Wa kabidi wa Samuele
16 Pabaadi Davide mukile kapela pa nsongo a muengie, basangene Ziba mufubi a Mefiboshete amutengiela na mpunda ibidi ibaadi isemune mikate 200, tu mikate 100 tua tukuba tua nfinyo tuume na tu mikate 100 tukitshibue na tumuma* tua mu kipungo kia kibobo ki bukopo, n’elondo dikata dia nfinyo. 2 Paapa nfumu nkuipusha Ziba’shi: “Buakinyi bofiki na bino bintu?” Ziba nkumualula’shi: “Nafiki na mpunda bua’shi ba mu nshibo ya nfumu bakaamine, natuala mikate na tumuma tua mu kipungo kia kibobo ki bukopo, bua’shi ba nsongualume badie, nfinyo bua’shi baba abakooko mu kabaaka batome.” 3 Paapa nfumu nkumuipusha’shi: “A muana* a nfumu oobe e kunyi?” Ziba namu nkulungula nfumu’shi: “Bashala mu Yelusalema, muanda bakula’shi: ‘Lelo uno, nshibo ya Isalele ayingaluisha bufumu bua nshami.’” 4 Akupu nfumu nkulungula Ziba’shi: “Talanga, bintu bioso bikeele bia Mefiboshete tabidi biobe.” Ziba nkumualula’shi: “Nayinama kumpala kobe. Nkuminyibue namu ku meso kobe muanana nfumuami.”
5 Pabaadi nfumu Davide mufikie ku Bakurime, ungi muntu a mu kifuko kia Saule abetanyina bu Shimeyi muana a Gera, batuukile ende na kuela milua na eyi di bukopo pabaadi efubuila kui Davide. 6 Baadi aasa Davide mabue, na bafubi boso ba Nfumu Davide, pamune na bantu boso, na bilobo bia ngoshi bibaadi ku mboko yaye ibalume na ku mboko yaye ibakashi. 7 Shimeyi baadi ende na kuela nfumu milua’shi: “Katuka, katuka akua, obe muntu ayipayishenaa! Muntu a bisumanga’be! 8 Binobino Yehowa bakunyoko bua ebaasa dia mase oso oboodi mupongoole mu nshibo ya Saule, yawa odi muate mbalo y’okuete kukunkusha bu nfumu, kadi Yehowa batuulu bufumu mu maasa mua muana oobe Absalome. Binobino malua abakukuata, muanda we na ebaasa dia mase!”
9 Akupu, Abishai muana a Seruya nkulungula nfumu’shi: “Buakinyi uno mbua mufue eele nfumuami milua? Ntadiile namu nyende kuadi mmutshibe mutue.” 10 Kadi nfumu nkumulungula’shi: “A mmuanda kinyi wanunkimbila anue bana ba Seruya? Mutadiileyi angiele milua, su Yehowa nyi mumulungule’shi: ‘Ela Davide milua!’ Biabia nnanyi a kumulungula’shi: ‘Buakinyi okitshi biabia?’” 11 Akupu Davide nkulungula Abishai na bafubi baye boso’shi: “Su muana ande kapumba, yawa andi mutande akimbi muwa wande, tui kuamba naminyi bua uno muina Benyamine? Mutadileyi angiele milua, muanda Yehowa nyi mumulungule bua kuibikita! 12 Pangi Yehowa amono malua ande, na Yehowa ankitshina bi buwa pamutue pa milua yabangiele lelo uno.” 13 Biabia Davide na bantu baye babatungunukile na luendo, Shimeyi namu baadi atambuka ku bukunkula bua muengie mu lupese luabo, ende na kuela milua na eyi di bukopo, ebaasanga mabue na lufuufi lui bungi.
14 Nfudiilo a bioso, nfumu na bantu boso babaadi naye babakafikile mbakookie ku mbalo ibaabadi abende, akupu, babashalele bua kuikisha.
15 Mu yaaya nsaa, Absalome na bantu boso ba mu Isalele babaadi abamukuatshishena babafikile mu Yelusalema, na Ahitofele baadi nabo. 16 Nsaa ibaadi Ushayi muina Arke baadi kuuku a Davide mufikie kui Absalome, bamulunguile’shi: “Nfumu ekale na muwa bua loso! Nfumu ekale na muwa bua loso!” 17 Paapa Absalome nkuipusha Ushayi’shi: “Bino bibokitshi nyi kulesha kifulo kia lulamato kui kuuku oobe su? Buakinyi tue muende na kuuku oobe?” 18 Paapa Ushayi nkualula Absalome’shi: “Nya, ne ku lupese lua muntu abadi basangule kui Yehowa, abadi basangule kui uno muilo na kui bantu boso ba mu Isalele. Yawa muntu nyi anshala naye. 19 Dingi neakuila’shi nnanyi anfubila? Nta muana aaye su? Biabia nka bu biangikalanga mufubile nshobe, nakufubila namu.”
20 Paapa Absalome nkulungula Ahitofele’shi: “Mpe namu elango, tukite kinyi binobino?” 21 Ahitofele nkulungula Absalome’shi: “Lala makupi a nshobe aadi mulekie bua kulama nshibo. Apakapusha bena Isalele boso’shi bueyikasha obe nabene kintu ki butete kui nshobe, baba abakukuatshishena abakanyingi.” 22 Biabia abo nkushimikila Absalome kashibo k’epema kunundu kua nshibo, na Absalome nkubanga kulala makupi a nshaye mu meso mua bena Isalele boso.
23 Mu aa mafuku, babaadi abamono elango aditusha Ahitofele nka bu eyi dia Efile Mukulu a binyibinyi. Biabia nyi bibaabadi abanemeka malango oso a Ahitofele, biabikala kui Davide sunga Absalome.