Awola imeyelo kɛ Yehova

1-2. Wopo wɔkɔnge anto wambolapɛla má mpekanto yɛwɔ okokawɔ ndjoka wɔlɔ? (Lenda ntshango djɛ loposo.)

NKFUMI Davidɛ ewaki wɔlɔ wɔlɔ djodjo djɛka má ndáwɛmbɛ lowo m’ɔtɛ wɔ mpekanto imboheta. (Yee. 40:12; 51:3, etepela wɛ lá djiko djɛ shapitrɛ) Ananghaka evunga wɛ nkekete efula lá lowiko lɔnde. Koko, nde alapɛlaka lá nsɔsɔlɔ la Yehova owimeyɛka. (2 Sa. 12:13) Eposelo weyalisá nde, Nkfumi Davidɛ okaka wɔlɔ efula winá wɔ Yehova ndowimeyɛ.—Yee. 32:1.

² Ete ngo Davidɛ, tokoka ndjoka wɔlɔ efula winá wɔ Yehova otimeyɛmde la djandji nkfumɔ. Ɔsɔ ngo oyɛwɔ nkambo djɛ lokembo djɛ ndjewa ente Yehova alekɔ entshupa djɛ ntimeyɛ mpekanto yɛso—kaanga mpekanto yɛ nkekete—ntsha tombolapɛla lá nsɔsɔlɔ, tombosuyɛ mpekanto yɛso, la ntsha tombonangha la wolo dj’ipa nkalɔ nangha evunga wɛkɔ! (Woo. 28:13; Ele. 26:20; 1 Dj. 1:9) Wole wɔlɔ okaso má ndjewa ente nde nyimeyɛka lotshinda lotshinda mpekanto la nanghaka ngo ngete mpekanto kɛkɔ ketananghema!—Ezk. 33:16.

3-4. Nkaana kɛmɔtshi ndokaka ngete mo m’ɔkɔngɔ wɔ ndongola batisimo, ko ɛnaso lá djamba djɛnɛ lɔ nge?

³ Koko winá ɛmɔtshi anto amɔtshi nkoka ndjala l’okakasano djɛ ndjawola imeyelo kɛ Yehova. Tokolenda ndjɔmbɔmba kɛ Jennifer, kaanga lofulisá lá nsɔsɔlɔ. Winá wɔ ndayalaka oseka, ananghaki akambo wa mbindo la ayalaki la lowiko lɔ dongi 2. M’ɔkɔngɔ w’ɛnɔnyi, akalɔka le Yehova la ekomo ekomo akotshɛka akambo walɔmbama djɛ ndongola batisimo. Atepela ante: “Lowiko lɔmi lɔ ntondo, lololaka kfu la ngandji kɛ mfalanga, wayi wa mbindo wosangelo wɔ mbeto, nɔyi djɛ wana la ankɛlɛ yɛ nkekete. Lá yimba yɛmi, ndjewaki ente m’ɔkɔngɔ wɔ lemi ndápɛla la ndɔmba Yehova djɛ nde nyimeyɛ, olambo wɔ Kristo wɔngɔndjɛndjɛ piyɔɔ. Koko ntawolaki l’oloko wɔmi ente Ndjambe nkoka nyimeyɛ lemi.”

⁴ Ongoyalake l’okakasano winá ɔmɔtshi djɛ ndjawola l’oloko wɔko ente Yehova nkoka nkimeyɛ mpekanto yɛko imboheta? Yehova nkɔpaka iso ndjala l’eshikikelo k’efula ente angotimeyɛ ete ngo Davidɛ. Lá djamba djɛnɛ tɔngɛna ladjikɛnge, oyɛso ladjɛ ndjawola imeyelo kɛ Yehova la kɛnɛ kokokaso nangha djɛ ndjawola imeyelo kɛkɔ.

LADJIKƐNGE OYƐSO LA DJONYI DJƐ NDJAWOLA IMEYELO KƐ YEHOVA?

5. Satana akɔpande iso ndjawola nge? Pɛyɛ ndjɔmbɔmba.

⁵ Má ndjawola imeyelo kɛ Yehova, tongewɔ dj’ipa nkfɔ l’ilonga yɛ Satana. Tovungɔ ente Satana angonangha la wolo djɛ ntoshimba dj’ipa iso nkambela Yehova. Djɛ nkotshɛ okoma wɔsɔ, Satana anangha la wolo djɛ ntotshinda dj’iso ndjawola ente Ndjambe apotimeyɛki kawo. Tokolenda ose Kɔrɛtɔ wɔ yimɛ m’otshumano m’ɔtɛ wɔ wayi wa mbindo wa nsanga mbeto. (1 Kɔ. 5:1, 5, 13) Winá wɔ ndolapɛlaka, Satana akombolaki djɛ ase otshumano nsamba ndowimeyɛ—la dj’iwɔ nkowa eloko dj’ipa ndolongola winá wɔ ndakalɔ l’otshumano. Lá winá wɔkɔ ɔmɔ, Satana akombolaki djɛ mpame kelapɛlisá kɛsɔ ndjoka ante apɛdje iwɔ ndowimeyɛ—djɛ ‘yɛnyi y’efula iyalaki lande yɛsɔ’ ndoshimba djɛ nkambela Ndjambe. Satana atatshikitanyɛ okoma wɔnde kana tolonga tɔnde tɔ mayɛlɛ. Koko ‘iso ndjewaka topo tɔ mayɛlɛ tokamba la Satana.’—2 Kɔ. 2:5-11.

6. Wopo wɔkɔnge okokaso ndjala l’osasa má nsamba ndáwɛmbɛ lowo l’indeko?

⁶ Má ndjawola imeyelo kɛ Yehova, tokoka ndjala l’osasa mande nkfum’oloko kɛso kepotofutanyɛka m’ɔtɛ wɔ mpekanto y’isananghe. Winá wonanghaso mpekanto, tokoka ndáwɛmbɛ lowo l’indeko. (Yee. 51:17) Ɔsɔ alekɔ nkambo djɛ wɔlɔ. Nkfum’oloko kɛso nkoka ntotshinda djɛ ndɔsa nkano djɛ nangha kɛnɛ kelekɔ wɔlɔ. (2 Kɔ. 7:10, 11) Koko, winá w’okindjɛso ngo ndáwɛmbɛ lowo l’indeko m’ɔkɔngɔ wɔ ndápɛla má mpekanto yɛso, tokoka ndɔlɛmba. Ntsha tombawola Yehova ambotimeyɛ, topongoyawɛmbɛ lonkina lowo l’indeko. Makɔ tokoka nkambela Yehova ete ngo ɔkɔpande iso ndokambela—la nkfum’oloko kɛ piyɔɔ ole l’osasa. (Kɔl. 1:10, 11; 2 Ti. 1:3) Ko wopo wɔkɔnge okokaso ndjawoyɛ oloko wɔso ente Ndjambe ambotimeyɛ?

EKETE KƐKƆNGE KENGOTOKOTSHƐ́ DJƐ NDJAWOLA ENTE YEHOVA AMBOTIMEYƐ?

7-8. Yehova ndashimela Mɔsɛ nge lá nkambo djɛnde, ko etepela wɛsɔ ɔtɔpɛyɛwɔ eshikikelo kɛkɔnge? (Eposelo 34:6, 7)

⁷ Tokɔtɔnɔla lá wopo wɔ Yehova otepelande lá nkambo djɛ nde nyɔmɛlɛ. Ndjɔmbɔmba, tokolenda kɛnɛ kɛ Yehova ndashimela Mɔsɛ lá Onkókó wɔ Sinayi.a (Wala Eposelo 34:6, 7.) Lá nkete nkfumɔ djɛ Yehova ndatepela, lá nkambo djɛ wekeka la nanghedji djɛ nde, nde ɛnaka wɔlɔ nshimela Mɔsɛ ante alekɔ ‘Ndjambe kɛ nkɛtshi la kokana djandji.’ Ndjambe kɛ nghɔsɔ nkoka ntona nyimeyɛ onkambi wɔnde wombolapɛla lá nsɔsɔlɔ má mpekanto yɛnde? Lako! Ɔsɔ nkoka ndjala ntshamba djɛ djandji la oloko wolo—djalelo djɛ sopakoke ntana le Yehova.

⁸ Tokoka ndjala l’eshikikelo ente winá wɔ Yehova otepelande ante alekɔ Ndjambe kɛ djandji, atepela nsɔsɔlɔ, apatongaka kaanga ndambo daambi. (Yee. 31:5) Djɛko ndeke, tawole kɛnɛ kotoshimelande. Ntsha olekɔ l’okakasano djɛ mvungɛ mpekanto yɛ ngananghe, kolawopola ente: ‘Ndjawola ente Yehova alekɔ nsɔsɔlɔ Ndjambe kɛ djandji la kokana nkɛtshi la nde apatonaka nyimeyɛ onto onkfumɔ wombonangha mpekanto wombolapɛla? Ntsha awola nghɔsɔ, yala l’eshikikelo ente Yehova ambokimeyɛ.’

9. Nyimeyama má mpekanto yɛso, osakisolawɔ nge? (Yeembo 32:5)

⁹ Tɔtɔnɔle lá kɛnɛ kɛ Yehova ndatshinde amfunyi wa Bible djɛ ntepela djɛ imeyelo kɛnde. Ndjɔmbɔmba, tokolenda kɛnɛ kɛ Davidɛ ndafune lá Bible lá nkambo djɛ imeyelo kɛ Yehova. (Wala Yeembo 32:5.) Atepelaka ante: ‘Wɛ imeyɛka evunga, la mpekanto yɛmi.’ Lá Hebero, itepela ikadjimwama “imeyelo” nkoka nsakisola “nsangola,” “nyimɛ,” kana “mbɛmba.” Winá wɔ ndimeyɛ Davidɛ, alekɔ ngo ngete Yehova awɛmbaka kana asangolaka mpekanto má apɛka wa Davidɛ ko awokelaka idjena inkina. Davidɛ okaka wɔlɔ efula má wopo wɔ yopapola odjito w’ekekete wɔ lowo l’indeko lɔ ndolawɛmbɛka. (Yee. 32:2-4) Tokoka ole iso ndawoká ete ngo Davidɛ. Winá wolapɛlaso l’oloko ɔmɔ má mpekanto yɛso, totakindjɛke mbɛmba lonkina odjito wɔ lowo l’indeko, ladjikɛnde Yehova ambotopapola kana ambotimeyɛ odjito wɔkɔ.

10-11. Itepela ‘entshupa djɛ nyimeyɛ’ otoshimelawɔ nge lá nkambo djɛ Yehova? (Yeembo 86:5)

¹⁰ Wala Yeembo 86:5. Lá vɛrse djɛnɛ, Davidɛ atepela ante Yehova angoyalake entshupa djɛ ‘nyimeyɛ.’ Bible mɔtshi djɛ rɛfɛransɛ mpakisola etepela wɛsɔ lá nkambo djɛ Yehova ente: ‘[Nde] alekɔ onto ‘wimeyanaka’—oyɛwɔ nde ‘l’onto’ lɔnde.’ Lamo otepelaso ente imeyelo oyɛwɔ nde lonto lɔ Yehova? Etenyi kɛlɔnda kɛ vɛrse ketepela nghɔnɛ: ‘Wɛ ombolola kfu la ngandji kɛ nkɔmano te anto ankfumɔ waketa.’ Ete ngo seke lá djamba mboheta, ngandji kɛ nkɔmano ntshindaka Yehova djɛ nde malema etshinda etshinda enkambi wɛnde wɛ nkɔmano. Ngandji kɛnde kɛ nkɔmano ndotshindaka djɛ, ‘nyimeyɛ’ lá lɛdji l’efula ananghi wa mpekanto ankfumɔ walapɛla. (Iza. 55:7, nɔtɛ.) Ntsha olekɔ l’okakasano djɛ ndjawola imeyelo kɛ Yehova, okoka ndawopola ente: ‘Lemi ndjawola ente Yehova alekɔ onto w’Imeyana—wolekɔ entshupa djɛ nyimeyɛ onanghi wɔ mpekanto onkfumɔ wombolapɛla woweta djɛ nde ndowoka djandji? Nkoka ndjawola ente anyimeyɛka winá wɔ mɔwɔnde djɛ nde ndjoka lemi djandji?’

¹¹ Tokoka mba lokembo má ndjewa ente Yehova ndjewaka wɔlɔ wɔlɔ ante oyɛso nde ananghi wa mpekanto. (Yee. 139:1, 2) Yeembo imɔtshi yɛ Davidɛ itepela nkambo djɛsɔ papoo, ikoka ntokotshɛ́ djɛ ndjawola ente Yehova ntimeyɛka.

KƐNƐ KƐ YEHOVA OVUNGƆNDE LÁ NKAMBO DJƐSO

12-13. Lá nkilika Yeembo 103:14, Yehova ovungɔnde nge lá nkambo djɛso, ko kɛsɔ otshindawɔ djɛ nangha nge?

¹² Wala Yeembo 103:14. Davidɛ atepela djɛ Yehova ante ‘nde mbopɔka ante tolekɔ ovutu.’ Má etepala wɛsɔ, Davidɛ apakisola elonga kɛmɔtshi kɛ Yehova oyɛnde entshupa djɛ nyimeyɛ enkambi wɛnde welapɛla: Angewake ante oyɛso nde ananghi wa mpekanto. Djɛ ndjoka nkambo djɛsɔ wɔlɔ wɔlɔ, nyontshɔ tokoshishima etepela wɛ Davidɛ.

¹³ Davidɛ atepela ante Yehova ‘ndjewaka wɔlɔ wɔlɔ wopo wɔ sakengama.’ Atongaka Adama ‘má ovutu wɔ looko’ la ewa wɔlɔ wɔlɔ ante anto wa djɔ walekɔ l’elelo ɛmɔtshi—ndjɔmbɔmba, iwɔ ladjɛ ndɛ, ndjetama la mpomola. (Ewa. 2:7) Koko winá wɔ Adama la Eva yananghe mpekanto, wopo wɔ yɔsama m’etoko woyalaka la nsakiso kenkina. Ete ngo oyɛso tonkanola tɔwɔ, watosambeyɛka eyalelo kɛ ntshamba djɛ djɔ ketotshinda djɛ nangha kɛnɛ kelekɔ nyɛtshi. Yehova apewe ngo ndjewa toko ante tolekɔ ase ntshamba djɛ djɔ; etepela wɛ Davidɛ wɛnyɛ ente ‘nde mbopɔka.’ Itepela yɛ Hebero ikambema lanɛ nkoka nsakisola ndjoka onto djandji. Tokoka ntepela lá yopasɛ nsakiso k’etepela wɛ Davidɛ lá lɛdji lɔnɛ: Yehova ndjewaka ante tokoka nkfɔ lá mpekanto mbala la mbala; winá w’ɔkfɔso la wolapɛlaso l’oloko ɔmɔ Yehova angotoka djandji la angotimeyɛ.—Yee. 78:38, 39.

14. a) Davidɛ ndatepela ante nge lá wopo wɔ Yehova otimeyɛkande? (Yeembo 103:12) b) Wopo wɔkɔnge ndjɔmbɔmba kɛ Davidɛ ɛnyɛwɔ ente Yehova ntimeyɛka lá lɛdji l’efula? (Lenda ipapango “Wopo wɔ Yehova otimeyɛkande la w’ovungɛkande.”)

¹⁴ Ekete kɛkɔnge kekoka ntoshikikɛ lonkina imeyelo kɛ Yehova? (Wala Yeembo 103:12.) Davidɛ atepelaka ante winá wɔ Yehova imeyɛnde, nde angowangoyɛke mpekanto yɛso otale ‘ete ngo ɛkɛlɔ [ɛstɛ] la edjimbelo kɛ winá [owɛstɛ] yombowangwana.’ Ɛstɛ la owɛstɛ alekɔ atshuku ape wa looko wambowangwana otale efula lá lɛdji lɔ sopakoke ndjewa; atshuku ape wasɔ wapapomanaki kaanga lofu lɔmɔ. Kɛsɔ otolakanyɛwɔ nge lá mpekanto yɛ Yehova imeyɛnde? Onkanda ɔmɔtshi wopakisola vɛrse djɛsɔ wɛnyɛ nghɔnɛ: ‘‘Tokoka ndjala l’eshikikelo ente ntsha mpekanto kembowangɔ otale laso, ikakambo inkfumɔ yɛ mpekanto kɛkɔ imbima má wɔngɔ.” Ndjoka ngo nsolo k’ekete kɛmɔtshi toko—nkoka ntovungola nkambo mɔtshi djɛ sananghe. Koko winá wɔ Yehova otimeyɛnde, lako kaanga isosolo kana ikekete imɔtshi ikoka ndovungola mpekanto kɛ sananghe djɛ nde nkanela nyɛtshi lá nkambo djɛso.—Ezk. 18:21, 22; Ele. 3:19.

15. Okokaso nangha mo ntsha tokindjɛ ndáwɛmbɛ lowo l’indeko m’ɔtɛ wɔ mpekanto yɛ sananghe?

¹⁵ Wopo wɔkɔnge etepela wɛ Davidɛ wɛ Yeembo 103 otokotshɛ́wɔ djɛ ndjawola imeyelo kɛ Yehova? Ntsha tokindjɛ ndáwɛmbɛ lowo l’indeko m’ɔtɛ wɔ mpekanto yɛ sananghe, tolawopole ente: ‘Lambovungɛ ekete kɛ Yehova ovungɔnde—lambovungɛ ente Yehova ewa ante tolekɔ ase ntshamba djɛ djɔ la angovungɛ mpekanto ole angimeyɛ ananghi wa mpekanto walapɛla ete ngo linko? Lemi mvungɔ lonkina ekete kɛ Yehova ndombovungɛ—ntepela ente mvungɔ mpekanto yɛ Yehova ndombimeyɛ la ente apakoke ntonanghela nyɛtshi lonkina?’ Yehova apapike wiso lá mpekanto yɛso imboheta. Ole iso tonanghe nghɔsɔ. (Yee. 130:3) Ntsha tombawola ente Yehova ambotimeyɛ, topongolawɛmbɛ lowo l’indeko lonkina la tongokambela l’osasa.

16. Tɔkɔpɛyɛ ndjɔmbɔmba kɛnyɛ ente lako wɔlɔ ndáwɛmbɛ lowo l’indeko m’ɔtɛ wɔ mpekanto yɛ sananghe. (Lenda ntshango.)

¹⁶ Tokolenda ndjɔmbɔmba kɛnɛ. Ntsha onto atakɛndjɛ otuka, angoyala wɔlɔ nde ndendaka l’ilendjeyɛ djɛ nyɛna kɛnɛ keheta l’ɔkɔngɔ wɔnde. Alekɔ wɔlɔ mfunaka ntsho mbala la mbala lá ilendjeyɛ. Koko mpika wiso l’ilendjeyɛ djɛ ndenda ngo kɛnɛ keheta l’ɔkɔngɔ, nkoka ndokomɛ lá mbalaka k’ekekete. Dj’ipa nde nangha aksida, nde ladjɛ mpika wiso tá ntondo kɛnde. Lá wopo wɔkɔ ɔmɔ, nkanela winá ɛmɔtshi evunga w’isananghe; nkoka ntokotshɛ́ djɛ mba elakanyelo m’eteyi la nkembɛ nkano djɛso dj’ipa nangha evunga wɛkɔ lonkina. Koko ntsha tombokindjɛ nkanela ngo evunga wɛkɔ, tongolawɛmbɛ lowo l’indeko longotoshimba djɛ nkambela Yehova winá wɔsɔ. Angoyala wɔlɔ iso mpika wiso lá mboka kelekɔ lá ntondo kɛso. Tolekɔ lá mboka kɛtɔla tá lowiko lá andja wa bango watolaki Ndjambe, lá akambo wa nyɛtshi ‘yopangovungɔma lonkina.’—Iza. 65:17; Woo. 4:25.

KINDJƐ NANGHA LA WOLO DJƐ NDJAWOYƐ OLOKO WƆKO

17. Lamo oyɛso ladjɛ nkindjɛ ndjawoyɛ oloko wɔso ente Yehova atɔkɔpa la ambotimeyɛ?

¹⁷ Iso ladjɛ nkindjɛ nangha la wolo djɛ oloko wɔso ndjawola ente Yehova atɔkɔpa la ambotimeyɛ. (1 Dj. 3:19, nɔtɛ.) Ladjikɛnge? Ladjikɛnde Satana angokindjɛ ngo ndjila welo djɛ nkawoyɛ ante Yehova apakɔkɔpɛ la apakimeyɛki. Ayale nghɔsɔ kana lako okoma wɔnde wokikinɛ—ntoshimba dj’iso nkambela Yehova. Tewe ente Satana angoleka ndjila welo ladjikɛnde ewa ante mfu yɛnde imbotshikala daambi. (Ndj. 12:12) Topakoke ndotshika nde ntolonga!

18. Okokɛ nangha ekete kɛkɔnge djɛ oloko wɔko ndjawola ente Yehova akɔkɔpa la ambokimeyɛ?

¹⁸ Djɛ wɛ nkembɛ eshikikelo kɛko lá ngandji kɛ Yehova, kamba l’alako wa sɛnyi lá djamba mboheta. Djɛ oloko wɔko ndjawola ente Yehova ntimeyɛka, tɔnɔla lá kɛnɛ kɛ ndatepela lá nkambo djɛ nde. Tɔnɔla lá kɛnɛ kɛ amfunyi wa Bible yatepela lá nkambo djɛ imeyelo kɛnde. Nde ewa wɔlɔ wɔlɔ ante oyɛ nde ose ntshamba djɛ djɔ, ko angokonanghela akambo la djandji. La vungɔ ente winá wimeyɛnde, angovungɛke lotshinda. Ntsha tomboyala l’eshikikelo ete ngo kɛ Davidɛ lá djandji djɛ Yehova, tokoka ntepela ente: ‘Lokasa efula Yehova, mande ombonyimeyɛ ovunga wɔ mpekanto yɛmi!’—Yee. 32:5.