DJAMBA DJƐ WEKELO 52
Ankaana y’eseka, nyokome Akristo w’amato wambotshunda lá nyuma
‘Amato ladjɛ ndjala . . . anto wanangha akambo la wɛdjimo, la walekɔ́ la nkɔmano l’akambo ankfumɔ.’—1 TI. 3:11.
YEEMBO 133 Nyɔtɛmɔlɛ Yehova l’etsho wɛnyo wɛ dɛngɛ (lá Otetela)
LÁ YOPASƐa
1. Kɛkɔnge k’oyɛso ladjɛ nangha djɛ mfula lá nyuma?
TONGOKAMƆKE efula djɛ nyɛna wopo wɔ ilɛngɛ ndofulaka lankeke. Nyɛnamaka ente ilɛngɛ mfulaka ipa la nde ndjila welo. Koko, mfula djɛ nkoma Okristo wombotshunda lá nyuma, ndɔmbamaka ndjila welo.b (1 Kɔ. 13:11; Heb. 6:1) Djɛ nkotshɛ okoma wɔsɔ, iso ladjɛ ndjala la djokanelo djɛ wolo la Yehova. Tolekɔ lonkina la djonyi djɛ nyuma kɛnde k’ekina dj’iso ndjala la wekeka w’osasangɛ, ndjala l’akoka walekɔ́ djonyi la ndálɔngɔsɔla djɛ ndɔwɛmba edjito l’etsho weyaye.—Woo. 1:5.
2. Elakanyelo wɛkɔnge w’owaso má Ewangelo 1:27, ko kɛkɔnge k’otepelaso lɔ lá djamba djɛnɛ?
2 Yehova alonghanyɛka djɛ anto ndjala ampame l’amoto. (Wala Ewangelo 1:27.) Lá nsɔsɔlɔ, mpame l’omoto ntshikitanaka l’alemba, koko wangotshikitanake l’onkina la topo tonkina. Ndjɔmbɔmba, Yehova ananghaka djɛ mpame l’omoto nkotshɛ edjito kɔɔ, djɛkondeke walekɔ la djonyi djɛ wekeka l’akoka wakoka nkotshɛ́ onto l’onto djɛ mbɛmba edjito wɛnde. (Ewa. 2:18) Lá djamba djɛnɛ, tongoshishima kɛnɛ kɛ nkaana k’oseka okokande nangha djɛ nkoma Okristo w’omoto wombotshunda lá nyuma. Lá djamba djeyaye, tongoshishima kɛnɛ kɛ wananyɔ w’elangala okokawɔ nangha.
NYOKONE WEKEKA WASASANGƐ YEHOVA
Ndjokola wekeka w’amato wa nkɔmano, ndjɔmbɔmba Rɛbɛka, Ɛsita, la Abigayɛlɛ, angokokotshɛ́ djɛ wɛ nkoma Okristo w’omoto wombotshunda lá nyuma (Lenda itenyi 3-4)
3-4. Lampe ankaana y’eseka okokawɔ mba ndjɔmbɔmba yɛ wɔlɔ yɛ ndjokola? (Lenda edjinge ntshango.)
3 Bible ntepelaka djɛ amato efula wakɔpaki Yehova la w’okambelaki. (Lenda djamba dekɔ l’ɔtɛ wɔ djoyi ante: “Les femmes dans la Bible : que pouvons-nous apprendre d’elles ?” lá jw.org.) Etengo vɛrse dj’ɔsamisa ɔtɛ wɔso wɔ djamba otolakande, iwɔ wayalaki ‘anto wanangha akambo la wɛdjimo, la walekɔ́ la nkɔmano l’akambo ankfumɔ.’ Lá djiko djɛ lasɔ, ankaana nkoka ntana ndjɔmbɔmba y’Akristo amɔtshi w’amato wambotshunda lá nyuma w’okokawɔ ndjokola l’otshumano wɔwɔ.
4 Ankaana y’eseka, nyo ndjewaka amato amɔtshi w’Akristo wambotshunda lá nyuma wapɛyɛ ndjɔmbɔmba yɛ wɔlɔ y’okokanyo ndjokola? Nyopike wiso lá wekeka wawɔ wa wɔlɔ, makɔ nyeke wopo w’okokanyo nyɛnyɛ wekeka wakɔ. Lá totenyi tɔlɔnda, tongotepela wekeka asato wa djonyi wa amato wambotshunda lá nyuma oyɛwɔ ladjɛ nyɛnyɛ.
5. Lamo Okristo w’omoto wombotshunda oyɛnde la djonyi dj’okitshakitshɛ?
5 Okitshakitshɛ alekɔ djekeka djɛ djonyi efula djɛ nkoma Okristo w’ombotshunda. Ntsha omoto alekɔ l’okitshakitshɛ, angoyala la djokanelo djɛ wɔlɔ la Yehova edjinge l’anto ankina. (Dja. 4:6) Ndjɔmbɔmba, omoto wɔkɔpa Yehova nsɔnaka djɛ nsuka l’okitshakitshɛ onkfumɔ ikfɔ yɛ lowandji yɛ Papa kɛnde kel’olongo ndile. (1 Kɔ. 11:3) Ikfɔ yɛsɔ ingokambemake pekapeka l’otshumano la lá nkfumbo.c
6. Olakanyelo wɔkɔnge ankaana y’eseka okokawɔ mba má ndjɔmbɔmba k’okitshakitshɛ kɛ Rɛbɛka?
6 Tokolenda ndjɔmbɔmba kɛ Rɛbɛka. Nde ayalaka omoto wɔ yimba, w’ɔsaki akano l’oloko wolo onkfumɔ la w’ɔsaki noghanyi yɛ wɔlɔ lá lowiko lɔnde l’otondo. (Ewa. 24:58; 27:5-17) Koko, nde ayalaki l’okitshakitshɛ ole la ntshunamo. (Ewa. 24:17, 18, 65) Ntsha osuka l’okitshakitshɛ onkfumɔ nonghanyi yɛ Yehova etengo Rɛbɛka, ongoyala la ndjimbo kɛ wɔlɔ lá nkfumbo la l’otshumano wɔko.
7. Wopo wɔkɔnge ankaana y’eseka okokawɔ ndjokola Ɛsita má nyɛnyɛ nkoka djɛwɔ djɛ ndjewa elelo?
7 Ndjewa elelo alekɔ djekeka nkina dj’Akristo ankfumɔ wambotshunda lá nyuma oyɛwɔ la djonyi. Bible ntepelaka ante: ‘Balo dekɔ esanga la ase okitshakitshɛ.’ (Woo. 11:2) Ɛsita ewaki elelo wɛnde la akambelaki Ndjambe la nkɔmano. Kaanga ndakome wadjɛ nkfumi, Ɛsita ewaki elelo wɛnde la atayala l’otako. Nde ɛnyɛka nkambo djɛsɔ papoo má ndjoka la nkamba l’alako wa nkaana kɛnde Mɔrdɛkayi. (Ɛst. 2:10, 20, 22) Okoka nyɛnyɛ ente wɛ ndjewaka elelo wɛko má mpona la má nkamba l’alako wa wɔlɔ.—Tito 2:3-5.
8. Lá nkilika 1 Timɔte 2:9, 10, wopo wɔkɔnge wɛdjimo okokawɔ nkotshɛ́ ankaana dj’iwɔ ndɔsa ankano wa balo lá kɛnɛ kelendana la ndalɛnga edjinge ɔlɔtɔ?
8 Ɛsita ɛnyɛka ante ewaki elelo wɛnde lá wopo onkina. Nde ayalaki ‘mbɔngi wɔlɔ la ayalaki l’ɛnamelo kɛ wɔlɔ efula’; koko, atasepaki kaanga ikanyi y’onto tende. (Ɛst. 2:7, 15) Wopo wɔkɔnge Akristo w’amato okokawɔ mba wapɔ má ndjɔmbɔmba k’Ɛsita? 1 Timɔte 2:9, 10 ɛnyɛ wopo ɔmɔtshi. (Wala.) Ɔpɔstɔlɔ Poolo apɛyɛka Akristo w’amato dako djɛ ndálɛnga la wɛdjimo edjinge l’ekanedji kɛ wɔlɔ. Totepela tɔ Grɛkɛ tokambemisá lanɛ tɛnyɛ djɛ Akriso w’amato la djɛ ndɔta lá yopo yɛnyɛ dilɛmɛlɔ te Ndjambe la tá nsaki la tokanyi tɔ anto ankina. Tolekɔ nsɔsɔlɔ l’ofuno lá nkambo djɛnyo ankaana yɛso y’Akristo ilɔtɔka la iyálɛngaka la wɛdjimo!
9. Olakanyelo wɔkɔnge w’okokaso mba má ndjɔmbɔmba kɛ Abigayɛlɛ?
9 Ntɔnɔ alekɔ djekeka nkina djɛ ankaana y’Akristo ankfumɔ wambotshunda lá nyuma ɛnyɛkawɔ. Ntɔnɔ oyɛwɔ nge? Oyɛwɔ nde ekanedji kɛ wɔlɔ, nkoka djɛ ndjewa ntshikitanyɛ wɔlɔ la nyɛtshi, ko masɔ nsɔna djɛ nangha kɛnɛ kelekɔ́ wɔlɔ. Tokolenda ndjɔmbɔmba kɛ Abigayɛlɛ. Womɛnde ɔsaka nkano djɛ nyɛtshi nkokisá ndjakala eposelo wɛ pɔlɔ le onto onkfumɔ wowikaki lá mvulu kɛnde. Ngo mbala kɛkɔ kɛmɔ, Abigayɛlɛ ananghaka nkambo mɔtshi. Ekanedji kɛnde kɛ wɔlɔ kewikɛka mbiko. (1 Sa. 25:14-23, 32-35) Ntɔnɔ nkoka ntokotshɛ́ lonkina djɛ ndjewa winá wɔ ntepela la wɔ mvumba. Djekoka ntokotshɛ́ lonkina djɛ ndjala la wɛdjimo winá w’oyapɛyɛso le anto ankina.—1 Te. 4:11.
EKA DJƐ NDJALA L’AKOKA WALEKƆ́ DJONYI
Wopo wɔkɔnge w’okokɛ mba wapɔ má ndjeka mfuna la mbala? (Lenda itenyi 11)
10-11. Wapɔ wɛkɔnge w’okokɛ mba wɛ ny’anto ankina ntsha ombewa mbala la mfuna wɔlɔ? (Lenda edjinge ntshango.)
10 Okristo w’omoto ladjɛ ndjeka djɛ ndjala l’akoka walekɔ́ djonyi. Akoka amɔtshi wa wɔn’omoto ekande m’ɔlɛngɛ wangokindjɛ ndokotshɛ́ lá lowiko lɔnde lonkfumɔ. Tokolenda ndjɔmbɔmba imangha.
11 Eka djɛ ndjewa mbala la mfuna wɔlɔ. Lá nkfumbo mɔtshi, wangɛnake ambɔ lako ntshina djɛ omoto ndjewa mbala la mfuna. Koko, alekɔ wɔlɔ edjinge djonyi efula djɛ Okristo onkfumɔ ndjeka djɛ mbala la mfuna.d (1 Ti. 4:13) Djɛkondeke tawolake kaanga nkambo mmɔ nkoshimba djɛ ndjeka mbala la mfuna wɔlɔ. Wapɔ wɛkɔnge nghongowa? Akoka wasɔ nkoka nkokotshɛ́ djɛ mba la nama olemo. Ongokoma ombeki la wetsha wɔ wɔlɔ wɔ Otepela wɔ Ndjambe. Nkambo deka djonyi nde, ongoleka ndásukanyɛ la Yehova winá w’owalɛ la w’ɔtɔnɔlɛ l’Otepela wɔ Ndjambe.—Yos. 1:8; 1 Ti. 4:15.
12. Wopo wɔkɔnge Woongo 31:26 okokande nkokotshɛ́ djɛ ndjewa nsawola l’anto wɔlɔwɔlɔ?
12 Eka djɛ ndjala l’akoka wa nsawola wɔlɔwɔlɔ l’anto. Akristo ladjɛ ndjewa nsawola wɔlɔwɔlɔ l’anto. Ombeki Djakɔbɔ atɔpɛyɛ dako djɛ wɔlɔ efula lá nkambo djɛsɔ ante: ‘Onto onkfumɔ ladjɛ ndjala entshupa djɛ ndjekameyɛ, ɔkɔkɛ djɛ ntepela.’ (Dja. 1:19) Winá w’ekameyɛ la nkɔmɛ nkfumɔ anto ankina winá w’otepelawɔ, ɔngɛnyɛ ente wɛ ndawokaka nkɛtshi, kana ‘djandji.’ (1 Pɛ. 3:8) Ntsha otasipisoyɛ wɔlɔwɔlɔ kɛnɛ kɛ onto otepelande la wopo w’oyawokande, okoka ndowopola weepó wekoká. Makɔ, ɔsa ndambo kɛ winá djɛ ntɔnɔla lá ntondo kɛ ntepela. (Woo. 15:28, nɔtɛ) Lokawopole ente: ‘Kɛnɛ k’ɔkɔpami ntepela kelekɔ wɔlɔ la kengɔpɛyɛ lokembo? K’ɛnyɛ dilɛmɛlɔ la wɔlɔ wɔmi?’ Eka djɛ ndjala la nkoka djɛsɔ me ankaana yembotshunda lá nyuma yewaká nsawola wɔlɔ l’anto. (Wala Woongo 31:26.) Kɔmɛ wopo w’otepelawɔ. Winá wɔ ngoteke djɛ ndjala la nkoka djɛsɔ, ndeke nghongoleka ndjala la djokanelo djɛ wɔlɔ l’anto ankina.
Omoto w’eka djɛ ndɔngɔsɔla mvulu alekɔ osako w’ekekete efula le onto onkfumɔ welá mvulu la welá otshumano wɔnde (Lenda itenyi 13)
13. Wopo wɔkɔnge w’okokɛ ndjeka djɛ ndjewa ndɔngɔsɔla mvulu? (Lenda edjinge ntshango.)
13 Eka djɛ ndɔngɔsɔla mvulu. Lá djena efula, amato nkambaka elemo efula wɛ mvulu. Nyɔ kɛko kana nkaana kenkina nkoka nkokotshɛ́ djɛ ndjeka wopo wɔ nangha elemo wɛsɔ wɔlɔ. Nkaana kɛmɔtshi k’etawɔ Cindy atepela ante: “Opapɛyɛ ɔmɔtshi woleka djonyi wɔ nyɔ kɛmi ndapɛyɛ nde, ndjala l’osasa má nkamba elemo wɛ wolo. Ndjeka djɛ ndjala l’akoka w’etengo: ndamba, nsola ntshendja, ntɛla, la nsamba nsomba nkete osombasomba, ankotshɛka djɛ ndaseyɛ ehomba wɛmi la ndeka ndapɛyɛ l’olemo wɔ Yehova. Nyɔ kɛmi andjekɛka lonkina wopo wɔ ndjewa ndongola anto l’osasango, ko kɛsɔ kenkotshɛ́ka djɛ mpomana la wananyɔ l’ankaana yɛ wɔlɔ efula ilekɔ́ ndjɔmbɔmba y’okokami ndjokola.” (Woo. 31:15, 21, 22) Omoto wɔ nkɔmɛ, w’osasango, la w’ewa ndɔngɔsɔla mvulu, alekɔ osako w’ekekete efula le onto onkfumɔ welá mvulu la welá otshumano wɔnde.—Woo. 31:13, 17, 27; Ele. 16:15.
14. Olakanyelo wɔkɔnge wɔ ngombowa má kɛnɛ kekomelisá Crystal, ko oyɛ ladjɛ mpika wiso l’ekete kɛkɔnge?
14 Eka djɛ ndjewa ndáseyɛ ehomba nghɔmɛlɛ ngɛndjɔ. Ndjewa ndaseyɛ ehomba alekɔ okoma wɔ djonyi efula le Akristo ankfumɔ wambotshunda lá nyuma. (Flp. 4:11) Nkaana kɛmɔtshi k’etawɔ Crystal atepela ante: “Ambotshi wami wankotshɛ́ka djɛ nsɔna nkalasa kɛmayale ladjɛ nkilika lá imanite djɛ lemi mba akoka wa nkamba elemo w’ɛwɔ. Papa kɛmi ankembɛka djɛ nangha nkalasa kɛ comptabilité, djɛ ndjewa nkamba la nama mfalanga yɛ sosiete kɛmɔtshi.” Lá djiko djɛ mba akoka walekɔ́ djonyi djɛ mba olemo wɔ demba, wɛ ladjɛ ndjeka djɛ ndjewa nonghanyɛ wopo wɔ nkamba la mfalanga yɛko la balo, la nangha la wolo djɛ nɛmɛyɛ nonghanyi kɛkɔ. (Woo. 31:16, 18) Pika wiso lá ekoma wɛ nyuma má ndjewɔ awasa w’ipa ntshina la má sasanga la lowiko l’onghanghunya.—1 Ti. 6:8.
YALƆNGƆSƆLA DJƐ NDƆWƐMBA EDJITO
15-16. Wopo wɔkɔnge anto ankina okokawɔ mba wapɔ me ankana yɛ mpolo? (Marko 10:29, 30)
15 Winá w’onanghɛ la wolo djɛ mfudjɛ wekeka wa nyuma l’akoka wa nkamba elemo, ongoyalɔngɔsɔla wɔlɔ djɛ ndɔwɛmba edjito weyaye. Kolenda ndjɔmbɔmba imangha yɛ kɛnɛ k’okokɛ nangha.
16 Okoka ntshikala ondjemba l’ilá kɛ winá ɛmɔtshi. Lá nkilika etepala wɛ Yeso, amato amɔtshi nyɛnaka wɔlɔ nsamba mpɛtshɛ bala, kaanga nkfumbo djɛwɔ yopaleke nkembɛ ikanyi yɛsɔ. (Mat. 19:10-12) Ankina nkoka ntshikala endjemba m’ɔtɛ wɔ donga ntshikitanyi. Yala l’eshikikelo ente olekɔ la ntshina lá wiso wa Yehova la Yeso kaanga ngotatshukama. L’andja w’otondo, ankaana yɛ mpolo walekɔ etengo osako w’ekekete le ntshumano. Ladjikɛnde iwɔ nkɔpaka la ndapɛyɛka l’oloko ɔmɔ te anto ankina, amato w’Akristo wasɔ wangokomake ankaana l’anyɔ yɛ nyuma yɛ anto efula.—Wala Marko 10:29, 30; 1 Ti. 5:2.
17. Wopo wɔkɔnge ankaana y’eseka okokawɔ ndalɔngɔsɔla má winá wɔsɔ djɛ nkamba olemo wɔ winá enkfumɔ?
17 Okoka nkoma onkambi wɔ winá enkfumɔ. Akristo w’amato ndapɛyɛka efula l’olemo w’ipoposanyɛ wɔ l’andja w’otondo. (Yee. 68:11) Opakoke ndalonghanyɛ djɛ ndɔsa olemo wɔ winá enkfumɔ? Okoka nkamba etengo yat’ekalo, ompiki wɔ l’ɛkɔpa kana ose Betɛlɛ. Lɔmba lá nkambo dj’okoma wɔko. Sawola l’anto wambokotshɛ́ okoma wɔ nghɔsɔ, djɛ ndjewa kɛnɛ k’oyɛ ladjɛ nangha djɛ nkoma onkambi wɔ winá enkfumɔ. Masɔ nangha nonghanyi kekoka nkokotshɛ́ djɛ nkotshɛ okoma wɔkɔ. Nkotshɛ okoma wɔko angokodjipola mboka tá mbamba yɛ wɔlɔ efula l’olemo wɔ Yehova.
Ntsha okanela djɛ ntshukama, wɛ ladjɛ nsɔna womɛko la nkɔmɛ nkfumɔ (Lenda itenyi 18)
18. Lamo nkaana oyɛnde ladjɛ nsɔna wome la nkɔmɛ nkfumɔ?
18 Okoka nsɔna djɛ ntshukama. Wekeka l’akoka wa sotepelaki wangokokotshɛ djɛ wɛ ndjala wadji wɔ wɔlɔ. Lá nsɔsɔlɔ, ntsha ɔkɔpa ntshukama, wɛ ladjɛ nsɔna wome la nkɔmɛ nkfumɔ. Ɔsɔ alekɔ nkano mɔtshi djeleka djonyi efula djɛ nghɔngɔsa. Vungɔ ente wɛ ongoyala l’anse kɛ lowandji lɔ mpame kengokotshuká. (Ɔrɔ. 7:2; Ɛfɛ. 5:23, 33) Djɛkondeke yawopola ente: ‘Nde alekɔ Okristo wombotshunda? Angilake wapɔ w’Onkfumi l’edjena kɛ ntondo lá lowiko lɔnde? Angɔsake akano wa balo? Angawolake evunga wɛnde? Angɔlɛmɛyɛke amato? Alekɔ l’akoka walekɔ́ djonyi djɛ nsuka lemi lá nyuma, lá demba la lá yimba? Angokotshɛke edjito wɛnde wɔlɔwɔlɔ? Ndjɔmbɔmba, edjito wɛkɔnge welekɔ́ lande l’otshumano, ko wopo wɔkɔnge ndookotshɛka?’ (Luka 16:10; 1 Ti. 5:8) Lá nsɔsɔlɔ, ntsha okombola mba wome wɔ wɔlɔ, wɛ ladjɛ ndjala wadji wɔ wɔlɔ.
19. Lamo odjito wɔ ‘okotshɔ’ oyɛwɔ odjito w’onkfunda efula?
19 Bible ntepelaka ante wadji wɔ wɔlɔ oyɛnde nde ‘okotshɔ w’okoka’ le womɛnde. (Ewa. 2:18) Kɛsɔ ɔkɔpande nde ntepela ente omoto apalekɔ la ntshina? Lako! Odjito wolekɔ́ l’omoto etengo okotshɔ, ndɔpɛyɛka lomo efula. Lá nsɔsɔlɔ, Bible ntepelaka mbala efula djɛ Yehova etengo ‘okotshɔ.’ (Yee. 54:4; Heb. 13:6) Omoto ndjalaka okotshɔ wɔ wɔlɔ le womende winá w’ósukandé la w’ókotshɛ́nde djɛ nkotshɛ akano wɔsande lá nkfumbo. Edjinge ladjikɛnde angɔkɔpake Yehova, nde nanghaka la wolo djɛ ndɔngɔsɔla lokumu lɔ womɛnde. (Woo. 31:11, 12; 1 Ti. 3:11) Okoka ndalɔngɔsɔla djɛ odjito wɔl’etsho weyaye wɔsɔ má mfudjɛ ngandji kɛko te Yehova la má ndjala okotshɔ le anto ankina l’otshumano.
20. Lɔɔla lɔkɔnge lɔ wɔlɔ nyɔ okokande ndjala la lɔkɔ te nkfumbo kɛnde?
20 Okoka nkoma nyɔ. M’ɔkɔngɔ wɔ mpɛtshɛ bala, wɛ nya womɛko nyokoka mbota. (Yee. 127:3) Djɛkondeke, alekɔ nkambo djɛ balo wɛ ntɔnɔla ntondo. Wekeka l’akoka wa sombotepela lá djamba djɛnɛ wangokokotshɛ ntsha ombokoma wadji la nyɔ. Ngandji, wɔlɔ w’oloko la balentshitshi djɛko ngokotshɛ djɛ mvulu kɛko ndjala idjena y’osasango la yɛ wana wako okokawɔ ndáwoka l’elamelo la okokawɔ ndáwoka ambɔ wangɔkɔpamake.—Woo. 24:3.
Wana w’amato efula wekisá Afunelo la wekambisá la kɛnɛ kɛ yeke, wambokoma Akristo wambotshunda lá nyuma (Lenda itenyi 21)
21. Wopo wɔkɔnge ɔsakaso ankaana yɛso, ko lamo? (Lenda ntshango djelá loposo.)
21 Ankaana, iso nyɔkɔpaka lombombe, lá kenkfumɔ k’onanghelanyo Yehova l’enkambi wɛnde. (Heb. 6:10) Nyokamba la wolo djɛ nkona wekeka wa nyuma, djɛ mfudjɛ akoka wanangha djɛ mbiko yɛnyo la mbiko yɛ anto wanyodjingi ndjala osasa, ole djɛ ndálɔngɔsɔla wɔlɔwɔlɔ djɛ ndɔwɛmba edjito l’etsho weyaye. Nyolekɔ la ntshina efula l’olonghanyelo wɔ Yehova!
YEEMBO 137 Ankaana yɛso y’Akristo walekɔ amato wa nkɔmano (lá Otetela)
a Nyo ankaana yɛso y’Akristo yɛ ngandji, nyolekɔ la ntshina efula l’otshumano. Nyokoka ntshunda lá nyuma má nkona wekeka wa nyuma, má mfudjɛ akoka walekɔ́ djonyi la má ndálɔngɔsɔla djɛ ndɔwɛmba edjito l’etsho weyaye. Eposelo wengoyala nde, nyongosasanga l’esako efula l’olemo wɔ Yehova.
b DJƐ NDJOKA WƆLƆ: Okristo wombotshunda lá nyuma angɔlɔndjamake má nyuma kɛ Ndjambe, koko ape má balo dj’andja wanɛ. Angókolake ndjɔmbɔmba kɛ Yeso, angonanghake la wolo djɛ ndjala la djokanelo djɛ wɔlɔ la Yehova la angɛnyɛke anto ankina ngandji kɛ ndásambɛ.
d Djɛ ndjewa akambo ankina walendana la djonyi djɛ badji, lenda lá jw.org djamba djelekɔ́ l’ɔtɛ wo djoyi ante: “Pourquoi est-il important que les enfants lisent ? 1re partie : Lire un livre ou regarder un film?”