Toleke ndɔngɔsɔla yopo yɛso yɛ ndɔmba

1. Kɛkɔnge kɛ Yehova ɔlɔmbande enkambi wɛnde djɛ nangha? (Lenda edjinge ntshango.)

TE NA okokaso mpona osukɔ la ɛlɔndjɛlɔ lá winá w’oyalaso la djonyi? Iso ndjewaka nsakiso kɛ woopó wɔsɔ. Iso nkoka mpona okotshɔ me Yehova Ndjambe má lɔlɔmbɔ. Yehova ntɔlɔmbaka dj’iso nangha nkambo djɛsɔ. Nde nkɔpaka iso ndɔmbaka mbala la mbala, ntepela ente ‘nkindjɛ ndɔmba.’ (1 Te. 5:17) Iso nkoka nsawola lande ipa l’okakasano má lɔlɔmbɔ edjinge ndɔɔlɔmba ɛlɔndjɛlɔ kɛnde l’akambo ankfumɔ welá lowiko lɔso. (Woo. 3:5, 6) Etengo oyɛnde Ndjambe kɛ lokapo efula, Yehova atatilelá elelo lá mbala y’okokaso ndɔɔlɔmba.

2. Kɛkɔnge kɛ sɔnghɛna lá djamba djɛnɛ?

² Iso ndɔsaka opapɛyɛ wɔ lɔlɔmbɔ la ntshina efula. Koko, m’efula k’akambo w’oyɛso la wakɔ, tokoka ndjala l’okakasano wɔ mba winá wɔ ndɔmba. Tokoka lonkina ndjala la djonyi djɛ ndeka ndɔngɔsɔla yopo yɛso yɛ ndɔmba. Mpeyi nde, iso nkoka mba ekembelo edjinge ɛlɔndjɛlɔ m’Afunelo. Lá djamba djɛnɛ, tɔngɛna wopo w’okokaso ndawombelaka winá wɔ ndɔmba má nshishima ndjɔmbɔmba kɛ Yeso. Tɔnghɛna lonkina wopo w’okokaso ndɔngɔsɔla akoka waso wa ndɔmba má ndjilaka akambo atano wa djonyi l’alɔmbɛlɔ waso.

YESO ƆSAKI WINÁ DJƐ NDƆMBA

3. Kɛkɔnge kɛ Yeso ndasipisoyɛ lá kɛnɛ kelendana l’alɔmbɛlɔ?

³ Yeso asipisoyɛka ante Yehova ndɔsaka alɔmbɛlɔ waso la ntshina efula. Ilá efula lá ntondo kɛ nde ndjɛ lanɛ lá looko, nde ɛnaka Papa kɛnde akadjimola alɔmbɛlɔ w’ampame la amato efula wa nkɔmano. Ndjɔmbɔmba, Yeso ayalaka l’ompandju wɔ Papa kɛnde winá wɔ ndakadjimolaka alɔmbɛlɔ wa l’oloko ɔmɔ wa Ana, Davidɛ, Elidja, edjinge enkambi enkina efula. (1 Sa. 1:10, 11, 20; 1 Nk. 19:4-6; Yee. 32:5) Djɛkondeke Yeso ndalakanyɛ ambeki wande dj’iwɔ ndɔmbaka mbala la mbala edjinge la djawo nkfumɔ!—Mat. 7:7-11.

4. Olakanyelo wɔkɔnge w’owaso me Yeso lá kɛnɛ kelendana l’alɔmbɛlɔ?

⁴ Yeso atshikelaka ambeki wande ndjɔmbɔmba k’iwɔ nkilika má alɔmbɛlɔ wande nyɔmɛlɛ ndalɔmbaka Yehova. L’ilá k’olemo wɔnde, Yeso alɔmbaki mbala la mbala. Nde ayawombelaki winá wɔ ndɔmba ladjikɛnde mbala efula nde ayalaki l’olemo edjinge anto efula wodjingaki. (Mar. 6:31, 45, 46) Nde awetshɔki lá nkɛsɛ dj’efula djɛ nde mba winá wɔ ndɔmba. (Mar. 1:35) Ndekana mbala kɛmɔ, nde alɔmbaka otsho w’otondo lá ntondo kɛ ndɔsa nkano djɛ djonyi. (Luka 6:12, 13) Edjinge Yeso alɔmbaka mbala efula l’otsho lá ntondo kɛ nyɔyi kɛnde djɛ nkotshɛ odjito wolekisá wolo l’anteyi k’edjito weyalisá lande lanɛ lá looko.—Mat. 26:39, 42, 44.

5. Wopo wɔkɔnge w’okokaso ndjokola Yeso winá w’ɔlɔmbaso?

⁵ Ndjɔmbɔmba kɛ Yeso ntolakanyɛka ente, ayale elemo wɛkɔnge w’oyalaso la wɛkɔ, iso ladjɛ ndɔsaka winá djɛ ndɔmbaka. Ngo ngete Yeso, iso nkoka mba winá wɔ ndɔmbaka má mbetshɔka l’inkɛnkɛsɛ kana la nkɔlɔ dj’efula. Winá w’onanghaso nghɔsɔ, iso nyɛnyɛka Yehova ente iso ndɔsaka opapɛyɛ wɔ ndɔtɔpɛyɛ la ntshina. Nkaana kɛmɔtshi k’etawɔ Lynne mvungɔka wopo wɔ ndayale la djedjɛ mbala kɛ ntondo kɛ ndewe mpɛyi kelekɔ́ laso kɛ ndɔmbaka. Nde mvungɔka ante: “Ndjewá ente lemi nkoka ndɔmba Yehova winá enkfumɔ, ankotshɛ́ka djɛ lemi ndɔɔwɔsa etengo Ilongo yɛmi yɛ ma ma edjinge djɛ ndɔngɔsɔla alɔmbɛlɔ wami.” Ape l’ehamo efula l’anteyi kɛso ndawokaka ngo nghɔsɔ. Djɛkondeke nyontshɔ toshishime akambo atano w’okokaso ndjila l’alɔmbɛlɔ waso.

AKAMBO ATANO WA DJONYI W’OKOKASO NDƆMBA

6. Lá nkilika Ndjiso 4:10, 11, kɛkɔnge kɛ Yehova okokande ndongola?

⁶ Lumɛka Yehova. Lá wɛnɛlɔ wɛ nkamɔ wa ndɛnyi, ɔpɔstɔlɔ Djɔanɛ ɛnaka tokokolo 24 tel’olongo watɛmɔla Yehova. Iwɔ walumɛki Ndjambe má ntepela ambɔ, wɛ ndeke lokoka ndongola ‘lomo, wumo edjinge nkfulu.’ (Wala Ndjiso 4:10, 11.) Andjelo wa nkɔmano walekɔ lonkina la donga efula djɛ mbandjɛ edjinge numɛ Yehova. Iwɔ walekɔ esanga lande l’olongo edjinge ndoowewaka wɔlɔ. Iwɔ nyɛnaka wekeka wande m’akambo w’onanghande. Winá w’ɛnawɔ wopo wɔ Yehova onanghande akambo, iwɔ ntshindamaka djɛ ndoolumɛ.—Djɔ. 38:4-7.

7. Lá akambo wakɔnge w’okokaso numɛ Yehova?

⁷ Iso ladjɛ numɛka Yehova lá ndɔmbɔ yɛso, má ndooshimela kɛnɛ k’ɔkɔpaso lende edjinge lamo oyɛso la djedjɛ te nde. Winá w’owalɛ la w’ekɛ Bible, nangha la wolo djɛ nyɛna wekeka wa Yehova w’olekɛ nkɔpa. (Djɔ. 37:23; Ɔrɔ. 11:33) Masɔ shimela Yehova wopo w’oyawokɛ má wekeka wande wasɔ. Iso nkoka numɛ Yehova lonkina má okotshɔ w’ɔtɔpɛyɛnde iso la winaso Akristo ankina. Nde ndakiyanyɛka lá nkambo djɛso la ntolamaka.—1 Sa. 1:27; 2:1, 2.

8. Donga mɔtshi djɛkɔnge djelekɔ l’anteyi k’efula kɛ donga dj’okotshɛso djɛ nkawoyɛ Yehova lokasa? (1 Tesalɔnikɛ 5:18)

⁸ Kawoyɛka Yehova lokasa. Tolekɔ la donga djɛ wɔlɔ efula djɛ nkawoyɛ Yehova lokasa lá ndɔmbɔ yɛso. (Wala 1 Tesalɔnikɛ 5:18.) Iso nkoka nkawoyɛ Yehova lokasa má nkete djɛ wɔlɔ dj’okotshɛso, ladjikɛnde epapɛyɛ enkfumɔ wɛ wɔlɔ oyɛkawɔnde me nde. (Dja. 1:17) Ndjɔmbɔmba, iso nkoka ndookawoyɛ lokasa m’ɔtɛ wɔ looko lɔso lɔ wɔlɔ efula edjinge nkete nkina djɛ wɔlɔ efula djɛ ndatotongela. Iso nkoka ndɔɔwɛnyɛ djedjɛ djɛso lonkina má wopo wɔ ndɔtɔpɛyɛ lowiko, nkfumbo kɛso, tolongo tɔso, la nkongi djɛso. Edjinge iso nkɔpaka nkawoyɛ Yehova lokasa má wopo wɔ ndotawola djɛ ndjala tolongo tɔnde.

9. Lamo oyɛso ladjɛ ndjala la djedjɛ te Yehova?

⁹ Tokoka ndjala la djonyi djɛ ndjila welo w’efula djɛ ntɔnɔla lá donga dj’oyɛso la djɛkɔ djɛ nkawoyɛ Yehova lokasa. Lɔɔko kɛnɛ anto efula wapalekɔ la djedjɛ. Iwɔ ndjilaka yimba ngo lá wopo w’okokawɔ mba nkete dj’ɔkɔpawɔ koko ape lá wopo w’okokawɔ nyɛnyɛ djedjɛ djɛwɔ lá kɛnɛ k’okotshɛwɔ. Ntsha tombowanga ndjala l’enanghedji kɛ ngɔsɔ, ndɔmbɔ yɛso nkoka ndoyala ngo yɛ ndɔmba nkete dj’oyɛso la djonyi. Dj’ipa nkambo djɛsɔ ndotokomela, iso ladjɛ nkindjɛ ndjala edjinge nyɛnyɛ djedjɛ djɛso lá kenkfumɔ kɛ Yehova otonanghelande.—Luka 6:45.

10. Wopo wɔkɔnge djedjɛ yakotshɛ́ nkaana kɛmɔtshi djɛnde nkfulumeyɛ? (Lenda edjinge ntshango.)

¹⁰ Ndjala la djedjɛ nkoka ntokotshɛ́ djɛ nkfulumeyɛ ekakasano. Kolenda ndjɔmbɔmba kɛ Kyung-sook, k’otanaso lá Etange k’Olami kɛ Ngɔndɔ kɛ ntondo 15, 2015. Wovundaka l’olando wɔ kansɛrɛ kɛ wolo efula. Nde ndjawolaka ante: “Olando wɔsɔ wɔndɛmbɛka efula. Ndawokaka etengo lambotshutshɛ kenkfumɔ k’okotshɛmi edjinge ndjalaka la wɔma efula.” Kɛkɔnge k’okotshisá djɛ nde nkfulumeyɛ? Nde ntepelaka ante etsho enkfumɔ lá ntondo kɛnde ndjetama, nde atshɔki tá ntɛpɛ kɛ mvulu kɛnde k’etajɛ ko l’eteyi nde alɔmbaki la djoyi djɛ wolo lá kɛnɛ kelendana l’akambo atano w’oyɛnde la djedjɛ lá lofu lɔsɔ. Nkambo djɛsɔ djekakitshɛka ekiyano wɛnde la djotshindaka djɛ nyɛnyɛ ngandji kɛnde te Yehova. Nde ɛnaka wopo wɔ Yehova okotshɛ́nde enkambi wɛnde wɛ nkɔmano winá w’opomanawɔ l’ekakasano wɛ wolo w’etengo wɛnde edjinge nde ayɛka ndosipisoyɛ ante ɛtshɔkɔ w’owaso lá lowiko ndeka ekakasano w’opomanaso la wɛkɔ. Ngo ngete nkaana Kyung-sook, tolekɔ la donga efula djɛ nyɛnyɛ djedjɛ djɛso te Yehova, kaanga winá w’oyɛso l’anteyi k’okakasano ɔmɔtshi. Ndɔɔwɛnyɛ djedjɛ djɛso lá ndɔmbɔ yɛso nkoka ntokotshɛ djɛ nkfulumeyɛ la nama osasa wɔso.

11. Ladjikɛnge ambeki wa Yeso yayale la djonyi dj’oloko wolo m’ɔkɔngɔ w’otshwelo wɔ Yeso t’olongo?

¹¹ Lɔmba Yehova akɔpɛyɛ oloko wolo wɔ mpoposanyɛ. Ndambo lá ntondo kɛnde nkalɔ t’olongo, Yeso avungolaka ambeki wande odjito wɔwɔ wɔ mpoposanyɛ lá nkambo djɛnde ‘lá Jerusalɛmɛ, lá Judeya dj’otondo, lá Samaria, edjinge lá djena djeleka otale lá looko.’ (Ele. 1:8; Luka 24:46-48) Ndambo m’ɔkɔngɔ wɔ lasɔ, ewandji wɛ ntolo w’ase Juda wavundaka ɔpɔstɔlɔ Pɛtɛlɔ nya Djɔanɛ, waayakalaka lá Tominanyi tel’adjiko ko washimelaka ampame yɛ nkɔmano yɛsɔ dj’iwɔ ntshika mpoposanyɛ, waawanaka edjinge ndaawaná. (Ele. 4:18, 21) Iya Pɛtɛlɔ nya Djɔanɛ yanaghe mo?

12. Lá nkilika Elemo 4:29, 31, kɛkɔnge kɛ ambeki yananghe?

¹² Djɛ mpɛyɛ nsakiso lá wanedji wɛ ewandji wɛ ntolo w’ase Juda, Pɛtɛlɔ nya Djɔanɛ watepelaka ambɔ: ‘Ntsha alekɔ wɔlɔ lá wiso wa Ndjambe dj’iso nyekameyɛ nyo l’edjena kɛ ndjekameyɛ Ndjambe, nyo nyɔmɛlɛ nyosambole. Koko leso, topangotshika ntepela akambo wa sɛnyi la wa soke.’ (Ele. 4:19, 20) Winá wɔ Pɛtɛlɔ nya Djɔanɛ yatshungɔ, ambeki walɔmbaka Yehova djɛ ndaakotshɛ́ djɛ nangha ɛkɔpa kɛnde. Iwɔ walɔmbaka ambɔ: ‘Kotshɛ́ enkambi wɛko dj’iwɔ nkindjɛ mpoposanyɛ otepela wɔko l’oloko wolo onkfumɔ.’ Yehova akadjimolaka lɔlɔmbɔ lɔwɔ lim’anse k’oloko lɔsɔ.—Wala Elemo 4:29, 31.

13. Olakanyelo wɔkɔnge w’okokaso mba má ndjɔmbɔmba kɛ wɔnanyɔ Jin-hyuk?

¹³ Iso nkoka ndjokola ambeki wa Yeso má nkindjɛ mpoposanyɛ kaanga winá wɔ ewandji wɛ mbandja otoshimbawɔ djɛ mpoposanyɛ. Tokolenda ndjɔmbɔmba kɛ wɔnanyɔ Jin-hyuk, kanga liyakowe lá lokando m’ɔtɛ wɔ ndotakɔpa ndjingela lá wayi wa pɔlitikɛ. Winá wɔ ndayalaka lá lokando, wɔpɛyɛka odjito wɔ mpɛyɛka ase lokando amɔtshi nkete djɛ ndɛ la nkete nkina dj’iyayalaka la djonyi, koko wopekalaka djɛ ndaashimela akambo ankina wapokana l’odjito wɔ yɔpɛyɛ, ndjila kaanga akambo walendana la Bible. Nde alɔmbaka djɛ ndjala l’oloko wolo edjinge djɛ mpoposanyɛ winá enkfumɔ wɛ ndawaka mbamba. (Ele. 5:29) Nde ntepelaka ante: “Yehova akadjimolaka ndɔmbɔ yɛmi má mpɛyɛ oloko wolo edjinge balo djɛ mbanga ndjeka l’anto efula Bible lá minitɛ itano ngo lá wiso wɔ mvulu yɛ yayalaka. Masɔ, otsho ɔmɔtshi, mfunaka enkanda djɛ mpɛyɛ ase lokando lofu lɔwɔlamisá.” Edjinge iso tokoka ndjala l’eshikikelo ente Yehova angotokotshɛ́ dj’iso nkotshɛ olemo wɔso w’ipoposanyɛ. Ngo ngete Jin-hyuk, tɔlɔmbake djɛ ndjala l’oloko wolo edjinge balo.

14. Kɛkɔnge kekoka ntokotshɛ́ winá w’opomanaso l’ekakasano? (Yeembo 37:3, 5)

¹⁴ Lɔmba Yehova akokotshɛ́ djɛ nkfulumeyɛ ekakasano. Efula l’anteyi kɛso tɛna ndjolo l’elando kana ekakasano enkina, ndjɔmbɔmba nyɔyi kɛ onto wɔso wɔ ngandji, ekakasano welá nkfumbo edjinge lɔnyɔkɔ. Ekakasano wɛ nghɔsɔ ndjila edjinge epela l’ambandji ndjalaka wolo efula djɛ nkfulumeyɛ. Djipolela Yehova oloko wɔko. Shimelande okakasano wɔko ngo ngete oshimelɛnde ilongo yɛko yɛ ma ma. Yala l’eshikikelo ente Yehova ‘anghonangha akambo lá wapɔ wɔko.’—Wala Yeembo 37:3, 5.

15. Wopo wɔkɔnge lɔlɔmbɔ okokande ntokotshɛ́ dj’iso ‘nkfulumeyɛ ndjolo’? Pɛyɛ ndjɔmbɔmba.

¹⁵ Nkindjɛ ndɔmba angotokotshɛ dj’iso ‘nkfulumeyɛ ndjolo.’ (Ɔrɔ. 12:12) Yehova ndjewaka ekakasano wepomana l’enkambi wɛnde, ‘nde ndjokaka alelo wawɔ w’ohonawɔ okotshɔ.’ (Yee. 145:18, 19) Nkaana Kristie kanga lolekɔ yat’ekalo l’ilá k’ɛnɔnyi 29 ɛnaka nsɔsɔlɔ kɛ nkambo djɛsɔ. Nde awangaka ndjala l’ekakasano wɛ wolo wɛ demba l’isasimoyɛ. Eposelo weyalisá la nkambo djɛsɔ nde, atshimbaka yimba efula. Ataheta ilá, wavundaka nyɔ kɛnde l’olando wɔ wolo wokokisá ndɔɔtɔla tá nyɔyi. Kristie ntepelaka ante: “Ndɔmbaka Yehova l’entete k’enkfumɔ djɛ nde mpɛyɛ lemi wolo w’oyɛmi la djonyi lofu la lofu. Ndalonghanyɛka djɛ ndjala la nonghanyi kɛ wɔlɔ kelá nyuma kɛ ndjingelaka nsanghanyɛ la nanghaka wekelo w’onto nyɔmɛlɛ.” Nde akotshɛ ante: “Lɔlɔmbɔ lonkotshɛka djɛ nkfulumeyɛ lá deko dj’ekakasano wɛ wolo. L’ewaki ente Yehova alekɔ entshupa la lemi, ko lawaki lokembo má ndjewa nghɔsɔ. Kaanga olando wɔmi yotashile tii win’ɔsɔ, Yehova akadjimolaka ndɔmbɔ yɛmi má mpɛyɛ vu djel’oloko.” Totavungɛke kaanga ndambo daambi ente, ‘Yehova ndjewaka mbikɛ anto womalema m’ehemba.’—2 Pɛ. 2:9.

16. Lamo oyɛso la djonyi djɛ okotshɔ wɔ Yehova djɛ mpikama lá ntondo k’ehemba?

¹⁶ Lɔmba Yehova akokotshɛ́ djɛ mpikama lá ntondo k’ehemba. Etengo oyɛso anto wa ntshamba djɛ djɔ, tonghonanaka winá enkfumɔ la wolo dj’ipa nangha kɛnɛ kelekɔ́ nyɛtshi. Satana anangha kenkfumɔ k’okokande nangha djɛ nkomɛ mbandji kɛsɔ wolo. Yopo imɔtshi y’ɔsɛsande ntshita yimba yɛso nde má etombo wɛ nyɛtshi. Etombo wɛ nghɔsɔ nkoka ndodjɛ timba tɔso la tokanyi tɔ mbindo, tokoka ndjila lonto losɔ lɔ l’eteyi mbindo djɛ nangha mpekanto yɛ nkekete.—Mar. 7:21-23; Dja. 1:14, 15.

17. Wopo wɔkɔnge w’okokaso nangha akambo lá yopo y’okana la ndɔmbɔ yɛso yɛ ndota ehemba? (Lenda edjinge ntshango.)

¹⁷ Tolekɔ la djonyi djɛ okotshɔ wɔ Yehova ntsha iso nkombolaka ndongela ohemba wɔ nangha kɛnɛ kelekɔ nyɛtshi. Yeso ilaka nkambo djɛwɔlama djɛnɛ lá lɔlɔmbɔ lɔ ndjɔmbɔmba: ‘Tawolake dj’iso nkfɔ l’ehemba, koko ototshungole me onto wɔpɔlɔ.’ (Mat. 6:13) Yehova nkɔpaka ntokotshɛ́, koko iso ladjɛ ndɔɔlɔmba djɛ nde ntokotshɛ́. Lonkina, iso ladjɛ nangha akambo lá lɛdji l’okana la ndɔmbɔ yɛso. Iso nkoka nangha nkambo djɛsɔ má nangha la wolo dj’ipa mbala kana ndjekameyɛ tokanyi tɔ nyɛtshi tombolola l’andja wa Satana wanɛ. (Yee. 97:10) Iso nkoka ndodjɛ wɔɔngɔ wɔso la tokanyi tɔ wɔlɔ má mbalaka la ndjekaka Bible. Ndjingelaka lá nsanghanyɛ edjinge mpoposanyɛka angotokotshɛ́ lonkina djɛ nama yimba yɛso. L’onkoko wɔnde, Yehova ntolakaka ante apangawola dj’iso mpembama lá lɛdji lɔ isopakoke nkfumeyɛ.—1 Kɔ. 10:12, 13.

18. Kɛkɔnge k’oyɛso ladjɛ nanghaka isankfumɔ lá kɛnɛ kelendana la lɔlɔmbɔ?

¹⁸ Isankfumɔ ladjɛ ndɔmbaka efula ndeka wopo w’isananghaka ntondo djɛ ntshikala la nkɔmano te Yehova l’etsho w’ekomo wɛ ndjolo wɛnɛ. Ɔsaka winá mfu inkfumɔ djɛ ndɔmbaka l’oloko ɔmɔ. Yehova nkɔpaka iso ‘ndjipola eloko wɛso lá ntondo kɛnde’ má lɔlɔmbɔ. (Yee. 62:8) Lumɛka Yehova edjinge pɛyɛnde lokasa lá kenkfumɔ k’okonanghelande. Lɔmbande akokotshɛ́ djɛ wɛ ndjala la wolo l’olemo w’ipoposanyɛ. Wɔndande akokotshɛ́ djɛ wɛ nkfulumeyɛ ekakasano enkfumɔ edjinge mpikama lá ntondo k’ohemba onkfumɔ wokoka mpomana la wɛ. Tawolake kaanga ekete kana onto nkoshimba djɛ wɛ ndɔmbaka Yehova mbala la mbala. Iya wopo wɔkɔnge, Yehova okadjimolande ndɔmbɔ yɛso? Tongoshishima woopó wɔ djonyi wɔsɔ lá djamba djeyaye.