WEKELO 56
Lama osanga wɔ l’otshumano
Winá w’oyɛso esanga la wananyɔ la ankaana, iso ndawokaka etengo nkfumi David kanga lotepelisá ante: ‘Ɔsɔ ngo wɔlɔ edjinge osasa djɛ onto la wɔna nyɛnghɛnde nyintasɛ esanga!’ (Yeembo 133:1) Osanga wɔso wopaye oyayɛ. Isankfumɔ tolekɔ l’odjito wɔ mbomba kana nama osanga wɔso.
1. Nkambo djɛkɔnge djɛ nkamɔ dj’ɛnaso l’anteyi k’enkambi wɛ Ndjambe?
Ntsha wɛ ndjingela lá losanghanyɛ lɔmɔtshi lɔ l’otshumano wɔ l’owila onkina, okoka ndjala opewe otepela wɔkɔ, koko wɛ nkoka ndawoká etengo olekɔ l’otshumano wɔnyo. Ladjikɛnge? Ladjikɛnde l’andja w’otondo, iso nkambaka ngo l’enkanda wɛkɔ ɛmɔ djɛ ndjeka Bible. Lonkina, iso nyɛnyɛka onto l’onto ngandji l’anteyi kɛso. Ayale edjena kɛkɔnge k’oyalaso isankfumɔ ‘ndjetaka djiina djɛ Yehova kana ndɔtɛmɔlaka l’osanga.’—Sefania 3:9, nɔtɛ.
2. Kɛkɔnge k’okokɛ nangha djɛ nama osanga?
‘Nyokane ngandji k’efula kɛ m’anse k’oloko l’anteyi kɛnyo.’ (1 Pɛtɛlɔ 1:22) Wopo wɔkɔnge w’okokɛ nkamba la dako djɛsɔ? L’edjena kɛ ndenda ngo evunga wɛ anto ankina, pika wiso nde lá wekeka wawɔ wa wɔlɔ. Tokanake ngo l’anto walekɔ́ la wɛ ikanyi imɔ, koko hona djɛ ndjokana l’anto wimá ndjena nkina. Iso ladjɛ nangha la wolo dj’ipa nkanela anto ankina nyɛtshi.—Wala 1 Pɛtɛlɔ 2:17.a
3. Kɛkɔnge k’okokɛ nangha ntsha okakasano ɔmɔtshi womboposa l’antenyɛ wɛ nya winako Okristo?
Tolekɔ l’osanga, koko topalekɔ djɔ. Winá ɛmɔtshi iso nanghelaka anto ankina nyɛtshi kana anto ntonanghelaka nyɛtshi. Koko Otepela wɔ Ndjambe ntoshimelaka ante: ‘Nyokindjɛ nyimeyana l’anteyi kɛnyo,’ edjinge wakfɛ ante: ‘Ngo ngete Yehova ndonyimeyɛ l’oloko ɔmɔ, nyo koko nyonanghe wopo wɔk’ɔmɔ.’ (Wala Kɔlɔsɛ 3:13.) Tongovungelake Yehova winá enkfumɔ, koko nde ntimeyɛka. Djɛkondeke, ɔtɔlɔmbande dj’iso nyimeyɛ wananyɔ la ankaana yɛso. Ntsha ombewa ente ombonanghela onto ɔmɔtshi nyɛtshi, ɔsa nkano djɛ ndjila vu wɛ nyape ipa la ntshatshimba.—Wala Mateo 5:23, 24.b
TSHIMOLA
Lenda akambo amɔtshi w’okokɛ nangha djɛ nama osanga edjinge vu djɛ l’otshumano.
Kɛkɔnge k’okokɛ nangha djɛ ndjila vu?
4. Nangha la wolo dj’ipa nkanela anto nyɛtshi
Iso nkɔpaka ndjoka wananyɔ l’ankaana inkfumɔ ngandji. Koko apalekɔ nkambo djɛ wɔdju nkɔpa anto watshikitana laso. Kɛkɔnge kekoka ntokotshɛ́? Wala Elemo 10:34, 35, ko kadjimola lá weepó wɛnɛ:
Yehova nkɔpaka djɛ nkopo y’anto inkfumɔ ndookambela. Wopo wɔkɔnge wʼokokɛ ndjokola Yehova lá wopo wʼɔsɛ anto watshikitanyi la wɛ?
Lá edjena kɛko k’intasɛ, anto okanelanakawɔ nyɛtshi lá akambo wakɔnge? Lamo oyɛ ladjɛ ntona?
Wala 2 Kɔrɛtɔ 6:11-13, ko kadjimola lá woopó wɔnɛ:
Kɛkɔnge k’okokɛ nangha djɛ ndjala entshupa nya wananyɔ l’ankaana yemboyɛ má djena nkina?
5. Imeyɛka l’oloko ɔmɔ edjinge ilaka vu
Yehova ntimeyɛka l’oloko ɔmɔ kaanga ndopalekɔ́ la djonyi djɛso ndowimeyɛ. Wala Yeembo 86:5, ko kadjimola lá weepó wɛnɛ:
Vɛrse djɛnɛ otolakanyɛwɔ nge lá nkambo djɛ imeyelo kɛ Yehova?
Ladjikɛnge oyɛ la djedjɛ lá wopo wotimeyɛ Yehova?
Akambo wakɔnge wakoka ntilela onkeka djɛ ndjila vu l’anteyi kɛso?
Wopo wɔkɔnge w’okokaso ndjokola Yehova djɛ ndjala esanga la wananyɔ l’ankaana yɛso? Wala Woongo 19:11, ko kadjimola lá woopó wɔnɛ:
Kɛkɔnge k’okokɛ nangha djɛ ndjila vu ntsha onto ɔmɔtshi ambokomadjɛ kana ambokokiyanyɛ?
Winá ɛmɔtshi, iso nanghelaka anto ankina nyɛtshi. Kɛkɔnge k’okokaso nangha winá wɔ nkambo djɛ nghɔsɔ oposawɔ? Lenda VIDEO, ko kadjimola woopó wɔl’anse.
Lá video djɛnɛ, kɛkɔnge kɛ nkaana kɛso ndananghe djɛ nde ndjila vu?
6. Pika wiso l’akambo wa wɔlɔ wa wananyɔ l’ankaana yel’otshumano
Winá w’oyasukanyɛso la wananyɔ l’ankaana, tongewa lampe oyɛwɔ wolo edjinge oyɛwɔ wɛdju. Wopo wɔkɔnge w’okokaso ndjila yimba ngo lá wekeka wawɔ wa wɔlɔ? Lenda VIDEO, ko kadjimola lá woopó wɔl’anse.
Kɛkɔnge kekoka nkokotshɛ́ djɛ nyɛna wekeka wa wɔlɔ wa wananyɔ l’ankaana yɛko?
Jehova ndjilaka yimba lá wekeka waso wa wɔlɔ. Wala 2 Ɛkɔndɔ 16:9a, ko kadjimola lá woopó wɔnɛ:
Okɛ mo winá wɔ ngombewa ente Yehova ndjilaka yimba lá wekeka wako wa wɔlɔ?
Kaanga diama djɛ wɔlɔ nkoka ndjalá l’ɛkɔmɔ, koko dekɔ l’odjito. Wopo wɔk’ɔmɔ ndeke wananyɔ l’ankaana wapalekɔ djɔ, koko Yehova ndawɔsaka l’odjito
ANTO EFULA NTEPELAKA AMBƆ: “Djɛ nyimeyɛ onto ngo lambɔkɔpa.”
Lamo oyɛso ladjɛ nyimeyɛ anto ankina l’oloko ɔmɔ?
LÁ YOPASƐ
Iso namaka osanga wel’otshumano winá w’oyalaso entshupa djɛ nyimeyɛ evunga wɛ wananyɔ l’ankaana edjinge awɛnyɛso ngandji.
Mvungo
Kɛkɔnge k’okokɛ nangha djɛ ntshika nkanela anto ankina nyɛtshi?
Kɛkɔnge k’okokɛ nangha ntsha olekɔ l’okakasano nya winako Okristo?
Lamo ɔkɔpɛ ndjokola Yehova lá nkambo djɛ nyimeyɛ anto ankina?
TOKANYI TONKINA
Lenda wopo wɔ ndjɔmbɔmba kɛ Yeso okokawɔ nkokotshɛ́ dj’ipa ndomboyɛ anto ankina.
Tokoka ndɔmba imeyelo kaanga ntsha tɛna ente totananghe nkambo mɔtshi djɛ nyɛtshi?
Tolende wopo wɔ anto amɔtshi yeke djɛ ndɔsa anto ankina ipa lʼisɔnɔdji.
Lenda wopo w’okokɛ nsiyɛ okakasano wɔko nya wɔnanyɔ lá ntondo kɛ okakasano wɔkɔ mfutanyɛ vu djel’otshumano.
‘Tosiyɛ ekakasano la yimba yɛ ngandji’ (Etange k’Olami, Ngɔndɔ k’atano 2016)
a Nɔtɛ kɛ l’ekomo 6 kɛnyɛ wopo wɔ ngandji otshindande Akristo dj’ipa ntshanghanyɛ elando wesambeyɛ.
b Nɔtɛ kɛ l’ekomo 7 kɛtɛnyɛ wopo w’okokaso nshiyɛ ekakasano welendana l’onkanda kana la tominanyi.