 1 Tesalɔnikɛ?

² Lá onkanda wɔnde wɔ ntondo wɔ ndafunela ase Tesalɔnikɛ má wolo wɔ nyuma k’ekina, ɔpɔstɔlɔ Poolo akambaka la ndjɔmbɔmba efula djɛ nkotshɛ́ Akristo dj’iwɔ nkindjɛ ndjala entshupa lá nkambo djɛ lofu l’ekekete lɔ dombo djɛ Yehova. Poolo ewaki ante lofu lɔ Yehova lopangoyɛ l’etsho wɛsɔ. (2 Te. 2:1-3) Koko, nde akembɛka wananyɔ djɛ ndalɔngɔsɔla lá nkambo djɛ lofu lɔkɔ etengo yongoyɛnde lomi, edjinge iso tokoka nkamba la dako djɛkɔ. Nyontshɔ toshishime nsakiso yɛnde lá akambo wawɔlama wanɛ: 1) wopo wɔkɔnge lofu lɔ Yehova yongoyɛ, 2) anto wakɔna wapangowiká lá lofu lɔkɔ, edjinge 3) wopo wɔkɔnge w’okokaso ndalɔngɔsɔla djɛ ndowika.

WOPO WƆKƆNGE LOFU LƆ YEHOVA YONGOYƐ?

3. Lá wopo wɔkɔnge lofu lɔ Yehova yongoyɛ etengo wibi lá lotsho? (Lenda edjinge ntshango.)

³ ‘Etengo ose wibi la lotsho.’ (1 Te. 5:2) Ɔsɔ alekɔ itepela yɛ ntondo l’anteyi kɛ totepela tosato tɛnyɛ wopo wɔ lofu lɔ Yehova yongoyɛ. Mbala efula ase wibi wangɔngɔlake nkete lankeke lankeke edjinge lá widjimá dj’ipa anto ndaawɛna. Edjinge lofu lɔ Yehova longoyɛ lá mayimo djɛ ntsho, longosasimola anto efula. Kaanga Akristo wa nsɔsɔlɔ wangokashimɔ wopo wo lofu lɔ Yehova yongoyɛ l’isasimoyɛ. Koko lá lɛdji lotshikitanyi l’anto wapɔlɔ, iso topangotshitana.

4. Lá wopo wɔkɔnge lofu lɔ Yehova yongoyɛ etengo lɔɔnɔ?

⁴ ‘Ngo ngete lɔɔnɔ le omoto w’olekɔ́ la djemi.’ (1 Te. 5:3) Omoto wolekɔ́ la djemi apewaka winá kɔɔ wɔ ndongowota. Koko nde apilaka ehamo ante lofu lɔsɔ longoyɛ. Lɔɔnɔ ndjɛka lá yopo yɛ isasimoyɛ, yɛ ndjolo, edjinge yɛ yopakoke nkfulumeyɛ. Lá wopo wɔk’ɔmɔ ndeke, topewe lofu kana winá kɔɔ wɔ lofu lɔ Yehova yongowanga. Koko tolekɔ l’eshikikelo ente longoyɛ, la dombo djɛ Ndjambe te anto wapɔlɔ ngoyɛ l’isasimoyɛ edjinge lá yopo yɛ yopakoke ndota.

5. Lá wopo wɔkɔnge ndjolo k’ekekete oyɛwɔ etengo ɛkɛlɔ kɛ winá?

⁵ Etengo ɛkɛlɔ kɛ winá. Ndjɔmbɔmba k’asato kɛ Poolo ketepela lonkina wopo wɔ ase wibi ɔngɔlakawɔ lá lotsho. Koko mbala kɛnɛ etengo Poolo ndɛdjɛká lofu lɔ Yehova nde la ɛkɛlɔ kɛ winá. (1 Te. 5:4) Ase wibi wayɛká lá lotsho nkoka mvungɛ ambɔ winá wɔngɔkɛ. Ɛkɛlɔ kɛ winá nkoka ndawila l’ilonga edjinge ndaposɛ lá ntshandjawala. Wopo wɔk’ɔmɔ ndeke ndjolo k’ekekete yongoposɛ anto, wakindjɛ ntshikala lá widjima etengo ase wibi, má nkindjɛ nangha akambo wapasasangɛ Ndjambe. Lá lɛdji lotshikitana lawɔ, iso nkoka ndalɔngɔsɔla má ntshika nanghedji djepasasangɛ Yehova la nkilika ‘wepo w’akambo ankfumɔ wa wɔlɔ la wa sii edjinge wa nsɔsɔlɔ.’ (Ɛfɛ. 5:8-12) Masɔ Poolo akambaka la ndjɔmbɔmba k’ape djɛ ntepela nkambo dj’anto wapangowiká.

ANTO WAKƆNA WAPANGOWIKA LÁ LOFU LƆ YEHOVA?

6. Lá lɛdji lɔkɔnge efula k’anto etamawɔ ilɔ? (1 Tesalɔnikɛ 5:6, 7)

⁶ ‘Wanɛ w’etamá ilɔ.’ (Wala 1 Tesalɔnikɛ 5:6, 7.) Poolo ɛdjɛka wanɛ wapangowiká lá lofu lɔ Yehova la anto w’etamá ilɔ. Iwɔ wapewe akambo waheta l’edjena kɛwɔ kana wopo wotahete winá. Djɛkondeke wapasipisoyɛ winá wɔ akambo wa djonyi onanghemawɔ, edjinge wapakoke kaanga nangha nkambo mmɔ lá kɛnɛ kelendana l’akambo wakɔ. Lɔɔko kɛnɛ anto efula walekɔ l’ilɔ yɛ nyuma. (Ɔrɔ. 11:8) Iwɔ wapawola tolembetelo tɛnyɛ ente towika ‘l’etsho w’ekomo’ edjinge ente ndjolo k’ekekete kemboyala entshupa. Akambo wa nkekete waheta l’andja nkoka nsasimoyɛ anto amɔtshi má ilɔ yɛ nyuma edjinge ndatshinda dj’iwɔ ndjawola losango l’Onkfumi. Koko, l’edjena kɛ mbadjɛ anto efula nkalɔka ndjetama ilɔ. Kaanga wanɛ wawola ambɔ lofu lɔ dombo longoyala, wakanela ngo ambɔ lofu lɔkɔ lolekɔ ngo otale. (2 Pɛ. 3:3, 4) Koko, iso nsipisoyɛka ente dako djemá Afunelo djetokembɛ́ djɛ mbadjɛ djetaleke ndjala djonyi winá wɔ mfu yotahete.

7. Wopo wɔkɔnge anto wakongela nkɛlɛ kɛ Ndjambe oyɛwɔ ngete onto wombovɔ waná?

⁷ ‘Wanɛ wavɔ́ waná.’ Ɔpɔstɔlɔ Poolo ɛdjɛka anto wa Ndjambe ndongotshita l’anto wavɔ́ waná. Onto wombovɔ waná angoyalake lɔnghɔnyɔ lá ndjelola l’akambo waheta entshupa lande, edjinge angɔsake akano wa nyɛtshi. Wopo wɔk’ɔmɔ ndeke, anto wa nyɛtshi wapile yimba lá ndjewo kɛ Ndjambe. Iwɔ nsɔnaka yopo yɛ lowiko yengatɔla t’etshitanelo. Koko Akristo ndɔmbamaka djɛ mbadjɛ la ndjala l’ekanedji kɛ yimba kɛ wɔlɔ. (1 Te. 5:6) Ondjewi wɔ Bible ɔmɔtshi atepelaka ante, onto w’olekɔ́ l’ekanedji kɛ yimba kɛ wɔlɔ angolamake “vu djel’oloko, nde apasokaka lokomba. Nde ndjalaka l’akoka wa nkanela wɔlɔ la ndɔsa akano wa wɔlɔ.” Lamo oyɛso ladjɛ ntshikala vu l’idjena yɛso? Dj’ipa iso ndiingela lá wayi wa pɔlitikɛ wa lɔɔko kɛnɛ. Winá wɔ lofu lɔ Yehova yotaleke ndjala entshupa, anto wangoleka ntotshinda la wolo djɛ ndɔsa opiko lá wayi wa pɔlitikɛ. Koko, topakoke ndakiyanyɛ lá wopo wɔ songelola. Nyuma kɛ Ndjambe kengotokotshɛ́ djɛ nama ikanyi yɛ wɔlɔ edjinge djɛ ndɔsa akano wa balo.—Luka 12:11, 12.

KƐKƆNGE K’OKOKASO NANGHA DJƐ NDALƆNGƆSƆLA LÁ NKAMBO DJƐ LOFU LƆ YEHOVA?

8. Wopo wɔkɔnge 1 Tesalɔnikɛ 5:8 ɛnyɛnde wekeka wangotokotshɛ́ djɛ mbadjɛ la djɛ nkindjɛ ndjala l’ikanyi yɛ wɔlɔ? (Lenda edjinge ntshango.)

⁸ ‘Tɔlɔtɛ nguwa . . . edjinge . . . itombo.’ Poolo atɛdjɛka l’angala wambowadjɛ edjinge wambɔlɔta ɔlɔta wɔ tá mbandji. (Wala 1 Tesalɔnikɛ 5:8.) Ongala wɔ wɔlɔ ndɔmbamaka djɛ ndjala entshupa djɛ nana mbandji winá onkfumɔ wɔ mbandji oposawɔ. Oyɛwɔ ngo nghɔsɔ edjinge leso. Iso ndjalaka entshupa lá nkambo djɛ lofu lɔ Yehova má ndɔta nguwa kɛ djawo la kɛ ngandji edjinge itombo yɛ nkongi. Wekeka wasɔ nkoka ntokotshɛ́ efula.

9. Wopo wɔkɔnge djawo djɛso otolamande?

⁹ Nguwa namaka oloko w’ongala. Djawo la ngandji namaka oloko wɔso wɔ djingingi. Wekeka wasɔ ntokotshɛ́ka djɛ nkindjɛ nkambela Ndjambe edjinge nkilika Yeso. Djawo ntokotshɛ́ka djɛ ndjala l’eshikikelo ente Yehova angotofuta má wopo w’ohonaso l’oloko ɔmɔ. (Heb. 11:6) Ngotokotshɛ́ djɛ ntshikala la nkɔmano te Owandji wɔso, Yeso, kaanga ntsha topomana l’ehemba. Iso nkoka nkembɛ djawo djɛso djɛ ndjala l’akoka wa nkfulumeyɛ ekakasano welá lowiko má ndjekaka ndjɔmbɔmba kɛ anto welá etsho wɛso wɛnɛ watshikalisá la nkɔmano kaanga l’anteyi kɛ lɔnyɔkɔ kana ekakasano welendana la mfalanga. Edjinge iso nkoka ndjewɔ ilonga yɛ nkɔpa nkete djelá demba má ndjokola ndjɔmbɔmba kɛ anto watshikisá lowiko lɔwɔ onghanghunya djɛ ndjila wapɔ w’Onkfumi l’edjena kɛ ntondo.b

10. Wopo wɔkɔnge ngandji k’okaso Ndjambe edjinge winaso anto otokotshɛ́wɔ djɛ nkfulumeyɛ?

¹⁰ Ngandji kelekɔ lonkina djonyi djɛ iso nkindjɛ mbadjɛ la ndjala l’ikanyi yɛ wɔlɔ. (Mat. 22:37-39) Ngandji k’okaso Ndjambe ntokotshɛ́ka djɛ nkindjɛ mpoposanyɛ ayale ekakasano wɛkɔnge wekoka ndjɛ má nkambo djɛsɔ. (2 Ti. 1:7, 8) Ladjikɛnde iso ndjokaka edjinge anto wapakambela Yehova ngandji, iso nkindjɛka mpoposanyɛ la nkindjɛka nkamba l’etatshi kɛso kɛ looko, ayale kaanga mpoposanyɛ má tɛlɛfɔnɛ kana m’enkanda. Topatshutshɛ nkongi ente lofu lɔmɔtshi anto welá etsho wɛso wangotshikitana edjinge wangotateyɛ nangha kɛnɛ kelekɔ́ wɔlɔ.—Ezk. 18:27, 28.

11. Wopo wɔkɔnge ngandji k’okaso winaso Akristo otokotshɛ́wɔ? (1 Tesalɔnikɛ 5:11)

¹¹ Iso nkɔpaka lonkina wananyɔ l’ankaana yɛso. Iso nyɛnyɛka ngandji kɛ nghɔsɔ má ‘nkembɛna la nsukana l’anteyi kɛso.’ (Wala 1 Tesalɔnikɛ 5:11.) Ngo ngete angala okambakawɔ mpɛka la mpɛka lá mbandji, iso nkembɛnaka l’anteyi kɛso. Lá nsɔsɔlɔ, ongala nkoka, ipa la ndjewa, mpotadjɛ winande ongala lá mbandji, koko nde apakoke lotshinda nangha nkambo djɛsɔ l’onkonda. Lá wopo wɔk’ɔmɔ, topakoke lotshinda nkiyanyɛ wananyɔ l’ankaana yɛso lonkonda kana nkawoyɛ nyɛtshi tá nyɛtshi. (1 Te. 5:13, 15) Iso nyɛnyɛka ngandji kɛso lonkina má nɛmɛyɛ wananyɔ walɔndjɛ otshumano. (1 Te. 5:12) Winá wɔ Poolo ndafune onkanda wɔnɛ, ko otshumano wɔ Tesalɔnikɛ wotananghe kaanga ɔnɔnyi ɔmɔ. Mbala imɔtshi ampame yɛlɔndjɛki otshumano wɔsɔ watapakisɔ akambo la wananghaki evunga. Koko kaanga yayale nghɔsɔ, alɔmbamaki ngo ndalɛmɛyɛ. Winá wɔ sotaleke nsukana tá ndjolo k’ekekete, tokoka ndoyala la djonyi djɛ nkilika ɛlɔndjɛlɔ kɛ tokokolo tel’otshumano ndeka lɔɔko kɛnɛ. Mbala imɔtshi topangoyala l’akoka wa mba ɛlɔndjɛlɔ me wananyɔ welá bilo dj’ekekete la wemá Betɛlɛ; djɛkondeke, alekɔ djonyi iso ndjeka djɛ nkɔpa la nɛmɛyɛ tokokolo tɔso má winá wɔsɔ. Ayale kɛkɔnge kengoposá, nyontshɔ tokindjɛ nama ekanedji kɛso kɛ wɔlɔ, ipa mpika wiso lá evunga wɛwɔ, koko topike wiso lá nsɔsɔlɔ kɛ ente, Yehova ndeke lɔlɔndjɛ ampame yɛ nkɔmano yɛsɔ má lotshimbo lɔ Kristo.

12. Wopo wɔkɔnge nkongi djɛso olamawɔ tokanyi tɔso?

¹² Ngo ngete itombo olamakande ɔtɛ w’ongala, nkongi djɛso djɛ ewiko namaka tokanyi tɔso. L’eshikikelo kenkfumɔ, iso ndjawolaka ente kɛnɛ kɛ andja wanɛ okokawɔ ntɔpɛyɛ kepalekɔ la ntshina. (Flp. 3:8) Nkongi djɛso ntokotshɛ́ka djɛ ntshikala vu edjinge ntshikala l’edjena kɛso. Wallace nya Laurinda, waakambá lá Afrikɛ, wɛnaka nsɔsɔlɔ kɛ nkambo djɛsɔ. Lá mbengo isato toko, iyape kɛkɔ wavusɛka ɔnɛ isɛkɛnde ɔnɛ nyɛnghɛnde. M’ɔtɛ wɔ opela wɔ COVID-19, iwɔ watayala l’akoka wa nkalɔ tá ewila wɛwɔ djɛ ntoyala l’ankfumbo yɛwɔ esanga. Wallace afunaka ante: “Nkongi dj’ekfundwelo djenkotshɛ́ka djɛ lemi ndawɛna lá yimba yɛmi, ape wopo wɔ yayalaka l’ekomo kɛ lowiko lɔwɔ lel’andja wanɛ, koko wopo wɔ yongoyala má bango djɛ lowiko lɔwɔ l’andja wa bango. Nkongi djɛsɔ nkitshakitshɛka oloko wɔmi winá wovundamami la yɛnyi yɛ ovuselo wɔ onto wɔ ngandji.”

13. Kɛkɔnge k’okokaso nangha djɛ mba nyuma k’ekina?

¹³ ‘Todjimɛke iyɛ yɛ nyuma.’ (1 Te. 5:19) Poolo ɛdjɛka nyuma k’ekina la iyɛ yelekɔ́ l’eteyi kɛso. Ntsha tolekɔ la nyuma kɛ Ndjambe, iso ndjalaka l’entete edjinge l’osasa wɔ nangha kɛnɛ kelekɔ́ wɔlɔ edjinge wolo wɔ nkambela Yehova. (Ɔrɔ. 12:11) Kɛkɔnge k’okokaso nangha djɛ mba nyuma k’ekina? Iso ladjɛ ndɔmbaka djɛ mba nyuma kɛkɔ, ndjekaka Otepela wɔ Ndjambe, la nkilikaka ɛlɔndjɛlɔ kɛ nyuma kɛnde k’owaso má olonghanyelo wɔnde. Nangha nghɔsɔ angotokotshɛ djɛ ndjala la wekeka wa ‘lowambo lɔ nyuma.’—Nga. 5:22, 23.

14. Ntsha tɔkɔpa nkindjɛ mba nyuma kɛ Ndjambe, kɛkɔnge k’oyɛso ladjɛ ndjewɔ? (Lenda edjinge ntshango.)

¹⁴ M’ɔkɔngɔ wɔ Ndjambe ntɔpɛyɛ nyuma kɛnde k’ekina, iso ladjɛ mbadjɛ dj’ipa ‘ndjimɛ iyɛ yɛ nyuma.’ Ndjambe mpɛyɛka nyuma kɛnde k’ekina ngo le anto walekɔ́ piyɔɔ lá tokanyi la lá nanghedji. Nde apangɔtɔpɛyɛ nyuma kɛnde ntsha tokindjɛ nkanela la nangha akambo wa nyɛtshi. (1 Te. 4:7, 8) Dj’iso nkindjɛ mba nyuma k’ekina, ‘topakoke lonkina nyɔnyɔla prɔfɛsi.’ (1 Te. 5:20) ‘Prɔfɛsi’ yotepelawɔ lanɛ ndendanaka la losango lɔ Ndjambe lɔtɔpɛyɛnde má lotshimbo lɔ nyuma kɛnde k’ekina, ndjila edjinge losango lolendana la lofu lɔ Yehova la wopo wɔ lofu lɔkɔ yomboyala entshupa. Topakoke nyimɛ lofu lɔsɔ má yimba yɛso má nkanela ente Armagɛdɔ wapangoyɛ lá etsho wɛso wɛnɛ. L’edjena kɛ nkanela nghɔsɔ, iso nyɛnyɛka ente, tawola ente lofu lɔkɔ lomboyala entshupa, ntepela ente iso namaka lofu lɔkɔ lá wɔɔngɔ má nkindjɛ ndjala la nanghedji djɛ wɔlɔ edjinge má ‘ndapɛyɛ l’akambo ankfumɔ wɛnyɛ djɛ tolekɔ ma ma la Ndjambe’ winá enkfumɔ.—2 Pɛ. 3:11, 12.

‘NYƆKƆMƐ AKAMBO ANKFUMƆ’

15. Wopo wɔkɔnge w’okokaso nangha dj’ipa ndjimbama má lodjimbo la má prɔpagadɛ yɛ ɛdjɛngɛ? (1 Tesalɔnikɛ 5:21)

¹⁵ Lako ilá, antonyi wa Ndjambe wangotepela lá lɛdji lɔmɔtshi ambɔ: ‘Vu la lotoyi ntshitshi!’ (1 Te. 5:3) Ɛdjɛngɛ wangolodjɛ looko l’otondo la prɔpagadɛ yɛwɔ, wangodjimba anto efula. (Ndj. 16:13, 14) Iya otepelaso mo lá nkambo djɛso? Topangodjimbama ntsha iso ‘nshishimaka kana nkɔmɛka akambo ankfumɔ.’ (Wala 1 Tesalɔnikɛ 5:21) Itepela yɛ Grɛkɛ yekadjimwamá ‘nshishima’ yekambemaka djɛ nyɛnyɛ ikanyi yɛ onto wɔkɔmɛ mbolo imɔtshi, ndjɔmbɔmba, mpaonyi kana mfɛsa djɛ ndashikikɛ ntsha yelekɔ yɛ wɔlɔ. Djɛkondeke iso ladjɛ nshishima kɛnɛ k’okaso kana k’owalaso djɛ ndashikikɛ ntsha kelekɔ wɔlɔ. Nkambo djɛsɔ djeyalaka djonyi efula le ase Tesalɔnikɛ, edjinge djengoleka ndjala la djonyi kaanga leso winá wɔ sotaleke nsukana tá ndjolo k’ekekete. L’edjena kɛ ndjala yawolawola l’akambo w’anto ankina otepelawɔ, iso nkambaka la nkoka djɛso djɛ nkanela djɛ ndjɛdjɛ akambo w’okaso kana w’owalaso la kɛnɛ kɛ Bible l’olonghanyelo wɔ Yehova otepelawɔ. Má nangha nghɔsɔ, topangodjimbama má prɔpagadɛ kana lodjimbo lɔ ɛdjɛngɛ.—Woo. 14:15; 1 Ti. 4:1.

16. Nkongi djɛ nsɔsɔlɔ djɛkɔnge dj’okotshɛso, ko nkambo djɛsɔ ototshindawɔ djɛ nangha nge?

¹⁶ Etengo oloyi, enkambi wɛ Ndjambe wangowika lá ndjolo k’ekekete. Koko, le onto l’onto, topewe kɛnɛ kengotokomela lomi. (Dja. 4:14) Koko, ayale ntsha tongokoma lá ndjolo k’ekekete, kana tongovɔ ntondo, tongowa lowiko l’etshinda ntsha tombotshikala la nkɔmano. Ankfutami w’avuta wangotoyala esanga lá Kristo l’olongo. Ɛnkɔkɔ enkina wangoyala lá paradiso kelá looko. Djɛkondeke nyontshɔ isankfumɔ kɛso topike wiso ta nkongi djɛso djɛ wɔlɔ efula edjinge tokindjɛ ndjala entshupa lá nkambo djɛ lofu lɔ Yehova!