‘Nyɔsɔnɛ nyɔmɛlɛ . . . onto wɔ nyongokambela’

1. Dj’iso ndjala l’osasa wɔ nsɔsɔlɔ, oyɛso ladjɛ nangha nge, ko lamo? (Izaya 48:17, 18)

PAPA kɛso kɛ l’olongo ntɔkɔpaka lombombe la nde nkɔpaka iso nsasanga la lowiko winá wɔsɔ edjinge l’etsho weyaye. (Los. 3:12, 13) Atotongaka l’akoka amɔtshi wa nkamɔ, koko atɔtɔpɛyɛ akoka w’iso ndálɔndjɛ sɔmɛlɛ kana ndawilela ɛlɛmbɛ welendana la wɔlɔ ole la nyɛtshi. (Los. 8:9; Jɛr. 10:23) Nde ewa ante dj’iso ndjala la osasa wɔ nsɔsɔlɔ, iso ladjɛ ndokambela la mbika lá nkilika ɛlɛmbɛ wɛnde.—Wala Izaya 48:17, 18.

2. Satana okombolande iso ndjawola nge, la wopo wɔkɔnge Yehova ndatongola Satana?

² Satana nkombolaka iso ndjawola ente tokoka ndjala l’osasa ipa Yehova, l’anto wakoka ndálɔndjɛ iyɔmɛlɛ. (Ewa. 3:4, 5) Yehova atongolaka Satana má mpɛyɛ anto watɔmbɔkisá lotshungɔ lɔ ndálɔndjɛ l’ilá kɛ winá ɛmɔtshi. Topalekɔ la djonyi dj’iso mpona djɛ nyɛna eposelo wɛ nyɛtshi wimá ɛlɔndjɛlɔ kɛ anto. Lá wedji onkina, Afunelo wambolola la ndjɔmbɔmba y’ampame la amato wayalisá la lowiko l’osasa l’olemo wɔ Yehova. Ndjɔmbɔmba kɛmɔtshi nde Yeso Kristo. Ntondo ntondo, tokolenda donga mɔtshi djotshindisá djɛ nde ndɔsa nkano djɛ nkambela Yehova. Manyi tongoshishima lamo oyɛwɔ wɔlɔ nkambela Papa kɛso kɛ l’olongo. L’ekomo, tɔnghɛna donga mɔtshi dj’ɔsɔnaso djɛ nkambela Yehova.

LAMO YESO NDASƆNƐ DJƐ NKAMBELA YEHOVA

3. Satana ndakɔpɛ mpɛyɛ Yeso nge, ko Yeso ndananghe mo?

³ Winá wɔ ndayalaka lá looko, Yeso ayalaka ladjɛ ndɔsa nkano djɛ ndjewa onto wɔkɔna ndongokambela. Ndambo daambi m’ɔkɔngɔ wɔnde ndongola, Satana oshimelaka ante angɔɔpɛyɛ enkfumi enkfumɔ wɛ lá looko ntsha ámbɔtɛmɔla. Yeso okadjimolaka ante: ‘Satana, ima mahanɛ! Ladjikɛnde afunamaka ente: “Yehova Ndjambe kɛko ndeke oyɛ ladjɛ ntɛmɔla, edjinge ngo nde nyɔmɛlɛ toko ndeke oyɛ ladjɛ nkambela olemo w’ekina.”’ (Mat. 4:8-10) Lamo Yeso ndɔshi nkano djɛsɔ? Tokolenda donga mɔtshi.

4-5. Donga mɔtshi djɛkɔnge djɛ Yeso ndasɔnɛ djɛ nkambela Yehova?

⁴ Elonga kɛ ntondo kɛ Yeso ndasɔnɛ djɛ nkambela Yehova nde ngandji—Yeso alekɔ la ngandji k’efula, ngandji kepashile te Papa kɛnde. (Dj. 14:31) Lá djiko djɛ lasɔ, Yeso akambela Yehova ladjikɛnde ɔsɔ alekɔ nkambo djɛ wɔlɔ djɛ nangha. (Dj. 8:28, 29; Ndj. 4:11) Nde ewa ante Yehova ndeke ikɔkɔ yɛ lowiko, ɛdje ndowilela oloko, ole kanga nkapo. (Yee. 33:4; 36:9; Dja. 1:17) Yehova nshimelaka Yeso nsɔsɔlɔ winá enkfumɔ, la ɔpɛyɛka ekete kenkfumɔ kokotshɛnde. (Dj. 1:14) Koko, Satana ndeke lotshindisá anto djɛ nangha mpekanto katɔla tá nyɔyi. Satana alekɔ kanga ongolo, kanga lokaki, la kanga lohonaka ngo wapɔ wande. (Dj. 8:44) Má ndjewa akambo wasɔ, Yeso atatɔnɔla kaanga ndambo daambi djɛ ndjokola Satana má mpendola Yehova.—Flp. 2:5-8.

⁵ Elonga kenkina kɛ Yeso ndasɔnɛ djɛ nkambela Yehova nde, atangelaka eposelo wengoyala la olemo wɔnde wɔ nkɔmano. (Heb. 12:2) Nde ewaki ante ntsha ambotshikala la nkɔmano, angokinyɛ djiina djɛ Papa kɛnde la angimɛ akambo wa nyɛtshi waposisá Djabalo.

LAMO OLƐSO LADJƐ NTƐMƆLA NGO YEHOVA

6-7. Lamo anto efula lɔɔko kɛnɛ yopakambela Yehova, ko lamo olɛso ladjɛ ndɔtɛmɔla?

⁶ Anto efula lɔɔko kɛnɛ wapakambela Yehova ladjikɛnde watewe wekeka wande wa wɔlɔ la wapile yimba lá kɛnɛ kɛ ndombananghela. Nsɔsɔlɔ kɛ nkambo djɛsɔ kɛnama papoo l’anto wa ɔpɔstɔlɔ Poolo ndápoposanyɛ l’Atɛnɛ.—Ele. 17:19, 20, 30, 34.

⁷ Poolo apakisolaka andjoki wande ante Ndjambe kɛ nsɔsɔlɔ ‘apɛyɛka anto ankfumɔ lowiko, lohomo la nkete nkfumɔ.’ Akfɛka ante: ‘Me nde ndeke oyɛso la lowiko, ɔkɛndaso la oyɛso l’andja wanɛ.’ Ndjambe alekɔ Ontongi, nde ndeke ‘lotongisá anto w’ewila enkfumɔ,’ djɛko ndeke olɛso ladjɛ ndɔtɛmɔla ngo nde.—Ele. 17:25, 26, 28.

8. Yehova ndopangonangha nge? Pakisola.

⁸ Ete ngo Ontongi la Lapamela l’andja w’otondo, Yehova nkoka ntshinda anto djɛ ndokambela la wolo. Koko, Yehova apananghaki nghɔsɔ. Angɔtɔpɛyɛke tolembetelo tɛnama ente nde alekɔ la angɔkɔpake onto onkfumɔ wɔ l’anteyi kɛso efula. Nde nkɔpaka anto efula nkoma tolongo tɔnde etshinda etshinda. (1 Ti. 2:3, 4) Djɛ nkambo djɛsɔ nanghema, Yehova ambotokfumba djɛ ndakanyɛ anto alaka wande l’akambo wa wɔlɔ wɔkɔpande ndananghela. (Mat. 10:11-13; 28:19, 20) Ambototshumanyɛ lá ntshumano la ambɔsɔna elami wɛ ngandji djɛ ntolama.—Ele. 20:28.

9. Ngandji kɛ Yehova ɛnamawɔ ngete mo?

⁹ Ngandji k’ipa wɔsɔdjɔmba kɛ Yehova nyɛnamaka lá wopo w’onanghelande waapewe ambɔ nde alekɔ akambo. Tokolenda nkambo djɛnɛ: Má andɛlɛ la ndɛdji, miliyɔ y’anto wambɔsɔna djɛ nkilika ɛlɛmbɛ wɛwɔ welendana la wɔlɔ kana la nyɛtshi. Kaanga nghɔsɔ, Yehova angapɛyɛke la djandji nkfumɔ kenkfumɔ k’oyɛwɔ la djonyi dj’iwɔ nsasanga la ntshikala la lowiko. (Mat. 5:44, 45; Ele. 14:16, 17) Angapɛyɛke akoka wa ndjala la djokanelo djɛ wɔlɔ, mbongola nkfumbo, kana mba lofuto lɔ elemo wɛwɔ wɛ wolo. (Yee. 127:3; Los. 2:24) Akambo wasɔ wɛnyɛ papoo ente Papa kɛso kɛ l’olongo nkɔpaka anto ankfumɔ. (Epo. 34:6) Winá wɔsɔ, tokolenda donga mɔtshi dj’oyɛso ladjɛ nkambela Yehova, la wopo wosakolande wɔɔsɔna djɛ ndokambela.

LAMO OLƐSO LADJƐ NSƆNA DJƐ NKAMBELA YEHOVA

10. a) Elonga kɛkɔnge kɛ ntondo ntondo k’okambelaso Yehova? (Mateo 22:37) b) Wopo wɔkɔnge ngombowa wapɔ má bale ntshitshi djɛ Yehova? (Yeembo 103:13, 14)

¹⁰ Ete ngo Yeso, tokambela ntondo ntondo Yehova má ngandji k’efula kowokaso. (Wala Mateo 22:37.) Tongosepamake le Yehova winá wekaso wekeka wande. Ndjɔmbɔmba, tokolenda wopo wɔ Yehova ɔtɛnyɛnde bale ntshitshi. Winá w’ase Isariyɛlɛ yopendola, awɔndaka ante: ‘Lambɔnyɔwɔnda, nyokalɔ má mboka yɛnyo yɛ nyɛtshi.’ (Jɛr. 18:11) Yehova ewa ante tolekɔ anto wa ntshamba djɛ djɔ, la otoko. (Wala Yeembo 103:13, 14.) Ntɔnɔla lá bale ntshitshi la wekeka ankina wa Yehova, apakotshinde djɛ ndokambela?

11. Donga nkina djɛkɔnge dj’ɔsɔnaso djɛ nkambela Papa kɛso kɛ l’olongo?

¹¹ Tongotshindamake kankina djɛ nkambela Yehova ladjikɛnde ɔsɔ ndeke nkambo deka wɔlɔ nangha. (Mat. 4:10) Lonkina, tongewake eposelo weyalaka l’olemo wɔso wɔ nkɔmano. Winá w’okambelaso Yehova la nkɔmano, tongokinyɛke djiina djɛnde, tɔnghɛnyɛke ente Djabolo alekɔ kanga ongolo, la tongosasangɛke oloko wɔ Papa kɛso. La ntsha tɔmbɔsɔna djɛ nkambela Yehova lɔɔko kɛnɛ, tongoyala la nkongi djɛ ndokambela etshinda etshinda!—Dj. 17:3.

12-13. Ngombowa olakanyelo wɔkɔnge má kɛnɛ kekomelisá Jane la Pam?

¹² Winá woyɛso ilɛngɛ, tokoka ndjala la ngandji k’ekekete te Yehova kengolangalangaka winá wɔ sotafule. Tokolenda kɛnɛ kekomelisá nkaana Jane nya Pam.a Jane ayalaki l’ɛnɔnyi 11 la Pam ɛnɔnyi 10 winá wɔ yawange ndjeka Bible. Kaanga ambotshi wawɔ yotaapɛyɛka lá wekelo, wapɛyɛka Jane la Pam lotshungɔ lɔ ndjeka Bible l’Ewakɛ wɛ Yehova winá w’ase nkfumbo ankina otshowɔ tá ekɛlɛsiya. Jane atepela ante: “Kɛnɛ k’Ewakɛ yandakanyɛka má Bible, kenkotshɛka djɛ mpikama lá ndjimbo yɛ winami wa nkalasa dj’ipa nnɔ nɔnɔ djɛ wolo la nangha wayi wa mbindo.”

¹³ M’ɔkɔngɔ w’ɛnɔnyi emangha, yape kɛkɔ wakomaka ansakodji. Manyi, wakomaka tat’ekalo winá wɔ yawongolaka ambotshi wawɔ wa nkokolo. Winá wokanelande kɛnɛ kokomelisá, Jane atepela ante: “Ndjekaka ntondo ntondo ente Yehova awakela tolongo tɔnde la nkɔmano nkfumɔ ete ngo 2 Timɔte 2:19 otepelande ante: ‘Yehova ndjewaka anto wande.’” Ape l’ehamo Yehova mbakelaka anto wɔɔkɔpa la wasɔna djɛ ndokambela!

14. Etepela la nanghedji djɛso okotshɛwɔ djɛ nsola djiina djɛ Yehova má emamɔ ngete mo? (Lenda asango.)

¹⁴ Iso nkɔpaka nkotshɛ́ djɛ nsola djiina djɛ Yehova má emamɔ enkfumɔ. Kolenda nkambo djɛnɛ: Olekɔ l’ilongo yɛ wɔlɔ efula ilekɔ́ onto wɔlɔ, nkapo la yimeyɛ. Lofu lɔmɔtshi omboka watepela ambɔ ilongo yɛko alekɔ lopango la onto nyɛtshi. Okokɛ nangha mo? Ongoosela. Wopo wɔkɔ ɔmɔ, winá wɔ Satana nya anto wande otshanghanyɛwɔ engolo lá nkambo djɛ Yehova la djiina djɛnde, tongelolake má nshimela anto nsɔsɔlɔ lá nkambo djɛ Yehova, tongoseelake djiina djɛnde la wolo wɔso onkfumɔ. (Yee. 34:1; Iza. 43:10) Tɛnyɛ ente tɔkɔpa nkambela Yehova la anyima waso ankfumɔ má etepela la nanghedji.

15. Wopo wɔkɔnge ɔpɔstɔlɔ Poolo ndawa wapɔ má ntshikitanyɛ ekoma wɛ lowiko lɔnde? (Filipɛ 3:7, 8)

¹⁵ Tolekɔ entshupa djɛ ntshikitanyɛ ekoma wɛso wɛ lowiko dj’iso ndeka nkambela Yehova lá wopo w’ɔkɔpande. Ndjɔmbɔmba, Poolo atshikaka mpipo la lowandji lɔ ndayalaka l’ɔtɛmwɛlɔ w’ase Juda djɛ nkilika Kristo la nkambela Ndjambe. (Nga. 1:14) Eposelo weyalisá nde, awaka lofuto l’ekekete la awaka mbamba kɛ ntɔlɔndjɛ esanga la Kristo l’olongo. Atakiyana kaanga ndambo daambi nkano djɛnde djɛ nkambela Yehova, ngole iso topakiyanaki.—Wala Filipɛ 3:7, 8.

16. Owaso olakanyelo wɔkɔnge má ndjɔmbɔmba kɛ Julia? (Lenda asango.)

¹⁶ Ntsha olemo wɔ Yehova wombokoma ekete keleka djonyi leso, tokoka mba esako winá wɔsɔ la l’etsho weyaye. Tokolenda kɛnɛ kekomelisá nkaana Julia. Lá ntondo kɛ nde ndjeka nsɔsɔlɔ, Julia atshumbaki lá ɛkɛlɛsiya kɛmɔtshi ngo m’ɔlɛngɛ wɔnde. Ntshumbi teembo kɛmɔtshi ɔwɛnaka ko awangaka ndokfumba. Lako mpeta ilá, Julia awangaka ndjewama ko awangaka ntshumba lá amvulu yɛ nkekete iminaka anto. Winá wɔ ndingela nkalasa kɛ mizikɛ, winande ɔmɔtshi wɔ nkalasa atateyɛka ndoshimela akambo walendana la Ndjambe ole oshimelaka ante djiina djɛ Ndjambe nde Yehova. Lako ndjala ilá, Julia awangaka ndjeka Bible mbala ipe lá lobengo. Ekomo ekomo, nde ɔsaka nkano djɛ nkambela Yehova l’edjena kɛnde ndjala ondjombe. Atayala wɔdju djɛ ndɔsa nkano djɛsɔ. Atepela ante: “Anto efula wanshimelaki ambɔ ombotshita opapɛyɛ wɔko, koko lakombolaki nkambela Yehova lowiko lɔmi l’otondo.” Okande lɔɔko kɛnɛ ngete mo lá nkano djɛ ndɔshi amboheta ɛnɔnyi 30? “Ndekɔ la vu lá yimba, la ndáwɛkɛ le Yehova ente angokotshɛ mposɛ yɛ oloko wɔmi l’etsho weyaye.”—Yee. 145:16.

TOKINDJƐ NKAMBELA YEHOVA!

17. Wopo wɔ winá yombotshikala daambi, olendanawɔ l’anto wambɔsɔna djɛ nkambela Ndjambe la wapokambela ngete mo?

¹⁷ Lako ilá ekomo kɛkɔpa ndjɛ. Ɔpɔstɔlɔ Poolo afunaka ante: ‘Ladjikɛnde lako ilá,’ ete koko “onto woyaye ambokoma edjinge apangotshatshimba.” (Heb. 10:37) Nkambo djɛsɔ otolendawɔ ngete mo? Ekete kɛ ntondo nde, winá wombotshikala dj’anto nsɔna djɛ nkambela Yehova wombokoma daambi. (1 Kɔ. 7:29) Ntsha tɔmbɔsá nkano djɛ nkambela Ndjambe, kaanga ewaso ente tongopomana l’ehemba, tewe ente winá wombotshikala ‘womboyala daambi.’

18. Yeso nya Yehova ɔkɔpawɔ iso nangha nge?

¹⁸ Yeso akembɛka ambeki wande djɛ ntateyɛ ndokilika la nkindjɛ ndokilika. (Mat. 16:24) Djɛko ndeke ntsha tombokambela Yehova ɛnɔnyi efula, tɔshi nkano dj’ipa mpekɔ. Iso ladjɛ nangha la wolo djɛ nkindjɛ mbika la nkano djɛso djɛ ndokambela. Nkambo djɛsɔ mpalekɔ wɔdju, koko towa la tosasanga l’esako kaanga má winá wɔsɔ!—Yee. 35:27.

19. Owaso olakanyelo wɔkɔnge má kɛnɛ kekomelisá Gene?

¹⁹ Anto amɔtshi nyɛnaka ambɔ nkambela Yehova ndɔmbaka ndápekala nkete efula. Ntsha oyɛ nde ilɛngɛ, ɛna ente osamba ekete kɛmɔtshi ntsha okambela Yehova? Gene, wɔnanyɔ ɔmɔtshi w’ilɛngɛ atepela ante: “Nyɛnaki ente ndjala Owakɛ wɔ Yehova alekɔ ete ngo momingela nde lá osasa. Lɛnaki dɛngɛngɛ nkina djɛ mafule isawɔ wasasanga la nkete ete ngo afɛtɛ, mponana, ntomba etombo w’ambandji lá video, koko lemi mpetshɛ winá wɛmi ngo lá nsanghanyɛ la l’olemo w’ipoposanyɛ.” Eposelo wɛkɔnge weyalisá l’ikanyi yɛsɔ le Gene? Atepela ante: “Mbangaka nangha akambo lomfufu, la ntombaka l’ilá kɛ etsho ɛmɔtshi. Koko ntayala l’osasa wɔ nsɔsɔlɔ. Ntateyɛka nkanela akambo wa nsɔsɔlɔ wa Bible wa masɔnɛ djɛ mvungɛ ko ndɔsaka nkano djɛ nkambela Yehova l’oloko wɔmi onkfumɔ. Masɔ, nyɛna ente Yehova akadjimola lá ndɔmbɔ yɛmi.”

20. Olɛso ladjɛ ndɔsa nkano djɛkɔnge?

²⁰ Ondjombe ɔmɔtshi atshumbelaka Yehova ante: ‘Osasa le onto wetɛ la wosukanyɛ entshupa nyape djɛ nyintasɛ lá awandja wako.’ (Yee. 65:4) Nyontshɔ tɔshi nkano ete ngo djɔsisá Yoshua: ‘Linko isa nkfumbo kɛmi, tongokambela Yehova.’—Yos. 24:15.