Olemo w’ankambi wanakotshɛka l’olemo nke?

Bible atepelake dje eloyi epe w’akristo wanalendaka elemo w’otshumano​—“alami la ankambi wanakotshɛka l’olemo.” (Filipɛ 1:1) Mbala efula, ampame ikɔ wayalake djudji l’otshumano l’otshumano. Ankambi wanakotshɛka l’olemo otonanghelakawɔ olemo ɔkɔ nke?

Wakotshɛke iloyi y’ankɔlɔma. Wayale dɛngɛ kondo wambopakisɔ, ankambi wanakotshɛka l’olemo wayalake la djokanelo dje wɔlɔ efula la Yehova, anto we ndjilela otema, anto wanɛ wakambaká olemo l’otema ɔmɔ. Wananghake elemo efula we djonyi dje akambo ndjeta wɔlɔ l’otshumano la lá Mvulu k’Onkfumi. Ma elemo w’iwɔkɔ, wapɛyɛke ankɔlɔma mbamba ke ndjaapɛyɛ l’olemo we ndakanyɛ la mbakanyɛ otshumano.

Wakotshɛke l’akambo efula. Ankambi wanakotshɛka l’olemo wayalake l’olemo we nsangela anto ankfumo wanayɛ la nsanghanyɛ. Ankina walendake masini ke mfudjɛ djoyi, ekanda we mpɛyɛ anto, akambo we mfalanga y’otshumano, la we mpɛyɛ ansakodji w’otshumano terituare ke ntshɔ tosakola. Kankina ko wakambake elemo we nsola la ndjɔmbɛla Mvulu k’Onkfumi. Ankɔlɔma waalombake mbala imɔtshi dje nkotshɛ akristo wanɛ wambopakisɔ. Eyale olemo ɔkɔ nke wapɛyɛwɔ, ankambi wanakotshɛka l’olemo wawolake dje nangha l’osasa. Otshumano ko waalɛmɛyɛke lá gkambo gkɔ.​—1 Timɔte 3:13.

Walekɔ akristo we nkoka ndjokola. Ankambi wanakotshɛka l’olemo ɔsɔnamakawɔ nde gkambo walekɔ akristo we djalelo dje wɔlɔ. Wamba w’iwɔkɔ lá nsanghanyɛ wakembiɛke djawo dj’isoko. Lá ndenda wopo we osakolakawɔ losango le wɔlɔ l’osasa, isɔ koko tokake osasa we nangha olemo ɔkɔ. Gkambo iwɔ nkopaká nkamba esanga l’ankɔlɔma, watokotshɛke dje toyale l’osasa la l’iwoke. (Ɛfɛsɛ 4:16) Ma mbisa k’etsho, iwɔ koko wayalake l’akoka we ndjɛlama ndjalá ankɔlɔma.

• Ankambi wanakotshɛka l’olemo oyalakawɔ mo?

• Onanghakawɔ nke dje otshumano wokɛnde wɔlɔ?