Nsukana la wananyɔ l’ankaana alekɔ wɔlɔ leso!

1-2. Ekete kɛmɔtshi kɛkɔnge keleka djonyi le Yehova, iya ɔkɔpande tonanghe nge?

WOPO wɔsaso winaso anto wolekɔ la djonyi efula lá wiso wa Yehova. Yeso atolakanyɛka ante iso ladjɛ nkɔpa winaso anto ete ngo olakɔpaso. (Mat. 22:37-39) Kɛsɔ nsakisolaka ndjala onto wɔlɔ kaanga le anto wapasange laso djawo. Winá wawɛnyɛso oloko wɔlɔ nghɔsɔ, tongokola Yehova Ndjambe kanga ‘lɔkɛsɔyɛ winá le anto wa nyɛtshi la le anto wa wɔlɔ, la kanga lɔtɔngɛ amvula le anto wa wɔlɔ la le anto wa nyɛtshi.’—Mat. 5:45.

² Kaanga Yehova ɔkɔpakande anto ankfumɔ, angɔkɔpake pekapeka anto wanangha kɛnɛ kelekɔ́ wɔlɔ. (Dj. 14:21) Nde nkɔpaka iso ndowokola. Nde ntokembɛka dj’iso ndjala la ‘ngandji k’efula’ te wananyɔ l’ankaana la ndáwoka ngandji ‘k’ima ngonga k’oloko.’ (1 Pɛ. 4:8; Ɔrɔ. 12:10) Winá wɔtɔnɔlaso djɛ nyɛnyɛ onto ngandji kɛ nghɔsɔ, tokoka ndowoka ngandji k’efula ete ngo kokaso boto la tolongo tɔso tɔ ma ma.

3. Oyɛso ladjɛ mvungɔ nge lá nkambo djɛ ngandji?

³ Ngandji kelekɔ ete ngo ansoso wokonawɔ lá mvulu, walɔmba ndavutela washi djɛ mfula. Ɔpɔstɔlɔ Poolo alakaka Akristo ante: ‘Ngandji kɛnyo k’onto la wɔnanyɔ kekindjɛ.’ (Heb. 13:1) Yehova nkɔpaka iso nkindjɛ nkɔpa anto ankina. Djamba djɛnɛ nghɛnyɛ lamo oyɛso ladjɛ nkindjɛ nsukana la winaso andjawodji.

LAMO OYƐSO LADJƐ NSUKANA LA WANANYƆ L’ANKAANA

4. Lá nkilika Yeembo 133:1, wopo wɔkɔnge w’okokaso nkindjɛ ndɔsa wananyɔ l’ankaana l’odjito? (Lenda asango.)

⁴ Wala Yeembo 133:1. Tosanga lolemi la ontshumbi wɔ Yeembo w’ofunisá ante djokanelo djɛ wɔlɔ l’anto wakɔpa Yehova dekɔ ‘wɔlɔ’ ole ‘osasa.’ Koko ete ngo onto okokande ndjapɔ wiso má otamba w’ekekete wɛnakande winá onkfumɔ, tokoka ndjapɔ wiso má wɔlɔ w’osanga wɔso w’Akristo. Tongɛnanake la wananyɔ l’ankaana winá la winá lá lobengo. Wopo wɔkɔnge w’okokaso nkindjɛ ndawɔsa l’odjito? Ngandji kɛso te wananyɔ l’ankaana kengofula ntsha tɔsa winá wɔ ntɔnɔla lá wopo wɔ onto l’onto oyɛnde djonyi l’otshumano, la leso.

5. Ngandji k’okanaso l’anteyi kɛso okokawɔ ndjala la lɔɔla lɔkɔnge l’anto ankina?

⁵ Anto amɔtshi wingelá nsanghanyɛ mbala kɛ ntondo wangokamɔke efula má ngandji kelekɔ́ l’anteyi kɛso. Ntsha wambolenda ngo ngandji kɛso toko, wakoka ntepela ambɔ wambisola nsɔsɔlɔ. Yeso atepelaka ante: ‘Má nkambo djɛnɛ anto ankfumɔ wangewa ambɔ nyolekɔ ambeki wami, ntsha nyokana ngandji l’anteyi kɛnyo.’ (Dj. 13:35) Tokolenda ndjɔmbɔmba kɛ Chaithra, ombeki w’inivɛrsite weka Bible la Ewakɛ wɛ Yehova. Nde awolaka leeta lɔ ndjɛ lá losanghanyɛ lɔ rɛjɔ. M’ɔkɔngɔ wɔ ndjingela lofu lɔ ntondo l’elongi la elongi, ashimelaka wetsha wɔnde wɔ Bible ante: “Ambotshi wami wantampɛyɛka ntondo djemo djɛ ntama. Koko lá losanghanyɛ lɔnyo, wambɔmpɛyɛka wemo w’atama 52 ngo lofu lɔmɔ! Lamɛna ngandji kɛ Yehova lá nkfumbo kɛ nyuma kɛnɛ. Nkɔpa lemi ndjala ose nkfumbo kɛnɛ.” Chaithra akindjɛka mfula lá nyuma la alongolaka batisimo lá 2024. Ee, winá wɔ anto wa bango ɛnawɔ nanghedji djɛso djɛ wɔlɔ, ngole ngandji k’okanaso l’anteyi kɛso wangotshindama djɛ nkambela Yehova.—Mat. 5:16.

6. Wopo wɔkɔnge nsukana la wananyɔ l’ankaana otowombawɔ?

⁶ Nsukana la wananyɔ l’ankaana, nkoka ndjala ete ngo elamelo. Poolo alakaka winande Akristo ante: ‘Nyokindjɛ nkembɛna l’anteyi kɛnyo mfu inkfumɔ . . . dj’ipa ɔmɔtshi ndjala ɔtɛ wolo má nkfulu kɛ lokeso kɛ mpekanto.’ (Heb. 3:13) Ntsha tɔmbɔlɛmba efula tii lá lɛdji lɔ akaka waso mbanga mpengɔ mboka kɛ nsɔsɔlɔ, Yehova nkoka ntshinda winaso ondjawodji wɔtɛna djɛ ntɔpɛyɛ okotshɔ w’oyɛso la djonyi. (Yee. 73:2, 17, 23) Lá nsɔsɔlɔ okotshɔ wɔ nghɔsɔ wolekɔ wɔlɔ efula leso.

7. Djokanelo djɛkɔnge dekɔ l’anteyi kɛ ngandji la osanga? (Kɔlɔsɛ 3:13, 14)

⁷ Tolekɔ lá oloyi w’anto wonangha la wolo djɛ nkɔpana, djɛko ndeke owaso esako efula. (1 Dj. 4:11) Ndjɔmbɔmba, ngandji ntotshindaka djɛ ‘nkfulumeyana l’anteyi kɛso,’ ko kɛsɔ nkembɛka osanga wɔso. (Wala Kɔlɔsɛ 3:13, 14; Ɛfɛ. 4:2-6) Djɛko ndeke lá nsanghanyɛ, tongosasangake ndeka eloyi enkfumɔ wɛ l’andja wanɛ.

TILANE ONKFUNDA

8. Nkambo djɛkɔnge nangha Yehova ntokotshɛ́ dj’iso ndjala l’osanga?

⁸ Osanga wɔso wɔ l’andja w’otondo oyɛwɔ nde nsese. Mpeyi me Yehova ndeke nkambo djɛsɔ onanghemawɔ, kaanga oyɛso anto wa ntshamba djɛ djɔ. (1 Kɔ. 12:25) Bible ntepelaka ante ‘tolakanyema me Ndjambe djɛ ndjokana ngandji l’anteyi kɛso.’ (1 Te. 4:9) Ntepela ente, l’otondo wɔ Bible, Yehova ntoshimelaka kɛnɛ k’oyɛso ladjɛ nangha djɛ nsukana la wananyɔ l’ankaana. Tokoka ‘ndakanyema me Ndjambe’ má nshishima la nkɔmɛ nkfumɔ la ma nkamba la elakanyelo wɛnde. (Heb. 4:12; Dja. 1:25) Ɔsɔ ndeke ekete k’Ewakɛ wɛ Yehova ilawɔ welo djɛ nangha.

9. Kɛkɔnge ketolakanyɛ Ɔrɔma 12:9-13 djɛ ndjilana onkfunda?

⁹ Wopo wɔkɔnge Otepela wɔ Ndjambe otolakanyɛwɔ djɛ nsukana la wananyɔ l’ankaana? Tokolenda kɛnɛ kɛ Poolo ndatepela lá nkambo djɛsɔ, ete ngo ɛnaso lá Ɔrɔma 12:​9-13. (Wala.) Tokolenda etepela wɛnɛ: ‘Lá kɛnɛ kelendana la nɛmɛyana, nyɔpɛyɛ ndjɔmbɔmba.’ Kɛsɔ osakisolawɔ nge? Iso ladjɛ ndɔsa nonghanyi kɛ nyɛnyɛ anto ankina ‘ngandji k’ima ngonga k’oloko’ má nyimeyana lá lɛdji l’efula, má ndongolana, má ndjala la nkapo, la má nangha akambo ankina. (Ɛfɛ. 4:32) Topalekɔ la djonyi djɛ nkonga ente wananyɔ l’ankaana wasukane leso. Okoka ‘nyɛnyɛ ndjɔmbɔmba’ má nangha nkambo djɛsɔ. Yeso atepelaka ante: ‘Osasa woyɛ má mpɛyɛ ndeka wɔ ndongola.’—Ele. 20:35.

10. Wopo wɔkɔnge wokokaso ndjala ankambi ‘má nɛmɛyana’? (Lenda ntshango.)

¹⁰ Nkambo djɛ djonyi nde, mbala kɛkɔ kɛmɔ m’ɔkɔngɔ wɔnde ntoshimela djɛ nyɛnyɛ ndjɔmbɔmba kɛ nɛmɛyana, Poolo atokembɛ ante: ‘Nyoyale ankambi, koko ape ntshumbe.’ Onto wolekɔ nkambi ndjalaka l’otshilo ole nkambaka olemo wɔ wolo. Winá wɔpɛyɛwɔ odjito, nde nkambaka lá wopo wɔ wɔlɔ. Woongo 3:27, 28 atokembɛ ante: ‘Topekalake anto ekete kɛ wɔlɔ k’okokɛ ndapɛyɛ ntsha olekɔ l’akoka wa ndakotshɛ́.’ Lá wopo wɔkɔ ɔmɔ, winá wɛnaso ente onto ɔmɔtshi alekɔ la djonyi, Tonanghe kɛnɛ k’okokaso nangha djɛ ndokotshɛ́. Totataloyɛke; kana mfɛnyɛ ente onto ɔmɔtshi angɔɔpɛyɛ kana angookotshɛ́.—1 Dj. 3:17, 18.

11. Ekete kɛkɔnge kekoka ntokotshɛ́ djɛ nsukana la wananyɔ l’ankaana?

¹¹ Wopo ɔmɔtshi wokokaso ndjila anto ankina onkfunda nde má ndjala entshupa djɛ ndawimeyɛ winá wotonanghelawɔ nyɛtshi. Ɛfɛsɛ 4:26 atepela ante: ‘Nyotatshikalake la nkɛlɛ tii winá ndjila.’ Lamo? Vɛrse 27 ntepela ante nangha nghɔsɔ ‘angɔpɛyɛ Djabolo mbamba.’ Lá Otepela wɔnde Yehova atoshimela mbala la mbala djɛ nyimeyana. Kɔlɔsɛ 3:13 atokembɛ dj’iso ‘nkindjɛ . . . nyimeyana la oloko ɔmɔ l’anteyi kɛso.’ Nyimeyɛ anto ankina evunga alekɔ wopo wɔ wɔlɔ wɔ nsukana lawɔ. Winá wonanghaso nghɔsɔ ‘tongokotshɛ́ djɛ osanga wɔ nyuma lá djokanelo djɛ vu ndjala.’ (Ɛfɛ. 4:3) Lá yopasɛ, nyimeyana nkotshɛka djɛ osanga la vu ndjala.

12. Yehova okokande ntokotshɛ́ djɛ nyimeyana ngete mo?

¹² Lá nsɔsɔlɔ, tokoka nyɛna ente alekɔ okakasano nyimeyɛ anto wakonanghela nyɛtshi. Koko tokoka ndawimeyɛ má okotshɔ wɔ nyuma kɛ Ndjambe. M’ɔkɔngɔ wɔ ntokembɛ djɛ ‘ndjala la ngandji k’ima ngonga k’oloko’ la ‘ndjala ankambi,’ Afunelo watolaka nkɔkɔnɛ: ‘Nyɔpɛtapɛte la nyuma.’ Onto wɔ ‘pɛtapɛta’ nde ‘onto wokfukɔkfukɔ kana wopotapota la osasalo ete ngo lɔɔla’ lɔ nyuma kɛ Ndjambe. (Lenda nɔtɛ kɛ wekelo kɛ Ɔrɔma 12:11 lá Bible djɛ Falase.) Djɛko ndeke nyuma kɛ Ndjambe nkoka ntokotshɛ́ djɛ ndjala la ngandji k’ima ngonga k’oloko ole nyimeyana l’oloko ɔmɔ. Ko tɔwɔndɛ Yehova la oloko ɔmɔ djɛ nde ntokotshɛ́.—Luka 11:13.

‘DJATƆNELO NTAYALAKE L’ANTEYI KƐNYO’

13. Nkambo djɛkɔnge nkoka mposɛ djatɔnelo l’anteyi kɛso?

¹³ ‘Anto wa nkopo inkfumɔ’ wimá nkfumbo la djena nkfumɔ ndeke lokfumba otshumano. (1 Ti. 2:3, 4) Ntsha topayalisa la ntɔnɔ, etshikitano wɛsɔ wekoka mposɛ djatɔnelo lá akambo wa onto l’onto oyɛnde ladjɛ ndɔsa akano, ete ngo ɔlɔtɔ, wimelo wɔ afo, bɔki kana etombo. (Ɔrɔ. 14:4; 1 Kɔ. 1:10) Mande ‘tolakanyema me Ndjambe djɛ ndjokana ngandji, iso ladjɛ ndjala la ntɔnɔ dj’ipa ntshinda anto la wolo djɛ nkɔpa ngo kɛnɛ kɔkɔpaso.—Flp. 2:3.

14. Oyɛso ladjɛ ndjila welo winá enkfumɔ djɛ nangha nge, ko lamo?

¹⁴ Tokoka nkotshɛ́ dj’ipa djatɔnelo ndjala l’otshumano má nangha la wolo, má nsuka la nkembɛ anto ankina winá enkfumɔ. (1 Te. 5:11) Lá etsho emangha wemboheta wɛnɛ, anto efula walɛmbisá lá nyuma la waposisá má otshumano wambokalɔ. Tasangela l’osasa! (2 Kɔ. 2:8) Tokolenda kɛnɛ kekomelisá nkaana kɛmɔtshi keyisá lá Mvulu k’Onkfumi m’ɔkɔngɔ wɔ nde mpɔla lá nyuma l’ilá k’ɛnɔnyi 10. Atepela ante: “Anto efula wamɔnghamɔnghelaki la wantshikitshɛki lá lɔwɔ la wemo wa yampɛyɛka.” (Ele. 3:19) Lɔɔla lɔkɔnge loyalisá la nanghedji djɛ ngandji djɛsɔ le nde? Atepela ante: “Ndjokaka ente lɔwɔ lɔ Yehova lomonkawoyɛ lá idjena yɛ osasa.” Má nkembɛ anto ankfumɔ, Kristo akoka nkamba laso djɛ nkotshɛ́ anto walekɔ́ lá ‘ndjolo la wambɔwɛmba edjito.’—Mat. 11:28, 29.

15. Wopo onkina wɔkɔnge wofudjɛso osanga? (Lenda ntshango.)

¹⁵ Wopo ɔmɔtshi wokokaso mfudjɛ osanga nde má etepela wɛso. Djɔbɔ 12:11 atepela ante: ‘Ntoyi ndɛtaka totepela ete ngo lolemi ɔlɛtande wima wa ndɛ?’ Ete ngo isekameyɛka dambo djɛ ndáshikikɛ ente dekɔ wɔlɔ lá ntondo kɛ nsɛmɛyɛ anto, angoyala wɔlɔ iso ntɔnɔla lá kɛnɛ kɔkɔpaso ntepela lá ntondo kɛ mposɛ djoyi. (Yee. 141:3) Okoma wɔso nde iso ladjɛ ndáshikikɛ winá enkfumɔ ente kɛnɛ kɔkɔpaso ntepela kengokembɛ, kengosuka la kengoyala la ‘wapɔ le anto woka.’—Ɛfɛ. 4:29.

16. Pekapeka anto wakɔna walekɔ́ ladjɛ ndjala la etepela wekembɛ?

¹⁶ Wame la ambotshi ladjɛ ndjewa ambɔ iwɔ ladjɛ nangha la wolo djɛ ndjala la etepela wekembɛ. (Kɔl. 3:19, 21; Tito 2:4) Ole tokokolo ladjɛ ndjala ikɔkɔ yɛ osukɔ la lokembo ete ngo elami w’ɛnkɔkɔ wɛ Yehova. (Iza. 32:1, 2; Nga. 6:1) Djongo mɔtshi djɛ Bible ntovungola ante: ‘Itepela itepelama lá winá wɛdje, ilekɔ wɔlɔ efula!’—Woo. 15:23.

NYƆKƆPANE ‘LÁ NANGHEDJI LA LÁ NSƆSƆLƆ’

17. Wopo wɔkɔnge wokokaso ndáshikikɛ ente ngandji kokaso wananyɔ l’ankaana kelekɔ nsɔsɔlɔ?

¹⁷ Ɔpɔstɔlɔ Djɔanɛ atokembɛka dj’ipa ‘nkɔpana ngo lá etepela kana lá ɔlɔmɔ toko, koko tɔkɔpane lá nsɔsɔlɔ la lá nanghedji.’ (1 Dj. 3:18) Iso nkombolaka djɛ ngandji kokaso wananyɔ l’ankaana ndjɛ m’eteyi k’oloko. Okokaso nangha nghɔkɔsɔ ngete mo? L’ilá kenkfumɔ kohetshɛso winá la wananyɔ l’ankaana, ndeke songoleka nsukana lawɔ la songoleka nkɔpa ɔmɔ ɔmɔ l’anteyi kɛwɔ. Djɛko ndeke toposɛ mbamba yɛ mpetshɛ́ winá l’anto ankina lá nsanghanyɛ la l’olemo w’ipoposanyɛ. Ɔsa winá wɔ ndawembola. Ntsha tombonangha nghɔkɔsɔ, tɔngɛnyɛ ente ‘tolakanyema me Ndjambe djɛ nkɔpana.’ (1 Te. 4:9) Tongokindjɛ nyɛna nsɔsɔlɔ kɛ etepela wɛnɛ: ‘Ɔnɛ ngo wɔlɔ la wole osasa djɛ onto la wɔna nyɛkɛnde nyintasɛ esanga!’—Yee. 133:1.