Lɔwɔ lɔ Yehova opayalaka itenyi

1. Wopo wɔkɔnge Mɔsɛ ndɛnyɛ ante ilela Yehova oloko winá wɔ ndaposɛ ase Isariyɛlɛ má Edjipito?

L’ANTEYI kɛ ndjɔmbɔmba y’anto wayalisá la djawo wa onkanda wɔ Hebero otepelande, Mɔsɛ ayalaka la djawo dj’ekekete efula. (Heb. 3:2-5; 11:23-25) Ɛnyɛka djawo djɛnde winá wɔ ndaposɛ ase Isariyɛlɛ má Edjipito. Nde atoka Farawɔ la angala wande wɔma. Má ndáwɛkɛ le Yehova, alɔndjɛka anto tá Ndjale kɛ Nkola nkola la m’ɔkɔngɔ, lá osowe wɔ lɔsɛnga. (Heb. 11:27-29) Ase Isariyɛlɛ efula watilelaki Yehova oloko lonkina ambɔ angawakela, koko Mɔsɛ alawɛkɛka ngo le Ndjambe kɛnde. Mɔsɛ ayalaka la elonga kɛ ndjala la djawo, mande má nsese, Ndjambe apɛyɛka eleelo, washi djɛ nkotshɛ́ anto l’osowe wɔ lɔsɛnga.a—Epo. 15:22-25; Yee. 78:23-25.

2. Lamo Ndjambe ndopola Mɔsɛ ante: ‘Lɔwɔ lɔ Yehova lolekɔ itenyi?’ (Ewadji 11:21-23)

² Kaanga Mɔsɛ ndayale la djawo dj’ekekete, ɔnɔnyi ɔmɔ m’ɔkɔngɔ w’ase Isariyɛlɛ ntshungɔ má nsese, alawopolaka ntsha Yehova angolesɛ enkambi wɛnde ete ngo ndatepela. Mɔsɛ atakoka nkanela wopo wɔ Yehova okokande mpɛyɛ miliyɔ k’anto keyalaki lá ká lá osowe wɔ lɔsɛkɛ nkete djɛ ndɛ dj’okokawɔ ndota. Ko Yehova akadjimolaka Mɔsɛ ante: ‘Lɔwɔ lɔ Yehova lolekɔ itenyi?’ (Wala Ewadji 11:21-23.) Lá hanɛ, itepela ‘lɔwɔ lɔ Yehova’ otomawɔ ikanyi nde tá nyuma k’ekina kɛ Ndjambe, kana nkfulu kɛnde kɛ nangha akambo. Ayalaka ngo ngete Yehova ndakɔpɛ nshimela Mɔsɛ nde ante: ‘Ɔfɛnyɛ nde ente lemi mpakoke nangha kɛnɛ k’otepelami?’

3. Ladjikɛnge kɛnɛ kekomelisá Mɔsɛ l’ase Isariyɛlɛ otolendawɔ?

³ Ongolawopolake ntsha Yehova angoshiyɛ ehomba wɛko la wɛ nkfumbo kɛko? Ntsha ombolawopola kana lako, tokolenda kɛnɛ kekomelisá Mɔsɛ la ase Isariyɛlɛ, watilela nkoka djɛ Ndjambe djɛ ndaseeyɛ ehomba wɛwɔ oloko. Tonghɛna tɔkfɔ tɔmɔtshi tɔ Afunelo tongotokotshɛ́ djɛ nkembɛ wɛkamo wɔso ente lɔwɔ lɔ Yehova lopalekɔ itenyi.

ELAKANYELO W’OWASO ME MƆSƐ L’ASE ISARIYƐLƐ

4. Ekete kɛkɔnge kekomisá ase Isariyɛlɛ djɛ ndjila ehamo ambɔ Yehova apangapɛyɛ nkete djɛ ndɛ?

⁴ Tokolenda kɛnɛ kenanghemisá. Owila w’Isariyɛlɛ la ‘oloyi w’ekekete w’anto’ wotayala ase Isariyɛlɛ woposisá má Edjipito wonanghaka etsho efula lá mboka djɛ ndjopa osowe wɔ lɔsɛnga tá Looko lɔ Daka. (Epo. 12:38; Mvu. 8:15) Oloyi w’ekekete wɔsɔ la ase Isariyɛlɛ efula watateyɛka nsamana djɛ oleelo wɔ mana. (Ew. 11:4-6) Anto wawangaka nkombola anyama la wima wa ndɛ wa yatshike lá Edjipito. Winá wɔ Mɔsɛ ndoke esamano wɛwɔ, akokaka nkanela ante angapɛyɛ wima ankina.—Ew. 11:13, 14.

5-6. Okokaso mba olakanyelo wɔkɔnge má wopo w’ase Isariyɛlɛ yadjimbɔ má esapo w’oloyi?

⁵ Nkoka ndjala ase Isariyɛlɛ wadjimbɔka má ntshamba dj’esuyɛ djɛ oloyi w’ekekete. Ngole iso tokoka ndjimbɔ má ikanyi yɛ lokaki y’anto ko ndjala l’esapo lá kenkfumɔ kɛtɔpɛyɛ Yehova. Tokoka ndjala la esapo ntsha tolokanela kɛnɛ kɛ sawaka ntondo, kana tololula anto ankina. Koko, tongoyala l’osasa ntsha tombosasanga la kɛnɛ kokotshɛso lá nkilika akoka waso.

⁶ Ase Isariyɛlɛ wakokaka mvungɔ ambɔ Ndjambe ambashikikɛ ante winá wɔ yongokoma lá mvulu yɛwɔ yɛ ntato, wangosasanga la nkete beboo. Daka djɛsɔ ntakotshama lá Looko lɔ Daka, koko ape winá wɔ yayalaka lá osowe wɔ lɔsɛnga. Lá wopo wɔkɔ ɔmɔ, l’edjena kɛso nsamana djɛ kɛnɛ kɛ sopakotshi lá nkfumbo dj’akambo djɛnɛ, tokanele nde kɛnɛ kɛ Yehova ndombotolaka djɛ ndɔtɔpɛyɛ l’andja wa bango. Tokoka nkanela lonkina afunelo wakoka ntokotshɛ́ djɛ nkembɛ wɛkamo wɔso le Yehova.

7. Lamo okakaso ndjala l’eshikikelo ente lɔwɔ lɔ Yehova lopalekɔ itenyi?

⁷ Ko lamo ngopakoke ndawopola ladjikɛnge Ndjambe ndopola Mɔsɛ ante: ‘Lɔwɔ lɔ Yehova lolekɔ itenyi?’ Yehova akotshɛ́ka Mɔsɛ djɛ ntɔnɔla ape ngo lá nkfulu kɛ lɔwɔ lɔnde, koko ole wopo wokambande la nkfulu kɛkɔ lá djena nkfumɔ. Ndjambe akokaka mpɛyɛ ase Isariyɛlɛ wima efula kaanga yayalaka l’otale lá osowe wɔ lɔsɛnga. La ‘lɔwɔ lɔ nkfulu edjinge la lɔwɔ lombosembɔ tɔɔ,’ Ndjambe ɛnyɛka nkfulu kɛnde. (Yee. 136:11, 12) Djɛko ndeke ntsha tolekɔ la ekakasano, totilake ehamo ente lɔwɔ lɔ Yehova lopanghɔmɔ leso.—Yee. 138:6, 7.

8. Wopo wɔkɔnge w’okokaso ndjewɔ evunga wenanghisá anto wayalisa lá osowe wɔ lɔsɛnga? (Lenda ntshango.)

⁸ Lako ndjala ilá, Yehova ápɛyɛka wimá wa ndɛ; atomelaka owila ntɛntɛ lako wopo. Koko, ase Isariyɛlɛ watakawoyɛ Ndjambe lokasa djɛ nsese djɛsɔ. Koko anto efula watɔnghɔnaka la lolemba l’efula. L’ilá kɛ lofu lɔmɔ l’etenyi, watɔnghɔnaka ntɛntɛ efula. Yehova okaka ‘anto wayalisá la lolemba,’ wasɔ nkɛlɛ efula ko ayakaka. (Ew. 11:31-34) Tokoka mba olakanyelo má ndjɔmbɔmba kɛsɔ. Towadjɛ dj’ipa ndjala la lokaki. Ayale tolekɔ la djɛɛlɔ kana lako, tonanghe la wolo djɛ mbomba ‘nkete djɛ ntsho l’olongo’ má nkembɛ djokanelo djɛso la Yehova ole la Yeso. (Mat. 6:19, 20; Luka 16:9) Nkama tombonangha nghɔsɔ, tongoyala l’eshikikelo ente Yehova angotokotshɛ́.

9. Kɛkɔnge kekoka ntoshikikɛ ente Ndjambe angotokotshɛ́?

⁹ Yehova asembola lɔwɔ lɔnde djɛ nkotshɛ́ enkambi wɛnde lɔɔko kɛnɛ. Koko, kɛsɔ kepakɔpɛ ntepela ente topangosamba mfalanga la wimá wa ndɛ kana topayalaki la ndjala.b Koko Yehova apatokadjɛki. Angotokotshɛka winá enkfumɔ lá ekakasano wɛso. Tokolenda nsɔsɔlɔ kɛ nkambo djɛsɔ má nshishima akambo 2 wokokaso nyɛnyɛ ente tilela Yehova oloko ente angosembola lɔwɔ lɔnde, djɛ ntɔpɛyɛ kɛnɛ koyɛso la djonyi; 1) winá w’oyɛso lá osambo wɔ mfalanga la 2) winá woyalonghanyɛso djɛ mbomba lofalanga djɛ etsho weyaye.

WINÁ W’OYƐSO LÁ OSAMBO WƆ MFALANGA

10. Okokaso mpomana l’ekakasano wɛ mfalanga wɛkɔnge?

¹⁰ Ete ngo ekomo kɛ nkfumbo dj’akambo djɛnɛ yolasɛmɛla, tewe ente ekakasano welendana la mfalanga wengetela. Otshikitano wɔ guvɛrnɛma, ambandji, mbalaka yeyɛ m’etongelo, kana epela wɛ bango nkoka ntoseeyɛ mfalanga kana ntosambɛ olemo, nkete kana mvulu kɛso. Iso ladjɛ mpona olemo wɔ bango l’edjena kintasɛso, kana ntɔnɔla djɛ nsɛkɔ tá idjena inkina la nkfumbo kɛso djɛ nshiyɛ ehomba wɛwɔ. Kɛkɔnge kengotokotshɛ́ djɛ ndɔsa akano wanghɛnyɛ ente tilela lɔwɔ lɔ Yehova oloko?

11. Ekete kɛkɔnge kengokokotshɛ́ djɛ nkfulumeyɛ ekakasano wɛ mfalanga? (Luka 12:29-31)

¹¹ Nkambo djɛ ntondo la deka djonyi nde iso nsodjeyɛ Yehova edjito wɛso. (Woo. 16:3) Lɔmbande balo djɛ ndɔsa akano wa wɔlɔ, la vu djelá oloko djɛ ‘ntshika nkiyana’ djɛ ekakasano wɛko. (Wala Luka 12:​29-31.) Lɔmbande akokotshɛ́ djɛ nsasanga la kɛnɛ kokotshɛ. (1 Ti. 6:7, 8) Hona lá enkanda wɛso alako wa wɔlɔ walendana l’ekakasano wɛ mfalanga. Anto efula wawaka wapɔ wa mpeko dekɔ lá jw.org ntepela djɛ ekakasano wɛ mfalanga.

12. Weepó wɛkɔnge wengokotshɛ́ Okristo djɛ ndɔsa akano wa wɔlɔ lá nkfumbo kɛnde?

¹² Anto amɔtshi wawolaka olemo wakomisá djɛ mbangɔna la nkfumbo yɛwɔ, koko mbala efula ɔsɔ atayala nkano djɛ wɔlɔ. Lá ntondo kɛ ndjawola olemo wɔ bango, tolendake ngo lofuto lɔ yongokofuta toko, koko lenda ole lonyuma lɔ nkfumbo kɛko. (Luka 14:28) Kolawopola ente: ‘Wadji kana womɛmi ndongoyala ngete mo ntsha lambowangɔ otale la nde? Eposelo wɛkɔnge wengoyala lá wingelo wɔ nsanghanyɛ, olemo wɔmi w’ipoposanyɛ, la djokanelo djɛmi isa wananyɔ l’ankaana?’ Ntsha olekɔ la wana, lokawopole woopó wɔ djonyi wɔnɛ: ‘Wopo wɔkɔnge mongowongola wana wami ‘lá ikako la lá alako wa Yehova’ ntsha mpalekɔ isawɔ?’ (Ɛfɛ. 6:4) Lɔndjama má ekanedji kɛ Ndjambe, ape k’ase nkfumbo kana kɛ tolongo topakambe la tɔkfɔ tɔ Bible.c Tony, kanga lowika lá ɛstɛ kɛ Asie, awaka mbamba yɛ ntokamba elemo wɛ wɔlɔ efula lá owila onkina. Koko, m’ɔkɔngɔ wɔ ndɔmba lá nkambo djɛsɔ la nsawola nya wadjɛnde, ɔsaka nkano djɛ ntona elemo wɛsɔ, la wɔsaka nkano djɛ nkitshakitshɛ adepansɛ wawɔ. Lɔɔko kɛnɛ, Tony atepela ante: “Lambowa mpeyi kɛ nkotshɛ́ anto efula djɛ ndjewa Yehova la wana waso wakɔpa Yehova lombombe. Nkfumbo kɛso kembeka ente l’ilá kenkfumɔ k’okambaso la Mateo 6:33, Yehova angotowakela.”

NDÁLONGHANYƐ DJƐ MBOMBA MFALANGA DJƐ ETSHO WEYAYE

13. Nkambo djɛkɔnge djɛ balo dj’okokaso nangha winá wɔsɔ ngotokotshɛ́ djɛ nshiyɛ ehomba wɛso lá lɔnkɔlɔma?

¹³ Wɛkamo wɔso lá lɔwɔ lɔ Yehova wokoka ndjingela l’ehemba winá wɛnaso ente lowiko lɔso longotshikitana lá lɔnkɔlɔma. Bible ntokembɛ djɛ nkamba olemo wɔ wolo w’okoka ndotoseyɛ ehomba wɛso l’etsho weyaye. (Woo. 6:6-11) Ntsha akoka walekɔ, alekɔ wɔlɔ mbomba ndambo kɛ lofalanga djɛ etsho weyaye. Mfalanga nkoka ntolama. (Los. 7:12) Koko, topakoke nkomɛ mfalanga ekete keleka djonyi lá lowiko lɔso.

14. Wopo wɔkɔnge Hebero 13:5 okokande ntokotshɛ́ djɛ ndálɔngɔsɔla djɛ ekakasano wɛ l’etsho weyaye?

¹⁴ Yeso apɛyɛka ndjɔmbɔmba kɛ onto w’enkesa wowombaki mfalanga, koko wotayalaki ‘okfudji lá wiso wa Ndjambe.’ (Luka 12:16-21) Lako onto wewa wopo wongoyala lowiko lomi. (Woo. 23:4, 5; Dja. 4:13-15) Ete ngo oyɛso ambeki wa Kristo, topomana l’ekakasano ɛmɔtshi. Yeso atepelaka ante iso ladjɛ ndjala entshupa djɛ ‘nsandjola nkete djɛso nkfumɔ’ djɛ ndjala ombeki wɔnde. (Luka 14:33, nɔtɛ.) Akristo wa ɛtɛndɔ kɛ ntondo wa Judeya wawolaka ntshutshɛ nkete l’osasa. (Heb. 10:34) Lá etsho wɛso wɛnɛ, wananyɔ efula watshutshɛ elemo wɛwɔ wɛ mfalanga mande wapakɔpɛ ndɔsa opiko lá wayi wa pɔlitikɛ. (Ndj. 13:16, 17) Kɛkɔnge kakotshɛ́ djɛ nangha nghɔsɔ? Wangilake oloko lá daka djɛ Yehova djɛnɛ: ‘Lemi mpakotshikaki, la mpakokadjɛki lotshinda.’ (Wala Hebero 13:5.) Tonanghe kenkfumɔ k’okokaso nangha djɛ ndálɔngɔsɔla djɛ ekakasano w’etsho weyaye, la tolashikikɛ ente Yehova angotokotshɛ́ ntsha tombopomana la wayi w’isasimoyɛ.

15. Ikanyi yɛkɔnge yɛ wɛdjimo ambotshi w’Akristo okokawɔ ndjala te wana wawɔ? (Lenda ntshango.)

¹⁵ Lá djena mɔtshi, anto nkɔpaka pekapeka mbota djɛ wana wawɔ ndaakotshɛ́ winá wɔ yongopomana l’ekakasano wɛ mfalanga lá lotshundo. Koko Bible ntepela ante ambotshi ladjɛ nshiyɛ ehomba wɛ wana wawɔ. (2 Kɔ. 12:14) Lá nsɔsɔlɔ, ambotshi wangoyalake la lonyi l’okotshɔ lá lotshundo, la wana wangoyalake l’osasa wɔ ndálonghanyɛ djɛ ndaakotshɛ́. (1 Ti. 5:4) Koko ambotshi w’Akristo wangewake ambɔ osasa wɔwɔ wopaye má mbongola wana wawɔ l’ikanyi y’iwɔ ndaapɛyɛ mfalanga, koko má nkotshɛ́ wana wawɔ dj’iwɔ nkambela Yehova.—3 Dj. 4.

16. Wopo wɔkɔnge ambotshi okokawɔ ndɔngɔsɔla wana wawɔ dj’iwɔ ndáseeyɛ ehomba wɛwɔ yɔmɛlɛ? (Ɛfɛsɛ 4:28)

¹⁶ Má ndjɔmbɔmba kɛnyo, nyekɛ wana wanyo djɛ ndjilela Yehova oloko winá waakotshɛ́nyo djɛ ndálɔngɔsɔla dj’iwɔ ndáseeyɛ ehomba wɛwɔ. Ɛnyɛwɔ ngo má ɔlɛngɛ wɔwɔ, djonyi djɛ nkamba olemo wɔ wolo. (Woo. 29:21; wala Ɛfɛsɛ 4:28.) Winá wɔ yotafule, kotshɛwɔ djɛ nangha kenkfumɔ k’oyɛwɔ ladjɛ nangha lá nkalasa. Angoyala wɔlɔ ambotshi w’Akristo nangha ehonelo la nkamba la tɔkfɔ tɔ Bible djɛ nkotshɛ́ wana wawɔ dj’iwɔ ndɔsa akano wa ndjewa wopo w’okokawɔ nkamba la nkalasa yɛwɔ lá wopo wɔ wɔlɔ. Kɛsɔ kengapɛyɛ akoka wa ndáseeyɛ ehomba wɛwɔ la ndápɛyɛ l’olemo w’Okristo.

17. Okokaso ndjala l’eshikikelo kɛkɔnge?

¹⁷ Enkambi wɛ Yehova wɛ nkɔmano nkoka ndjala l’eshikikelo ambɔ alekɔ la mposɛ ole entshupa djɛ ndáseeyɛ ehomba wɛwɔ wɛ demba. Winá wɔ sotasɔsɔmɛla tá ekomo kɛ nkfumbo dj’akambo djɛnɛ, wɛkamo wɔso le Yehova wongingela lá ehemba. Koko ayale nkambo djɛkɔnge nkoka ntokomela, tolashikikɛ ente Yehova angokamba la nkfulu kɛnde djɛ nshiyɛ ehomba wɛso wɛ demba. Tokoka ndjala l’eshikikelo ente lɔwɔ lɔnde lɔ nkfulu la lombosembɔ tɔɔ lopayalaki itenyi djɛ ntokotshɛ́.