Wa kabidi wa Samuele
11 Ku mbangilo kua kipua, mu mafuku aendaa ba nfumu ku ngoshi, Davide batumine Yoabe na bafubi baye, na kiluilo kioso kia ngoshi kia bena Isalele buabadia kukabutula bena Amone, na abo nkuifunyisha Raba, anka Davide bashadile mu Yelusalema.
2 Dingi efuku ku kiolua, Davide babukile ku lusala luaye, na aye nkubanga kuifunya kunundu kua musaka* waye wa nshibo ya bufumu. Pabaadi kuakua kunundu, bamuene muana mukashi etumpu mema, yawa muana mukashi baadi buwa bukile. 3 Davide batumine muntu bua’shi akepushe bua kuuka yawa muana mukashi. Yawa muntu balukile amulungula’shi: “Nyi Bate-sheba muana a Eliame, mukashi a Uriya muina Ite.” 4 Paapa Davide batumine bantu buabadia kukamuata. Biabia Bate-sheba batuelele kuadi, Davide nkumulala. (Uno muanda ubakitshikile pabaadi Bate-sheba etoosha ku butete* buaye.) Kunyima kua biabia, balukile kuaye.
5 Bate-sheba bapetele eyimi, na aye nkutuma mukandu kui Davide’shi: “Ne na eyimi.” 6 Paapa Davide batumiine Yoabe mukandu’shi: “Tuma Uriya muina Ite kuno kuandi.” Yoabe nkutuma Uriya kui Davide. 7 Pabaadi Uriya mufikie kuadi, Davide bamuipuishe bibaadi Yoabe, bibaadi bisaka bia basalayi, na bibaadi ngoshi ayikitshika. 8 Paapa Davide balunguile Uriya’shi: “Enda kobe okayikishe.”* Pabatuukile Uriya mu nshibo ya nfumu, babamulondele na kia buntu* kia kalolo kia kui nfumu. 9 Anka Uriya baladile ku kituelelo kia nshibo ya nfumu na bangi bafubi boso ba nfumuaye, tabalukiile kuaye ku nshibo nya. 10 Biabia babalunguile Davide’shi: “Uriya ta muende kuaye nya.” Paapa Davide nkuipusha Uriya’shi: “Bokatuka ku luendo lula, buakinyi tue muende kobe?” 11 Uriya nkualula Davide’shi: “Mushete, na bena Isalele na bena Yunda, mbashale mu tushibo tua mapema, nfumuami Yoabe na bafubi ba nfumuami mbashale mu mapia. Biabia buakinyi ne kuenda kuande bua kudia na kutoma na kulala mukashi ande? Bu biodi binyibinyi na muwa, netshipi’shi, nta kukita muanda wi biabia nya!”
12 Paapa Davide balunguile Uriya’shi: “Shala pano dingi lelo uno, maloba nankutadiila wende.” Biabia Uriya bashalele mu Yelusalema diadia efuku, n’efuku dibalondele. 13 Kunyima Davide bamuitanyishe bua’shi afikie mu kudia na kutoma naye, n’aye nkumukoluesha malofu. Kadi ku kiolua, bayile mu kulala pamune na bafubi ba nfumuaye, anka tabayile mu kulala kuaye ku nshibo nya. 14 Ku namashika, Davide bafundiile Yoabe mukanda, aye nkuiutuma na Uriya. 15 Mu wawa mukanda baadi mufunde’shi: “Tuula Uriya mu mulongo wa kumpala, mbalo i ngoshi i bukopo. Akupu walukie kunyima, omulekie bua’shi bamuipee.”
16 Yoabe baadi auku kibundi kalolo, na batuudile Uriya mu mbalo ibaadi auku’shi ibaadi bilobo bia ngoshi bia beshikuanyi. 17 Pabaadi bantu ba mu kibundi batukie bua kulua na Yoabe, bangi ba ku bafubi ba Davide babafuile, na Uriya muina Ite baadi mu baba bantu. 18 Paapa Yoabe nkutumina Davide mukandu, bua kumulungula mianda yoso ibaadi ikitshikie ku ngoshi. 19 Balunguile muntu bayile na mukandu’shi: “P’opudisha kulungula nfumu mianda yoso ikitshikie ku ngoshi, 20 nfumu mmulombene kukuata nsungu, na akulungula’shi: ‘Buakinyi nui besesele pepi na kibundi biabia bua kulua ngoshi? T’anukanga’shi babaadia kuinuasa mikietue dia kunundu kua kimano? 21 Nnanyi bayipayile Abimeleke muana a Yerubeshete? Ta mmuana mukashi a ku Tebese bamuashile ebue dia mpelua kukatukila kunundu kua kimano su? Biabia buakinyi nuikeele beseesele pepi na kimano? Paapa omulungule’shi: ‘Mufubi oobe Uriya muina Ite mmufue n’aye namu.’”
22 Yawa muntu bayile, aye nkulungula Davide mianda yoso ibaadi Yoabe mumutume bua kumulungula. 23 Akupu, yawa muntu nkulungula Davide’shi: “Bantu babo betukidile bukome, na batuukile bua kulua netu mu mapia. Kadi tuibabingile mpa na ku kituelelo kia kiibi kia kibundi. 24 Beedi ba mikietue abaasanga bafubi bobe mikietue kukatukila kunundu kua kimano, na bangi bafubi bobe mbafue, mpa na mufubi oobe Uriya muina Ite mmufue namu.” 25 Paapa Davide nkulungula yawa muntu bafikile na mukandu’shi: “Enda okalungule Yoabe bino: ‘Uno muanda taukukalakashanga nya, muanda lupete lua ngoshi aluipaa muntu oso kushii kusangula. Nyingishayi ngoshi bua’shi nunyengie kiakia kibundi.’ Akupu onyingishe Yoabe.”
26 Pabaadi mukashi a Uriya mupushe’shi mulume aaye bafu, babangile kudila mulume aaye. 27 Musango umune pabapuile kipungo kia maalo, Davide batumine bantu buabadia kukaata Bate-sheba, na abo nkufika naye kuaye ku nshibo, aye nkufika mukashi aaye, n’aye nkumutandila muana mulume. Kadi biabia bibaadi Davide mukite bibaadi bibubi ngofu ku meso kua Yehowa.