Yehova ndjilaka enkambi wɛnde yimba edjinge ndaalamaka

1. Lamo Yeso ndalɔmbɛ Yehova djɛ namaka ambeki wande?

L’OTSHO ɔmɔtshi lá ntondo kɛ nde mvɔ, Yeso ananghaka lɔlɔmbɔ lotshikitanyi te Papa kɛnde kel’olongo. Nde alɔmbaka Yehova djɛ namaka ambeki wande. (Dj. 17:15, 20) Lá nsɔsɔlɔ, Yehova ndendaka enkambi wɛnde winá enkfumɔ, ndakiyanyɛka lá nkambo djɛwɔ, la ndaalamaka. Koko, Yeso ewaki ante ambeki wande wangopomana l’onanyelo wɔ wolo me Satana. Yeso asipisoyɛka lonkina ante wangoyala la djonyi dj’okotshɔ wɔ Yehova dj’iwɔ mpikama lá ntondo kɛ onanyelo wɔ Djabolo.

2. Lá nkilika Yeembo 33:18-20, lamo sopakoke ndjoka ekakasano wɔma?

² Andja walɔndjama me Satana wanɛ wayakala Akristo ekakasano efula lɔɔko kɛnɛ. Iso mpomanaka l’ekakasano wekoka ntɔlɛmbɛ kana kaanga ndjila nkɔmano djɛso te Yehova l’ohemba. Koko etengo sɔngɛna lá djamba djɛnɛ, topalekɔ kaanga l’elonga kɛ ndjoka wɔma. Yehova atolama, nde ɛna ekakasano wepomana laso, edjinge alekɔ winá enkfumɔ entshupa laso djɛ ntokotshɛ́ djɛ nkandola ekakasano wɛkɔ. Nyontshɔ tokoshishima ndjɔmbɔmba yemá Bible yɛnyɛ wopo wɔ Yehova olamande ‘wanɛ wowoka wɔma.’​—Wala Yeembo 33:18-20.

WINÁ WOYAWOKASO OLENGEDJI

3. Lá winá wɔkɔnge w’okokaso ndawoka olengedji?

³ Kaanga oyɛso l’anteyi kɛ nkfumbo k’ekekete kɛ wananyɔ l’ankaana, tokoka ndawoka olengedji lá winá ɛmɔtshi. Ndjɔmbɔmba, dangala nkoka ndawoka olengedji winá w’otepelawɔ akambo walendana la djawo djɛwɔ lá ntondo kɛ winawɔ welá nkalasa kana winá w’ɔsɛkɔwɔ t’otshumano wɔ bango. Amɔtshi l’anteyi kɛso nkoka ndjala l’okiyano kana ndɛmba, winá w’oyɛwɔ la tokanyi tɔ nyɛtshi má nkanela ambɔ iso ladjɛ nana l’ekakasano wɛso isɔmɛlɛ. Tokoka nkaakanda djɛ nshimela anto wopo woyawokaso ladjikɛnde tolekɔ la wɔma ente wapangosipisoyɛ wopo w’oyawokaso. Edjinge lá mbamba imɔtshi, tokoka ndawopola ntsha kana onto ɔmɔtshi ndakiyanyɛka lá nkambo djɛso. Ndawoka olengedji, ayale kaanga m’elonga kɛkɔnge, nkoka ntokome djɛ ndjala l’okiyano la ndawoka etengo topalekɔ l’okotshɔ. Yehova apakɔpɛ iso ndawoka nghɔsɔ kaanga ndambo daambi. Lamo otepelaso nghɔsɔ?

4. Lamo ɔprɔfɛtɛ Elidja ndatepela ante: ‘Ngo lemi toko ndeke lombotshikala’?

⁴ Tokoshishima ndjɔmbɔmba kɛ mpame kɛ nkɔmano k’etawɔ Elidja. Nde atalotaki djɛ mbikɛ lowiko lɔnde l’ilá k’etsho 40 ladjikɛnde Jezabɛlɛ alapaka djɛ ndoyaka. (1 Nk. 19:1-9) Ekomo ekomo, winá wɔ ndotoyalaka ngo nyɔmɛlɛ lá weendo wɔ ve nde alelaka, ko ashimelaka Yehova ante: ‘Ngo lemi toko ndeke [ɔprɔfɛtɛ] wombotshikala.’ (1 Nk. 19:10) Aprɔfɛtɛ ankina watshikalaka l’owila, Ombadia alonghanyɛka djɛ mbikɛ aprɔfɛtɛ 100 má nkɛlɛ kɛ Jezabɛlɛ. (1 Nk. 18:7, 13) Iya lamo Elidja ndoyawoke olengedji nghɔsɔ? Ndakanelaka nde ante aprɔfɛtɛ ankfumɔ w’Ombadia ndawikɛ wamboovɔ m’ɔkɔngɔ wɔnde? Ndoyawokaka olengedji nde má wopo wɔ anto ankina yotasanghana lande djɛ nkambela Yehova kaanga m’ɔkɔngɔ wɔ Yehova ndaawɛnyɛ l’Onkókó wɔ Karamɛlɛ djɛ nde toko ndeke Ndjambe kɛ nsɔsɔlɔ? Ndo koko ndakanelaka nde ante lako onto wewa ante nde alekɔ lá mbalaka, kana lako onto woyakiyanyɛ lá nkambo djɛ nde? Ɔkɔndɔ wopasipisoyɛ kɔɔ ikanyi yeyalaki l’Elidja. Koko kɛnɛ kewaso nde Yehova asipisoyɛki lamo Elidja ndoyawokaka olengedji, la Nde ewaki wopo wɔ ndokotshɛ́.

5. Wopo wɔkɔnge Yehova ndashikikɛ Elidja ante nde apalekɔ nyɔmɛlɛ?

⁵ Yehova akotshɛ́ka Elidja lá topo efula. Nde akembɛka Elidja djɛ ndoshimela wopo woyawokande. Mbala ipe y’etondo Nde opolaka Elidja ante: ‘Onanghɛ lanɛ nge?’ (1 Nk. 19:9, 13) Winá enkfumɔ wɔ Elidja ndoshimelaka wopo woyawokande, Yehova ekameyɛki Elidja. Yehova akadjimolaka Elidja má ndɔwɛnyɛ tolembetelo tɔ ɛnamelo kɛ Nde la nkfulu kɛ Nde k’efula. Nde ashikikɛka Elidja lonkina ante winande ankina efula watshikalisá la nkɔmano walekɔ. (1 Nk. 19:11, 12, 18) Ape l’ehamo, Elidja ayawokaka wɔlɔ m’ɔkɔngɔ wɔ nde ndjipola Yehova oloko wɔnde la ndjekameyɛ nsakiso yɛ Ndɔpɛyɛ. Yehova apɛyɛka Elidja edjito enkina efula wɛ djonyi. Nde oshimelaka djɛ ntokfuta Hazayɛlɛ avuta djɛ nde ndjala nkfumi lá Suriya, Jehu djɛ nde ndjala nkfumi l’Isariyɛlɛ, la Elisha djɛ nde ndjala ɔprɔfɛtɛ. (1 Nk. 19:15, 16) Má mpɛyɛ Elidja edjito enkfumɔ wɛsɔ, Yehova okotshɛka djɛ nde ndjila yimba lá akambo wa djonyi. Ndjambe ɔpɛyɛka lonkina ilongo yɛ ma ma, Elisha. Wopo wɔkɔnge w’okokɛ mba okotshɔ wɔ Yehova winá woyawokɛ olengedji?

6. Kɛkɔnge k’okokɛ ndɔmba winá woyawokɛ olengedji? (Yeembo 62:8)

⁶ Yehova nkoshimelaka djɛ wɛ ndɔlɔmbaka. Nde nyɛnaka ekakasano wepomana la wɛ, la nde nkoshikikɛka djɛ angekameyɛka alɔmbɛlɔ wako lá winá enkfumɔ. (1 Te. 5:17) Nde nsasangaka ndjekameyɛ enkambi wɛnde. (Woo. 15:8) Kɛkɔnge k’okokɛ ndɔmba winá w’oyawokɛ olengedji? Shimela Yehova wopo w’oyawokɛ, ngo ngete Elidja ndananghe. (Wala Yeembo 62:8.) Shimelande ekiyano wɛko la wɔma wɔko. Lɔmba Yehova akokotshɛ́ djɛ wɛ ndjewa kɛnɛ k’okokɛ nangha winá woyawokɛ olengedji kana woyɛ l’okiyano. Ndjɔmbɔmba, ntsha ongoyawokake olengedji la ongoyalake la wɔma winá w’opoposanyɛ lá nkalasa, lɔmba Yehova akɔpɛyɛ oloko wolo woyɛ la djonyi djɛ nangha nkambo djɛsɔ. Wɛ nkoka ndɔlɔmba kaanga balo djɛ wɛ ndjewa nsipisoyɛ djawo djɛko la ntɔnɔ nkfumɔ. (Luka 21:14, 15) Ntsha ɛna ndjolo la tokanyi tɔ nyɛtshi, lɔmba Yehova djɛ nde nkokotshɛ́ djɛ wɛ nsawola ny’Okristo wombotshunda lá nyuma nkambo djɛsɔ. Wɛ nkoka ndɔmba Yehova djɛ nde nkotshɛ́ onto wɔkɔpɛ nsawola nyape djɛ nde nsipisoyɛ wopo w’oyawokɛ. Djipolela Yehova oloko wɔko, lenda wopo w’okadjimolande lá ndɔmbɔ yɛko; edjinge awola okotshɔ w’anto ankina; má nangha nghɔsɔ, ongoyawoka wɔlɔ.

7. Olakanyelo wɔkɔnge wɔ ngombowa lá ndjɔmbɔmba kɛ Mauricio?

⁷ Yehova atɔpɛyɛka isankfumɔ olemo wɔ ntshina efula wɔ nangha. Wɛ nkoka ndjala l’eshikikelo ente nde nyɛnaka la nsasangaka la kenkfumɔ k’onanghɛ djɛ nkotshɛ edjito wɛko wel’otshumano la l’olemo w’ipoposanyɛ. (Yee. 110:3) Wopo wɔkɔnge nkindjɛ ndapɛyɛ l’olemo wɔsɔ okokawɔ nkokotshɛ́ dj’ipa wɛ ndawoka olengedji? Tokolenda ndjɔmbɔmba kɛ wɔnanyɔ ɔmɔtshi w’olangala w’etawɔ Mauricio.b Lako mpeta ilá m’ɔkɔngɔ wɔ batisimo djɛnde, ilongo yɛnde imɔtshi yɛ ma ma atshikaka akambo wa nsɔsɔlɔ. Mauricio ntepalaka ante: “Winá wɔ mɔwɛnyi ambotshika Yehova, ntshutshɛka eshikikelo kɛmi. Ndawopolaka ntsha langoyala l’akoka wa nkotshɛ elako kɛmi edjinge ntshikala lá nkfumbo kɛ Yehova. Ndawokaka olengedji la nkanelaka ente lako onto wokoka nsipisoyɛ wopo woyawokami.” Kɛkɔnge kekotshisá Mauricio? Nde ntepelaka ante: “Mfudjɛka olemo wɔmi w’ipoposanyɛ. Kɛsɔ kenkotshɛka dj’ipa nkanelaka ngo lá nkambo djɛmi la lá tokanyi tɔ nyɛtshi tolekɔ la lemi. Ndjalaka l’osasa la ntayawokaki lonkina olengedji winá wɔ maposaka t’olemo w’ipoposanyɛ esanga l’anto ankina.” Lá nsɔsɔlɔ, kaanga winá wɔ sopakoke mpoposanyɛ la winaso andjawodji etengo isananghaka ntondo, iso mbaka lokembo má mpoposanyɛ má telefɔnɛ la m’enkanda. Kɛkɔnge kekotshisá Mauricio lonkina? Nde akotshɛ ante: “Ndapɛyɛka lonkina efula l’elemo wel’otshumano. Ndjilaka oloko wɔmi onkfumɔ djɛ ndɔngɔsɔlaka la mpɛyɛka asawo w’ambeki. Edjito wɛsɔ wenkotshɛka djɛ lemi ndawoka ente ndekɔ la ntshina le Yehova la le anto ankina.”

WINÁ WOYAWOKASO ETENGO TƆMBƆLƐMBA MÁ EFULA K’EHEMBA

8. Okokaso ndawoka ngetemo winá wopomanaso l’ekakasano efula?

⁸ Iso ndjewaka ente tongopomanaka l’ehemba l’etsho w’ekomo wɛnɛ. (2 Ti. 3:1) Koko, winá edjinge wepo w’ehemba wekoka ntokomela nkoka ntokamoyɛ. Tokoka mpomana l’ekakasano welendana la mfalanga l’isasimoyɛ, olando ɔmɔtshi wɔ wolo kana nyɔyi k’onto ɔmɔtshi wɔkɔpaso. Lá mbamba kɛ nghɔsɔ, tokoka ndakiyanyɛ efula kana ndɛmba, pekapeka ntsha ehemba wɛkɔ wemboyala má wɔnɛ tá wɔnɛ kana efula lá mbala kɛkɔ kɛmɔ. Koko tovungɛke ente, Yehova nyɛnaka kɛnɛ ketokomelá, m’okotshɔ wɔnde iso nkoka nkfulumeyɛ wepo w’ehemba enkfumɔ l’eshikikelo.

9. Kowala ekakasano ɛmɔtshi wepomanisá la Djɔbɔ.

⁹ Tokolenda wopo wɔ Yehova ndakotshɛ́ Djɔbɔ mpame kɛ nkɔmano. Nde apomanaka l’ehemba efula lá mbala kɛkɔ kɛmɔ. Ngo lá lofu lɔmɔ toko, wɔngɔlaka anyama yɛ Djɔbɔ inkfumɔ, wayakaka enkambi wɛnde, edjinge kaanga wana wande wa ngandji efula. (Djɔ. 1:13-19) Lako mpeta ilá, ngo yɛnyi y’akambo wasɔ itashile, Djɔbɔ atataka olando wɔ wolo efula la wɔ nsɔnyi efula. (Djɔ. 2:7) Ekakasano wɛnde welekaka wolo efula djɛkondeke Djɔbɔ ndatepela ante: ‘Lambotona lowiko lɔmi, lemi mpɔɔkɔpaka nkindjɛ ndjala la lowiko.’​—Djɔbɔ 7:16.

10. Wopo wɔkɔnge Yehova ndapɛyɛ Djɔbɔ kɛnɛ kɛ ndayalaka la djonyi djɛ nkfulumeyɛ ehemba wɛnde? (Lenda ntshango djelá loposo.)

¹⁰ Yehova ɛnaki ekakasano wepomanaki la Djɔbɔ. Ladjikɛnde Yehova akɔpaki Djɔbɔ, Nde ɔpɛyɛka kɛnɛ kɛ ndayalaka la djonyi djɛ nkfulumeyɛ ekakasano wɛsɔ la ntshikala la nkɔmano. Yehova asawolaka nya Djɔbɔ, ovungolaka balo djɛnde dj’ipa l’ekomo la wopo w’oyakiyanyɛnde la ngandji kenkfumɔ lá nkambo djɛ ntonghami djɛnde. Nde atepelaka nkambo djɛ efula k’anyama yekamoyɛ. (Djɔ. 38:1, 2; 39:9, 13, 19, 27; 40:15; 41:1, 2) Yehova akambaka lonkina la olangala wɔ mpame w’etawɔ Elihu djɛ nkembɛ la nsuka Djɔbɔ. Elihu oshikikɛka ante Yehova angofutake enkambi wɛnde winá enkfumɔ má nkɔmano djɛwɔ. Koko lonkina Yehova atshindaka Elihu djɛ mpɛyɛ Djɔbɔ alako amɔtshi wa la ngandji. Elihu akotshɛ́ka Djɔbɔ djɛ ntshika ndakiyanyɛ amboleka efula lá nkambo djɛnde nyɔmɛlɛ má ndovungola ante tolekɔ daambi efula lá ndawɛdjɛ la Yehova, Ontongi w’andja w’otondo. (Djɔ. 37:14) Yehova apɛyɛka lonkina Djɔbɔ odjito ɔmɔtshi, nde oshimelaka djɛ ndɔmbɛla tolongo tɔnde tosato tonanghisá ovunga. (Djɔ. 42:8-10) Ya wopo wɔkɔnge Yehova otokotshɛ́nde lɔɔko kɛnɛ winá w’opomanaso l’ehemba wɛ wolo?

11. Ekembelo kɛkɔnge Bible ɔtɔpɛyɛnde winá w’opomanaso l’ehemba?

¹¹ Yehova apotepelaka laso ngo ngete ndatepelaka nya Djɔbɔ, koko Nde ntepelaka laso m’Otepela wɔ Nde, Bible. (Ɔrɔ. 15:4) Nde ntokembɛka má ntɔpɛyɛ nkongi djelendana l’etsho weyaye. Tokoshishima ngo avɛrse amangha wemá Bible wakoka ntokotshɛ́ winá w’opomanaso l’ehemba. Lá Afunelo, Yehova ntoshikikɛka ante lako kaanga ekete, ayale kaanga ehemba w’efula, ‘wekoka ntokakitola má ngandji kɛ [nde].’ (Ɔrɔ. 8:38, 39) Nde ntoshikikɛka lonkina ante nde ‘alekɔ entshupa ny’anto ankfumɔ wowetá’ má lɔlɔmbɔ. (Yee. 145:18) Yehova ntoshimelaka ante ntsha iso ndawɛkɛ te nde, tokoka nkfulumeyɛ wepo w’ehemba enkfumɔ edjinge kaanga ndjala l’osasa winá wɛnaso ndjolo. (1 Kɔ. 10:13; Dja. 1:2, 12) Otepela wɔ Ndjambe ntovungolaka ante ehemba wɛso welekɔ w’itenyi yɛ winá la wepalekɔ wolo lá ndjɛndjɛ la ɛtshɔkɔ wɛ lotshinda wɛ Ndjambe ndɔngɔtɔpɛyɛ. (2 Kɔ. 4:16-18) Yehova ntɔpɛyɛka nkongi djɛ nsɔsɔlɔ dj’ente, nde anghimɛ ikɔkɔ yɛ ehemba wɛso enkfumɔ, ntepela ente Satana Djabolo nya anto ankfumɔ wakiliká mboka yɛnde yɛ pɔlɔ. (Yee. 37:10) Ombokotaka avɛrse amɔtshi wakembɛ wimá Bible wangokokotshɛ́ djɛ nkfulumeyɛ ehemba weyaye?

12. Kɛkɔnge kɛ Yehova ɔtɔlɔmbande djɛ nangha ntsha iso nkɔpaka mba wapɔ m’otepela wɔnde?

¹² Yehova ntɔlɔmbaka dj’iso ntshungolaka winá djɛ ndjekaka Bible mbala la mbala la ntɔnɔlaka efula lá kɛnɛ k’owalaso. Winá w’okambaso la kɛnɛ k’ekaso, djawo djɛso nkembaka edjinge iso ndasukanyɛka la Papa kɛso kel’olongo. Eposelo welekɔ́ la nkambo djɛsɔ nde, iso mbaka wolo wɔ nkfulumeyɛ ehemba. Lonkina Yehova mpɛyɛka wanɛ wayawɛkɛ l’Otepela wɔnde nyuma kɛnde k’ekina. Edjinge nyuma kɛsɔ nkoka ntɔpɛyɛ ‘wolo woleká wɔnɛ woyalaká l’onto’ djɛ nkfulumeyɛ wopo w’ehemba enkfumɔ.​—2 Kɔ. 4:7-10.

13. Wopo wɔkɔnge nkete djɛ ndɛ djelá nyuma djɛtɔpɛyɛ ‘mfumbe kɛ nkɔmano la nkɛsɔ’ otokotshɛwɔ djɛ nkfulumeyɛ ehemba?

¹³ M’okotshɔ wɔ Yehova ‘mfumbe kɛ nkɔmano la nkɛsɔ’ ntoposeyɛka wamba, wa video, la teembo tokoka ntokotshɛ́ djɛ nkembɛ djawo djɛso la nkindjɛ mbadjɛ lá nyuma. (Mat. 24:45) Iso ladjɛ nkambaka la nkete nkfumɔ dj’ɔtɔpɛyɛwɔ lá winá wɛdje djɛsɔ lá yopo yɛ wɔlɔ. Atahetá ilá nkaana kɛmɔtshi kɛ m’États-Unis ɛnyɛka djedjɛ djɛnde tá nkete djɛ ndɛ nkfumɔ djelá nyuma djɛsɔ. Nde atepelaka ante: “L’ilá k’ɛnɔnyi 40 wɛ momohetshɛ l’olemo wɔ Yehova, nkɔmano djɛmi djingelaka l’ohemba mbala la mbala.” Nde apomanaka l’ehemba efula, wayakaka ndoyi kɛnde kɛ mpame l’aksida w’otuka, ambotshi wande watataka olando wɔ wolo, edjinge nde nyɔmɛlɛ avundamaka la kansɛrɛ mbala ipe y’etondo. Kɛkɔnge k’okotshisá djɛ nkfulumeyɛ? Nde apakisola ante: “Yehova anseyɛki ehoma wɛmi winá enkfumɔ. Nkete djɛ ndɛ djelá nyuma dj’ɔtɔpɛyɛnde má lotshimbo lɔ mfumbe kɛ nkɔmano la nkɛsɔ djenkotshɛka djɛ nkfulumeyɛ. Má nkambo djɛsɔ, nkoka ntepela etengo Djɔbɔ ndatepela ante: ‘Tii winá wɔ mongovɔ, mpatshikaki nkɔmano djɛmi!’”​—Djɔ. 27:5.

14. Wopo wɔkɔnge Yehova okambande la winaso andjawodji djɛ ntosuka winá w’opomanaso l’ehemba? (1 Tesalɔnikɛ 4:9)

¹⁴ Yehova nkfumbaka enkambi wɛnde dj’iwɔ nkɔpanaka la nkotshanaka l’anteyi kɛwɔ lá deko djɛ ndjolo. (2 Kɔ. 1:3, 4; wala 1 Tesalɔnikɛ 4:9.) Lá ndjɔmbɔmba kɛ Elihu, wananyɔ l’ankaana yɛso ndjalaka l’osasa djɛ ntokotshɛ́ dj’iso ntshikala la nkɔmano winá w’opomanaso l’ekakasano. (Ele. 14:22) Ndjɔmbɔmba, tokolenda wopo wɔ wananyɔ l’ankaana yel’otshumano wɔ Diane iyokembɛ la iyokotshɛ́ djɛ nde ntshikala la lonyuma lɔ wolo winá wɔ womɛnde ndatate olando wɔ wolo efula. Nde ntepelaka ante: “Atayalá nkambo djɛ wɔdju. Koko tɛnaka wolo la ngandji kɛ Yehova l’ilá kɛ angɔndɔ efula y’isapomana l’okakasano wɔsɔ. Otshumano wɔso wananghaka akambo efula djɛ ntosuka. Watowemboláki, watetaki lá telefɔnɛ djɛ ntokotshɛ́ dj’iso nkfulumeyɛ. Ladjikɛnde ntakokaki nkɛndjɛ otuka mɔmɛlɛ lonkina, wananyɔ l’ankaana wananghaki la wolo djɛ lemi mba wopo wɔ ntshɔ tá nsanghanyɛ la t’olemo w’ipoposanyɛ winá wɔ mawaka mbamba.” Ɔsɔngo ɛtshɔkɔ w’owaso má ndɔsa opiko lá nkfumbo kɛ ngandji kelá nyuma kɛsɔ!

TOYALE LA DJƐDJƐ TÁ NGANDJI KƐ YEHOVA

15. Lamo oyɛso l’eshikikelo ente iso nkoka ndongela ekakasano?

¹⁵ Isankfumɔ tongopomana la wepo wɛ ehemba ɛmɔtshi. Koko, etengo isekaki, topangonana l’ehemba wɛsɔ ngo isɔmɛlɛ. Ngo ngete ombotshi wɔ ngandji, Yehova angotolendaka winá enkfumɔ. Nde alekɔ l’onkoko wɔsɔ, alekɔ entshupa djɛ ndjekameyɛ leeta lɔso lɔ mpona okotshɔ edjinge alekɔ entshupa djɛ ntosuka. (Iza. 43:2) Tolekɔ l’eshikikelo ente iso nkoka ndongela ekakasano ladjikɛnde la lokapo lonkfumɔ nde atɔpɛyɛka nkete dj’oyɛso la djonyi djɛ nkfulumeyɛ. Nde atɔpɛyɛka opapɛyɛ wɔ lɔlɔmbɔ, Bible, nkete djɛ ndɛ lombombe djelá nyuma, la nkfumbo kɛ ngandji kɛ wananyɔ l’akaana djɛ ntokotshɛ́ka winá w’oyɛso la djonyi dj’okotshɔ.

16. Wopo wɔkɔnge w’okokaso ntshikala l’elamelo kɛ ngandji kɛ Yehova?

¹⁶ Tolekɔ nsɔsɔlɔ la djedjɛ efula lá wopo w’okotshɛso Papa kel’olongo ketiláka yimba! ‘Eloko wɛso nsasangaka lende.’ (Yee. 33:21) Iso nkoka nyɛnyɛ Yehova ente tolekɔ la djedjɛ t’okotshɔ wɔnde wɔ la ngandji má nkambaka la nkete nkfumɔ dj’otɔpɛyɛnde djɛ ntokotshɛ́. Edjinge iso ladjɛ nangha nkambo mɔtshi djɛ nkindjɛ namema me Ndjambe. L’etepela enkina, ntsha iso nkindjɛ ndjila welo djɛ nɛmɛyɛ Yehova la nangha kɛnɛ kelekɔ́ wɔlɔ lá wiso wande, nde angokindjɛ ntolama lotshinda lotshinda!​—1 Pɛ. 3:12.