Weepó w’antangi

Oyɛwɔmo, Losanghanyɛ 5:8 otepelande nde n’kambo dj’ewandji wɛ wana w’anto, kana Yehova?

Vɛrse djɛ djonyi n’tshɔ ntepelaka ante: ‘Ntsha ɔmbɛna ndjolo yɛ kanga ɔmvɔ edjinge etshitanelo kɛ akambo wa sii, la nsambo kɛ wɔlɔ lá distrikɛ djɛko, ntokamɔke djɛ n’kambo n’tshɔ. Ladjikɛnde owandji wel’adjiko alekɔ ndendama mé owandji onkina wowapemelisa edjinge anto ankina walekɔ l’adjiko djɛwɔ.’​—Los. 5:8.

L’ikanyi y’anto, etepela wɛsɔ ndendamaka l’ase lɛɛta walekɔ la lowandji lɔmɔtshi. Koko ntsha iso nkanela efula lá n’kambo n’tshɔ, tɔngɛna ente, vɛrse djɛnɛ n’tepela djoyi mɔtshi lá n’kambo djɛ Yehova. N’kambo n’tshɔ ntosukaka edjinge ntokeketshɛka.

Losanghanyɛ 5:8 ndendanaka l’ilɔndjɛ y’ɛnyɛ kanga ɔmvɔ ndjolo la yepananghe akambo la sii. Ilɔndjɛ yɛkɔ ladjɛ mvungɔka dj’onto ɔmɔtshi lolekɔ la mpipo k’oleká kana lolekɔ la lowandji laka lɛɛta ndoleka nde, olenda. Edjinge nkoka ndjala k’anto amɔtshi walekɔ la mpipo yel’adjiko efula. Ekfupa nde, lá ɛlɔndjɛlɔ kɛ wana w’anto nkoka ndjala ko ewandji enkfumɔ wɛsɔ wapakambe la sii edjinge anto ngo anto wɛna ndjolo ngo m’ɔtɛ wɔ yopalɔndjɛ wɔlɔ lá topo efula.

Koko, kaanga wina wɛnaso etengo tombosamba n’kongi, tokoka mba osukɔ má ndjewa ente Yehova ‘alenda ewandji we ládjiko’ wɛlɔndjɛ enkfumi wɛ wana w’anto. Iso nkoka ndɔmba Ndjambe okotshɔ edjinge ndotshikela edjito wɛso. (Yee. 55:22; Flp. 4:6, 7) Iso ndjewaka ente ‘wiso wa Yehova ndendaka looko djɛ nyɛnyɛ nkfulu kɛnde lá wapɔ wɔ wanɛ wɛkɛ eloko wɛwɔ enkfumɔ teende.’​—2 Ɛk. 16:9.

Djɛko ndeke, Losanghanyɛ 5:8 ntomvungolaka wopo wolekɔ andja w’ɔsɛnaso edjinge angoyalaka ntshi tshɛ onto ɔmɔtshi lolekɔ la lowandji loleka. Ekete k’eleka djonyi nde, vɛrse kɛnɛ nkoka ntokotshɛ djɛ ndjewa ente Yehova ndeke la lowandji loleká, ee, lowandji lápemela tshɛ. Nde alɔndjɛ l’etsho wɛnɛ lá lotshimbo lɔ Wɔnande Yeso Kristo, lolekɔ Nkfumi kɛ Onkfumi. Kanga-Nkfulu-Inkfumɔ ashishima n’kete nkfumɔ, nde alekɔ sii lá wayi ankfumɔ, edjinge Wɔnande alekɔ ngo wop’ɔkɔ.