Onkanda wɔ Iloyi yɛ lɔndjɛ

Wananyɔ l’ankaana yɛ ngandji:

Ngandji k’okaso Ndjambe la anto ntotshindaka djɛ ‘ntshɔ edjinge nkfumba anto wa ewila enkfumɔ ambeki, [la] ndabatizɛ.’ (Mat. 28:​19, 20; Mar. 12:​28-31) Ngandji kelekɔ la nkfulu. Kekoka mvunda eloko w’anto ankfumɔ ‘walekɔ́ entshupa djɛ ndjawola akambo wa nsɔsɔlɔ watɔlá tá lowiko l’etshinda.’—Ele. 13:48.

L’etsho wemboheta, toyapɛyɛki efula djɛ nkota akambo wa ntepela l’ɔtɛ la djɛ ntshikela anto enkanda. Winá wɔsɔ, iso ladjɛ nangha la wolo djɛ ndɔngɔsɔla akoka waso wa nsawola l’anto. Iso nkɔpaka nyɛnyɛ anto ngandji má nsawola lawɔ akambo w’ilawɔ yimba la w’oyapɛyɛwɔ efula. Kɛsɔ nsakisolaka ente iso ladjɛ ndjekela l’onto onkfumɔ la ndjala la nkɔmɛ djɛ nsipisoyɛ okiyano la nkambo dj’ɔkɔpande. Inkankanda yɛnɛ yongotokotshɛ́ djɛ nangha nghɔsɔ ngete mo?

Inkankanda yɛnɛ ilekɔ la wekelo 12 welekɔ́ la wekeka w’oyɛso la djonyi djɛ nkona djɛ nkɔpa anto la ndakfumba ambeki. Wekelo onkfumɔ wɔsamaka má ɔkɔndɔ ɔmɔtshi wɔ Bible wɔ Yeso kana nsakodji kɛmɔtshi k’ɛtɛndɔ kɛ ntondo ndɛnyɛ djekeka kɔɔ l’olomi w’ipoposanyɛ. Okoma wɔnde nde, ape wɔ nkota akambo wa ntepela l’ɔtɛ, koko wɔ mpona mbamba yɛ nyɛnyɛ anto ngandji. Kaanga djekeka nkfumɔ oyɛwɔ djonyi lá topo tonkfumɔ t’olemo w’ipoposanyɛ, tongoshishima wopo wɔ wekeka amɔtshi oyɛwɔ djonyi efula, pekapeka winá w’ɔkɔpaso mbanga ntshawo l’anto, w’okalɔso ntawembola, kana w’ekaso Bible lawɔ.

Winá w’ekanyo wekelo onkfumɔ, nyɔtɔnɔlɛ lá wopo w’okokanyo nyɛnyɛ djekeka djɛkɔ winá w’otepelanyo l’anto l’idjena y’intasɛnyo. Nyonanghe la wolo djɛ mfudjɛ ngandji kɛnyo te Yehova la te anto. Ngandji keleká topo tɔ mayɛlɛ tonkfumɔ kɛsɔ, kengonyokotshɛ́ djɛ nkotshɛ okoma wɔnyo wɔ nkfumba ambeki.

Tolekɔ l’osasa ndaka pɔnda la mpeyi k’okotshɛso kɛ nkamba mpɛka la mpɛka la nyo. (Sef. 3:9) Yehova anyosakole lombombe winá w’okindjɛnyo nkɔpa anto la ndakfumba ambeki!