DJAMBA DJƐ WEKELO 24
Wɛ nkoka nkotshɛ ekoma wɛko welá nyuma
‘Totatshikake nangha kɛnɛ kelekɔ wɔlɔ, ladjikɛnde lá winá wɛdje, tongovuka ntsha topapekwisa.’—NGA. 6:9.
YEEMBO 84 Toyapɛyɛ l’ɛkɔpa (lá Otetela)
LÁ YOPASƐa
1. Ekakasano wɛkɔnge w’epomanaka l’anto efula?
OMBOYAWILELAKA okoma ɔmɔtshi welá nyuma koko olekɔ l’okakasano wɔ ndookotshɛ?b Ntsha oyɛwɔnde nghɔsɔ, mbɔ koko opalekɔ nghɔmɛlɛ. Ndjɔmbɔmba, Philip akɔpaki ndɔngɔsɔla alɔmbɛlɔ wande edjinge ndɔmbaka mbala la mbala, koko ayalaki l’okakasano wɔ mba winá wɔ ndɔmba. Erika ayawilelaka okoma wɔ nkomaka la winá lá nsanghanyɛ y’olemo w’ipoposanyɛ; koko, nsuke la nsanghanyɛ inkfumɔ angokomake ngo l’ɔkɔngɔ. Tomáš asɛsaka mbala efula djɛ nshiyɛ mbala Bible k’otondo. Nde ntepelaka ante: “Mopayalaka nde la ngandji kɛ mbala Bible. Koko lambɔsɛsa mbala isato, mbala infkumɔ langokomake ngo l’Akambo w’Ase lewi ko lambopekɔ.”
2. Lamo sopakoke ndɛmba ntsha tomboyawilela okoma ɔmɔtshi welá nyuma wɔ sotakotshɛ?
2 Ntsha etsho wɛnɛ omboyawilela okoma ɔmɔtshi wɔ ngotakotshɛ, ɔsa nkano dj’ipa ndɛmba. Mbala efula, kaanga okoma wɔ daambi ndɔmbaka winá edjinge ndjila welo. Wopo wilɛ welo djɛ nkotshɛ okoma wɔko ɛnyɛ ente wɛ ndɔsaka djokanelo djɛko nya Yehova la ntshina efula edjinge okombola ndɔpɛyɛ kɛnɛ keleka wɔlɔ tshɛ lewɛ. Yehova ndɔsaka welo w’ilɛ la ntshina. Lá nsɔsɔlɔ, nde apɔkɔlɔmbɛ kɛnɛ kɛ ngopalekɔ l’akoka wa nangha. (Yee. 103:14; Mika 6:8) Djɛkondeke, wɛ ladjɛ ndawilela ngo okoma woyɛ l’akoka wa nkotshɛ. Ntsha omboyawilela okoma ɔmɔtshi, kɛkɔnge k’okokɛ nangha djɛ ndookotshɛ? Nyontshɔ tokolenda alako amɔtshi.
YALA LA MPOSƐ K’EFULA KƐ NKOTSHƐ OKOMA WƆKO
Lɔmba djɛ ndjala la mposɛ k’efula (Lenda itenyi 3-4)
3. Lamo mposɛ oyɛwɔ djonyi?
3 Mposɛ alekɔ djonyi efula djɛ nkotshɛ okoma ɔmɔtshi welá nyuma. Winá woyɛ la mposɛ k’efula kɛ nkotshɛ okoma ɔmɔtshi, ongila welo djɛ nkotshɛ okoma wɔkɔ. Iso nkoka ndjɛdjɛ mposɛ la lompopo lotshinda wato tá edjena kɛ ndotatshu. Ntsha lompopo lokindjɛ mpopa, oluki angokoma ngo nkoma l’edjena kɛ ndotatshu. Ntsha lompopo lolekɔ lɔ wolo, nde nkoka nkoma l’ankeke. Wopo wɔk’ɔmɔ ndeke, ntsha tolekɔ la mposɛ k’efula kɛ nkotshɛ okoma ɔmɔtshi, tongila welo efula djɛ nkotshɛ okoma wɔkɔ. Davidɛ, wɔnanyɔ ɔmɔtshi wolekɔ lá El Salvador, atepela ante: “Winá woyɛ la mposɛ kɛ nangha nkambo mɔtshi, ongila welo djɛ nkotshɛ nkambo djɛkɔ. Opangotshika kaanga ekete kɛmɔ nkoshimba djɛ nkotshɛ okoma wɔko.” Ko, kɛkɔnge kokokɛ nangha djɛ wɛ ndeka ndjala la mposɛ?
4. Lá nkilika Filipɛ 2:13, lá nkambo djɛkɔnge dj’okokaso ndɔmba? (Lenda edjinge ntshango.)
4 Lɔmba djɛ wɛ ndjala la mposɛ k’efula. Má lotshimbo lɔ nyuma kɛnde, Yehova nkoka nkɔpɛyɛ mposɛ kɛ nkotshɛ okoma wɔko. (Wala Filipɛ 2:13.) Mbala imɔtshi iso ndawilelaka okoma ɔmɔtshi ladjikɛnde alɔmbama ngo nangha nghɔsɔ, ɔsɔ alekɔ nkambo djɛ wɔlɔ. Koko lá nsɔsɔslɔ akoka ndjala ko topalekɔ la mposɛ kɛ nkotshɛ okoma wɔkɔ. Kɛsɔ ndeke lokomelisa nkaana kɛmɔtshi k’etawɔ Norina lá Uganda. Nde ayawilelaka okoma wɔ ndjeka l’onto ɔmɔtshi Bible, koko atayala la mposɛ kɛ nangha nkambo djɛsɔ ladjikɛnde akanelaki ante apewe ndakanyɛ wɔlɔ. Ko, kɛkɔnge kokotshisa? Nde akɔndɔla ante: “Ntateyɛka ndɔmba Yehova mfu inkfumɔ djɛ nkotshɛ́ lemi djɛ mfudjɛ mposɛ kɛmi kɛ ndjeka l’anto Bible. Djɛ nangha akambo la yopo y’okana la ndɔmbɔ yɛmi, nanghaka la wolo djɛ ndɔngɔsɔla akoka wami wa ndakanyɛ. M’ɔkɔngɔ wɔ ngɔndɔ imangha, nyɛnaka ente mposɛ kɛmi kembofula. Ngo ɔnɔnyi wɔk’ɔmɔ, ntateyɛka ndjeka l’anto ape Bible.”
5. Lá nkambo djɛkɔnge dj’okokaso ntɔnɔla djɛ mfudjɛ mposɛ kɛso kɛ nkotshɛ ekoma wɛso?
5 Tɔnɔlaka lá kɛnɛ kɛ Yehova ndombokonanghelá. (Yee. 143:5) Ɔpɔstɔlɔ Poolo atɔnɔlaka la wɔlɔ w’ipawɔsɔdjɔmba wɔ Yehova tende, ko kɛsɔ kotshindaka djɛ nde ndeka ndjala la mposɛ kɛ nkamba la wolo l’olemo wɔ Yehova. (1 Kɔ. 15:9, 10; 1 Ti. 1:12-14) Wopo wɔk’ɔmɔ ndeke, ntsha tɔtɔnɔla efula la kɛnɛ kɛ Yehova otonanghelande, tongoleka ndjala la mposɛ k’efula kɛ nkotshɛ ekoma wɛso. (Yee. 116:12) Kolenda kɛnɛ kekotshisa nkaana kɛmɔtshi kelá Honduras djɛ nkotshɛ okoma wɔnde wɔ nkoma yat’ekelo yɛ lotshinda. Nde ntepelaka ante: “Latɔnɔlaki lá efula kɛ ngandji kɛ Yehova ɔnyɛnyɛnde. Nde ankotshɛ́ka djɛ lemi ndjisola enkambi wɛnde. Nde nseyɛka ehomba wɛmi, edjinge namaka lemi. Ntɔnɔlaka nghɔsɔ akembɛka ngandji k’owokami edjinge afudjɛka mposɛ kɛmi.”
6. Kɛkɔnge kekoka ntokotshɛ́ lonkina djɛ mfudjɛ mposɛ kɛso?
6 Ilaka yimba lá ɛtshɔkɔ wɛ nghongowa ntsha ombokotshɛ okoma wɔko. Kolenda kɛnɛ kekotshisá Erika, kanga sotepelaki má djiko, loyawilelisá okoma wɔ nkomaka la winá. Nde atepela ante: “Ndjɛka ndosipisoyɛ ente nsamba akambo efula má nkomaka l’ɔkɔngɔ lá losanghanyɛ l’olemo w’ipoposanyɛ. Koko má nkomaka la winá, nkoka mba mbamba kɛ nyemoyɛ wananyɔ l’ankaana, edjinge nsawola lawɔ. Lakokaki lonkina ndjekameyɛ alako wakokaki nkotshɛ́ lemi djɛ nkɔpa la ndɔngɔsɔla olemo wɔmi w’ipoposanyɛ.” Erika ilaka yimba lá wapɔ wayɛ má nkoma lá winá, ko akotshɛka okoma wɔnde. L’ɛtshɔkɔ wɛkɔnge w’okokɛ ndjila yimba? Ntsha okoma wɔko olendanawɔnde la badji djɛ Bible kana la lɔlɔmbɔ, kanela lá wopo wɔ nkotshɛ okoma wɔsɔ okokawɔ nkokotshɛ́ djɛ wɛ ndeka ndjala la djokanelo djɛ wɔlɔ la Yehova. (Yee. 145:18, 19) Ntsha okoma wɔko oyɛwɔnde wɔ wɛ ndjala la wekeka w’Okristo, tɔnɔla lá wopo wɔ nkotshɛ okoma wɔsɔ okokawɔ nkokotshɛ́ djɛ wɛ ndjala la djokanelo djɛ wɔlɔ l’anto ankina. (Kɔl. 3:14) Lamo ngopafune ndonga nkfumɔ dj’ɔkɔpɛ nkotshɛ okoma wɔko? Lendaka donga djɛ ngafune la nkishi mbala la mbala. Tomáš, kanga sotepelaki má djiko, atepela ante: “Ntsha ndekɔ la donga efula djɛ nkotshɛ okoma wɔmi, langilake welo efula djɛ nkotshɛ okoma wɔkɔ.”
7. Kɛkɔnge kekotshisá Julio nya wadjɛnde djɛ nkotshɛ okoma wɔwɔ?
7 Hetshɛka winá mbala efula l’anto wakoka nkɔpɛyɛ mposɛ kɛ nkotshɛ okoma wɔko. (Woo. 13:20) Kolenda kɛnɛ kekotshisá Julio nya wadjɛnde djɛ nkotshɛ okoma wɔwɔ wɔ mfudjɛ olemo w’ipoposanyɛ. Nde atepela ante: “Tɔsɔnaka tolongo totokembɛki djɛ nkotshɛ okoma wɔso, edjinge tɔ sakokaka nsawola lawɔ lá nkambo djɛ okoma wɔso. Efula l’anteyi kɛwɔ wamboshiyɛká nkotshɛ ekoma w’etengo wɛso, djɛkondeke wakokaki ntɔpɛyɛ alako wa wɔlɔ efula. Tolongo tɔso watopolaki lonkina wopo wɔ nonghanyi yɛso yotahete, la watokembɛki winá wɔ sayalaka la djonyi.”
NTSHA TOPALEKƆ LA MPOSƐ
Ila welo djɛ nkotshɛ okoma wɔko (Lenda itenyi 8)
8. Kɛkɔnge kekoka mposa ntsha tonangha la wolo djɛ nkotshɛ okoma wɔso ngo winá w’oyalaso la mposɛ? (Lenda edjinge ntshango.)
8 Koko lá nsɔsɔlɔ, etsho ɛmɔtshi isankfumɔ nsambaka mposɛ kɛ nangha akambo. Kɛsɔ osakisolawɔnde ente topakoke ndjila welo djɛ nkotshɛ okoma wɔso? Lako. Tɔkɔsa ndjɔmbɔmba: Iso ndjewaka ente lompopo lolekɔ la nkfulu k’efula kɛ ntshinda wato tii t’edjena kɛ ndotatshu. Koko, wolo wɔ lompompo la lompompo ntshikitanaka, edjinge l’etsho ɛmɔtshi, nkoka ndjala ko lako kaanga ndambo kɛ lompopo. Kɛsɔ nsakisolaka ente oluki apangokindjɛ nkɛnda? Lako ape ngo nghɔsɔ. Ndjɔmbɔmba, wato ɛmɔtshi welekɔ la mɔtɛrɛ, enkina welekɔ la nkapi. Oluki nkoka nkamba la nkete djɛsɔ djɛ nkindjɛ nkɛnda tii l’idjena yɛ ndotatshu. Iso nkoka ndjɛdjɛ mposɛ kɛso la lompopo; etsho ɛmɔtshi tongoyalake la mposɛ k’efula koko ɛmɔtshi lako. Edjinge etsho ɛmɔtshi tokoka nsamba ndjoka mposɛ kɛ nkotshɛ okoma wɔso. Djɛkondeke ntsha tongohonake nkotshɛ okoma wɔso ngo winá woyalaso la mposɛ, mbɔ koko topakotshɛki lotshinda. Koko etengo oluki ndokambaka la topo tonkina djɛ nkoma l’edjena kɛ ndotatshu, iso nkoka ndjila welo djɛ nkotshɛ okoma wɔso kaanga winá wɔ sopalekɔ la mposɛ. Lá nsɔsɔlɔ, nkambo djɛsɔ palekɔ wɔdju, koko ongoyala l’osasa winá wɔ nghongokotshɛ okoma wɔko. Lá ntondo k’iso nyɛna kɛnɛ k’okokaso nangha, tokoshishimá woopó ɔmɔtshi wokoka ntoyela lá wɔɔngɔ.
9. Alekɔ nyɛtshi dj’iso nkindjɛ ndjila welo djɛ nkotshɛ okoma wɔso kaanga winá wɔ sopoke mposɛ kɛ nangha nkambo djɛsɔ? Pakisola.
9 Yehova nkɔpaka iso ndokambela l’osasa edjinge l’ɛkɔpa. (Yee. 100:2; 2 Kɔ. 9:7) Iya iso ladjɛ ndjila welo djɛ nkotshɛ okoma ɔmɔtshi welá nyuma kaanga ntsha topakɔpɛ okoma wɔkɔ? Tokolenda ndjɔmbɔmba k’ɔpɔstɔlɔ Poolo. Nde atepelaka ante: ‘Lemi ndjapemelaká demba djɛmi edjinge ndokomɛká etengo mfumbe.’ (1 Kɔ. 9:25-27) Poolo ananghaki la wolo djɛ nangha kɛnɛ kelekɔ wɔlɔ kaanga winá wɔ ndotayalaki la mposɛ kɛ nangha nkambo djɛsɔ. Yehova awolaka olemo wɔ Poolo? Ee! Edjinge Yehova ɔtshɔkɔlaka lá welo wɛnde.—2 Ti. 4:7, 8.
10. Wapɔ wɛkɔnge w’owaso má ndjila welo djɛ nkotshɛ okoma ɔmɔtshi kaanga ntsha topalekɔ la mposɛ?
10 Wopo wɔk’ɔmɔ ndeke, Yehova nsasangaka ntɛna tonangha la wolo djɛ nkotshɛ okoma wɔso kaanga lá winá wɔ sopalekɔ la mposɛ kɛ nangha nkambo djɛsɔ. Nde nsasangaka ladjikɛnde ntsha kaanga topananghisa nkambo djɛsɔ má ngandji k’olemo wɔsɔ, nde ndjewaka ante iso nanghaka nkambo djɛsɔ má ngandji k’owokaso. Etengo Yehova ndatshɔkɔla Poolo, angɔtɔtshɔkɔla edjinge iso lá welo wɛso. (Yee. 126:5) Edjinge winá wɔ sɔngɛna ɛtshɔkɔ wɛ Yehova, tokoka ntateyɛ ndjala la mposɛ. Nkaana kɛmɔtshi k’intasɛ lá Pologne, k’etawɔ Lucyna atepela ante: “Winá ɛmɔtshi, mpakɔpaka ntshɔ t’olemo w’ipoposanyɛ, pekapeka winá w’ɔlɛmbami. Koko, osasa wɔ mokaka m’ɔkɔngɔ wɔ lemi mposa t’olemo w’ipoposanyɛ oyɛwɔ nde opapɛyɛ w’ekekete.” Nyontshɔ tokolenda kɛnɛ k’okokaso nangha winá wɔ sopoke mposɛ.
11. Wopo w’ɔkɔnge Yehova okokande ntokotshɛ́ dj’iso ndjala la ndakota?
11 Lɔmba djɛ ndjala la ndakota. Ndakota oyɛwɔ nde nkoka djɛ ndjapamela nsaki la nanghedji djɛso isɔmɛlɛ. Mbala efula itepela yɛsɔ mpɛyɛka ikanyi yɛ ndapekala dj’ipa nangha nkambo djɛ nyɛtshi. Koko tongoyalake lonkina la djonyi djɛ ndakota djɛ nangha kɛnɛ kelekɔ wɔlɔ, pekapeka ntsha olemo wɔkɔ wolekɔ wolo kana topalekɔ la mposɛ kɛ nangha olemo wɔkɔ. Vungɔ ente ndakota oyɛwɔnde djekeka mɔtshi djɛ lowambo lelá nyuma, djɛkondeke lɔmbaka Yehova nyuma kɛnde k’ekina djɛ wɛ ndjala la djekeka djɛ djonyi djɛsɔ. (Luka 11:13; Nga. 5:22, 23) Davidɛ, kanga sotepelaki má djiko, apakisola wopo wɔ lɔlɔmbɔ yokotshɛ́. Nde akɔpaki ndjala l’enkfumbo kɛ nanghaka wekelo w’onto nyɔmɛlɛ mbala la mbala. Nde atepela ante: “Lalɔmbaki Yehova djɛ nkotshɛ́ lemi djɛ ndjala la ndakota. M’okotshɔ wɔnde, ndjɛka ndoyalá la nonghanyi kɛ wɔlɔ kɛ wekelo edjinge ntateyɛka nangha wekelo wɔmi mbala la mbala.”
12. Wopo wɔkɔnge ikfɔ yotanaso lá Losanghanyɛ 11:4 otokotshɛwɔ djɛ nkotshɛ ekoma wɛso welá nyuma?
12 Tokongake ngo akambo ankfumɔ mbɔnga. Lako winá wɔ akambo ankfumɔ yɔngɔwɔnga l’andja wanɛ. Ntsha tombokonga ngo winá wɔ nghɔsɔ, mbɔ koko topakotshɛki lotshinda okoma wɔso. (Wala Losanghanyɛ 11:4.) Wɔnanyɔ ɔmɔtshi w’etawɔ Dayniel atepela ante: “Lako winá wɔ akambo ankfumɔ yɔngɔwɔnga. Djɛkondeke totakongake ngo akambo mbɔnga, totateyɛ ngo ntateyɛ.” Wɔnanyɔ ɔmɔtshi w’intasɛ lá Uganda w’etawɔ Paul atepela elonga kɛmɔtshi kɛ sopakoke ntaloyɛ akambo ante: “Winá w’owangaso kaanga l’anteyi k’ekakasano wɛ wolo, iso mpɛyɛka Yehova mbamba kɛ ntɔtshɔkɔla.”—Mal. 3:10.
13. Lamo oyɛwɔ wɔlɔ ntateyɛ nkotshɛ ekoma wɛso ndambo ndambo?
13 Wanga ndambo ndambo. Iso nkoka nsamba mposɛ ladjikɛnde okoma wɔso wɛnama etengo wolekɔ wolo efula nkotshɛ. Ntsha oyɛwɔ nde nghɔsɔ lá nkambo djɛko, opakoke mbanga ndambo ndambo? Ntsha okoma wɔko oyɛwɔnde wɔ ndjala la djekeka mɔtshi, lamo ngopakoke ntateyɛ nyɛnyɛ djekeka djɛkɔ ntondo má tokakambo tɔ daambi? Ntsha okoma wɔko oyɛwɔnde wɔ nshiyɛ mbala Bible, opakoke nonghanyɛ djɛ ntateyɛ mbalaka l’ilá kɛ ndambo kɛ winá daambi? Tomáš, kaanga sotepelaki má bango, ayalaka l’okakasano wɔ nkotshɛ okoma wɔnde wɔ mbala Bible dj’otondo l’ɔnɔnyi ɔmɔ. Nde atepela ante: “Nyɛnaka ente ntaawalaki lankeke lankeke efula. Ko ndɔsaka nkano djɛ mpetola lonkina, koko mbala kɛnɛ, nonghanyɛka djɛ mbalaka ngo totenyi tomangha lá lofu edjinge ntɔnɔlaka l’eteyi. Eposelo welekɔ la nkambo djɛsɔ nde, lambowanga nkɔpa badji djɛmi.” Ladjikɛnde Tomáš awangaka nkɔpa badji djɛnde djɛ Bible, nde atateyɛka mbala l’ilá kɛ winá efula. Ekomo ekomo, nde ayɛka ndoshiyɛ mbala Bible dj’otondo.c
TƆLƐMBAKE NTSHA OMBOPOMANA L’EKAKASANO
14. Ekakasano wɛkɔnge wekoka nkoshimba djɛ nkotshɛ okoma wɔko?
14 Yɛnyi nde, ayale kaanga mposɛ kɛkɔnge kelekɔ́ laso kana oyapekalaso akambo amɔtshi, iso nkoka ndopomana l’okakasano ɔmɔtshi. Ndjɔmbɔmba, ‘akambo w’isasamoyɛ’ nkoka tosambɛ winá w’oyɛso la djonyi djɛ nkotshɛ okoma wɔso. (Los. 9:11) Iso nkoka mpomana l’okakasano w’okoka ntɔlɛmbɛ edjinge nkitshakitshɛ wolo wɔso. (Woo. 24:10) Demba djɛso djɛ ntshamba djɛ djɔ nkoka ntotshinda djɛ nangha akambo wakoka ntoshimba djɛ nkotshɛ okoma wɔso. (Ɔrɔ. 7:23) Kana iso nkoka ndɛmba. (Mat. 26:43) Kɛkɔnge kekoka ntokotshɛ́ dj’iso ndongela lɔlɛmbɔ kana ekakasano enkina wekoka ntoshimba djɛ nkotshɛ okoma wɔso?
15. Ntsha ombopomana l’okakasano, kɛsɔ osakisolawɔnde ente opongokotshɛ okoma wɔko? Pakisola. (Yeembo 145:14)
15 Vungɔ ente mpomana l’okakasano apasakisola ente opangolonga. Bible ntepelaka ante tokoka mpomana l’ekakasano mbala la mbala. Koko, djɛnyɛ lonkina papoo ante iso nkoka nkalɔ mba wolo, pekapeka m’okotshɔ wɔ Yehova. (Wala Yeembo 145:14.) Wɔnanyɔ, w’etawɔ Philip, kanga sotepelaki má djiko, ntepelaka ante: “Mpilaká yimba lá mbala yɛ mopakotshɛ okoma wɔ moyawilelá. Koko, langilake yimba lá mbala yotateyɛmi ndjila welo lonkina djɛ nkotshɛ okoma wɔmi.” Davidɛ, kanga sotepelaki má djiko atepela ante: “Langonanghake la wolo djɛ nyɛna ekakasano wepomana la lemi ape etengo onkeka, koko etengo mbamba yɛ nyɛnyɛ Yehova ngandji k’efula k’owokami.” Ee, má nkindjɛ ndjila welo djɛ nkotshɛ okoma wɔko kaanga opomanɛ l’ekakasano, ɔngɛnyɛ Yehova ente wɛ nkɔpaka ndoosasangɛ. Ɔsɔngo osasa wɔ Yehova ndongoka winá w’ɔkɛnande onangha la wolo djɛ nkotshɛ okoma wɔko!
16. Olakanyelo wɔkɔnge w’okokaso mba ntsha tombopomana l’okakasano wotoshimba djɛ nkotshɛ okoma wɔso?
16 Waka olakanyelo má ekakasano wepomana la wɛ. Tɔnɔla djɛ ndjewa ikɔkɔ y’okakasano wɔkɔ, edjinge yawopola ente: ‘Kɛkɔnge k’okokami nangha dj’ipa okakasano wɔnɛ nkomela lemi lonkina?’ (Woo. 27:12) Koko, lá winá ɛmɔtshi, ekakasano w’epomana la wɛ nkoka nyɛnyɛ ente otayawilela okoma w’oyɛ l’akoka wa nkotshɛ etengo ngafɛnyɛka. Ntsha ɔmbɛna ente nkambo djɛsɔ nkoka ndjala nsɔsɔlɔ lá nkambo djɛko, tɔnɔla lonkina lá kɛnɛ kelendana l’okoma wɔko djɛ ndenda ntsha nsɔsɔlɔ wɛlama l’akoka wako.d Yehova apangɔkɔsa etengo etshumbe l’ɔtɛ wɔ ngopakotshisa okoma wopalekɔ l’akoka wako.—2 Kɔ. 8:12.
17. Lamo ngopakoke mvungɛ ekoma wɛ ngomboshiyɛka nkotshɛ?
17 Tovungɛke ekoma wɛ ngomboshiyɛka nkotshɛ. Bible ntepelaka ante ‘Ndjambe apalekɔ kanga ntshamba djɛ sii djɛ vungɛ olemo wɔnyo.’ (Heb. 6:10) Djɛkondeke tovungɛke kaanga ndambo daambi ekoma wɛ ngomboshiyɛka nkotshɛ. Ekoma wɛ ngomboshiyɛka nkotshɛ wɛsɔ, nkoka ndjala djokanelo djɛ wɔlɔ nya Yehova, nshimela anto ankina akambo walendana lande, kana ndongola batisimo. Etengo ngananghe efulelo la ngakotshɛ ekoma welá nyuma l’etsho wɛ ntondo, okoka nkotshɛ edjinge ekoma wɛ bango wɛ ngomboyawilela winá wɔsɔ.—Flp. 3:16.
Hona djɛ nyɛna wopo wɔ yehova okokotshɛnde (Lenda itenyi 18)
18. Kɛkɔnge k’oyɛso ladjɛ mvungɔka djɛ nangha winá w’ilaso welo djɛ nkotshɛ okoma ɔmɔtshi welá nyuma? (Lenda edjinge ntshango.)
18 Má okotshɔ wɔ Yehova, wɛ nkoka nkotshɛ okoma wɔko, etengo oluki ndoyalaka l’osasa ntsha ambokoma l’edjena kɛ ndotatshu. Koko vungɔ ente, aluki efula wangɔkɔpake nkɛnda nkɛndɔ. Wopo wɔk’ɔmɔ ndeke, nanghaka la wolo djɛ nyɛna wopo wɔ Yehova ɔkɔtshɔkɔlande, ko kɛsɔ kengokokotshɛ djɛ wɛ ndjala l’osasa winá wɔ ngotakindjɛ ndjila welo djɛ nkotshɛ okoma wɔko welá nyuma. (2 Kɔ. 4:7) Ntsha opapekwisa, ongowa ɛtshɔkɔ efula.—Nga. 6:9.
YEEMBO 126 Towadjɛke, totshikale ndi, toyale la wolo (lá Otetela)
a Mbala la mbala wangotokembɛke dj’iso ndawilela ekoma welá nyuma. Ko otepelaso mo ntsha tomboyawilela okoma ɔmɔtshi wɔ djonyi ko tolekɔ l’okakasano wɔ nkotshɛ? Djamba djɛnɛ ngɔtɔpɛyɛ alako watshikitanyi lá wopo w’okokaso nkotshɛ ekoma wɛso.
b DJƐ NDJOKA WƆLƆ: Okoma welá nyuma nkoka nsakisola ikakambo inkfumɔ yonanghɛ la wolo djɛ ndɔngɔsɔla kana djɛ ndjala l’akoka wa nkambela Yehova lá yopo yɛ wɔlɔ edjinge ndo sasangɛ. Ndjɔmbɔmba, wɛ nkoka ndawilela okoma wɔ ndjala la wekeka welá nyuma kana ndɔngɔsɔla nkambo mɔtshi dj’onanghakɛ djɛ ntɛmɔla Yehova, ndjɔmbɔmba, badji djɛ Bible, wekelo w’onto ndɔmɛlɛ, kana olemo w’ipoposanyɛ.
c Lenda onkanda Kondja wahɔ oma lo kalasa k’olimu wa Teokrasi, nki. 10-11, ite. 4.
d Djɛ ndjewa akambo ankina efula, lenda djamba: “Toyadje eyangɔ wele la ekanelo k’ɔlɔlɔ, ko tayonga l’ɔngɛnɔngɛnɔ,” l’Etange k’Olami kɛ Ngɔndɔ k’esambele 15, 2008.