Yeso Kristo ende na?

1. Lowiko lɔ Yeso yowange mo?

Yeso atshikitana l’anto ankina, nkambo lá ntondo kɛ nde mbotshɔ lá looko, ayalaki ondjelo l’olongo. (Djɔanɛ 8:23) Nde nde loyalisá etongami kɛ ntondo kɛ Ndjambe, kankina ko akotshɛki Ndjambe lá ntonga nkete nkina nkfumɔ. Ngo nde nde lotongamisá me Yehova nyɔmɛlɛ, djɔko nde owetakawɔ amɔ Wona “ɛtɔyi-lowotamisá” we Ndjambe. (Djɔanɛ 1:14) Yeso ayalaki Ontepedji wɛ Ndjambe, djɔko nde owetakawɔ kakina amɔ “Otepela.”​—Tangá Woongo 8:22, 23, 30; Kɔlɔsɛ 1:15, 16.

2. Yeso nyoye ya looko la nke?

Lá wíná we Ndjambe nyotome Wonɛ ndeko ya looko, asɛkɔlaka lowiko le ndeko m’olongo ya nkfundu djɛ Mariya, wone womoto ɔmɔtshi w’ose Yuda onatomvɛ́ oyɛ. Ko ise Yeso atayalá onto lá looko lako. (Luka 1:30-35) Yeso nyoyé ya looko nde djɛ (1) ndakanyɛ sɔlɔ lá nkambo djɛ Ndjambe, (2) ntotshikela ndjɔmbɔmba lá nangha ɛkɔpa kɛ Ndjambe kondo nde tolekɔ l’ekakatano, (3) mpɛyɛ lowiko lɛ ndeko lopakɔ l’ɛkɔmɔ djɛ ndjalá “mbendó.”​—Tangá Mateo 20:28.

3. Eso la djonyi djɛ mbendó la nke?

Mbendó nde djɛlɔ djɛ ofutakawɔ djɛ ntshungola onto wɔkɔpawɔ ndjaka. (Eposelo 21:29, 30) Lá wíná wɛ Ndjambe nyotonge anto, atakaná ante wangoyɛ yotshunda kondo yovɔ. Ewaso nghɔsɔ wopo ɔkɔ nke? Ndjambe asimelaka onto wɛ ntondo, Adama, ante nde omonangha “mpekato,” ongovɔ. Ko Adama nyotasamba nangha mpekato, atasamba mvɔ. (Ewangelo 2:16, 17; 5:5) Bible ante nyoyi “kingelaka” l’andja w’anto me Adama. Ko Adama nyombotshikela tonkanola tɛ ndeko tonkfumɔ otshikedjɔ we mpekato la lofuto lɛ mpekato: Nyoyi. Tolekɔ la djonyi djɛ mbendó djɛ nkoka ntshungɔ ma nyoyi kɛ sombokitá me Adama.​—Tangá Ɔrɔma 5:12; 6:23.

Na lotokoka mfuta mbendó djɛ ntotshungola ma nyoyi? Nde tombovɔ, ofutakisɔ ngo basa djɛ mpekato y’isoko sɔmɛlɛ. Lako kondo onto ɔmɔ w’ose nkɔmɔ onakoka mfuta basa dje mpekanto y’anto ankina.​—Tangá Yeembo 49:7-9.

4. Yeso nyovu la nke?

Yeso apakɔ t’iso, nkambo nde atayalá l’ɛkɔmɔ. Atayalá la djɛ mvɔ lá nkambo djɛ mpekato yɛ ndeko, nkambo nde atananghá mpekato lako. Yeso nyovu nde lá nkambo dje mpekanto y’anto ankina. Ndjambe ɛnyɛka ngandji k’ekekete efula y’anto lá nyotome Wone nd’eko yotowela. Yeso koko atɛnyɛka ngandji lá nyookelá Ise, kankina koko lá nyopɛyɛ́ lowiko le nd’eko lá nkambo djɛ mpekanto y’isoko.​—Tangá Djɔanɛ 3:16; Ɔrɔma 5:18, 19.

Lenda video Yeso ndavu lange?

5. Yeso onanghande lɔko kɛnɛ nke?

Yeso lá nyoyalaká lá looko, asadjɛki ɛkɔnyi, akfundolaki edjo, kakina ko akotshɛki anto wanɛnaki ndjolo la djɛmɔ. Nyonanghaká akambo akasɔ nde djɛ nyɛnyɛ akambo wanɛ nyonghonangha lá etsho weyayé djɛ wɔlɔ w’anto wanɛ wokelá Ndjambe. (Mateo 15:30, 31; Djɔanɛ 5:28) Yeso nyombovɔ, ko Ndjambe nyombookfundola lá demba djɛ etongami k’edjimo. (1 Pɛtɛlɔ 3:18) M’anko, Yeso nyombokonga lá wome lɔwɔ le Ndjambe tii wíná wɛ Yehova nyongɔɔpɛyɛ nkfulu yɛ ndjalá Nkfumi kɛ looko onkfumɔ. (Hebero 10:12, 13) Lá lɔko kɛnɛ, Yeso alekɔ Nkfumi l’olongo; ambeki wɛ ndeko wewoyɛ losango le wɔlɔ ɔkɔ l’andja w’otondo.​—Tangá Danyɛlɛ 7:13, 14; Mateo 24:14.

Lako ilá, Yeso okamba la nkfulu yɛ Onkfumi wɛ ndeko dje nsiyɛ ndjɔlo inkfumɔ la wanɛ wapɔpɔla ndjolo ikɔ. Anto ankfumɔ wanɛ wokelá Yeso djɛ nyɛnyɛ amɔ walekɔ la djawo le nde wangoyala la lowiko lá paradiso lá looko.​—Tangá Yeembo 37:9-11.