Topalekɔ isɔmɛlɛ

1-2. a) Ladjikɛnge okokaso ntepela ente topakfulumeyɛ ekakasano isɔmɛlɛ? b) Ɛnaso lá djamba djɛnɛ lɔ nge?

WINÁ woyɛso l’ekakasano wɛ nkekete, tokoka ndjoka ete ngo tolekɔ isɔmɛlɛ lá yatato yɛ daambi l’anteyi kɛ ndjale k’ekekete. Koko, topanane l’ekakasano wɛso isɔmɛlɛ ngɛndjɔ. Papa kɛso kɛ ngandji kɛ l’olongo nyɛnaka ekakasano wɛso la ntolakaka djɛ ntokotshɛ́. Yehova nshikikɛka onkambi la onkambi wɔnde wɔ nkɔmano ante: ‘Lemi langokokotshɛ́.’—Iza. 41:10.

² Lá djamba djɛnɛ, tongotepela wopo wɔ Yehova otokotshɛnde 1) má ntɔlɔndjɛ, 2) má ntoseeyɛ ehomba wɛso, 3) má ntolama, 4) má ntokembɛ. Yehova atoshikikɛ ante kaanga ehemba wɛkɔnge w’opomanaso lá lowiko, apatovungɛki. Apatokadjɛki. Djɛko ndeke topayalaki isɔmɛlɛ.

YEHOVA NTƆLƆNDJƐKA

3-4. Yehova ɔtɔlɔndjɛkande ngete mo? (Yeembo 48:14)

³ Wala Yeembo 48:14. Yehova apatɔlɔmbɛ dj’iso ndɔndjama isɔmɛlɛ. Ɔlɔndjɛnde enkambi wɛnde wɛ nkɔmano lɔɔko kɛnɛ ngete mo? Yopo imɔtshi yɔtɔlɔndjɛnde nde má Bible. (Yee. 119:105) Má mbamba k’Otepela wɔnde w’ofunamisá má nyuma k’ekina, Yehova atokotshɛ́ djɛ ndɔsa akano ole nkona wekeka watokomɛ djɛ ndjala l’osasa má winá wɔsɔ la djɛ mba lowiko l’etshinda l’etsho weyaye.a Ndjɔmbɔmba, atolakanyɛ djɛ ntshika enkomba, ndjala sii lá kenkfumo konanghaso la ndjala la ngandji k’efula kɛ m’anse k’oloko te anto ankina. (Yee. 37:8; Heb. 13:18; 1 Pɛ. 1:22) Winá wɛnyɛso wekeka wasɔ, tongoyala ambotshi, antshukami la ntombe yɛ wɔlɔ.

⁴ Lá djiko djɛ lasɔ, Yehova ilaka lá Otepela wɔnde ɛkɔndɔ w’anto wapomanisá la ehemba walawokisá ete ngo iso. (1 Kɔ. 10:13; Dja. 5:17) Winá wowalaso ɛkɔndɔ wɛ mbiko y’anto wasɔ la wokambaso l’elakanyɛlo wowaso, tongowake wapɔ má wepo 2. Wɔ ntondo, tongosipisoyɛke ente topalekɔ isɔmɛlɛ—anto amɔtshi koko wapomanaka l’ekakasano ete ngo wɛso la wakfulumeyɛka la nkɔmano nkfumɔ. (1 Pɛ. 5:9) Wape, tongekake wopo wɔ mpikama lá ntondo k’ehemba.—Ɔrɔ. 15:4.

5. Yehova okambande l’anto wakɔ na djɛ ntɔlɔndjɛ lá mboka kɛ lowiko?

⁵ Yehova ambolonghanyɛ djɛ winaso andjawodji ntɔlɔndjɛ.b Ndjɔmbɔmba, elami wɛ djingadjinga mbembolaka ntshumano mbala la mbala djɛ ntokembɛ. Wamba wawɔ nkembɛka djawo djɛso la ntokotshɛka djɛ ndjala l’osanga l’anteyi kɛso. (Ele. 15:40–16:5) Tokokolo t’otshumano lonkina ndápɛyɛka l’oloko ɔmɔ te ɔnkɔkɔ onkfumɔ. (1 Pɛ. 5:2, 3) Ambotshi ndɔndjɛka wana wawɔ lá nyuma, ndákotshɛka dj’iwɔ ndjala la nkoka dj’ekanedji kɛ wɔlɔ ole la nkfumbo djɛ wɔlɔ. (Woo. 22:6) Akristo w’amato wambotshunda lá nyuma nkotshɛ́ka ankaana y’esaka má ndjala ndjɔmbɔmba yɛ wɔlɔ, má ndapɛyɛ alako wa djonyi, la má ndákembɛ l’osasango.—Tito 2:3-5.

6. Oyɛso ladjɛ nangha nge djɛ mba wapɔ má ɛlɔndjɛlɔ kɛ Yehova?

⁶ Yehova amonanghá opiko wɔnde má ntɔpɛyɛ ɛlɔndjɛlɔ koyɛso la djonyi. Wopo wɔkɔnge wokokaso nyɛnyɛ ente tolekɔ la djedjɛ lá kɛnɛ kɛ ndatonanghela? Woongo 3:5, 6 atepela ante: ‘Lokawɛkɛ le Yehova l’oloko wɔko onkfumɔ, tolawɛkɛke lá yimba yɛko.’ Winá wokambaso l’etepela wɛsɔ, ‘nde angosembola mboka yɛso,’ ntepela ente angotokotshɛ́ djɛ ndota ekakasano kana nsasanga la lowiko. Ɔsɔ ngo oyɛso la djedjɛ má ndjewa ente Yehova ndɔndjɛka onto onkfumɔ l’anteyi kɛso má ndɔpɛyɛ alako wa ngandji!—Yee. 32:8.

YEHOVA NTOSEEYƐKA EHOMBA WƐSO

7. Wopo ɔmɔtshi wɔkɔnge Yehova osiyɛnde ehomba wɛso? (Filipɛ 4:19)

⁷ Wala Filipɛ 4:19. La djiko djɛ ntɔlɔndjɛ lá nyuma, Yehova nsakolaka welo wɛso dj’iso mba oleelo, ntshendja la idjena yɛ nyintasɛ. (Mat. 6:33; 2 Te. 3:12) Kaanga yopalekɔ́ nyɛtshi djɛ nkiyana djɛ ehomba wɛso wɛ demba, Yehova atokembɛ dj’ipa iso ndola kfu l’ekiyano l’akambo wasɔ. (Lenda nɔtɛ kɛ wekelo kɛ Mateo 6:25 lá Bible djɛ Falase.) Lamo? Mande Papa kɛso apakadjɛki enkambi wɛnde wɛ nkɔmano winá woyɛwɔ la ehomba. (Mat. 6:8; Heb. 13:5) Towilele oloko winá wotepelande ante angosiyɛ ehomba wɛso.

8. Yehova ndananghela Davidɛ nge?

⁸ Tokolenda wopo wɔ Yehova ndakotshɛ́ Davidɛ. Lá ɛnɔnyi wɛ Davidɛ ndalotalotaka nkfumi Saolo, Yehova ɔpɛyɛka nde l’enkambi wɛnde kɛnɛ kɛ yayalaka la djonyi djɛ mbika. Winá wɔ ndɔɔtɔnɔlaka wopo wɔ Yehova ndoseeyɛ ehomba wɛnde l’ilá k’ɛnɔnyi, Davidɛ afunaka ante: ‘Lemi ndjalaki ilɛngɛ la winá wɔsɔ lambokoma ekokolo koko lemi ntɛnaka onto wɔ wɔlɔ ambokalema kana wana wande walɔmba nkete djɛ ndɛ.’ (Yee. 37:25) Nkoka ndjala má ɔlɛngɛ wɔko tii winá wɔsɔ, ɔmɛna wopo wɔ Yehova osiyɛnde la ngandji ehomba w’enkambi wɛnde wɛ nkɔmano.

9. Wopo wɔkɔnge Yehova osiyɛnde ehomba w’enkambi wɛnde lɔɔko kɛnɛ winá wɔ mbalaka? (Lenda asango.)

⁹ Yehova nshiyɛka ehomba w’enkambi wɛnde lá wina w’ekakasano. Ndjɔmbɔmba, winá wɔ Akristo w’ɛtɔndɔ kɛ ntondo yayale lá ndjala kɛ nkasa, Akristo wimá ewila efula watomelaka wananyɔ l’ankaana iyalaki la djonyi nkete. (Ele. 11:27-30; Ɔrɔ. 15:25, 26) Enkambi wɛ Ndjambe wɛ lɔɔko kɛnɛ wɛnyɛ yimba yɛ Nkapo yɛ wopo wɔkɔ ɔmɔ. Winá wɔ mbalaka oposawɔ, Yehova ntshindaka la ngandji k’enkfumɔ enkambi wɛnde djɛ mpɛyɛ anto walekɔ́ lá djena djɛ mbalaka nkete djɛ djonyi ete ngo eleelo, washi, ntshendja la ekanga. Wananyɔ wakamba l’opikelo wangɔlɔngɔsɔlake amvulu la Amvulu y’Onkfumi imbotshitana. La enkambi wɛ Yehova wangoyalake entshupa djɛ mpɛyɛ anto wambotshutshɛ nkete lokembo la okotshɔ wɔ nyuma.c

10-11. Olakanyelo wɔkɔnge ngombowa má kɛnɛ kekomelisá Borys?

¹⁰ Lá akambo ankfumɔ, Yehova angosiyɛke ole ehomba w’anto wapɔtɛmɔla. Lá wopo wɔkɔ ɔmɔ, tohone mbamba yɛ nyɛnyɛ anto wapasange laso djawo oloko wɔlɔ. (Nga. 6:10) Nkambo djɛsɔ mpɛyɛka owakɛ wɔ wɔlɔ efula. Tokolenda ndjɔmbɔmba kɛ Borys, prefɛ kɛ nkalasa kɛmɔtshi kewika lá Ukraine. Kaanga Borys ndopalekɔ́ owakɛ wɔ Yehova, ananghelaki ambeki w’Ewakɛ wɛ Yehova winá enkfumɔ akambo l’oloko wɔlɔ la alɛmɛyɛki djawo djɛwɔ. Winá wɔ Borys ndalote mbandji má idjena yɛ nyintasɛka, ko ndatshu ta ntshuku nkina dj’owila ndjalaki vu, wananyɔ waso wokotshɛ́ka. M’ɔkɔngɔ, Borys ingelaka lá bokfɔ djɛ nyɔyi kɛ Yeso. Winá wɔ ndookanela akambo wokomelisá, Borys atepelaka ante: “Ewakɛ wɛ Yehova wandjilaka yimba efula la wanseeyɛka ehomba wɛmi. Nkawoyɛ Ewakɛ wɛ Yehova lokasa.”

¹¹ Ole iso tokoka ndjokola Papa kɛso kɛ l’olongo kɛ djandji má ndjoka anto walekɔ́ la djonyi ngandji, kaanga ntsha wapasange djawo laso. (Luka 6:31, 36) Tolekɔ la nkongi ente welo wonanghaso djɛ nkɔpa anto, wengatshinda djɛ nkoma ambeki wa Kristo. (1 Pɛ. 2:12) Ayale wopo wɔkɔnge anto yongelola lá welo wilaso wɛsɔ, tongolola kfu l’osasa woyɛka má mpɛyɛ.—Ele. 20:35.

YEHOVA NTOLAMAKA

12. Yehova olakande djɛ nama enkambi wɛnde enkfumɔ ngete mo? (Yeembo 91:1, 2, 14)

¹² Wala Yeembo 91:​1, 2, 14. Lɔɔko kɛnɛ, Yehova ntolakaka djɛ ntolama lá nyuma. Apatshikaki Satana nkfumbola ɔtɛmwɛlɔ wɔ nsɔsɔlɔ. (Dj. 17:15) Edjinge winá wɔ ‘ndjolo k’ekekete’ yongowanga, toyale l’eshikikelo k’efula ente Yehova angokotshɛ daka djɛnde djɛ nama enkambi wɛnde ape ngo lá nyuma toko koko ole lá demba.—Ndj. 7:9, 14.

13. Wopo wɔkɔnge Yehova olamande onto l’onto l’anteyi kɛso?

¹³ Wopo wɔkɔnge Yehova ndongolama onto l’onto l’anteyi kɛso? Má mbamba k’Otepela wɔnde, Yehova atokotshɛ́ djɛ ntshikitanyɛ wɔlɔ la nyɛtshi. (Heb. 5:14) Winá wowikaso lá nkilika tɔkfɔ t’Otepela wɔ Ndjambe, tolawomba má mbalaka yɛ nyuma la yɛ demba. (Yee. 91:4) La djiko djɛ lasɔ, Yehova ntolamaka má mbamba kɛ otshumano. (Iza. 32:1, 2) Má ndjingama l’anto wakɔpa Yehova la wakilika tɔkfɔ tɔnde, towa lokembo la wolo wɔ ntshininala lá ntondo kɛ ndjimbo yɛ nyɛtshi.—Woo. 13:20.

14. a) Lamo Yehova ndopatolamaka m’akambo ankfumɔ? b) Yeembo 9:10 otoshikikɛwɔ nge ? (Lenda nɔtɛ.)

¹⁴ Winá ɛmɔtshi, Yehova alamaki enkambi wɛnde w’etsho wɛ ntondo má mbalaka yɛ demba. Koko, átalamaki lá akambo ankfumɔ. Winá ɔmɔtshi tokoka mpomana la ‘nkambo dj’isasimoyɛ.’ (Los. 9:11) Lonkina, Yehova awolaki djɛ enkambi wɛnde ɛmɔtshi nyɔkwama la kaanga ndjakema djɛ ntongola Satana. (Djɔ. 2:4-6; Mat. 23:34) Nkambo djɛsɔ nanghema tii lɔɔko kɛnɛ. Kaanga Yehova ndopakoke nyimɛ ehemba wɛso, tolashikikɛ ente apakadjɛki kawo anto wɔkɔpa.d—Yee. 9:10.

YEHOVA NTOKEMBƐKA

15. Wopo wɔkɔnge wowakaso lokembo má lɔlɔmbɔ, m’Otepela wɔ Ndjambe la me winaso Akristo? (2 Kɔrɛtɔ 1:3, 4)

¹⁵ Wala 2 Kɔrɛtɔ 1:​3, 4. Winá ɔmɔtshi, tokoka ndjoka djodjo l’oloko, ndjala la yɛnyi kana la ndjolo. Mbala imɔtshi, olekɔ la nkambo mɔtshi nkotshimbɛ yimba winá wɔsɔ ko olawoka nghɔmɛlɛ. Onto ɔmɔtshi oka wɔlɔ wɔlɔ wopo wokɛ? Ee, Yehova oka. Nde apokaka ngo ndjolo yɛso toko, koko ‘angotokembɛke lá ndjolo yɛso inkfumo.’ Ngete mo? Winá wɔwɔndaso Yehova lá lɔlɔmbɔ, tongowake ‘vu djɛ Ndjambe deka tokanyi tonkfumo.’ (Flp. 4:6, 7) Tongowake lonkina lokembo winá wowalaso kɛnɛ ketoshimela Yehova lá Bible. Yehova ntoshimelaka wopo wɔtɔkɔpande, wokokaso ndjala la balo, la ntɔpɛyɛka nkongi. Edjinge nsanghanyɛ y’Akristo ntokembɛka má ntɔpɛyɛ tolongo tɔ wɔlɔ la alako wimá Bible.

16. Olakanyelo wɔkɔnge wowaso má kɛnɛ kekomelisá Nathan nya Priscilla?

¹⁶ Djɛ nyɛna wopo wɔ Yehova otokembɛnde má mbamba kɛ Otepela wɔnde, tokolenda kɛnɛ kekomelisá Nathan nya Priscilla, waawika lá États-Unis. Ɛnɔnyi emangha m’ɔkɔngɔ, wɔsaka nkano djɛ nsɛkɔ tá idjena iyalaki la djonyi djɛ ansakodji. Nathan atepela ante: “Tayalaki l’eshikikelo ente Yehova angosakola welo wɛso.” Koko m’ɔkɔngɔ wɔ nkoma l’idjena yɛ bango yɛsɔ, wapomanaka la elando ole l’ekakasano wɛ mfalanga wɛ yasambe ndjewa. Ekomo ekomo, antshukami wasɔ wakalɔka takawɔ, ko wakindjɛki ndjala ngo l’ekakasano wɛ mfalanga. Nathan avungɔ ante: “Tolawopolaka lamo Ndjambe ndasambe ntosakola ete ngo isafɛnyɛka. Ntateyɛka kaanga ndaawopola ntsha lambonangha nkambo mɔtshi djɛ nyɛtshi.” Koko lá winá wɛsɔ, Nathan nya Priscilla wayɛka ndɛna ambɔ Ndjambe ataakadjɛ lá winá woyɛwɔ lá djonyi. Nathan atepela ante: “Lá winá wɔ ndjolo wɔsɔ, Bible djalaki ete ngo ilongo yɛ balo itɔpɛyɛki lokembo la ɛlɔndjɛlɔ. Mpika wiso lá wopo wɔ Yehova ndatokotshɛ́ djɛ nkfulumeyɛ ekakasano wɛsɔ l’edjena kɛ mpika wiso l’okakasano mɛlɛmɛlɛ, atɔlɔngɔsɔlaka djɛ nkfulumeyɛ ekakasano enkina l’etsho weyaye la djawo nkfumɔ.”

17. Wopo wɔkɔnge nkaana Helga ndawa lokembo? (Lenda ntshango.)

¹⁷ Wananyɔ l’ankaana nkoka ntokembɛ lá wopo onkina. Lá ngete mo? Tokolenda ndjɔmbɔmba kɛ Helga, kanga lowika lá Hongrie. L’ilá k’ɛnɔnyi, nde ananaka l’ekakasano wetshikitanyi wokomisá djɛ nsamba nkongi la ndáwoka ete ngo apalekɔ la ntshina. Koko winá wɔtɔnɔlande, angɛnake wopo wɔ Yehova ndokembɛ má mbamba k’otshumano. Afunaka ante: “Yehova ankembɛki winá enkfumɔ wɔ mɛnaka ente wolo wɔmi wombokoma daambi m’ɔtɛ w’olemo, la winá wɔ mawongolaka wɔnami woyalaki l’olando ole l’ekakasano enkina. Lako kaanga lofu lɔmɔ l’ilá k’ɛnɔnyi 30 wɛnɛ, lɔ ndasambe nkotshɛ daka djɛnde djɛ nkembɛ lemi. Nde ankembɛki mbala la mbala má mbamba kɛ kɔmantɛrɛ yɛ wɔlɔ, yɛ ngandji la yɛ ntɔnɔ y’anto ankina. Mbala efula, lalongolaki mesajɛ, kartɛ, la etepela wɛ djedjɛ winá wɔ mayalaka la djonyi.”

18. Wopo wɔkɔnge wokokaso nkembɛ anto ankina?

¹⁸ Tolekɔ la mpeyi kɛ ndjokola Ndjambe kɛso má nkembɛ anto ankina. Okokaso nangha nghɔsɔ ngete mo? Tokoka ndaawekameyɛ la bale ntshitshi, mposɛ etepela wekembɛ la ndakotshɛ́ lá topo tɛnama. (Woo. 3:27) Tonanghe la wolo djɛ nkembɛ anto ankfumɔ walekɔ́ lá ndjolo, ndjila ole waapakambela Ndjambe. Winá wɔ epasɔ wɛso okfulumeyɛwɔ nkambo djaapɛyɛ djodjo l’oloko, yɛnyi kana olando, tawembole, tawekameyɛ la tawalele versɛ djɛ Bible nkoka ndákembɛ. Winá wokolaso Yehova, ‘Ndjambe kɛ lokembo lonkfumɔ,’ tokoka nkotshɛ́ ape ngo winaso andjawodji toko, koko ole ntshutatshutɛ eloko w’anto wapalekɔ́ andjawodji, dj’iwɔ ndjɛ l’ɔtɛmwɛlɔ wɔ nsɔsɔlɔ.—Mat. 5:16.

YEHOVA ALEKƆ ENTSHUPA DJƐ NTOKOTSHƐ́ WINÁ ENKFUMƆ

19. Yehova otonanghelande nge, ko wopo wɔkɔnge wokokaso ndowokola?

¹⁹ Yehova nkiyanaka efula lá nkambo djɛ anto ankfumɔ wɔkɔpa. Apatokadjɛki kawo winá woyɛso lá ekakasano. Ete ngo ombotshi wɔ ngandji owakelakande wɔnande, Yehova mbakelaka enkambi wɛnde wɛ nkɔmano. Atɔlɔndjɛ, atoseeyɛ ehomba wɛso, atolama la atokembɛ. Tokola Papa kɛso kɛ ngandji kɛ l’olongo winá wosukaso la okembɛso anto ankina, winá woyɛwɔ lá ekakasano. Kaanga okokaso mpomana la ekakasano la akambo watshumba oloko, tolashikikɛ ente Yehova alekɔ laso. Lá djiko djɛ akambo ankfumɔ, ambotolaka ante: ‘Tokake wɔma, mande ndekɔ esanga isape.’ (Iza. 41:10) Ɔsɔ ngo etepela wɛsɔ otoshikikɛwɔ! Lá nsɔsɔlɔ topalekɔ isɔmɛlɛ.