Yehova angokokotshɛ́ winá w’opomanɛ l’akambo w’isasimoyɛ

1. Eshikikelo kɛkɔnge k’oyɛso la kɛkɔ?

ETENGO oyɛso enkambi wɛ Yehova, iso ndjewaka ente nde ntɔkɔpaka edjinge nkombolaka dj’iso ndjala la lowiko lɔ wɔlɔ. (Ɔrɔ. 8:35-39) Tolekɔ lonkina l’eshikikelo ente winá enkfumɔ w’okambaso la tɔkfɔ telá Bible tongowaka wapɔ. (Iza. 48:17, 18) Ya otepelaso mo, ntsha tombopomana l’ekakasano wɛ sotakanelaki?

2. Ekakasano wɛkɔnge wekoka mpomana laso, ko ekakasano wɛsɔ okokawɔ ntotshinda djɛ ndawopola weepó wɛkɔnge?

² Enkambi wɛ Yehova enkfumɔ mpomanaka l’ekakasano. Ndjɔmbɔmba, ose nkfumbo ɔmɔtshi nkoka ntokiyanyɛ lá lɛdji lɔmɔtshi. Tokoka ndjala l’olando ɔmɔtshi wɔ wolo w’okoka ntilela onkeka l’olemo wɔ Yehova. Tokoka mpomana l’eposelo wɛ nyɛtshi wemá mbalaka yeyɛ má nkete djetongamisá. Kana wakoka ntɛnyɛ ndjolo m’ɔtɛ wɔ djawo djɛso. Winá w’opomanaso l’ekakasano wɛ nghɔsɔ, tokoka ndawopola ente: ‘Lamo akambo wanɛ onkomelawɔ? Lambonangha nkambo mɔtshi djɛ nyɛtshi? Akambo wanɛ ɛnyɛwɔ nde ente Yehova apantshɔkɔla?’ Omboyawokaka nghɔsɔ lofu lɔmɔtshi? Ntsha oyɛwɔnde nghɔsɔ, mbɔ koko tɔlɛmbake. Enkambi wɛ Yehova efula wɛ nkɔmano wayawokaka nghɔsɔ edjinge iwɔ.—Yee. 22:1, 2; Aba. 1:2, 3.

3. Olakanyelo wɔkɔnge w’okokaso mba má Yeembo 34:19?

³ Wala Yeembo 34:19. Tokote akambo ape wa djonyi má yeembo yɛnɛ: 1) Anto wa wɔlɔ mpomanaka l’ekakasano. 2) Yehova ntotshungolaka má ekakasano wepomana laso. Wopo wɔkɔnge Yehova ototshungolande? Má ntokotshɛ́ dj’iso ndjala l’ikanyi yɛ wɔlɔ lá nkambo djelendana la lowiko lel’andja wa nyɛtshi wanɛ. Winá wɔ Yehova olakande ante tongoyala l’osasa má ndookambela, nde apakɔpɛ ntepela ante topangopomana l’ekakasano lɔɔko kɛnɛ. (Iza. 66:14) Nde ntokembɛka djɛ mpika wiso waso t’etsho weyaye, ntepela ente t’etsho wɛ songoyala la wopo wɔ lowiko l’okombolande dj’iso ndjala la lɔkɔ lotshinda lotshinda. (2 Kɔ. 4:16-18) Lá winá wɔk’ɔmɔ, nde ntokotshɛ́ka dj’iso nkindjɛ ndookambela lofu la lofu.—Del. 3:22-24.

4. Kɛkɔnge k’ɔkɔpaso nshishima lá djamba djɛnɛ?

⁴ Nyontshɔ toshishime elakanyelo w’okokasomba má ndjɔmbɔmba k’enkambi wɛ Yehova wɛ nkɔmano wɛ l’etsho wefunamaki Bible la wɛ l’etsho wɛso wɛnɛ. Etengo sɔngɛna, tokoka mpomana l’ekakasano wɛ sotapomanaki. Koko ntsha iso ndawɛkɛ te Yehova, nde apatokadjɛki kaanga ndambo daambi. (Yee. 55:22) Winá wɔ sotashishima ndjɔmbɔmba yɛsɔ, yawopola ente: ‘Otananghami mo lá nkambo dj’etengo djɛnɛ? Wopo wɔkɔnge ndjɔmbɔmba yɛnɛ okembɛwɔ djawo djɛmi te Yehova? Okokami nkamba l’elakanyelo wɛkɔnge lá lowiko lɔmi?’

L’ETSHO WEFUNAMAKI BIBLE

5. Ekakasano wɛkɔnge wɛ Djakɔbɔ ndapomana m’ɔtɛ wɔ Labana? (Lenda ntshango djelá loposo.)

⁵ Enkambi wɛ Yehova wa l’etsho wefunamaki Bible wapomanaki l’ekakasano wɛ yotakanelaki. Tokoshishima nkambo djekomelisá Djakɔbɔ. Papa kɛnde oshimelaka djɛ nde ntshɔ ntotshuka wadji l’anteyi kɛ wana wa Labana w’amato, ewoto kɛwɔ keyalaki ondjawodji, la oshikikɛka ante Yehova angɔɔtshɔkɔla lombombe. (Ewa. 28:1-4) Djɛkondeke Djakɔbɔ ananghaka nkambo djɛ wɔlɔ. Nde atshikaka owila wɔ Kanana ko atshɔka lokɛndɔ taka Labana, kanga loyalaki la wana ape w’amato Leya nya Rashɛlɛ. Djakɔbɔ akɔpaka wɔna Labana wɔ nkose, edjinge awolaka nkambela isɛkɛnde ɛnɔnyi esambele djɛ ndootshuka. (Ewa. 29:18) Koko akambo watananghema etengo Djakɔbɔ ndakongelaka. Labana odjimbaka má ndotshukɛ Leya wɔnande wɔ ntondo. Labana awolaka djɛ Djakɔbɔ ntshuka Rashɛlɛ m’ɔkɔngɔ wɔ lobengo lɔmɔ, koko ngo ntsha nde ambawola ndookambela ɛnɔnyi esambele enkina. (Ewa. 29:25-27) Labana atayala lonkina la nkɔmano l’olemo wɔ ndakambaka nya Djakɔbɔ. Nde ananghelaka Djakɔbɔ akambo la ntshamba djɛ sii l’ilá k’ɛnɔnyi 20!—Ewa. 31:41, 42.

6. Ekakasano enkina wɛkɔnge wɛ Djakɔbɔ ndapomana?

⁶ Djakɔbɔ apomanaka l’ekakasano enkina lonkina. Nde ayalaka la nkfumbo k’ekekete efula, koko wana wande watokanaki l’anteyi kɛwɔ. Iwɔ wasadjɛka Yosɛfu ankfune wɔwɔ tá lomfumbe. Wana wa Djakɔbɔ ape w’ampame, Simɛyɔ nya Levi, wapɛyɛka nkfumbo kɛwɔ la djiina djɛ Yehova nsɔnyi. Lá djiko djɛ lasɔ, Rashɛlɛ wadjɛ Djakɔbɔ wɔ ngandji, avɔka lá winá wɔ botshi djɛnde djɛ wɔna w’ape. Edjinge lá lotshundo lɔnde, Djakɔbɔ atshindamaka djɛ nsɛkɔ t’Edjipito m’ɔtɛ wɔ ndjala.—Ewa. 34:30; 35:16-19; 37:28; 45:9-11, 28.

7. Wopo wɔkɔnge Yehova ndɛnyɛ Djakɔbɔ ante Nde owawolaki?

⁷ Kaanga l’anteyi k’ekakasano enkfumɔ wɛsɔ, Djakɔbɔ atatshutshɛ djawo djɛnde te Yehova edjinge t’alaka wande kaanga ndambo daambi. L’onkoko wɔnde, Yehova ɛnyɛka Djakɔbɔ ante, nde owawolaki. Ndjɔmbɔmba, kaanga Labana ndoonanghelaka akambo la ntshamba djɛ sii, Yehova atshɔkɔlaka Djakɔbɔ má ndɔɔpɛyɛ okfudji w’efula. Edjinge kokanela efula kɛ djedjɛ djeyalisá la Djakɔbɔ te Yehova winá wɔ ndɔtɛnana nya wɔnande Yosɛfu, kanga lindakanelaka ante amboshiyɛká mvɔ! Djokanelo djɛ wɔlɔ djɛ Djakɔbɔ ndayalaka nya Yehova dj’okotshɛka djɛ nkfulumeyɛ ekakasano lá yopo yɛ wɔlɔ. (Ewa. 30:43; 32:9, 10; 46:28-30) Edjinge iso tokoka ndongela ekakasano wisasimoyɛ w’opomanaso la wɛkɔ, ntsha tolekɔ la djokanelo djɛ wɔlɔ la Yehova.

8. Kɛkɔnge kɛ Nkfumi Davidɛ ndakombola djɛ nangha?

⁸ Nkfumi Davidɛ atákoká nangha kenkfumɔ kɛ ndakombolaka nangha l’olemo wɔ Yehova. Ndjɔmbɔmba, Davidɛ ayalaka la mposɛ k’efula kɛ mpikela Ndjambe tɛmpɛlɔ. Nde ashimelaka ɔprɔfɛtɛ Natana mposɛ keyalaki lande kɛsɔ. Ko Natana okadjimolaka ante: ‘Nangha kenkfumɔ kelekɔ́ l’oloko wɔko, ladjikɛnde Ndjambe kɛ nsɔsɔlɔ alekɔ la wɛ.’ (1 Ɛk. 17:1, 2) Tokoka nkanela wopo w’etepela wɛsɔ yakoke mpɛyɛ Davidɛ lokembo. Mbala imɔtshi nde awangaka nonghanyɛ olemo w’ekekete wɔsɔ ngo lá winá wɔkɔ.

9. Davidɛ ndananghe nge winá wɔ yoshimela losango lɔ yɛnyi?

⁹ Koko, lako mpeta ilá, ɔprɔfɛtɛ wɔ Yehova akalɔka ndooshimela losango lɔ yɛnyi. ‘L’otsho wɔkɔ,’ Yehova ashimelaka Natana ante ape Davidɛ ndeke longompikela tɛmpɛlɔ; koko, wɔnande ɔmɔtshi. (1 Ɛk. 17:3, 4, 11, 12) Davidɛ ndananghe mo winá wɔ yoshimela losango lɔsɔ? Nde atshikitanyɛka okoma wɔnde. Nde ilaka yimba djɛ ntshumanyɛ mfalanga la nkete djɛ wɔnande Salɔmɔ ndongoyala la djonyi djɛ ndonangha olemo wɔsɔ.—1 Ɛk. 29:1-5.

10. Wopo wɔkɔnge Yehova ndatshɔkɔla Davidɛ?

¹⁰ Ngo mbala kɛkɔ kɛmɔ m’ɔkɔngɔ wɔ nde nshimela Davidɛ ante ape nde ndeke longopika tɛmpɛlɔ, Yehova akɔtaka isambi nyande. Yehova alakaka Davidɛ ante tonkanola tɔnde wangɔlɔndjɛka lotshinda lotshinda. (2 Sa. 7:16) Kokanela efula k’osasa wongoyala la Davidɛ l’andja wa bango, winá wɔ ndongewa ante owikande nde l’anse k’Ɛlɔndjɛlɔ k’Ɛnɔnyi Kinunu wɛ Yeso kanga lolekɔ́ inkanola yɛnde! Ɔkɔndɔ wɔsɔ wombotokotshɛ djɛ nyɛna ente ntsha topananghisa kɛnɛ k’okombolaso nangha l’olemo wɔ Yehova, Ndjambe kɛso nkoka ntɔtshɔkɔla lá lɛdji lonkina lɔ sotakanelaki.

11. Wopo wɔkɔnge Akristo wal’ɛtɛndɔ kɛ ntondo yatshɔkwɔma kaanga Onkfumi yotayɛ la winá wɔ yakongelaka? (Ele. 6:7)

¹¹ Kaanga Akristo wal’ɛtɛndɔ kɛ ntondo wapomanaka l’ekakasano wɛ yotakanelaki. Ndjɔmbɔmba, iwɔ wayalaki la mposɛ k’efula kɛ Onkfumi wɔ Ndjambe ndjɛ, koko watewaki winá w’Onkfumi wɔkɔ yongoyɛ. (Ele. 1:6, 7) Ko, kɛkɔnge kɛ yananghe? Iwɔ wayapɛyɛka l’olemo w’ipoposanyɛ. Winá wɔ losango lɔ wɔlɔ yotatshanghanaká, iwɔ wɛnaka ilembetelo y’ɛnyɛ ente Yehova atshɔkɔla welo wɛwɔ.—Wala Elemo 6:7.

12. Kɛkɔnge kɛ Akristo wal’ɛtɛndɔ kɛ ntondo yananghe l’eleko kɛ ndjala?

¹² Lá mbamba kɛmɔtshi, ndjala kɛ nkasa keyalaka ‘l’andja w’otondo.’ (Ele. 11:28) Akristo wal’ɛtɛndɔ kɛ ntondo watahandá má ndjala kɛsɔ. Okoka nkanela efula kɛ ndjolo kiyɛnyi m’ɔtɛ wɔ ndjala kɛsɔ? Ape l’ehamo, ambotshi wayakiyanyɛka lá wopo w’okokawɔ mbayela wana wawɔ nkete djɛ ndɛ. Ya otepelaso mo lá nkambo djɛ elangala l’eseka weyalonghanyisá djɛ mfudjɛ olemo wɔwɔ w’ipoposanyɛ? Mbala imɔtshi wakanelaka ambɔ iwɔ ladjɛ nkonga tii ndjala kɛsɔ kemboshila ko iwɔ ndokotshɛ ekoma wɛwɔ? Kaanga iyapomaná l’ekakasano wɛsɔ, Akristo wasɔ wekesanelaka l’akambo wakomelisá. Iwɔ wakindjɛka mpoposanyɛ lá lɛdji lɔ yakoke edjinge watomelaka winawɔ welá Judeya okotshɔ l’osasa onkfumɔ.—Ele. 11:29, 30.

13. Ɛtshɔkɔ wɛkɔnge Akristo yawa lá deko djɛ ndjala?

¹³ Ɛtshɔkɔ wɛkɔnge Akristo wasɔ yawa l’eleko kɛ ndjala kɛsɔ? Waawisá okotshɔ wɛnaka ambɔ Yehova angaakotshɛke winá enkfumɔ. (Mat. 6:31-33) Iwɔ wayalaka la djokanelo djɛ wɔlɔ la winawɔ Akristo wayisá ndakotshɛ́. Edjinge waapɛyisá epapɛyɛ kana wayapɛyisá l’ɛkɔpa l’olemo wɔ mpɛyɛ okotshɔ wawaka osasa wóyɛka má mpɛyɛ. (Ele. 20:35) Yehova aatshɔkɔlaka yankfumɔ lá welo wɛ yile djɛ ndjekesanela la deko djɛ wolo djɛsɔ.

14. Kɛkɔnge kekomelisá Barnabasɛ nya Poolo, edjinge lɔɔla lɔkɔnge loyalisá la nkambo djɛsɔ? (Ele. 14:21, 22)

¹⁴ Akristo wa ntondo wɛnaki ndjolo la lɔnyɔkɔ mbala efula, mbala imɔtshi lá winá wɛ yotakanelaki. Kolenda kɛnɛ kekomelisá Barnabasɛ nya Poolo winá wɔ yapoposanyɛka lá ngando kɛ Lystera. Má bango, anto wawekameyɛki walongolaka l’osasa onkfumɔ. Koko m’ɔkɔngɔ, antonyi wawɔ amɔtshi ‘wawoyɛka eloyi w’anto,’ edjinge anto amɔtshi l’anteyi k’anto w’alongolisá wasɔ wavutaka Poolo awanga ko w’otshikaka nsuke la nyɔyi. (Ele. 14:19) Koko Barnabasɛ nya Poolo wakindjɛka mpoposanyɛ lá todjena tonkina. Lɔɔla lɔkɔnge l’iyawa? Iwɔ ‘wakomɛka anto djudji ambeki,’ edjinge etepela wɛwɔ la ndjɔmbɔmba yɛwɔ yekembɛka winawɔ Akristo. (Wala Elemo 14:21, 22.) Anto efula wawaka wapɔ ladjikɛnde Barnabasɛ nya Poolo watapekɔ kaanga yapomana la lɔnyɔkɔ l’isasimoyɛ. Ntsha topapekwisa l’olemo wɔ Yehova ndɔtɔlɔmbɛ djɛ nangha, tɔngɔtshɔkwɔma.

L’ETSHO WƐSO

15. Olakanyelo wɔkɔnge wɔ ngombowa má ndjɔmbɔmba kɛ wɔnanyɔ A. H. Macmillan?

¹⁵ Lá ntondo kɛ 1914, enkambi wɛ Yehova wakongelaki djoyi mɔtshi. Tokolenda ndjɔmbɔmba kɛ wɔnanyɔ, A. H. Macmillan. Ngo ngete anto efula wal’etsho wɛsɔ, wɔnanyɔ Macmillan akanelaki ante owa lofuto lɔnde lɔ t’olongo lako ilá. Lá djamba djɛ ndapɛyɛ lá Ngɔndɔ kɛ djuwa 1914, nde atepelaka ante: “Ɔnɛ akoka ndjala djamba djɛmi dj’ekomo djɛ mɔmɔpɛyɛ.” Koko lá nsɔsɔlɔ, ɔsɔ atayala djamba djɛnde dj’ekomo. M’ɔkɔngɔ wɔnanyɔ Macmillan afunaka ante: “Mbala imɔtshi anto amɔtshi l’anteyi kɛso wayalaki l’eshikikelo ambɔ totshɔ t’olongo lako ilá.” Nde akotshɛka ante: “Nkambo dj’oyɛso ladjɛ nangha nde ndapɛyɛ l’olemo wɔ Nkfumi.” Wɔnanyɔ Macmillan ayapɛyɛka l’olemo. Nde ayalaka l’entete l’olemo w’ipoposanyɛ. Nde ayalaka la mpeyi kɛ nkembɛ wananyɔ efula wingelisá lá nkando má ntona ndɔsa opiko lá wayi wa pɔlitikɛ. Edjinge nde ingelaki lá nsanghanyɛ y’otshumano la nkɔmano nkfumɔ kaanga lá lotshundo lɔnde. Wapɔ wɛkɔnge wɔnanyɔ Macmillan ndawa má nkamba la winá wɛnde lá wopo wɔ wɔlɔ winá wɔ ndakongaka lofuto lɔnde? Ndambo lá ntondo kɛnde mvɔ lá 1966, nde afunaka ante: “Lɔɔko kɛnɛ, djawo djɛmi mboleka nkemba ndeka l’etsho wɛ ntondo.” Ɔsɔngo eyalelo kɛ wɔlɔ kɛ isankfumɔ oyɛso ladjɛ ndjokola, pekapeka ntsha tokfulumeyɛ ehemba wɛ sotakanelaki!—Heb. 13:7.

16. Okakasano wɔkɔnge wɔnanyɔ Herbert Jennings nya wadjɛnde yapomana? (Djakɔbɔ 4:14)

¹⁶ Enkambi wɛ Yehova efula wapomana l’ekakasano wɛ demba wɛ yotakanelaki. Ndjɔmbɔmba, l’ɔkɔndɔ wɔnde wɔ lowiko, wɔnanyɔ Herbert Jenningsb atepelaka wopo wɔ nde nya wadjɛnde yakɔpaka olemo wɔwɔ wɔ misiɔnɛrɛ wɔ yakambaka lá Ghana. Koko, m’ɔkɔngɔ w’ɛnɔnyi, wayɛka ndoovunda l’olando wɔ wolo lá wɔɔngɔ. Koko wɔnanyɔ Jennings akambaka l’etepela welá Djakɔbɔ 4:14, ko etaka nkambo dj’okomelisá djɛsɔ ante, ‘topewe kɛnɛ kengotokomela lomi.’ (Wala.) Nde afunaka ante: “Toyalaka ladjɛ ndjala l’ikanyi yɛ wɔlɔ, djɛkondeke isalonghanyɛ djɛ nyima má Ghana la ntshika efula kɛ tolongo tɔso ko nkalɔ tá Canada [djɛ ntohona bɔki].” Yehova akotshɛka wɔnanyɔ Jennings nya wandjɛnde djɛ nkindjɛ ndookambela la nkɔmano nkfumɔ kaanga l’anteyi k’okakasano wɔwɔ wɔsɔ.

17. Wapɔ wɔkɔnge w’owisá Akristo ankina má ndjɔmbamba kɛ wɔnanyɔ Jennings?

¹⁷ Etepela wɛ l’oloko ɔmɔ wɛ wɔnanyɔ Jennings ndatepela lá ɔkɔndɔ wɔnde wɔ lowiko wekotshɛ́ka anto ankina efula. Nkaana kɛmɔtshi afunaka ante: “Ntshindamaka efula winá wɔ mawale djamba djɛsɔ. . . . Nyɛna wopo wɔ wɔnanyɔ Jennings ndatshike olemo wɔnde djɛ ntohona bɔki ankotshɛka djɛ nyɛna ekakasano wenkomela lá lɛdji lɔ wɔlɔ.” Wɔnanyɔ onkina, afunaka m’ɔkɔngɔ ante: “M’ɔkɔngɔ wɔ nkamba etenge ikokolo l’ilá k’ɛnɔnyi djomi, ntshutshɛka mpeyi kɛmi m’ɔtɛ wɔ olando welá wɔɔngɔ. Olando wɔ mokaka lá wɔɔngɔ wantshimbɛki yimba kaanga djɛ mbala wamba w’ɛkɔndɔ wɛ lowiko. . . . Koko, entete kɛ wɔnanyɔ Jennings kenkembɛka.” Nkambo djɛsɔ ntovungolaka ente winá wokfulumeyɛso okakasano ɔmɔtshi wɔ sotakanelaki iso nkoka nkembɛ anto ankina. Kaanga winá wɔ akambo wapahete lá wopo wɔ sakanelaka, iso nkoka mpɛyɛ ndjɔmbamba kɛ wɔlɔ kelendana la djawo edjinge l’okfumedji.—1 Pɛ. 5:9.

18. Etengo yɔmbɛnyɛ lá ntshango, olakanyelo wɔkɔngɔ wɔ nghombowa má ndjɔmbɔmba kɛ wadj’odjo w’ose Nigeria?

¹⁸ Ambalaka, ndjɔmbɔmba opela wɔ COVID-19 woyalaka l’eposelo wɛ nyɛtshi efula te enkambi wɛ Yehova. Ndjɔmbɔmba, wadj’odjo ɔmɔtshi welá Nigeria atayala la nkete djɛ ndɛ efula edjinge lá mfalanga. Nkɛsɛ mɔtshi, wɔnande w’omoto owopolaka kɛnɛ kɛ yɔngɔlɛ ntsha wamboshiyɛ nkɔpɔ mmɔ dj’omponga tshikalisa lawɔ. Nkaana kɛso akawoyɛka wɔnande w’omoto ante wapalekɔ lonkina la mfalanga kaanga l’ekete kɛ ndɛ lá mvulu koko wangokola wadj’odjo w’ose Zarafata, ntepela ente wangokatshɛ nkete djɛwɔ djɛ ndɛ dj’ekomo edjinge ndatshika ngo l’ɛwɔ wɛ Yehova. (1 Nk. 17:8-16) Lá ntondo kɛ kaanga iwɔ ntateyɛ nkanela nkete djɛ yɔngɔlɛ lá nkɛsɛ djɛ lofu lɔsɔ, iwɔ wawaka mpato kɛ nkete djɛ ndɛ me winawɔ Akristo. Mpato kɛsɔ keyalaka la nkete djɛ ndɛ djɛ ya koke ndɛ ndekana mbengo ipe. Nkaana kɛsɔ atepela ante apaleke nsipisoyɛ wopo wɔ Yehova ndile yimba lá kɛnɛ kɛ ndashimelaka wɔnande. Lá nsɔsɔlɔ, winá woyawɛkɛso te Yehova, ekakasano wɛ sotakanelaki wepomanaso lá wɛkɔ lá lowiko ndolekaka ntosukanyɛ lande.—1 Pɛ. 5:6, 7.

19. Okakasano wɔkɔnge w’opomanisá lá Aleksey Yershov?

¹⁹ Lá ɛnɔnyi emangha wemboheta wɛnɛ, efula kɛ wananyɔ l’ankaana yɛso wakfulumeyɛka lɔnyɔkɔ lɔ yotakanelaki. Tokolenda kɛnɛ kekomelisá wɔnanyɔ Aleksey Yershov, kanga l’intasɛ lá Russie. Enkambi wɛ Yehova welekɔ́ lá owila wɔsɔ wayalaki la ndambo kɛ lotshungɔ winá wɔ wɔnanyɔ Yershov ndalongola batisimo lá 1994. Koko lá ɛnɔnyi wemboheta wɛnɛ, akambo welá Russie watshikitanaka. Lá 2020, ampulushi wingelaka edjinge wahɛndjaka mvulu kɛ wɔnanyɔ Yershov, ko wopapolaka nkete djɛnde efula. M’ɔkɔngɔ wɔ ngɔndɔ efula, ewandji wɛ lɛɛta wofunelaka dombo djɛ l’enkfunkfulu. Djɛ ndeka ntɔla nkambo tá nyɛtshi, wowandaka lowo má akambo walekɔ́ lá video djenanghisá onto ɔmɔtshi. Onto wɔsɔ ɛnyɛki etengo akɔpa akambo wa nsɔsɔlɔ edjinge ekaka Bible ndekana ɔnɔnyi ɔmɔ, ntshende ndadjimbaka nde ndjimba. Ɔsɔngo nyɛtshi!

20. Wopo wɔkɔnge Yershov ndakembɛ djokanelo djɛnde nya Yehova?

²⁰ Lɔnyɔkɔ lopomanisá lá wɔnanyɔ Yershov loposɛka nkambo mɔtshi djɛ wɔlɔ? Ee. Djokanelo djɛnde la Yehova djelekaka nkemba. Nde ntepelaka ante “Lemi isa wadjɛmi talɔmbaki esanga mbala efula. Nsipisoyɛka ente ntakoka ndjala l’akoka wa nkfulumeyɛ ohemba wɔsɔ ipa l’okotshɔ wɔ Yehova.” Nde akotshɛka ante: “Wekelo w’onto nyɔmɛlɛ wonkotshɛ́ka djɛ lemi ndongela ɔlɛmbɛlɔ. Langɔtɔnɔlake lá ndjɔmbɔmba kɛ enkambi wɛ Yehova wɛ nkɔmano welá etsho wɛ ntondo. Ɛkɔndɔ efula welekɔ́ lá Bible wɛnyɛ wopo woyɛwɔ djonyi ntshikala vu edjinge ndawɛkɛ te Yehova.”

21. Kɛkɔnge kɛ sombeka lá djamba djɛnɛ?

²¹ Kɛkɔnge kɛ sombeka lá djamba djɛnɛ? Lá mbamba imɔtshi tongopomana l’ekakasano wɛ sotakanelaki l’andja wanɛ. Kaanga oyɛwɔ nghɔsɔ, Yehova angokotshɛke enkambi wɛnde winá enkfumɔ woyawɛkɛwɔ te nde. Etengo vɛrse djɔsamisa ɔtɛ wɔso wɔ djamba otepelande, ‘ndjolo yɛ onto wɔ wɔlɔ ndjalaka efula, koko Yehova ndotshungolaka má ndjolo yɛkɔ inkfumɔ.’ (Yee. 34:19) Nyotshɔ tokindjɛ ndjila yimba, ape l’ekakasano wepomanaso la wɛkɔ, koko lá okotshɔ wɔ nkfulu wɔ Yehova. Má nangha nghɔsɔ tokoka ntepela etengo ɔpɔstɔlɔ Poolo, lotepelisa ante: ‘L’akambo ankfumɔ ndekɔ la wolo me kanga lɔmpɛyɛka nkfulu.’—Flp. 4:13.