Kindjɛ nkɛnda lá ‘Mboka k’Ekina’

1-2. Nkano djɛkɔnge djɛ djonyi ase Juda wawikaki lá Babilɔnɛ iyayale ladjɛ ndɔsa? (Ɛzɛra 1:2-4)

NDJEWO kɛpɛyamaka! Ase Juda wayalaki lá lofumbe lá Babilɔnɛ l’ilá k’ɛnɔnyi etengo 70, wawaka lotshungɔ lɔ nkalɔ t’owila wɔwɔ, Isariyɛlɛ. (Wala Ɛzɛra 1:2-4.) Ngo Yehova toko ndeke lokokisá nangha nkambo djɛsɔ. Ladjikɛnge okokaso ntepela nghɔsɔ? Ase Babilɔnɛ watayalaki l’ekfumbo kɛ ntshungola amfumbe yɛwɔ. (Iza. 14:4, 17) Koko Babilɔnɛ djɛka ndotshitana, edjinge owandji wɔ bango ashimelaka ase Juda dj’iwɔ nkalɔ t’owila wɔwɔ. Eposelo weyalisá má nkambo djɛsɔ nde, ose Juda onkfumɔ, pekapeka ewandji wɛ nkfumbo wayalaka ladjɛ ndɔsa nkano mɔtshi: ntshikala lá Babilɔnɛ kana nyima m’eteyi. Nkano djɛsɔ ntayala nkano djɛ wɔdju ndɔsa. Ladjikɛnge?

² Nkokolo wewoyɛka ambɔ ekakasano wengoyala efula lá lɔkɛndɔ. La koko efula k’ase Juda iyawotshɔ nde lá Babilɔnɛ, ɔsɔ ndeke loyalaki ɛtɔyi k’owila k’iyewaka. Le wɔ, Isariyɛlɛ yayalaká nde owila w’andoyi yɛwɔ. Nyɛnamaka etengo ase Juda amɔtshi wayɛka ndoyala la lomo efula lá Babilɔnɛ, djɛkondeke akokaka ndjala okakasano le wɔ djɛ ntshika amvulu yɛwɔ yɛ wɔlɔ kana elemo wɛwɔ wɛ mfalanga ko ntshɔ t’owila wɔ yotalembetalaka.

3. Ɔtshɔkɔ wɔkɔnge wokongelaki ase Juda wa nkɔmano wataakalɔki tá Isariyɛlɛ?

³ Lá timba t’ase Juda wa nkɔmano, nkalɔ t’Isariyɛlɛ ayalaka la wapɔ ndeka k’enkfumɔ k’iyakoke ndasambɛ. Ɔtshɔkɔ woleka ekekete walendanaki l’ɔtɛmwɛlɔ wɔwɔ. Kaanga tɛmpɛlɔ y’apanghano ndekana 50 yayalaka lá Babilɔnɛ, tɛmpɛlɔ kɛ Yehova ketayalaki lá ngando kɛsɔ. Etshumbelo kɛ ase Isariyɛlɛ ndambola elambo wɛwɔ ngo ngete Ɛlɛmbɛ wɛ Mɔsɛ yalɔmbaka ketayalá edjinge lako kaanga nonghanyi kenanghemisá djɛ ankfundji ndambolaka elambo wɛkɔ. Lá djiko djɛ lasɔ, ampame l’amato w’apanghano watalɛmɛyɛki Yehova l’ɛlɛmbɛ wɛnde wayalaka efula ndeka wanɛ wɔlɛmɛyɛki. Djɛkondeke nunu dj’ase Juda w’okaki Ndjambe wɔma wayalaka l’eloko lukuluku djɛ nkalɔ t’owila wɔwɔ, lá yakoke tokawoyɛ etolo kɛwɔ kɛ piyɔɔ.

4. Okotshɔ wɔkɔnge wɔ Yehova ndalake djɛ mpɛyɛ ase Juda wataakalɔki t’Isariyɛlɛ?

⁴ Lɔkɛndɔ lɔ nsɔsɔlɔ lɔ wolo l’imá Babilɔnɛ t’Isariyɛlɛ lokokaka ndɔsa ngɔndɔ etengo inɛyi, koko Yehova alakaka ante angowangoyɛ ekakasano enkfumɔ wekokaki ndaashimba dj’iwɔ nkalɔ. Izaya afunaka ante: ‘Nyɔmbɛlɛ mboka kɛ Yehova! Nyosembole mboka k’ekekete kel’osowe lá nkambo djɛ Ndjambe kɛso. . . . Looko lɔ embondá embondá laleme ngo sii, edjinge looko lɔ apeku apeku loyale wɔɔkɔ wombalemá.’ (Iza. 40:3, 4) Kokanela nkambo djɛnɛ: mboka k’ekekete keheta l’osewe, otayimbo wɔ sii l’anteyi k’enkókó. Ɔsɔngo osasa wongoyala l’ankɛndji yɛ nkɛndɔ! Angoyala wɔdju efula le wɔ djɛ nkɛnda lá mboka k’ekekete kɛ sii ndeka lá mboka kɛ mpanda nkita kana l’anteyi k’enkókó wɛ ndaambi, wɛ nkekete, kana l’osowe. Angoyala edjinge losadjɛ.

5. Djiina djɛkɔnge dj’iyapɛyɛ mboka k’ekete kɛ djingingi keyalaki l’antenyɛ Babilɔnɛ la Isariyɛlɛ?

⁵ Lɔɔko kɛnɛ, mboka efula yɛ nkekete ndjewamaká má djiina mɔtshi kana má lofulo lɔmɔtshi. Edjinge mboka k’ekete kɛ ndjingingi kɛ Izaya ndafune keyalaka la djiina. Towala nghɔnɛ: ‘Mboka kɛmɔtshi k’ekete kengoyala l’eteyi, ee, mboka ketawɔ ambɔ Mboka k’Ekina. Kanga mbindo apɔngɔkɛnda l’eteyi.’ (Iza. 35:8) Daka djɛsɔ iyasakisolaka nge te ase Isariyɛlɛ wataakalɔki l’eteyi? Ko osakisolawɔ nge leso lɔɔko kɛnɛ?

‘MBOKA K’EKINA’ L’ETSHO WƐ NTONDO LA L’ETSHO WƐSO WƐNƐ

6. Ladjikɛnge iyetaka otayimbo wɔsɔ ambɔ ekina?

⁶ ‘Mboka k’Ekina,’ ɔsɔngo mboka k’ekekete kɛsɔ djiina wɔlɔ! Ladjikɛnge yetaka otayimbo wɔsɔ ambɔ ekina? Lako kaanga ‘onto wɔ mbindo’ wongowa idjena l’owila w’Isariyɛlɛ wɔmbɔlɔngɔswamá, ayale kaanga ose Juda wɔsa nkano djɛ nangha wayi wa mbindo wa ntshɛngi, ntɛmɔla tosakandole, kana nangha mpekato inkina yɛ nkekete. Ase Juda wataakalɔki wangotokoma ‘anto w’ekina’ le Ndjambe kɛwɔ. (Mvu. 7:6) Koko, nkambo djɛsɔ mpasakisola ente, anto wimisá má Babilɔnɛ wapalekɔ lonkina la djonyi djɛ nangha etshikitano djɛ nsasangɛ Yehova.

7. Etshikitano wɛkɔnge ase Juda amɔtshi yayale ladjɛ nangha? Pɛyɛ ndjɔmbɔmba.

⁷ Etengo sɛnaki má djiko, efula k’ase Juda yawotshɔ nde lá Babilɔnɛ edjinge nyɛnamaka etengo, efula kɛwɔ wayɛka ndekela tokanyi la ɛlɛmbɛ ɛmɔtshi wemá Babilɔnɛ. Ɛnɔnyi efula m’ɔkɔngɔ wɔ ase Juda wa ntondo nkalɔ tá Isariyɛlɛ, Ɛzɛra ayɛka ndisola ante ase Juda watshukanaka l’amato w’ampanghano. (Epo. 34:15, 16; Ɛzr. 9:1, 2) Koko m’ɔkɔngɔ wɔ lasɔ, Guvɛrnɛrɛ Nɛhɛmiya akamɔka má nyɛna ante wana wawotshisá l’Isariyɛlɛ watewaki kaanga ntepela otepela w’ase Juda. (Mvu. 6:6, 7; Nɛh. 13:23, 24) Wopo wɔkɔnge wana wasɔ yakoke ndjeka djɛ nkɔpa la ntɛmɔla Yehova ntsha wapoke Hebero, ɛtɔyi k’otepela wɔ Otepela wɔ Ndjambe yafunama? (Ɛzr. 10:3, 44) Djɛkondeke ase Juda wasɔ wayalaka ladjɛ nangha etshikitano wɛ nkekete, koko atakoka ndjala wɔdju efula lewɔ djɛ nangha etshikitano wɛsɔ l’Isariyɛlɛ, l’edjena kɛ etolo kɛ piyɔɔ yotakawoyɛmaka ndambo ndambo.—Nɛh. 8:8, 9.

8. Lamo akambo wananghemisá amboheta ɛnɔnyi efula olendanawɔ laso lɔɔko kɛnɛ? (Lenda ntshango djelá loposo.)

⁸ Anto amɔtshi nkoka ntepela ambɔ, ‘Akambo wasɔ walekɔ la ntshina, koko yakomelá nde ase Juda amboheta ilá efula, ya walekɔ nsɔsɔla la ntshina leso lɔɔko kɛnɛ?’ Ee ladjikɛnde, lá lɛdji lɔmɔtshi, tokindjɛ nkɛnda la ‘Mboka k’Ekina.’ Ayale kaanga oyɛsonde ankfutami w’avuta kana ‘ɛnkɔkɔ enkina,’ tolekɔ la djonyi djɛ ntshikala lá ‘Mboka k’Ekina’ ladjikɛnde kengotokotshɛ djɛ ntshikala lá paradiso kelá nyuma edjinge kengotoyakala ɛtshɔkɔ wɛ Onkfumi woyaye.b (Dj. 10:16) Ntateyɛ má 1919 D.D., miliyɔ y’ampame, amato, edjinge dɛngɛ waposaka má Babilɔnɛ dj’Ekekete, osanga wɔ nkɛlɛsiya dj’engolo djel’andja w’otondo, ko wawangaka nkɛnda lá mboka kɛ djingingi kɛsɔ. Mbala imɔtshi olekɔ l’anteyi kɛwɔ. Kaanga mboka yadjipɔ ɔnɛnyi 100 la ntondo, elemo wɛ ndɔngɔsɔla mboka wɛsɔ wewangaka ɛnɔnyi nkama lá ntondo.

ƆLƆNGƆSWƐLƆ WƆ MBOKA

9. Lá nkilika Izaya 57:14, lá lɛdji lɔkɔnge olemo w’ɔlɔngɔswɛlɔ yananghema lá ‘Mboka k’Ekina’?

⁹ Yehova alonghanyɛka dj’ipa ase Juda watimaki má Babilɔnɛ mpomana l’ekakasano. (Wala Izaya 57:14.) Iya otepelaso mo lá nkambo djɛ ‘Mboka k’Ekina’ kɛ l’etsho wɛso wɛnɛ? Ɛnɔnyi nkama lá ntondo kɛ 1919, Yehova awangaka nkamba l’ampame yokaki Ndjambe wɔma djɛ ndjɔmbɛla mboka kengokotshɛ́ anto djɛ mposa má Babilɔnɛ dj’Ekekete. (Ɛdjɛ la Izaya 40:3.) Iwɔ wananghaka olemo wɔ djonyi, ntepela ente olemo wɔ ndɔngɔsɔla mboka kelá nyuma djɛ nkotshɛ́ anto w’eloko wɔlɔ djɛ mposa má Babilɔnɛ dj’Ekekete edjinge ndjingela lá paradiso kelá nyuma, l’edjena kɛ yombokawoyɛ etolo kɛ piyɔɔ kɛ Yehova. Kɛkɔnge kesakisola ‘elemo wɛ ndjɔmbɛla mboka’ wɛsɔ? Tokolenda elemo w’ɔlɔngɔswɛlɔ ɛmɔtshi wenanghemisá.

10-11. Wopo wɔkɔnge oposelo l’okadjimwelo wɔ Bible yakotshɛ́ djɛ ntshanghanyɛ balo djɛ Bible? (Lenda edjinge ntshango.)

¹⁰ Oposelo w’enkanda. Tii l’anteyi anteyi k’ɛtɛndɔ kɛ 15, wasangolaki Bible ngo l’ɛwɔ. Olemo wɔsɔ wɔsaki winá efula, edjinge kɔpi yɛ Bible itɛnamaki la yayalaki oshinga efula. Koko winá w’iyatshule mashinyi w’oposɛ enkanda w’iyakokaka nsɛkɔla, ayɛka ndoyala wɔdju efula mposɛ la nkapanyɛ Bible.

¹¹ Okadjimwelo. Ɛnɔnyi efula lá ntondo, Bible yɛnamaka ngo lá Latin, otepela wɔ ngo anto wingelisá nkalasa wɔlɔ ndeke loyalaki l’akoka wa ndjoka. Koko winá wɔ mashinyi w’oposɛwɔ enkanda yowangaka yɛnama efula, anto wokaki Ndjambe wɔma, watateyɛka nkadjimola Bible tá etepela efula w’anto yatepelaka. Kɛsɔ kekotshɛka antangi yɛ Bible djɛ ndjɛdjɛ kɛnɛ kɛ yaalakanyɛka me ewandji wɛ nkɛlɛsiya la kɛnɛ kɛ Bible olakanyɛnde nsɔsɔlɔ.

12-13. Kɔpɛyɛ ndjɔmbɔmba kɛmɔtshi kɛnyɛ wopo wɔ ambeki wa Bible w’eloko wɔlɔ wal’ɛtɛndɔ kɛ 19 iyawange mposɛ lá ntshandjawala elakanyelo w’engolo wɛ nkɛlɛsiya.

¹² Mpeko djɛ ndjeka Bible. Ambeki wa nkɔmɛ wa Bible wekaka akambo efula má kɛnɛ kɛ yawalaka má Otepela wɔ Ndjambe. Koko ewandji wɛ ntolo womalaka efula winá wɔ ambeki wa Bible wasɔ iyatateyɛ nshimela anto ankina akambo w’iyekaka. Ndjɔmbɔmba, lá ɛtɛndɔ kɛ 19, iloyi imɔtshi y’ampame y’eloko wɔlɔ, wawangaka mposɛ traktɛ yɛnyɛki elekanyelo wɛ nkelesiya dj’engolo lá ntshandjawala.

¹³ Lá 1835 mpame kɛmɔtshi k’okaki Ndjambe wɔma kɛ yetaka Henry Grew aposɛka traktɛ kɛmɔtshi ketepelaki nkambo dj’elendana la wopo woyalakaso ntsha tombovɔ. Lá traktɛ kɛsɔ, nde ɛnyɛka má lotshimbo l’Afunelo ante onto apawotshɔka l‘anima wapavu etengo nkɛlɛsiya mɔtshi olakanyɛwɔ, koko nkoka djɛsɔ oyɛwɔnde opapɛyɛ wɔ ngo Ndjambe ndeke lɔpɛyɛ. Lá 1837 onkambi wel’etolo k’emɔtshi w’iyetaka George Storrs awaka kɔpi kɛmɔtshi kɛ traktɛ kɛsɔ winá wɔ ndotatshɔka tá lɔkɛndɔ lá trɛ. Nde awalaka ko ayalaka l’eshikikelo ante ambisola akambo wa nsɔsɔlɔ watɔla ta lowiko. Nde ɔsaka nkano djɛ nshimela anto ankina kɛnɛ k’indeke. Lá 1842 nde apɛyɛka ɔnɔnghɔ wɔ wamba wa wɔlɔ efula walekɔ l’ɔtɛ wɔ djoyi ante: “Woopó, anto wa pɔlɔ walekɔ l’alemba wapavɔka?” Akambo wa George Storrs ndafune wayalaka la lɔɔla lɔ wɔlɔ efula le olangala ɔmɔtshi wɔ yetaka Charles Taze Russell.

14. Lá topo tɔkɔnge wɔnanyɔ Russell nya anto wande yawa wapɔ má olemo wɔ ndjɔmbɛla mboka kelá nyuma wonanghemisá l’etsho wɛ ntondo? (Lenda edjinge ntshango.)

¹⁴ Lá topo tɔkɔnge wɔnanyɔ Russell nya anto wande yawa wapɔ má olemo wɔ ndjɔmbɛla mboka kelá nyuma wonanghemisa l’etsho wɛ ntondo? Lá wekelo wɔwɔ, iwɔ wakambaka la enkanda wesakisola totepela telá Bible, enkanda wekotshɛ́ djɛ mpona toshapitrɛ telá Bible, edjinge nkadjimwelo ntshikitanyi djɛ Bible, nkete nkfumɔ djɛsɔ djɛlɔngɔswamaka lá ntondo k’iwɔ ntateyɛ olemo wɔwɔ. Iwɔ wawaka lonkina wapɔ má ehonelo w’akambo welá Bible wonanghisá Henry Grew, George Storrs, edjinge anto ankina. Wɔnanyɔ Russell nya anto wande wakotshɛ́ka l’olemo wɔ ndjɔmbɛla mboka kelá nyuma má mposɛ enkanda edjinge wa traktɛ efula yetepelaki akambo wemá Bible.

15. Etshikitano wɛkɔnge wɛ djonyi w’enanghemisa lá 1919?

¹⁵ Lá 1919, Babilɔnɛ dj’Ekekete, atshutshɛ́ka nkfulu kɛnde kɛ ndjapamela enkambi wɛ Ndjambe. L’ɔnɔnyi wɔsɔ, ‘mfumbe kɛ nkɔmano la nkɛsɔ’ atateyɛka nkamba, djɛ ndongola anto w’eloko wɔlɔ la ‘Mboka k’Ekina’ kedjipwisá bango. (Mat. 24:45-47) Mpeyi má olemo wonanghisá anto l’etsho wɛ ntondo wɔ ndɔngɔsɔla mboka k’ekekete kɛsɔ, anto watateyisá nkɛnda l’eteyi wekaka akambo efula walendana la Yehova edjinge l’ikanyi yɛnde. (Woo. 4:18) Iwɔ wakokaka lonkina ndjokanyɛ mbiko yɛwɔ la ɛlɛmbɛ wɛ Yehova. Yehova atakongaki ante anto wande wananghe etshikitano wɛ nkekete ngo mbala kɛkɔ kɛmɔ. Nde atalɔngɔsɔlaki enkambi wɛnde ndambo ndambo. (Lenda ipapango “Yehova atalɔngɔsɔlaki enkambi wɛnde ndambo ndambo.”) Ɔsɔngo osasa songoka winá wɔ songoyala l’akoka wa nsasangɛ Ndjambe kɛso lá akambo ankfumɔ wa songonanghaka!—Kɔl. 1:10.

‘MBOKA K’EKINA KELEKƆ NGO OHOLO’

16. Elemo wɛkɔnge w’ɔlɔngɔswɛlɔ wenanghemisa lá ‘Mboka k’Ekina’ ntateyɛ má 1919? (Izaya 48:17; 60:17)

¹⁶ Mboka inkfumɔ ndɔmbamaka ngo ndɔngɔsɔlama mbala la mbala. Ntateyɛ má 1919, olemo wɔ ndɔngɔsɔla ‘Mboka k’Ekina’ wokindjɛka nkambema djɛ nkotshɛ́ anto efula dj’iwɔ mposa má Babilɔnɛ dj’Ekekete. Mfumbe kɛ nkɔmano la nkɛsɔ kɛsɔnamisá bango akindjɛka nkamba olemo, ko lá 1921, aposɛka inkankanda imɔtshi yesakisola Bible yɛlɔngɔswamisá djɛ nkotshɛ́ anto wa bango djɛ ndjeka akambo wa nsɔsɔlɔ wemá Bible. Ekomo ekomo, onkanda wɔsɔ, La Harpe de Dieu, wokapanyemaka lá wakɔpi ndekana miliyɔ isamalo lá etepela 36, edjinge anto efula wekaka akambo wa nsɔsɔlɔ m’eteyi. Atahete ilá, towaka onkanda wɔ bango wɔ wɔlɔ efula wɔ ndjeka l’anto Bible, Sasanga la lowiko lotshinda lotshinda! L’etsho w’ekomo wɛnɛ, Yehova akamba l’olonghanyelo wɔnde djɛ ntɔpɛyɛ olelo w’efula welá nyuma djɛ ntokotshɛ́ dj’iso nkindjɛ nkɛnda lá ‘Mboka k’Ekina.’—Wala Izaya 48:17; 60:17.

17-18. ‘Mboka k’Ekina’ ɔtɔlawɔ tampe?

¹⁷ Iso nkoka ntepela ente, winá onkfumɔ wɔ onto awolande ndjeka Bible, nde mbaka mbamba kɛ nkɛnda lá ‘Mboka k’Ekina.’ Amɔtshi nkɛndaka ngo ndambo daambi lá mboka k’ekekete ko masɔ wangimake. Ankina ndɔsaka nkano djɛ nkindjɛ nkɛnda l’eteyi tii iwɔ nkoma l’edjena kɛ yotatshu. Edjena kɛkɔ kɛsɔ nge?

¹⁸ Le waalekɔ la nkongi djɛ ntshɔ t’olongo, ‘Mboka k’Ekina’ kengatɔla tá ‘paradiso kɛ Ndjambe’ kelekɔ l’olongo. (Ndj. 2:7) Le waalekɔ la nkongi djɛ mbika lanɛ lá looko, mboka k’ekekete kɛsɔ kengalɔndjɛ tii l’ekomo k’ɛlɔndjɛlɔ k’ɛnɔnyi 1 000 lá anto ankfumɔ yongokoma djɔ. Ntsha ɔnkɛnda la mboka k’ekekete kɛsɔ lɔɔko kɛnɛ, tolendake t’ɔkɔngɔ. Edjinge timake m’eteyi tii nghongokoma l’ekomo kɛ lɔkɛndɔ lɔɔko l’andja wa bango! Tokokombola “lɔkɛndɔ lɔ wɔlɔ.”